Viernes 3 de octubre
Xikchiuakan tlen kinpaleuis oksekimej uan amo xikchiuakan san tlen namejuan namechpaleuis (Filip. 2:4).
ToTajtsin Dios okiyekanki apóstol Pablo makinmilui tokniuan itech achto siglo ken kinpaleuiskej oksekimej. ¿Ken uelis ijkon tikchiuaskej ijkuak timonechikouaj? Matikilnamikikan oksekimej noijki kinekij tlanankiliskej. Matikijtokan ijkuak timotlapouia iuan moyolikniuan amo san te titlajtoua porque tikneki nochtin kuali mamomachilikan. Ijkon moneki tikchiuaskej ijkuak timonechikouaj. Tiknekij nochtin tokniuan matlanankilikan. Ijkon timoyolchikauaj ijkuak tikinmitaj tokniuan kijtouaj tlen kineltokaj (1 Cor. 10:24). Tokniuan noijki uelis tlanankiliskej tla amo miak tlamantli tikijtouaj ijkuak titlanankiliaj. Noijki amo matikijtokan nochi tlen kijtoua párrafo porque tokniuan ayakmo kimatiskej tlen kijtoskej tla ijkon tikchiuaskej. w23.04 22, 23 párrs. 11-13
Sábado 4 de octubre
Nochi nikchiua ipatka kuali tlajtoli uan ijkon nikinmatiltia oksekimej (1 Cor. 9:23).
Matimochijchikauakan titetlapouiskej ijkon tikinpaleuiskej oksekimej. Ijkuak titetlapouiaj moneki titeajsikamatiskej. Porque tikintlapouiaj akinmej tlaneltokaj, akinmej uitsej itech oksekimej altepemej uan noijki tlatlamantli mokuayejyekouaj. ¿Tleka miak ipati matikchiuakan ken apóstol Pablo? Porque ye oteajsikamatiaya ikinon Jesús okilui ‘makinmatiltiti itlajtol akimeh amo judíojteh’ (Rom. 11:13). Ye nochtin okintlapoui, judíos, griegos, ixtlamatkej, akinmej otlatokayaj uan tekiuajkej. Ye okijto: “Ne nikinmoiknitia”. Ijkon Pablo okintlapoui miakej (1 Cor. 9:19-22). Ijkuak okintlapouiaya okitaya kanin oualayaj uan tlen okineltokayaj. Non techmachtia okachi kuali tikintlapouiskej oksekimej tla tikinmajsikamatij uan tikitaj ken uelis tikinpaleuiskej. w23.07 23 párrs. 11, 12
Domingo 5 de octubre
Akin kitekichiuilia toTeko amo moneki mokualanis, nochtin makinyeknotsa (2 Tim. 2:24).
Akinmej yolyamankej noijki yolchikauakej. Moneki timochijchikauaskej tiyetoskej tiyolyamankej ijkuak itlaj tikixnamikij. Tiyetoskej tiyolyamankej poui itech espíritu santo (Gál. 5:22, 23). Ika griego tlajtoli “yolyamanki” ualeua okitekitiltiayaj ijkuak se caballo yokitekauiliaya ipan matlejkokan. Non kijtosneki caballo achto amo okitekauiliaya ipan matlejkokan. Satepan yokitekauiliaya pero non amo kijtosneki ayakmo okatka chikauak. ¿Tejuan ken uelis tiyetoskej tiyolyamankej uan noijki tiyetoskej tiyolchikauakej? Moneki tikiluiskej toTajtsin Dios matechmaka iespíritu santo porque san tejuan toselti amo uelis itlaj tikchiuaskej. Pero uelis tiyetoskej tiyolyamankej porque miakej ijkon kichiuaj. ITlaixpantijkauan Jehová kiteititiaj katej yolyamankej ijkuak oksekimej kinekij mokualaniskej. Ikinon miakej motlajtlachialtiaj ijkuak kitaj tokniuan yolyamankej (2 Tim. 2:24, 25). w23.09 15 párr. 3