¿Ken uelis nechpaleuis tlen kijtoua Biblia? Tlamachtil 2: Ma mitspakti ijkuak tiktlajtoltis Biblia

Se telpochtli tlen itoka Will okijto: “Ualeua techtlatsiuitia tiktlajtoltiskej Biblia. Pero ijkon techpanos tla amo tikmatij ken tiktlajtoltiskej”.

¿Mitspaktiskia tikmatis tlen uelis tikchiuas uan ijkon mitspaktis tiktlajtoltis Biblia? Nin tlamachtil mitspaleuis.

• Ximokuayejyeko tikita tlen tiktlajtoltijtok itech Biblia

• Xitlatemo

• Tlen mokuayejyekouaj sekimej telpochmej uan ichpochmej

Ximokuayejyeko tikita tlen tiktlajtoltijtok itech Biblia

Ijkin uelis tikchiuas:

1. Xikpejpena itlaj tlen tikneki timomachtis. Uelis tikpejpenas itlaj tlen Biblia kijtoua opanok, tlen kijtoua se Evangelio noso audiodramas tlen katej itech jw.org.

2. Xiktlajtolti tlen otikpejpenki. Uelis tiktlajtoltis san te moselti, iuan mofamilia noso inmiuan moyolikniuan. Ikaj uelis kitlajtoltis tlen panotok uan oksekimej ma kitlajtoltikan tlen kijtouaj akinmej ompa nesij.

3. Uelis tikchiuas tlen nikan kijtoua:

   • Uelis tikchijchiuas se dibujo kanin mota tlen opanotia uan xikijkuilo tlen kijtosneki.

   • Xikijkuilo tlen opanok. Ijkuak tiktlajtoltis tlen okichi se itekipanojka toTajtsin Dios tlen nochipa okitlakamatki, xikijkuilo tlen okichi, ken okiteititi kuali okipiaya inemilis uan ken okiteochi toTajtsin Dios.

   • Ximokuayejyeko tlen uelis “tikintlajtlanis” akinmej ompa okatkaj.

   • Tla ikaj okichi itlaj tlen amo kuali, ximokuayejyeko tlen uelis kipejpenaskia. Ximokuayejyeko tlen okipanok Pedro, ijkuak okijto amo okixmatiaya Jesús (Marcos 14:66-72). ¿Tlen tikijtoskia omonekiaya kichiuas Pedro?

   • Tla tikneki uelis tikijkuilos tlen kijtoua Biblia ken te mitspanoskia, noijki xikijkuilo tlen mitsmachtia tlen opanok (Romanos 15:4).

     

Xitlatemo

Ximokuayejyeko tlen okachi mitsmachtia tlen tiktlajtoltia, tla okachi timomachtis tikajsikamatis okseki tlamantli. Ualeua san se tlajtoli uelis techmachtis miak tlamantli.

Xikita tlen okachi tikajsikamati ijkuak tiktlajtoltia Mateo 28:7 uan satepan xikita tlen kijtoua Marcos 16:7.

• ¿Tleka Marcos okijkuilo Jesús okinmonextiliskia idiscípulos uan noijki Pedro?

• Nin mitspaleuis xikmati: Marcos amo okitak tlen opanok, san okitlapoui Pedro.

• ¿Tlen techmachtia tlen opanok? ¿Tleka Pedro omoyolseui ijkuak okimatki Jesús oksepa okinekiaya kitas? (Marcos 14:66-72). ¿Ken okiteititi Jesús melauak okitlasojtlaya Pedro? ¿Ken uelis tikchiuas ken Jesús uan ijkon tikteititis tikintlasojtla akinmej inmiuan timouika?

Tla ijkuak tiktlajtoltia Biblia timokuayejyekoua ompa tika uan okachi timomachtia, okachi mitspaktis tiktlajtoltis Biblia.