Misioneros tetlapouiaj hasta kanin okachi uejka

Jesús okinmilui imachtijkauan: “Nontetlapowitiweh notlajtol [...] itech nochi n tlaltíkpaktli” (Hechos 1:8). TiiTlaixpantijkauan Jehová timochijchikauaj tikchiuaskej tlen otlanauati Jesús. Pero ok techpoloua titetlapouiskej itech seki altepemej kanin sapanoua miakej chantij. Noijki itech seki altepemej amo miakej iTlaixpantijkauan Jehová, ik non, ok techpoloua titetlapouiskej (Mateo 9:37, 38). ¿Tlen tikchijtokej para okachi miakej tikintlapouiskej?

Para tikchiuaskej tlen okijto Jesús, tokniuan Akinmej kiyekanaj Tetlapouilistli uan kipaleuiaj Cuerpo Gobernante, kintitlanij misioneros kanin okachi moneki tlapaleuiskej. Axkan katej 3,090 misioneros uan tlapaleuijtokej itech nochi tlaltikpak.a Miakej misioneros okiselijkej Tlamachtil para matetlapouikan Tekiuajkayotl noso okiselijkej okse tlamachtil. Yejuan okikajkej inkalijtik uan ochantitoj itech okse altepetl. Misioneros yomomachtijkej miak tlamantli, ik non, yotlapaleuijkej mamotetlapoui uan noijki yokinpaleuijkej oksekimej ijkon makichiuakan.

Tikinpaleuiaj misioneros uan yejuan kinpaleuiaj oksekimej

Itech kalmej Betel sekimej tokniuan kitaj ken motetlapouis uan mopaleuiaj inmiuan tokniuan tlen tlayekanaj ompa Betel para kinpaleuiskej misioneros. Kintemoliaj kanin chantiskej, noijki kinmaluiaj para amo mamokokan uan kinmakaj tepitsin tomin para makipiakan tlen moneki. Itech xiuitl 2020 iTlaixpantijkauan Jehová okitlaxtlajkej kanaj 27 millones de dólares uan ijkon okinmakakej misioneros tlen moneki. Ijkon yejuan ueli tetlapouiaj, kinyolchikauaj tokniuan uan amo kintekipachoua tlen ika mopanoltiskej.

¿Ken tlapaleuiaj misioneros? Frank Madsen tlayekana Betel ompa Malaui uan okijto: “Misioneros yolchikauakej uan yotlapaleuijkej mamotetlapoui kanin oui se ajsiti uan kanin tlajtouaj okse tlajtoli. Ijkuak kinmitaj mochijchikauaj momachtiaj okse tlajtoli kinyolchikauaj oksekimej. Noijki kinpaleuiaj telpochmej uan ichpochmej mamochiuakan precursores. Tiktlasojkamatiliaj Jehová porque techpaleuiaj misioneros”.

Okse tokni tlen tlayekana itech okse kali Betel okijto: “Misioneros kiteititiaj tiiTlaixpantijkauan Jehová maski san kanin toaltepe melauak timotlasojtlaj uan san sekan titlapaleuiaj. Noijki akinmej amo momachtiaj kitaj maski tlatlamantli toaltepe melauak timotlasojtlaj. Tlen timomachtiaj itech Biblia techpaleuia tinochtin matimotlasojtlakan”.

¿Ken kinpaleuiaj misioneros akinmej tetlapouiaj? Paulo tlen chanti Timor Oriental kitlasojkamati tekitl tlen kichiuaj misioneros kanin ye monechikoua. Ye okijto: “Maski kanin tichantij sapanoua tlatotonia yejuan amo mosotlauaj. Nochipa touan monechikouaj para titetlapouitiuij uan kinchiuaj revisitas hasta tlajko tonal maski sapanoua tlatotonia. Noijki tetlapouiaj tiotlak uan timiakej yotechpaleuijkej matikixmatikan Jehová. Melauak yolpakij ijkuak kitekichiuiliaj Jehová uan non techpaleuia matiktekichiuilikan Jehová ika nochi toyolo”.

Se precursora tlen itoka Ketti uan chanti Malaui okijto se tokni iuan isiua tlen okatkaj misioneros sapanoua okipaleuijkej iuan ifamilia. Ye okijto: “Ijkuak okintitlankej kanin onimonechikouaya san ne oniktekichiuiliaya Jehová, tokniuan sapanoua onechpaleuijkej uan opejkej mouikaj iuan nofamilia. Okinmachtijkej nokoneuan tla kitekichiuiliskiaj Jehová, sapanoua yolpakiskiaj. Axkan eyi nochpochuan precursoras uan nonamik yopejki monechikoua”.

¿Kanin kisa tomin tlen ika tikinpaleuiaj misioneros? Non tomin kitemakaj oksekimej ika nochi inyolo para mamotetlapoui. Miakej kitemakaj itech donate.jw.org. Namechtlasojkamatiliaj porque namechpaktia nantlapaleuiskej.