Jueves 25 de septiembre
Ye otechtlapojpolui ika nochi iyolo (Col. 2:13).
ToTajtsin Dios kijtoua techtlapojpoluis tla timoyolkopaj (Sal. 86:5). Ikinon tla yotimoyolkopkej matikneltokakan yotechtlapojpolui porque ye melauak kichiua tlen kijtoua. Matikilnamiktokan Jehová techajsikamati uan amo techiluia matikchiuakan tlen amo tiuelij. Ye kipatioita tlen tikchiuaj tla timochijchikauaj tikchiuaskej ika nochi toyolo. Matimokuayejyekokan ken yiuejkika sekimej okitekichiuilijkej Jehová ika nochi inyolo. Apóstol Pablo miak xiuitl okitekichiuili Jehová. Ye uejka oyajki uan otlapaleui mamomiaktilikan tlanechikolmej. Pero satepan ayakmo okachi ueli otetlapoui ijkon ken achto okichiuaya. Non amo kijtosneki ayakmo okiyolpaktiaya Jehová. Pablo omochijchikauaya kitekichiuilis toTajtsin Dios uan ye okiteochi (Hech. 28:30, 31). Tejuan noijki ualeua amo tiktekichiuiliaj Jehová ijkon ken tiknekiskiaj. Pero ye kipatioita tiktekichiuiliaj ika nochi toyolo. w24.03 27 párrs. 7, 9
Viernes 26 de septiembre
Kualkan ijkuak ok tlayoua, Jesús omejki uan oyajki iselti omotlatlaujtito (Mar. 1:35).
Jesús okinmititi imachtijkauan ken motlatlaujtiskej. Ye nochipa omotlatlaujti ijkuak okitekichiuili toTajtsin Dios nikan tlaltikpak. Ye okitak ken kitlatlaujtiskia toTajtsin Dios maski amo omajxiliaya uan miakej iuan okatkaj (Mar. 6:31, 45, 46). Jesús omeuaya ijkuak otlayouatoka uan okitlatlaujtiaya iTajtsin. Se tonal, omotlatlaujti youak porque omonekiaya kichiuas itlaj miak ipati (Luc. 6:12, 13). Jesús miak uelta okitlatlaujti Jehová ijkuak yikimiktiskiaj. Omotlatlaujti porque kichiuaskia itlaj sapanoua oui (Mat. 26:39, 42, 44). Jesús techmachtia uelis timajxiliskej tiktlatlaujtiskej Jehová maski tikchiuaj miak tlamantli. Ijkon ken okichi Jesús xamo moneki kualkan timeuaskej noso okachi yiyouak tikochiskej. Ijkon tikititiskej Jehová tikpatioitaj techkauilia matiktlatlaujtikan. w23.05 3 párrs. 4, 5
Sábado 27 de septiembre
ToTajtsin Dios techmaka iespíritu santo uan ijkon kiteititia techtlasojtla (Rom. 5:5).
Ijkuak omoijkuilo nin versículo okinekiayaj kijtoskej Jehová sapanoua kintlasojtla tlapejpenalmej ijkon ken ijkuak chikauak yaui se aueyatl. Non kiteititia Jehová sapanoua kintlasojtla. Ijkon tlapejpenalmej kimatij toTajtsin Dios ‘kintlasojtla’ (Judas 1). Yejuan kineltokaj tlen okijto apóstol Juan: “¡Xikitakan ken sapanoua techtlasojtla toTajtsin Dios! Ye technotsa tiikoneuan” (1 Juan 3:1). Pero Jehová amo san kintlasojtla tlapejpenalmej. Ye kijtoua kintlasojtla nochtin itekipanojkauan. Matikitakan ken kiteititia. ¿Tlen yokichi Jehová tlen kiteititia sapanoua techtlasojtla? Ijkon okiteititi ijkuak topatka okitemakak iKone. Tlen Jehová okichi okiteititi amikaj uelis techtlasojtlas ijkon ken ye techtlasojtla (Juan 3:16; Rom. 5:8). w24.01 28 párrs. 9, 10