Octubre

¿Tikita oui titetlakamatis? Ijkon okipanok David. Ikinon okitlatlaujti toTajtsin Dios: “Techpaleui manimitstlakamati” (Sal. 51:12). Maski David okitlasojtlaya Jehová ualeua okitaya oui kitlakamatis uan tejuan noijki ijkon techpanoua. ¿Tleka? Achto porque titlajtlakolejkej. Noijki porque Satanás kineki techkajkayauas para amo matitetlakamatikan ijkon ken ye okichi (2 Cor. 11:3). Noijki porque kanin tichantij amo tetlakamatij uan non ye “espíritu tlen kinnauatia akinmej amo tetlakamatij” (Efes. 2:2). Ikinon tla tiknekij tiktlakamatiskej Jehová uan akinmej ye okintlali matlanauatikan moneki timochijchikauaskej titetlakamatiskej maski titlajtlakolejkej. Noijki amo matikkauilikan matechkajkayaua Satanás nion tlen onka itech nin tlaltikpak. w23.10 6 párr. 1

¿Tlen techmachtia milagro tlen okichi Jesús? Techmachtia moneki tiyetoskej tiyolyamankej. Jesús amo omoueyineki ijkuak atl okikopki vino uan amo keman okijtojtinemiaya tlen okichiuaya. Ye okatka yolyamanki, okitlasojkamatiliaya iTajtsin uan okijtouaya ye okipaleuiaya (Juan 5:​19, 30; 8:28). Tla tikchiuaskej ken Jesús, tiyetoskej tiyolyamankej uan amo san tikijtojtinemiskej tlen tikchiuaj. Matikilnamiktokan Jehová techkauilia matiktekichiuilikan, ikinon amo matimoueyinekikan (Jer. 9:​23, 24). San Jehová matikueyichiuakan porque amitlaj tikchiuaskej tla ye amo techpaleuiskia (1 Cor. 1:​26-31). Akin yolyamanki amo kineki nochtin makimatikan ken kinpaleuia oksekimej. Ye ijkon kichiua porque kimati Jehová kita tlen kichiua uan kipatioita (noijki xikita Mateo 6:​2-4; Heb. 13:16). Jehová melauak yolpaki ijkuak tiknekij tiyetoskej tiyolyamankej ijkon ken Jesús (1 Ped. 5:6). w23.04 4 párr. 9; 5 párrs. 11, 12

ToTajtsin Dios okiyekanki apóstol Pablo makinmilui tokniuan itech achto siglo ken kinpaleuiskej oksekimej. ¿Ken uelis ijkon tikchiuaskej ijkuak timonechikouaj? Matikilnamikikan oksekimej noijki kinekij tlanankiliskej. Matikijtokan ijkuak timotlapouia iuan moyolikniuan amo san te titlajtoua porque tikneki nochtin kuali mamomachilikan. Ijkon moneki tikchiuaskej ijkuak timonechikouaj. Tiknekij nochtin tokniuan matlanankilikan. Ijkon timoyolchikauaj ijkuak tikinmitaj tokniuan kijtouaj tlen kineltokaj (1 Cor. 10:24). Tokniuan noijki uelis tlanankiliskej tla amo miak tlamantli tikijtouaj ijkuak titlanankiliaj. Noijki amo matikijtokan nochi tlen kijtoua párrafo porque tokniuan ayakmo kimatiskej tlen kijtoskej tla ijkon tikchiuaskej. w23.04 22, 23 párrs. 11-13

Matimochijchikauakan titetlapouiskej ijkon tikinpaleuiskej oksekimej. Ijkuak titetlapouiaj moneki titeajsikamatiskej. Porque tikintlapouiaj akinmej tlaneltokaj, akinmej uitsej itech oksekimej altepemej uan noijki tlatlamantli mokuayejyekouaj. ¿Tleka miak ipati matikchiuakan ken apóstol Pablo? Porque ye oteajsikamatiaya ikinon Jesús okilui ‘makinmatiltiti itlajtol akimeh amo judíojteh’ (Rom. 11:13). Ye nochtin okintlapoui, judíos, griegos, ixtlamatkej, akinmej otlatokayaj uan tekiuajkej. Ye okijto: “Ne nikinmoiknitia”. Ijkon Pablo okintlapoui miakej (1 Cor. 9:​19-22). Ijkuak okintlapouiaya okitaya kanin oualayaj uan tlen okineltokayaj. Non techmachtia okachi kuali tikintlapouiskej oksekimej tla tikinmajsikamatij uan tikitaj ken uelis tikinpaleuiskej. w23.07 23 párrs. 11, 12

Akinmej yolyamankej noijki yolchikauakej. Moneki timochijchikauaskej tiyetoskej tiyolyamankej ijkuak itlaj tikixnamikij. Tiyetoskej tiyolyamankej poui itech espíritu santo (Gál. 5:​22, 23). Ika griego tlajtoli “yolyamanki” ualeua okitekitiltiayaj ijkuak se caballo yokitekauiliaya ipan matlejkokan. Non kijtosneki caballo achto amo okitekauiliaya ipan matlejkokan. Satepan yokitekauiliaya pero non amo kijtosneki ayakmo okatka chikauak. ¿Tejuan ken uelis tiyetoskej tiyolyamankej uan noijki tiyetoskej tiyolchikauakej? Moneki tikiluiskej toTajtsin Dios matechmaka iespíritu santo porque san tejuan toselti amo uelis itlaj tikchiuaskej. Pero uelis tiyetoskej tiyolyamankej porque miakej ijkon kichiuaj. ITlaixpantijkauan Jehová kiteititiaj katej yolyamankej ijkuak oksekimej kinekij mokualaniskej. Ikinon miakej motlajtlachialtiaj ijkuak kitaj tokniuan yolyamankej (2 Tim. 2:​24, 25). w23.09 15 párr. 3

Ijkuak apóstol Juan okitak itlaj tetlajtlachialti, okinmitak 24 tlayekankej okiueyichiuayaj Jehová ompa iluikak. Yejuan okiueyichiuayaj toTajtsin Dios uan okijtouayaj ‘sanwel Yejwatsi iaxka n weyílistli, mawistílistli iwa n weletílistli’ (Apoc. 4:​10, 11). Ángeles noijki kimatij san Jehová kinamiki tikueyichiuaskej uan tiktlakaitaskej. Yejuan kuali kixmatij porque katej iuan ompa iluikak. Yejuan kitaj ken iyelis ijkuak kitaj tlen kichiua uan non kinyolinia makiueyichiuakan (Job 38:​4-7). Tejuan noijki moneki tikueyichiuaskej Jehová ijkuak iuan timotlapouiaj. Ijkon tikchiuaj ijkuak tikiluiaj tlen ye kichiua uan tlen okachi techtlajtlachialtia. Ijkuak tiktlajtoltiaj Biblia uan timomachtiaj, timochijchikauaj okachi tikixmatiskej Jehová (Job 37:23; Rom. 11:33). Satepan matikiluikan tlen kuali kichiua uan techpaktia. Noijki uelis tikueyichiuaskej Jehová ijkuak techpaleuia noso ijkuak kinpaleuia nochtin tokniuan (1 Sam. 2:​1, 2). w23.05 3, 4 párrs. 6, 7

Itech 1919, ialtepe Jehová ayakmo opouiaya itech Ueyi Babilonia tlen kineskayotia nochtin religiones tlen tlakajkayauaj. Noijki itech non xiuitl opejki tlapaleuia “tlakeuali yolmelajki uan ixtlamatki”. Ijkon akinmej yolkualmej yiuelis nejnemiskiaj itech “Ojtli tlen Santo” (Mat. 24:​45-47; Is. 35:8). Miakej otlapaleuijkej kiyektlaliskej ojtli. Ikinon akinmej otipejkej tinejnemij itech nin ojtli okachi tikixmatij Jehová uan tikmatij tlen kichiuas satepan (Prov. 4:18). Noijki otikpatlakej tlen otikchiuayaj para tikyolpaktiskej Jehová. Pero ye amo okichiaya san niman matikpatlakan tlen otikchiuayaj. Jehová yolik techchipajtok. Matimokuayejyekokan ijkuak tinochtin tikyolpaktiskej Jehová ken ye kineki. Moneki nochipa momaluis se ojtli para kuali mayeto. Desde 1919 hasta axkan kimaluijtokej “Ojtli tlen Santo” uan ijkon miakej uelis kisaskej itech Ueyi Babilonia. w23.05 17 párr. 15; 19 párr. 16

Sejse tokniuan tlen pouij itech Cuerpo Gobernante kinmachtiaj oksekimej tokniuan tlen uelis kinpaleuiskej. Nonmej tokniuan yikuali kichijtokej inteki. Ikinon tikmatij yejuan kuali kinyekanaskej ichkauan Cristo. Ok tikueyichijtoskej toTajtsin Dios nikan tlaltikpak ijkuak tlapejpenalmej kinuikaskej iluikak itlamian ueyi tlajyouilistli. Ijkon tikchiuaskej porque techyekantos Jesucristo. Biblia kijtoua ijkuakon techtlajyouiltiskej akinmej pouij itech Gog de Magog (Ezeq. 38:​18-20). Pero amo uejkika ijkon techtoktiskej uan amitlaj uelis kichiuaskej para ayakmo matikueyichiuakan toTajtsin Dios. Tikneltokaj san Jehová uelis techmakixtis. Ijkuak apóstol Juan itlaj okimonextili, okinmitak “sapanoua miakej” ichkauan Cristo. Okiluijkej nonmej ichkamej okisayaj itech “ueyi tlajyouilistli”. Non kiteititia Jehová kinmakixtis (Apoc. 7:​9, 14). w24.02 5, 6 párrs. 13, 14

¿Tlen moneki tikchiuaskej para Jehová matechmaka iespíritu santo? Matiktlajtlanilikan, matimomachtikan iTlajtol uan nochipa matikpaleuikan ialtepe. Tla ijkon tikchiuaskej, techyekanas ika iespíritu santo (Gál. 5:​22, 23). Para Jehová techmakatos iespíritu moneki tikchiuaskej uan timokuayejyekoskej tlen kuali. Pero ye ayakmo techmakas iespíritu tla timokuayejyekoskej tlen amo kuali uan tikkauiliskej makalaki ijtik toyolo (1 Tes. 4:​7, 8). ¿Tlen okachi moneki tikchiuaskej? Pablo okijto: “Amo san xikajawilmatikah n tlajtóli non nomechmatiltiah n profetas.” (1 Tes. 5:20). Itech nin versículo ijkuak kijtoua “tlajtóli non nomechmatiltiah n profetas” kijtosneki tlen toTajtsin Dios kitematiltia ika iespíritu. Profetas noijki okitematiltijkej san niman uits itonal Jehová. Tejuan amo timokuayejyekouaj ok miak poliui para ajsiki non tonal noso amo timokuayejyekouaj amo tikitaskej Armagedón. Tikteititiaj tikchixtokej san niman maajsiki non tonal ikinon timochijchikauaj tikchiuaj tlen kuali (2 Ped. 3:​11, 12). w23.06 12 párrs. 13, 14

¿Tlen moneki tikchiuaskej tla itech tocelular, totableta noso tocomputadora kisa se foto tlen kipia pornografía? San niman oksekan matitlachiakan uan amo matikitakan. Tla tikilnamiktokej okachi ipati timouikaskej iuan Jehová, non techpaleuis amo matikitakan pornografía. Pero katej seki fotos tlen xamo amo kipiaj pornografía pero uelis kichiuas matimokuayejyekokan tiauilnemiskej. Tejuan amo moneki tikinmitaskej nonmej fotos porque amo tiknekij titlajtlakolchiuaskej itech toyolo (Mat. 5:​28, 29). Se tokni tlayekanki tlen chanti Tailandia uan itoka David okijto: “Nochipa nimotlajtlania: ‘¿Kipaktis Jehová tla nikinmitas fotos maski nikijtos amo kipiaj pornografía?’. Ijkuak ijkon nimokuayejyekoua, nechpaleuia manikchiua tlen kuali”. Amo oui tikchiuaskej tlen kuali tla tiktlakaitaj Jehová. “Tipeuaj timochiuaj tiixtlamatkej ijkuak tiktlakaitaj Jehová”. w23.06 23 párrs. 12, 13

Tlajtoli ‘cuartos tlen katej tlaijtik’ xamo kijtosneki tlanechikolmej. Jehová techmaluis ijkon ken yokijto tla san sekan tiyetoskej inmiuan tokniuan ijkuak panos ueyi tlajyouilistli. Ikinon moneki melauak tikintlasojtlaskej tokniuan uan amo san tikijtoskej tikintlasojtlaj. Tla amo ijkon tikchiuaskej, xamo amo uelis timomakixtiskej. Ijkuak ajsiki “iueyi tonal Jehová” nochtin sapanoua tlajyouiskej (Sof. 1:​14, 15). Tiitlaixpantijkauan Jehová noijki titlajyouiskej pero tla axkan timoyektlaliskej, amo okachi timotekipachoskej uan uelis tikinpaleuiskej oksekimej. Tla titlaxikouaj, amitlaj techsotlauas. Tla titeiknomatij, timochijchikauaskej tikinpaleuiskej tokniuan uan tikinmakaskej tlen kinpolos. Noijki san sekan tiyetoskej inmiuan tokniuan tla tikintlasojtlaj. Jehová techteochiuas porque kichiuas nochipa matiyoltokan uan kipojpolos nochi tlen techtlajyouiltia (Is. 65:17). w23.07 7 párrs. 16, 17

Biblia kijtoua chijchikauakej akinmej amo keman kikauaj toTajtsin Dios. Pero akinmej okatkaj okachi chijchikauakej amo nochipa ijkon omomachilijkej. Tekiua David ualeua okatka yolchikauak uan omomachiliaya ken se tepetl chikauak. Pero ualeua omomachiliaya amo okatka chikauak uan omomojtiaya (Sal. 30:7). Noijki Sansón okatka sapanoua chikauak ijkuak Jehová okimakaya espíritu santo. Pero ye okimatiaya tla toTajtsin Dios amo kimakaskia chikaualistli yetoskia ken oksekimej tlakamej tlen amo okatkaj chijchikauakej (Juec. 14:​5, 6; 16:17). Yejuan Jehová okinpaleui mayetokan chijchikauakej. Apóstol Pablo noijki okineltokaya omonekiaya makipaleui Jehová para yetoskia chikauak (2 Cor. 12:​9, 10). Pablo omokokouaya.(Gál. 4:​13, 14). Noijki omochijchikauaya kichiuas tlen kuali (Rom. 7:​18, 19). Ualeua okitekipachouaya tlen kipanoskia (2 Cor. 1:​8, 9). Pero ye okijto: “Ijkuak amo nichikauak nimochiua nichikauak”. ¿Tleka ijkon okijto? Porque Jehová okimakaya chikaualistli tlen okipolouaya uan ijkon omochiuaya chikauak. w23.10 12 párrs. 1, 2

Matikilnamikikan Jehová otechnotski matipouikan itech ialtepe maski ualeua tikmachiliskej amitlaj topati (Juan 6:44). Ye kimati ken tikpiaj toyelis maski ualeua tejuan amo tikitaj uan noijki kuali techixmati (2 Crón. 6:30). Ikinon matikneltokakan ijkuak techiluia techpatioita (1 Juan 3:​19, 20). Xamo sekimej ok moyolkokouaj porque okichiuayaj tlen amo kuali ijkuak ayamo omomachtiayaj (1 Ped. 4:3). Oksekimej mochijchikauaj amo kichiuaskej tlen amo kuali maski yimiak xiuitl kitekichiuiliaj Jehová. ¿Tejuatsin noijki ok timoyolkokoua? Tla ijkon mitspanotok xamo mitsyolseuis tikmatis itekipanojkauan Jehová noijki ijkon omomachiliayaj. Ijkon omomachiliaya apóstol Pablo porque omokuayejyekouaya san okichiuaya tlen amo kuali (Rom. 7:24). Ye omoyolkopki uan omoapolakti. Pero okijto omomachiliaya ‘amo okachi ipati innauak oksekimej apóstoles’ uan okatka ‘okachi tlajtlakole’ (1 Cor. 15:9; 1 Tim. 1:15). w24.03 27 párrs. 5, 6

Tlen okichi tekiua Jehoás techmachtia moneki tikinpejpenaskej toyolikniuan tlen melauak techpaleuiskej. Non kijtosneki moneki timouikaskej inuan akinmej kitlasojtlaj Jehová uan kinekij kiyolpaktiskej. Noijki nochtin uelis inuan timouikaskej maski tlatlamantli xiuitl kipiaj. Xikilnamiki Jehoiadá okipiaya okachi miak xiuitl uan Jehoás okatka ok telpochtli. Ximokuayejyeko akinmej inuan timouika uan ximotlajtlani: “¿Nechpaleuiaj okachi manikneltoka Jehová? ¿Nechpaleuiaj maniktlakamati? ¿Kinpaktia kintlapouiskej oksekimej para makixmatikan Jehová uan tlen momachtiaj itech Biblia? ¿Kintlakamatij itlanauatiluan? ¿Nechiluiaj tlen moneki nikchiuas ijkuak nimotlapololtia?” (Prov. 27:​5, 6, 17). Amitlaj ipati tikinpias moyolikniuan tla amo kitlasojtlaj Jehová. Pero amo keman xikinkaua moyolikniuan tlen kitlasojtlaj Jehová (Prov. 13:20). w23.09 9, 10 párrs. 6, 7

Alfa ika peua abecedario griego uan tlami ika omega. Jehová okijto ye Alfa uan Omega porque ye kitlamia tlen kipeualtia. Ijkuak Jehová okinchijchi Adán uan Eva, ye okinmilui: “Ximomiaktilikan uan ximochiuakan nanmiakej, xiktemitikan tlaltikpak uan xikmaluikan” (Gén. 1:28). Ijkuak Jehová okijto tlen okinekiaya kichiuas yetoskia ken okijto ‘ye Alfa’. Ajsis tonal inkoneuan Adán uan Eva tlen ayakmo yetoskej tlajtlakolejkej momiaktiliskej uan kikopaskej se xochitlali tlaltikpak. Ijkuakon Jehová kijtos ‘ye Omega’. Jehová okiteititi melauak mochiuaskia tlen okijto ijkuak otlanki okichijchi iluikak, tlaltikpak uan nochi tlen kipia. ¿Ken okichi? Jehová okitlali tonal para mamochiua tlen ye okinekiaya ipan tlaltikpak uan para tejuan. Ijkon mochiuaskia nochi tlen okinekiaya ijkuak tlamiskia chikome tonal (Gén. 2:​1-3). w23.11 5 párrs. 13, 14

Judíos uejkauaskiaj kanaj naui metstli para ajsiskiaj Israel uan yetoskia oui ijkon kichiuaskej. Pero Jehová okinmilui kinpaleuiskia para amitlaj makintsakuili ijkuak yaskiaj inmialtepe. Judíos akinmej kuali omouikayaj iuan Jehová sapanoua okipatioitakej ijkuak okinmiluijkej yiuelis mokopaskiaj Israel. Okitakej Jehová sapanoua okinteochi porque oksepa ueliskia kiueyichiuaskiaj. Ompa Babilonia amo okatka se teokali para kiueyichiuaskiaj Jehová. Noijki amo okatka se altar nion teopixkej para israelitas kitlamaniliskiaj Jehová ijkon ken okijtouaya Tlanauatil tlen okijkuilo Moisés. Noijki akinmej okitlakamatiayaj Jehová amo okatkaj miakej ijkon ken akinmej okiueyichiuayaj oksekimej teotsitsintin. Ikinon judíos akinmej okitlakamatiayaj Jehová okinekiayaj mokopaskej Israel para oksepa kiueyichiuaskiaj ken ye kineki. w23.05 14, 15 párrs. 3, 4

Moneki matechpaleui iespíritu santo toTajtsin Dios tla tiknekij ‘nochipa tiyetoskej ken ikoneuan tlauili’. ¿Tleka ijkon tikijtouaj? Porque miakej kichiuaj tlen pitsotik ikinon tikitaj oui tiyetoskej tiyolchipauakej (1 Tes. 4:​3-5, 7, 8). Iespíritu santo toTajtsin Dios techpaleuis amo matimokuayejyekokan ijkon ken ixtlamatkej tlen katej nikan tlaltikpak. Porque yejuan amo mokuayejyekouaj ijkon ken Jehová mokuayejyekoua. Noijki techpaleuis matiyetokan ‘tiyolkualmej, matikchiuakan tlen kuali uan matikijtokan tlen melauak’ (Efes. 5:9). Jesús okijto Jehová “kinmakas espíritu santo akinmej kitlajtlaniliaj” (Luc. 11:13). Ikinon matiktlatlaujtikan Jehová matechmaka iespíritu santo. Noijki tikseliskej espíritu santo ijkuak timonechikouaj inuan tokniuan para tikueyichiuaskej Jehová (Efes. 5:​19, 20). Ijkon espíritu santo techpaleuis matikpiakan tonemilis ijkon ken kipaktia toTajtsin Dios. w24.03 23, 24 párrs. 13-15

¿Tikita oui timochias? Xikilui Jehová mamitspaleui porque iespíritu santo Jehová techpaleuia matimochiakan (Gál. 5:​22, 23). Ikinon uelis tikiluiskej matechmaka espíritu santo uan matechpaleui matikpiakan kuali toyelis. Noijki matikiluikan Jehová matechmaka espíritu santo para tikmatiskej timochiaskej ijkuak titlajyouiskej uan ijkuak amo tikmatij tlen tikchiuaskej (Luc. 11:13). Matikiluikan matechpaleui matikitakan nochi tlamantli ijkon ken ye kita. Tla yotiktlatlaujtijkej Jehová, nochipa matimochijchikauakan matikmatikan timochiaskej. Okachi tikmatiskej timochiaskej tla nochipa tikiluiaj Jehová matechpaleui uan timochijchikauaj tikchiuaskej tlen moneki. Noijki techpaleuis matimokuayejyekokan tlen okichijkej sekimej itekipanojkauan Jehová tlen okatkaj yiuejkika. Biblia techiluia sekimej okimatiayaj mochiaskej. Tejuan noijki uelis ijkon tikchiuaskej tla timokuayejyekouaj tlen yejuan okichijkej. w23.08 22, 23 párrs. 10, 11

Jesús okilui Pedro Jehová nochipa kimaluiskia. Ijkuak Jesús okiyolitijkej okichi se milagro uan ijkon Pedro uan oksekimej apóstoles okinkitskijkej michimej (Juan 21:​4-6). Non milagro okipaleui Pedro makineltoka Jehová kimakaskia tlen ika mopanoltiskia. Ijkuakon Pedro xamo okilnamik Jesús okijto, Jehová nochipa kinmaluis akinmej kitekichiuiliaj (Mat. 6:33). Ikinon Pedro omochijchika otetlapoui uan ayakmo omichkitski. Noijki itech pentecostés xiuitl 33 omoyolchika uan otlamachti. Ijkon miakej okinpaleui matlaneltokakan (Hech. 2:​14, 37-41). Satepan okinpaleui miakej samaritanos mamochiuakan idiscípulos Cristo uan noijki akinmej amo okatkaj judíos (Hech. 8:​14-17; 10:​44-48). Jehová okichi Pedro matlapaleui para miakej tlen chantij itech tlatlamantli altepemej matlaneltokakan. w23.09 20 párr. 1; 23 párr. 11

Ijkuak yopanoka kanaj ome xiuitl ijkuak akinmej ochantiayaj Babilonia okipojpolojkej Jerusalén. Tekiua Nabucodonosor okitemik se ueyi estatua uan okitekipachouaya tlen okijtosnekiaya. Tekiua okinmilui ixtlamatkej tlen okatkaj Babilonia uan noijki Daniel, makiluikan tlen okitemik uan tlen okijtosnekiaya. Noijki okinmilui nochtin kinmiktiskiaj tla amo kiluiskiaj tlen okijtosnekiaya tlen okitemik (Dan. 2:​3-5). Daniel omonekiaya san niman itlaj kichiuas porque miakej uelis kinmiktiskiaj. Ikinon “okilui tekiua makichia uan kiluiskia tlen kijtosneki tlen okitemik” (Dan. 2:16). Daniel omonekiaya yetos yolchikauak uan tlaneltokas. Porque Biblia amo kijtoua kox Daniel yokijtojka tlen kijtosneki ijkuak ikaj itlaj kitemiki. Daniel okinmilui iyolikniuan makitlatlaujtikan toTajtsin Dios makinpaleui (Dan. 2:18). Jehová okinnankili Daniel uan okipaleui makijto tlen okijtosnekiaya tlen okitemik Nabucodonosor. Ijkon ye uan iyolikniuan omomakixtijkej. w23.08 2 párr. 4

Matimokuayejyekokan ken techpaleuis tla tikmatij timochiaskej. Okachi tiyolpakiskej uan timoyolseuiskej tla tikmatij timochiaskej. Techpaleuia kuali matimomachilikan uan kuali matiyetokan. Noijki techpaleuia kuali matimouikakan inmiuan tokniuan uan noijki oksekimej. Amo okachi timoouijtiliskej tla amo san niman tikualanij ijkuak oksekimej kichiuaj tlen amo techpaktia (Sal. 37:​8, xikita nota; Prov. 14:29). Tikchiuaskej ken Jehová uan okachi iuan timouikaskej. Axkan yotikitakej tla tikmatij timochiaskej okachi kuali timomachiliskej uan okachi tiyolpakiskej. Jehová techpaleuis matikmatikan matimochiakan maski tikitaskej oui ijkon tikchiuaskej. Matikchiakan toTajtsin Dios makikopa se xochitlali tlaltikpak uan matikilnamiktokan “Jehová kinmita akinmej kitlakaitaj uan akinmej kineltokaj, ye nochipa kintlasojtlas ika nochi iyolo” (Sal. 33:18). Ikinon tinochtin matikmatikan timochiaskej. w23.08 22 párr. 7; 25 párrs. 16, 17

Ye okinmilui amo melauak tlaneltokaj tla kichikoitaj akin amitlaj kipia uan kuali kinotsaj akin kipia miak tomin. Ikinon tlen okichiuayaj okiteititiaya techikoitaj (Sant. 2:​1-5, 9). Noijki Santiago okijto ijkuak ikaj kita se tokni amo kipia itlaken noso tlen kikuas, amo okipaleuiaya porque amo okimakaya tlen kipoloua. Amitlaj ipati kijtos tlaneltoka porque amo kitemaka tlen kipia (Sant. 2:​14-16). Santiago okijto Rahab okichi tlen kuali uan ijkon okiteititi otlaneltokaya (Sant. 2:​25, 26). Rahab okimatiaya tlen okichi Jehová uan okimatiaya okinpaleuijtoka israelitas (Jos. 2:​9-11). ¿Ken okiteititi Rahab okineltokaya Jehová? Okintlati ome israelitas para amo makinmiktikan porque yejuan oichtakatlachiatoj itech non altepetl. Ikinon non siuatl okitakej yolkuali ijkon ken Abrahán maski otlajtlakolchiuaya uan amo okatka israelita. Tlen okichi techmachtia miak ipati matikchiuakan tlen kuali tla titlaneltokaj. w23.12 5 párrs. 12, 13

Akinmej tikchiuaj ken Cristo amo moneki tikmatiskej san seki tlamantli tlen kijtoua Biblia. Tiknekij tikajsikamatiskej “tlen mokuayejyekoua toTajtsin Dios maski amikaj kajsikamati” uan techpaleuis espíritu santo (1 Cor. 2:​9, 10). Uelis timomachtiskej itlaj tlen techpaleuis okachi matimouikakan iuan Jehová. Onka miak tlamantli tlen uelis techpaleuis. Uelis tiktemoskej ken okiteititi Jehová okintlasojtlaya akinmej yiuejkika okitekichiuilijkej uan ken techpaleuia matikmatikan noijki techtlasojtla. Uelis timomachtiskej ken otlanauati Jehová makiueyichiuakan israelitas uan matikitakan ken tikueyichiuaj axkan. Noijki uelis timomachtiskej ken okichi Jesús tlen okijtouayaj profecías ijkuak okatka nikan tlaltikpak uan ijkuak otetlapoui. Techpaktis timomachtiskej amatlajkuilolmej Tlen ika momachtiaj iTlaixpantijkauan Jehová uan Índice de las publicaciones Watch Tower. Tla timomachtiskej nonmej amatlajkuilolmej, okachi titlaneltokaskej uan okachi tikixmatiskej toTajtsin Dios (Prov. 2:​4, 5). w23.10 18, 19 párrs. 3-5

Tlajtoli “sapanoua” kijtosneki “momelaua”. Kanin tlami versículo kijtoua ijkuak sapanoua titetlasojtlaj nochipa titetlapojpoluiaj. Ika griego tlajtoli titetlapojpoluiaj kijtosneki tikpachouaj. Tlasojtlalistli yetoskia ken se tsotsoli tlen uelis tikmelauaskej hasta kipachos nochi tlajtlakoli. Tlasojtlalistli uelis techpaleuis amo matikitakan ijkuak oksekimej motlapololtiaj ijkon ken se tsotsoli kipachoua itlaj tlen sokio. Tla sapanoua tikintlasojtlaj tokniuan, tikintlapojpoluiskej ijkuak motlapololtiskej maski tikitaskej oui ijkon tikchiuaskej (Col. 3:13). Ijkuak tikintlapojpoluiaj oksekimej tikteititiaj melauak titetlasojtlaj uan tiknekij tikyolpaktiskej Jehová. w23.11 10, 11 párrs. 13-15

Josías okipiaya 26 xiuitl ijkuak opejki kiyektlalia teokali. Ijkuak okiyektlalijtokaj templo okajsikej amochtli tlen okimakakej Moisés uan okinpiaya itlanauatiluan Jehová. Tekiua Josías san niman okipatlak seki tlamantli ijkuak okikak tlen okijtouaya non amochtli uan ijkon kitlakamatiskia tlen Jehová okijto (2 Crón. 34:​14, 19-21). ¿Mitspaktiskia nochipa tiktlajtoltis Biblia? Tla yitiktlajtoltijtok, ¿mitspaktia tlen tiktlajtoltia? ¿Tikinmijkuiloua textos tlen uelis mitspaleuiskej? Ijkuak Josías okipiaya 39 xiuitl otlajtlakolchi uan okimiktijkej. Ye okichi tlen omokuayejyekouaya uan amo okilui Jehová makipaleui (2 Crón. 35:​20-25). Tlen okichi techmachtia moneki tikiluiskej Jehová matechpaleui maski san keski xiuitl tikpiaskej noso yiuejkika tiktekichiuilijtokej. Ikinon moneki matiktlatlaujtikan, matiktlajtoltikan iTlajtol uan matikkakikan tlen techiluiaj tokniuan tlen kuali iuan mouikaj. Tla ijkon tikchiuaskej amo okachi titlajtlakolchiuaskej uan okachi tipakiskej (Sant. 1:25). w23.09 12, 13 párrs. 15, 16

Biblia kijtoua yiuejkika miakej siuamej okitekichiuilijkej Jehová uan okitlasojtlakej. Kijtoua yejuan ‘okipiayaj innemilis uan nochipa okiteititiayaj okineltokayaj toTajtsin Dios’ (1 Tim. 3:11). Xamo noijki kanin timonechikouaj katej miakej tlen kuali tlaneltokaj uan yejuan uelis techmachtiskej miak tlamantli. Tla te tiichpochtli xikita ken uelis tikchiuas ijkon ken siuamej tlen kuali mouikaj iuan Jehová. Xikita ken kipiaj inyelis uan satepan ximokuayejyeko ken uelis tikchiuas ijkon ken yejuan kichiuaj. Siuatl tlen yolyamanki kuali mouika iuan Jehová uan inuan oksekimej. Kiteititia yolyamanki uan kitlasojtla Jehová ijkuak kintlakamati akinmej kiyekanaj tlanechikol. Noijki ijkuak kitlakamati akin kiyekana ifamilia (1 Cor. 11:3). w23.12 18, 19 párrs. 3-5

Jehová kineki xiktlasojtla mosiua, xikmaka tlen moneki, kuali mamomachili uan kuali mamouika iuan Jehová. Noijki mitspaleuis kuali tikyekanas mofamilia tla tikintlakaita siuamej uan tla timochijchikaua tikchiuas tlen tikijtoua. Tla timonamiktis xamo tikinpias mokoneuan. Tlen okichi Jehová uelis mitspaleuis kuali xikinmiskalti mokoneuan (Efes. 6:4). Jehová nochipa okilui Jesús kuali tlen okichiuaya uan okitlasojtlaya (Mar. 1:11). Tla tikinpias mokoneuan, ximochijchikaua nochipa xikinmilui tikintlasojtla uan xikinmilui kuali tlen kichiuaj. Tetajmej tlen kichiuaj ijkon ken Jehová kichiua, kinpaleuiaj inkoneuan okachi matlaneltokakan. ¿Tlen uelis tikchiuas axkan para satepan kuali tikinmiskaltis mokoneuan? Xikinmititi tikintlasojtla uan tikinpatioita mofamilia uan noijki tokniuan (Juan 15:9). w23.12 28, 29 párrs. 17, 18

Tejuan noijki tikixnamikij miak tlamantli uan timokokouaj ijkon ken akinmej amo kitekichiuiliaj Jehová. Noijki techixnamikij akinmej kikokoliaj ialtepe toTajtsin Dios uan techtlajyouiltiaj. Jehová kitekauilia matechpano tlen amo kuali pero techiluia techpaleuis (Is. 41:10). Uelis tiyolpakiskej, kuali tikpejpenaskej tlen tikchiuaskej uan amo tikkauaskej Jehová maski titlajyouiskej porque ye touan kajki. Biblia kijtoua toTajtsin Dios techmakas “iyolseuilis” (Filip. 4:​6, 7). ToTajtsin Dios techyolseuia porque kuali iuan timouikaj. Iyolseuilis toTajtsin Dios sapanoua kualtsin uan “amikaj kajsikamati”. ¿Se tonal yotiktlatlaujti Jehová ika nochi moyolo uan satepan kuali otimomachili? Ijkon otimomachili porque toTajtsin Dios omitsmakak “iyolseuilis”. w24.01 20 párr. 2; 21 párr. 4

Akinmej kitlasojtlaj toTajtsin Dios kinekij kiueyichiuaskej itoka ika nochi inyolo. Tekiua David okajsikamatki san se tlamantli kijtosneki kiueyichiuas itoka toTajtsin Dios uan noijki kiueyichiuas. Ijkuak David okijtouaya itoka toTajtsin Dios omokuayejyekouaya ken iyelis uan tlen tlamantli yokichijchi. David amo okinekiaya kisokiotis itoka iTajtsin porque okinekiaya kiueyichiuas. Ye okijto ijkon okinekiaya kichiuas ika nochi iyolo. Levitas noijki ijkon opejki kichiuaj uan okiueyichijkej Jehová. Yejuan okatkaj yolyamankej. Ikinon okijtojkej itoka Jehová sapanoua ueyititok uan amikaj uelis kiueyichiuas ijkon ken ye kinamiki (Neh. 9:5). Xamo Jehová sapanoua oyolpakik ijkuak okikak okiueyichijkej ika nochi inyolo. w24.02 9 párr. 6

Jehová techajsikamati uan amo kijtos amo ueli tikchiuaj tlen yotikijtojkej (2 Cor. 8:12). Amo matimosotlauakan tla amo kuali kisa tlen tiknekij tikchiuaskej. Matikilnamiktokan tlen yotikchijkej. Biblia kijtoua: “Totajtsi Dios yolmilajka, iwa ayik kilkawas tlan nomejwah ononkichijkeh” (Heb. 6:10). Tejuan noijki amo matikilkauakan. Matikilnamiktokan yitimouikaj iuan Jehová, titetlapouiaj uan yotimoapolaktijkej. Tlen yotikchijkej kiteititia uelis tikchiuaskej okseki tlamantli tlen yotikijtojkaj uan ijkon okachi tiktekichiuiliskej Jehová. Tejuan tiyolpakij porque Jehová techpaleuia matikchiuakan tlen yotikijtojkej. Noijki uelis tiyolpakiskej tla timochijchikauaj tikchiuaskej tlen yotikijtojkej uan tikitaj ken techpaleuia Jehová uan techteochiua (2 Cor. 4:7). Jehová okachi techteochiuas tla timochijchikauaskej tikchiuaskej tlen yotikijtojkej uan amo timosotlauaj (Gál. 6:9). w23.05 31 párrs. 16-18

Jehová kipaktia kiteititis kintlasojtla akinmej kitekichiuiliaj uan kiselia tlen kichiuaj. Biblia kijtoua ome uelta Jehová okilui Jesús itlaj miak ipati. Ye okijto: “Nin noKone niktlasojtla uan ye kichiua manipaki” (Mat. 3:17; 17:5). ¿Mitspaktiskia noijki mamitsilui Jehová tikyolpaktia? Ye amo techualtlapouia desde iluikak pero techtlapouia ika iTlajtol. Ijkuak tiktlajtoltiaj Jesús kualtsin okintlapouiaya idiscípulos, noijki tikmachiliaj Jehová techtlapouia. Jesús okichi ijkon ken iTajtsin kichiua. Ikinon ijkuak tiktlajtoltiaj Jesús okinmilui idiscípulos okintlasojtlaya maski ualeua omotlapololtiayaj, uelis timokuayejyekoskej Jehová noijki ijkon techtlapouia (Juan 15:​9, 15). Amo matikijtokan ayakmo tikyolpaktiaj Jehová ijkuak titlajyouiaj. Ijkuak ijkon techpanoua matikteititikan tiktlasojtlaj uan matikneltokakan techpaleuis (Sant. 1:12). w24.03 28 párrs. 10, 11