Septiembre

ToTajtsin Dios okimakak chikaualistli Jesús makipojpolo nochi tlen techtlajyouiltia. Onka miak tlamantli tlen tejuan amo keman uelis tikyektlaliskej. Pero Jesús uelis ijkon kichiuas porque ijkon okiteititi ijkuak okinchi milagros. Jesús kipojpolos tlajtlakoli porque non kichiua matimokokokan uan matiixpoliuikan (Mat. 9:​1-6; Rom. 5:​12, 18, 19). Milagros tlen okinchi Jesús kiteititia kichiuas ayakmo matimokokokan uan kinyolitis akinmej yoixpolikej (Mat. 4:23; Juan 11:​43, 44). Ye kichiuas ayakmo chikauak maejeka uan kintlanilis amo kuali ejekamej (Mar. 4:​37-39; Luc. 8:2). Techyolseuia tikmatiskej Jehová okimakak chikaualistli Jesús. Moneki tikneltokaskej melauak techteochiuas iTekiuajkayo toTajtsin Dios. Milagros tlen okinchi Jesús kiteititia tlen kichiuas satepan ijkuak ualtlanauatis iTekiuajkayo toTajtsin Dios nikan tlaltikpak. Ximokuayejyeko ken tiyetoskej ijkuak Jesús ualtlanauatijtos nikan tlaltikpak. w23.04 3 párrs. 5-7

Xamo kanin timonechikoua katej miakej tokniuan uan oui titlanankilis. Xamo timokuayejyekoua ayakmo titlanankilis uan san titlakaktos. Pero amo ximosotlaua. Amo ximoyektlali para san se uelta titlanankilis. Ximomachti nochi párrafos uan ijkon okachi uelis titlanankilis. Ijkuak timomachtis revista Akin Tetlapouijtok, xikita ken mouikaj párrafos iuan itoka tlamachtil. Ijkon nochipa tikmatis tlen titlanankilis. Noijki uelis timoyektlalis para tikyekijtos seki tlamachtilmej tlen okachi oui tlen katej itech seki párrafos. Xamo itech nonmej párrafos tokniuan kitaj oui tlanankiliskej. Pero ¿tlen uelis tikchiuas tla ok tikita oui titlanankilis? Ijkuak ayamo peua nechikol, uelis tikiluis tokni tlen tlamachtis tlen párrafo tikneki titlanankilis. w23.04 22 párrs. 9, 10

José kuali omoyekanaya ika itlanauatiluan Jehová uan non okipaleui kuali mayeto iuan isiua. Eyi uelta Jehová okilui ken omonekiaya kiyekanas ifamilia. Maski okitak oui ye ijkon okichi (Mat. 1:20; 2:​13-15, 19-21). José okitlakamatki Jehová uan ijkon kuali okimalui María. Ikinon xamo María okachi okitlakaitak uan okitlasojtlak. Tlakamej akinmej yomonamiktijkej uelis kichiuaskej ken José uan kitaskej tlen kijtoua Biblia para ijkon uelis kinmaluiskej infamilia. Xamo monekis kipatlaskej seki tlamantli pero tla ijkon kichiuaskej, kiteititiskej kitlasojtlaj insiua. Noijki okachi kuali mouikaskej. Se tokni tlen yikipia kanaj 20 xiuitl omonamikti uan chanti altepetl Vanuatu, okijto: “Okachi niktlakaita nonamik ijkuak nikita moyekana ika itlanauatiluan Jehová. Noijki kuali nimomachilia uan nikita kuali tlen kipejpena”. w23.05 21 párr. 5

Judíos tlen mokopaskiaj omonekiaya yetoskej chipauakej ixpan Jehová (Deut. 7:6). ¿Kijtosneki judíos nochi kuali okichiuayaj? Amo. Omonekiaya kipatlaskej seki tlamantli para kiyolpaktiskej Jehová. Miakej judíos oneskej Babilonia ikinon opejkej mokuayejyekouaj uan kichiuaj ken babilonios. Sekimej judíos omokopkej Israel uan satepan opanok miak xiuitl, Nehemías omotlajtlachialti ijkuak okitak ikoneuan judíos amo okimatiayaj tlajtoskej hebreo (Deut. 6:​6, 7; Neh. 13:​23, 24). ¿Ken uelis kitlasojtlaskiaj uan kiueyichiuaskiaj Jehová nonmej konemej? Yejuan amo okajsikamatiayaj iTlajtol toTajtsin Dios porque oijkuilitoka ika hebreo (Esd. 10:​3, 44). Ikinon judíos omonekiayaj kipatlaskej tlen okichiuayaj. Okachi kuali ijkon kichiuaskiaj ijkuak chantiskiaj Israel porque ompa yopejkaj kiueyichiuaj Jehová ken ye kineki (Neh. 8:​8, 9). w23.05 15 párrs. 6, 7

Ualeua itlaj panotikisa ijkuak tiknekij itlaj tikchiuaskej. Xamo ayakmo timajxiliskej tikchiuaskej tlen yotikijtojkej porque “itlaj amo kuali techpanotikisa” (Ecl. 9:11). Noijki xamo tikixnamikij seki tlamantli tlen kichiua matimosotlauakan (Prov. 24:10). Tejuan titlajtlakolejkej uan timotlapololtiaj. Non uelis kichiuas ayakmo matikchiuakan tlen yotikijtojkaj (Rom. 7:23). Ualeua xamo san tisotlauaj (Mat. 26:43). ¿Tlen techpaleuis matikchiuakan tlen yotikijtojkej? Amo matimotekipachokan tla timotlapololtiaj. Biblia kijtoua xamo techpanos miak tlamantli. Pero noijki kijtoua matikchiuakan tlen yotikijtojkej. Tejuan noijki tikteititiskej tiknekij tikyolpaktiskej Jehová tla timochijchikauaj tikchiuaskej tlen yotikijtojkej maski titlajyouiaj. Jehová yolpaki ijkuak kita timochijchikauaj tikchiuaj tlen yotikijtojkej. w23.05 30 párrs. 14, 15

Tla timochiuas precursor, tikmatis titekipanos inuan tokniuan tlen kipiaj tlatlamantli inyelis. Noijki tikmatis ken tikmaluis motomin (Filip. 4:​11-13). ¿Tleka amo timochiua precursor auxiliar? Non mitspaleuis satepan timochiuas precursor regular. Satepan uelis titlapaleuiti kanin kinchiuaj kalmej kanin timonechikouaj noso titlapaleuis Betel. Nochtin tlakamej moneki mochijchikauaskej para uelis tlapaleuiskej ken tlayekankej. Biblia kijtoua akinmej kinekij kinpaleuiskej tokniuan ‘kinekij kichiuaskej se kuali tekitl’ (1 Tim. 3:1). Moneki achto tlapaleuiskej ken siervos ministeriales. Siervos ministeriales sapanoua kinpaleuiaj tlayekankej. Tlayekankej uan siervos ministeriales kinpaleuiaj tokniuan porque yolyamankej uan pakij tetlapouiaj. w23.12 28 párrs. 14-16

Tekiua Josías opejki mouika iuan Jehová ijkuak okatka ok telpochtli. Ye okinekiaya kuali kixmatis toTajtsin Dios uan kichiuas tlen ye kineki. Pero ijkuak Josías otlanauatiaya miakej okinueyichiuayaj oksekimej dioses ikinon okitaya oui tlanauatis. Ikinon omonekiaya yetos yolchikauak para kipojpoloskia tlen okichiuayaj oksekimej uan ijkon san ye Jehová kiueyichiuaskiaj. Uan kuali tlen okichi. Ye ayamo okipiaya 20 xiuitl ijkuak okipojpolo nochi tlen ika okinueyichiuayaj oksekimej dioses (2 Crón. 34:​1, 2). Te uelis tikchiuas ijkon ken Josías okichi maski ok titelpochtli. ¿Ken uelis ijkon tikchiuas? Uelis okachi timouikas iuan Jehová uan timomachtis tlen ye kichiua. Non mitspaleuis ixpan ximotemaka. Se tokni tlen itoka Luke omoapolakti ijkuak okipiaya 14 xiuitl uan okijto: “Axkan moneki achto niktekichiuilis Jehová uan nimochijchikauas nikchiuas tlen kipaktia” (Mar. 12:30). Jehová noijki mitsteochiuas tla tikchiuas ijkon ken non tokni. w23.09 11 párrs. 12, 13

Matimokuayejyekokan tlen okinpanok tokniuan ompa Tesalónica. Yejuan ayamo okajxitiayaj se xiuitl omonechikojtokaj ijkuak Pablo okinmijkuilili achto carta. Xamo tokniuan akinmej okinyekanayaj omotlapololtiayaj porque amo okimatiayaj seki tlamantli pero omonekiaya kintlakaitaskej. Ijkuak yiajsiki ueyi tlajyouilistli okachi monekis timouikaskej inmiuan tokniuan akinmej techyekanaj. Porque xamo ayakmo uelis timotlapouiskej inmiuan tokniuan tlen katej kanin techyekanaj nion tokniuan tlen katej Betel. Uan xamo ayakmo uelis techiluiskej tlen moneki matikchiuakan. Ikinon axkan moneki okachi tikteititiskej tikintlasojtlaj uan tikintlakaitaj tokniuan akinmej techyekanaj. Matimokuayejyekokan ken moneki maski san tlen panos uan amo san matikitakan ijkuak motlapololtiaj. Matikilnamiktokan Jehová okitlali iKone para makinyekana tokniuan akinmej techyekanaj. Tlen tikchiaj panos satepan techpaleuia matimokuayejyekokan ken moneki ijkon ken soldados okinpaleuiaya incasco ijkuak okimotlaliliayaj. Tejuan tikmatokej amitlaj ipati tlen kichiuaj oksekimej porque tikilnamiktokej tlen tikseliskej satepan (Filip. 3:8). Noijki ijkuak tikilnamiktokej tlen tikseliskej techpaleuia kuali matimomachilikan uan kuali matiyetokan. w23.06 11, 12 párrs. 11, 12

Nochtin akinmej kinmiluia “siuatl tlen amo ixtlamatki” mayakan ikalijtik moneki kipejpenaskej kox yaskej noso amo. Miak ipati amo matiauilnemikan. Itech amochtli Proverbios ijkuilitok “siuatl tlen amo ixtlamatki” kijtoua: “Tsopelik atl tlen kichtekij” (Prov. 9:17). ¿Tlen kineskayotia “atl tlen kichtekij”? Biblia kijtoua ijkuak akinmej yomonamiktijkej san sekan motekaj yetoskia ken atl tlen kinyolpaktiaj (Prov. 5:​15-18). Se tlakatl uan se siuatl amo tlajtlakolchiuaj ijkuak san sekan motekaj tla yomonamiktijkej. Pero tlajtoli “atl tlen kichtekij” kijtosneki okse tlamantli. Xamo kijtosneki ijkuak sekimej auilnemij uan amo kintlakamatij itlanauatiluan toTajtsin Dios. Nochtin akinmej auilnemij kichiuaj san ichtaka ijkon ken ijkuak ikaj tlachteki. Akinmej amo kinextiaj tlen kichiuaj yetoskia ken non “atl tlen kichtekij” uan kimachiliaj tsopelik. Pero san yejuan mokajkayauaj porque Jehová kita nochi uan amo uelis kikajkayauaskej. Akinmej ijkon kichiuaj, Jehová ayakmo kinselia uan non yetoskia ken itlaj chichik (1 Cor. 6:​9, 10). w23.06 22 párrs. 7-9

¿Tlen tikchiuaskej tla tikitaj ayakmo timotlatlaujtiaj ika nochi toyolo? Tla ijkon techpanoua, amo matimokuayejyekokan ayakmo techpaleuia iespíritu santo Jehová. Tejuan titlajtlakolejkej ikinon ualeua amo kuali timomachiliaj. Matimokuayejyekokan tlen okichi apóstol Pablo tla tikitaj ayakmo tiyolpakij. Ye omochijchikauaya kichiuas ijkon ken Jesús okichi pero ualeua okitaya oui ijkon kichiuas. Tlen okijto Pablo okiteititi okinekiaya tetlapouis maski ualeua amo kuali omomachiliaya. Tejuan noijki kuali matikpejpenakan tlen tikchiuaskej maski ualeua amo kuali timomachiliaj. Matimochijchikauakan tikchiuaskej tlen kuali maski ualeua amo tiknekij ijkon tikchiuaskej. Satepan kuali timomachiliskej tla tikchiuaj tlen kuali (1 Cor. 9:16). w24.03 11 párrs. 12, 13

Tejuan noijki uelis tikteititiskej tikintlasojtlaj tokniuan tla kuali inmiuan timouikaj (2 Cor. 6:​11-13). Kanin timonechikouaj katej tlatlamantli tokniuan uan tlatlamantli okinmiskaltijkej. ¿Tlen techpaleuis nochtin matikintlasojtlakan? ¿Ken uelis tikteititiskej tikintlasojtlaj tokniuan? Matimochijchikauakan tikinmitaskej ijkon ken Jehová kinmita. Moneki tikintlasojtlaskej tokniuan ijkuak panotos ueyi tlajyouilistli. ¿Ken techmaluis Jehová ijkuak peuas ueyi tlajyouilistli? Matikilnamikikan tlen okilui Jehová ialtepe ijkuak kipojpoloskiaj Babilonia uan ijkon momakixtiskiaj. Ye okijto: “Noaltepe, xikalaki itech mocuartos tlen katej tlaijtik uan ximokaltsakua. San seki tonal ximotlati hasta mapano ikualanilis toTajtsin Dios” (Is. 26:20). Xamo tejuan noijki monekis ijkon tikchiuaskej ijkuak panotos ueyi tlajyouilistli. w23.07 6, 7 párrs. 14-16

“¿Oksekimej kitaj niteajsikamati, amo san niman nikualani uan nikinkaki oksekimej?, ¿san niman nikualani uan nikinchiualtia oksekimej makichiuakan tlen san ne nikneki? Noso ¿nikinkaki oksekimej uan niktlakaita tlen kijtouaj?”. Tla titeajsikamatij, tikchiuaskej ken Jehová uan Jesús. Ijkuak mopatla itlaj itech tonemilis moneki kuali timokuayejyekoskej uan tikchiuaskej tlen moneki. Uelis tinochtin itlaj san niman techpanotikisas, xamo sapanoua timokokoskej, ayakmo tikpiaskej tomin noso mopatlas itlaj kanin tichantij. Ijkuak itlaj mopatla itech tonemilis ualeua titlajyouiaj (Ecl. 9:11). Noijki xamo timotekipachouaj ijkuak ayakmo tiktekichiuiliaj Jehová ken tiknekij noso kanin tiknekij. Tla tikchiuaj ninmej naui tlamantli, techpaleuis amo okachi matimotekipachokan: Se, maski seki tlamantli mopatla amo okachi matimotekipachokan. Ome, amo san matimokuayejyekojtokan tlen achto otikchiuayaj uan matikitakan tlen satepan uelis tikchiuaskej. Eyi, matikitakan tlen axkan kuali tikchiuaj uan naui, matikinpaleuikan oksekimej. w23.07 22 párrs. 7, 8

Ijkuak Daniel okatka telpochtli, babilonios okikixtijkej ialtepe uan okiuikakej Babilonia. Pero akinmej ompa ochantiayaj kuali okitakej maski okatka telpochtli. Porque kuali omotaya uan oualaya itech se familia tlen oueyititoka (1 Sam. 16:7). Ikinon kuali okimachtijkej para mayeto ijkon ken akinmej ochantiayaj Babilonia (Dan. 1:​3, 4, 6). Jehová amo okitlasojtlaya Daniel porque kualtsin omotaya noso porque kuali otekipanouaya. Ye okitlasojtlaya porque Daniel okipejpenki kichiuas tlen kuali. Ijkuak Daniel okipiaya kanaj 20 xiuitl, Jehová okijto Noé uan Job okatkaj yolkualmej uan yejuan miak xiuitl yokitekichiuilijkaj. Pero noijki okijto Daniel okatka yolkuali ijkon ken yejuan (Gén. 5:32; 6:​9, 10; Job 42:​16, 17; Ezeq. 14:14). Jehová nochipa okitlasojtlak Dan. uan miak xiuitl oyoltoka (Dan. 10:​11, 19). w23.08 2 párrs. 1, 2

Tla tikneki tikkouas se kali. Xamo tiknekis achto tikitati non kali. Noijki moneki ijkon tikchiuaskej ijkuak timomachtiaj iTlajtol toTajtsin Dios. Tla amo timokuayejyekouaj ijkuak tiktlajtoltiaj Biblia, tikmatiskej san tlen amo oui ‘tlen achto otechmachtijkej itech iTlajtol toTajtsin Dios’ (Heb. 5:12). Ijkuak timomachtiskej Biblia matikchiuakan ijkon ken ijkuak tiknekij tikkouaskej se kali. Matikitakan ken mouika nochi tlen kijtoua Biblia. Amo moneki san tikmatiskej tlen tikneltokaj, moneki tikitaskej tleka titlaneltokaj. Moneki kuali timomachtiskej tlen okachi oui tla tiknekij tikajsikamatiskej iTlajtol toTajtsin Dios. Apóstol Pablo okinmilui tokniuan mamochijchikauakan mamomachtikan iTlajtol toTajtsin Dios uan ijkon ‘kajsikamatiskiaj tlen patlauak, ueyak, uejkapan uan tlen uejkatlan’. Non kinpaleuiskia okachi matlaneltokakan (Efes. 3:​14-19). Tejuan noijki moneki ijkon tikchiuaskej. w23.10 18 párrs. 1-3

Biblia techiluia miakej okimatkej mochiaskej. ¿Tleka amo timomachtiaj tlen yejuan okichijkej? Matikitakan tlen okipanok David. Ye okatka chokotsin ijkuak okipejpenkej kinyekanas israelitas. Pero David omochixki miak xiuitl para uelis yetos tekiua. Simeón uan Ana nochipa okitekichiuilijkej Jehová ijkuak okichiayaj Mesías tlen omoijto ualaskia (Luc. 2:​25, 36-38). Ijkuak timomachtijtiaskej tlen okichijkej akinmej okitekichiuilijkej Jehová, matimotlajtlanikan: “¿Tlen okinpaleui makimatikan mochiaskej? ¿Tlen okiselijkej porque okimatkej mochiaskej? ¿Ken uelis tikchiuaskej ijkon ken yejuan okichijkej?”. Noijki uelis tikitaskej tlen okinpanok akinmej amo okimatkej mochiaskej (1 Sam. 13:​8-14). Matimotlajtlanikan: “¿Tleka amo okimatkej mochiaskej? ¿Tlen okinpanok porque amo okimatkej mochiaskej?”. w23.08 25 párr. 15

Apóstol Pedro nochipa otetlapoui iuan Jesús uan amo okika itlaj makitsakuili. Se tonal ye okiteititi okineltokaya Jesús ijkuak itlaj okijto uan idiscípulos amo okajsikamatkej (Juan 6:68). Pero miakej okikajtejkej Jesús uan amo okiluijkej makinyekilui tlen okijto nion amitlaj okitlajtlanijkej. Pedro amo okikajte Jesús uan inmixpan oksekimej okijto ye kitemaka “yolílistli non ayik tlami”. Jesús amo keman okika Pedro. Ye yokimatiaya Pedro uan oksekimej apóstoles kikajteuaskiaj youak ijkuak yikikitskiskiaj. Pero Jesús okilui Pedro ye okimatiaya uelis kichiuaskia tlen kuali uan amo kikauaskia Jehová (Luc. 22:​31, 32). Jesús okimatiaya iapóstoles okinekiayaj kichiuaskej tlen kuali pero incuerpo amo otlaxikouaya (Mar. 14:38). Ikinon Jesús okimatiaya Pedro uelis kichiuaskia tlen kuali maski eyi uelta okijto amo okixmatiaya. Ijkuak toTajtsin Dios okiyoliti Jesús okimonextili Pedro (Mar. 16:7; Luc. 24:34; 1 Cor. 15:5). Non okipaleui Pedro ayakmo mamoyolkoko. w23.09 22 párrs. 9, 10

Jehová kintlapojpoluia akinmej kineltokaj uan ayakmo kilnamiki tlen amo kuali okichijkej (Sal. 32:​1, 2). Jehová ayakmo kinmita tlajtlakolejkej uan kinmita yolkualmej porque tlaneltokaj. Abrahán, David uan oksekimej itekipanojkauan Jehová okatkaj tlajtlakolejkej pero ye okinmitaya yolkualmej. Yejuan otlaneltokayaj ikinon toTajtsin Dios okinmitaya yolkualmej. Pero okinmitaya tlajtlakolejkej akinmej amo otlaneltokayaj (Efes. 2:12). Itech carta tlen apóstol Pablo okinmijkuilili Romanos okijto moneki titlaneltokaskej tla tiknekij timouikaskej iuan Jehová. Abrahán uan David otlaneltokakej ikinon omouikakej iuan Jehová. Tejuan noijki uelis iuan timouikaskej tla tikchiuaj ijkon ken yejuan okichijkej. w23.12 3 párrs. 6, 7

Uelis itlaj tiktliokoliskej Jehová tejuan akinmej tikchiuaj ken Cristo. ¿Tlen uelis tiktliokoliskej? Ijkuak timochijchikauaj tikchiuaj tlen ye kineki uan tiktemakaj tlen tikpiaj para tikpaleuiskej iTekiuajkayo. Tikteititiskej tiknekij tikueyichiuaskej Jehová tla timochijchikauaj okachi tiktekichiuiliskej. Apóstol Pablo kijtoua tlen moneki tikchiuaskej para tikueyichiuaskej Jehová (Heb. 10:​22-25). Ompa kijtoua miak ipati matiktlatlaujtikan, matikintlapouikan oksekimej tlen ye kichiuas, matimonechikokan inuan tokniuan uan ‘matimosepanyolchikauakan porque tikitaj yiajsiki itonal toTajtsin Dios’. Saiktlami capítulos tlen kipia Apocalipsis iángel Jehová techiluia ‘matikueyichiuakan toTajtsin Dios’. Ome uelta ijkon okijto ángel para kiteititis miak ipati ijkon matikchiuakan (Apoc. 19:10; 22:9). Nochipa matikilnamiktokan tlamantli oui tlen otimomachtijkej itech itemplo espiritual Jehová. Noijki matikilnamiktokan Jehová techteochiua porque techkauilia matikueyichiuakan. w23.10 29 párrs. 17, 18

Tinochtin tiknekij tiktlakamatiskej nin tlanauatil: “Nochipa matimosepantlasojtlakan”. Pero amo matikilkauakan tlen okijto Jesús. Ye okijto: “Miakej ayakmo tetlasojtlaskej” (Mat. 24:12). Ye amo okijto idiscípulos ayakmo motlasojtlaskiaj. Pero moneki timomaluiskej para amo tikchiuaskej ken akinmej amo tetlasojtlaj. Ikinon matiknankilikan nin tlajtlanilistli: ¿Ken uelis tikmatiskej kox melauak tikintlasojtlaj tokniuan? Matimokuayejyekokan tlen tikchiuaj ijkuak itlaj techtoktiaj tokniuan uan ijkon uelis tikmatiskej kox melauak tikintlasojtlaj (2 Cor. 8:8). Apóstol Pedro okijto: “Okachi ipati sapanoua ximosepantlasojtlakan, porque akin tetlasojtla nochipa tetlapojpoluia” (1 Ped. 4:8). Ikinon ijkuak tokniuan itlaj techtoktiaj noso motlapololtiaj tikteititiskej kox melauak tikintlasojtlaj. w23.11 10 párrs. 12, 13

Tla amo tikintlasojtlaj nochtin tokniuan kijtosneki amo tiktlakamatij tlen Jesús okijto. Pero xamo okachi kuali timouikaj inuan sekimej tokniuan ijkon ken Jesús omouikaya inuan sekimej idiscípulos (Juan 13:23; 20:2). Pero Apóstol Pedro techiluia ‘matikinyektlasojtlakah [nochtin] tokniwah’ ijkon ken tiktlasojtlaj tofamilia (1 Ped. 2:17). Pedro okijto: “Ximosepantlasojtlakah ika nochi nomoyolo” (1 Ped. 1:22). Tlajtoli “ximosepantlasojtlakah” kijtosneki okachi matikintlasojtlakan akinmej amo tikintlasojtlaskiaj. ¿Tlen tikchiuaskiaj tla se tokni itlaj otechtokti noso otechkualani? Xamo tikijtoskej timomakopaskej uan amo tikteititiskej tiktlasojtlaj. Pero Jehová amo kipaktis tla ijkon tikchiuaskej ijkon ken Jesús okimachti Pedro (Juan 18:​10, 11). Pedro okijkuilo: “Tla nomechtoktiah itla amokuali, amo xikmokopilikah, nion xikwijwikaltikah akin nomechwijwikaltia, yej xikintiochiwakah” (1 Ped. 3:9). Tla titetlasojtlaj noijki titeajsikamatiskej. w23.09 28, 29 párrs. 9-11

Techtlajtlachialtia ijkuak tikitaj san niman moskaltia se konetsintli. Mota amo oui ijkuak ikaj moskaltia. Pero amo ijkon panoua ijkuak peua titlaneltokaj porque moneki timochijchikauaskej (1 Cor. 13:11; Heb. 6:1). Para okachi titlaneltokaskej moneki kuali timouikaskej iuan Jehová. Moneki matechpaleui iespíritu santo toTajtsin Dios tla tiknekij tikpiaskej kuali toyelis uan tla tiknekij tikchiuaskej tlen kuali. Noijki matikchiuakan seki tlamantli tlen techpaleuis satepan (Prov. 1:5). Jehová okinchijchi tlakatl uan siuatl (Gén. 1:27). Tlakatl uan siuatl tlatlamantli chijchitokej uan noijki tlatlamantli mokuayejyekouaj. Jehová okinmakak tlatlamantli inteki tlakatl uan siuatl. Para uelis kichiuaskej inteki moneki momachtiskej seki tlamantli uan kipiaskej kuali inyelis (Gén. 2:18). w23.12 18 párrs. 1, 2

Jesús okinekiaya oksekimej makinotsakan iTajtsin ika itoka. Xamo ijkuakon sekimej tlen okinyekanayaj religiones okineltokayaj amo omonekiaya kijtoskej itoka toTajtsin Dios porque sapanoua chipauak. Pero Jesús amo okichi ijkon ken nonmej tlakamej. Porque iTlajtol toTajtsin Dios amo ijkon kijtoua. Ikinon ye nochipa okiueyichi itoka iTajtsin. Matimokuayejyekokan tlen opanok ompa altepetl Gerasa. Jesús okipajti se tlakatl tlen okinpiaya miakej ejekamej. Akinmej ompa okatkaj sapanoua omomojtijkej uan okitlatlaujtijkej Jesús makisa itech non altepetl (Mar. 5:​16, 17). Pero Jesús okinekiaya nochtin makixmatikan itoka Jehová. Ikinon ijkuak yiyaskia okilui tlakatl makinmilui oksekimej Jehová okipaleui (Mar. 5:19). Jesús noijki kineki nochtin matikinmatiltikan itoka Jehová (Mat. 24:14; 28:20). Tikyolpaktiaj ijkuak ijkon tikchiuaj. w24.02 10 párr. 10

Sapanoua tipakij tipouij itech ialtepe Jehová. Tikatej itlamian tonalmej ikinon panotok miak tlamantli pero tejuan san sekan tikatej porque tipouij itech ialtepe Jehová (Sal. 133:1). ToTajtsin Dios techpaleuia matiyolpakikan iuan tofamilia (Efes. 5:​33–6:1). Noijki techpaleuia matiyetokan tiixtlamatkej uan matiyolpakikan maski ualeua amo kuali timomachiliskej. Pero ualeua moneki timochijchikauaskej tla tiknekij tiktekichiuiliskej Jehová. ¿Tleka ijkon tikijtouaj? Porque uelis techyolkokos tlen oksekimej kichiuaj noso tlen techiluiaj. Noijki ualeua timoyolkokoskej porque timotlapololtiaj. Axkan timomachtiskej Jehová techpaleuis matiktekichiuilikan maski techyolkokos se tokni, tonamik noso tosiua uan ijkuak timotlapololtiaj. w24.03 14 párrs. 1, 2

Ualeua tikmatiskej tlen okichijkej sekimej tokniuan para okachi kitekichiuiliskej Jehová. Xamo okiselitoj tlamachtil para matetlapouikan Tekiuajkayotl noso ochantitoj kanin okachi moneki matetlapouikan. Te noijki uelis ijkon tikchiuas tla tiueli. Porque akinmej tiktekichiuiliaj Jehová nochipa tikitaj ken uelis okachi titetlapouiskej (Hech. 16:9). Pero ¿tlen tikchiuas tla tikita amo tiueli? Amo ximokuayejyeko amitlaj mopati. Okachi miak ipati xitlaxiko (Mat. 10:22). Amo matikilkauakan Jehová yolpaki ijkuak timochijchikauaj tikchiuaj nochi tlen tiuelij. Ijkon uelis nochipa tikchiuaskej ken Jesús okichi maski yotimoapolaktijkej (Sal. 26:1). w24.03 10 párr. 11

ToTajtsin Dios kijtoua techtlapojpoluis tla timoyolkopaj (Sal. 86:5). Ikinon tla yotimoyolkopkej matikneltokakan yotechtlapojpolui porque ye melauak kichiua tlen kijtoua. Matikilnamiktokan Jehová techajsikamati uan amo techiluia matikchiuakan tlen amo tiuelij. Ye kipatioita tlen tikchiuaj tla timochijchikauaj tikchiuaskej ika nochi toyolo. Matimokuayejyekokan ken yiuejkika sekimej okitekichiuilijkej Jehová ika nochi inyolo. Apóstol Pablo miak xiuitl okitekichiuili Jehová. Ye uejka oyajki uan otlapaleui mamomiaktilikan tlanechikolmej. Pero satepan ayakmo okachi ueli otetlapoui ijkon ken achto okichiuaya. Non amo kijtosneki ayakmo okiyolpaktiaya Jehová. Pablo omochijchikauaya kitekichiuilis toTajtsin Dios uan ye okiteochi (Hech. 28:​30, 31). Tejuan noijki ualeua amo tiktekichiuiliaj Jehová ijkon ken tiknekiskiaj. Pero ye kipatioita tiktekichiuiliaj ika nochi toyolo. w24.03 27 párrs. 7, 9

Jesús okinmititi imachtijkauan ken motlatlaujtiskej. Ye nochipa omotlatlaujti ijkuak okitekichiuili toTajtsin Dios nikan tlaltikpak. Ye okitak ken kitlatlaujtiskia toTajtsin Dios maski amo omajxiliaya uan miakej iuan okatkaj (Mar. 6:​31, 45, 46). Jesús omeuaya ijkuak otlayouatoka uan okitlatlaujtiaya iTajtsin. Se tonal, omotlatlaujti youak porque omonekiaya kichiuas itlaj miak ipati (Luc. 6:​12, 13). Jesús miak uelta okitlatlaujti Jehová ijkuak yikimiktiskiaj. Omotlatlaujti porque kichiuaskia itlaj sapanoua oui (Mat. 26:​39, 42, 44). Jesús techmachtia uelis timajxiliskej tiktlatlaujtiskej Jehová maski tikchiuaj miak tlamantli. Ijkon ken okichi Jesús xamo moneki kualkan timeuaskej noso okachi yiyouak tikochiskej. Ijkon tikititiskej Jehová tikpatioitaj techkauilia matiktlatlaujtikan. w23.05 3 párrs. 4, 5

Ijkuak omoijkuilo nin versículo okinekiayaj kijtoskej Jehová sapanoua kintlasojtla tlapejpenalmej ijkon ken ijkuak chikauak yaui se aueyatl. Non kiteititia Jehová sapanoua kintlasojtla. Ijkon tlapejpenalmej kimatij toTajtsin Dios ‘kintlasojtla’ (Judas 1). Yejuan kineltokaj tlen okijto apóstol Juan: “¡Xikitakan ken sapanoua techtlasojtla toTajtsin Dios! Ye technotsa tiikoneuan” (1 Juan 3:1). Pero Jehová amo san kintlasojtla tlapejpenalmej. Ye kijtoua kintlasojtla nochtin itekipanojkauan. Matikitakan ken kiteititia. ¿Tlen yokichi Jehová tlen kiteititia sapanoua techtlasojtla? Ijkon okiteititi ijkuak topatka okitemakak iKone. Tlen Jehová okichi okiteititi amikaj uelis techtlasojtlas ijkon ken ye techtlasojtla (Juan 3:16; Rom. 5:8). w24.01 28 párrs. 9, 10

Nin versículo kijtoua tlen okichi David para ayakmo momojtis ijkuak okinekiayaj kimiktiskej. Ye omokuayejyeko Jehová kipaleuiskia satepan. Okineltokaya toTajtsin Dios kipaleuiskia ijkuak monekiskia. Porque Jehová yokijtojka David yetoskia tekiua ompa Israel (1 Sam. 16:​1, 13). David okineltokaya ijkon mochiuaskia porque Jehová ijkon okijto. ¿Tlen yokijto Jehová kichiuas? Jehová amo kijtoua axkan amo titlajyouiskej. Axkan uelis itlaj tikixnamikiskej pero Jehová yokijto kipojpolos nochi tlen techtlajyouiltia ijkuak tichantiskej itech xochitlali (Is. 25:​7-9). Jehová kipia chikaualistli para kinyolitis akinmej yoixpolikej, techpajtis uan kinmixpolos akinmej techkokoliaj (1 Juan 4:4). w24.01 6 párrs. 12, 13

Matikilnamiktokan tleka otimotemakakej ixpan Jehová uan otimoapolaktijkej. Ijkon otikchijkej porque tiknekij tikchiuaskej tlen Jehová kipaktia. Matikilnamikikan tlen otechpaleui matikneltokakan melauak tlen kijtoua Biblia. Otikixmatkej Jehová, opejki tikitaj ken toTajtsin, opejki tiktlakaitaj uan tiktlasojtlaj. Opejki okachi titlaneltokaj uan non otechpaleui matimoyolkopakan. Noijki otikkajkej tlen Jehová kikokolia uan opejki tikchiuaj tlen ye kipaktia. Otiyolpakej porque otikmatkej toTajtsin Dios techtlapojpoluia (Sal. 32:2). Opejki timonechikouaj uan opejki tikintlapouiaj oksekimej tlen otimomachtijtokaj. Axkan yotimoapolaktijkej uan tikchiuaj ken Cristo. Tikatej itech “ojtli non tewika kan nochipa se yolitos” uan tiknekij nochipa ompa tiyetoskej (Mat. 7:​13, 14). Nochipa matiktlasojtlakan Jehová uan matiktlakamatikan. w23.07 17 párr. 14; 19 párr. 19

Ijkuak timokuayejyekouaj otikiluijkej Jehová nochipa tiktekichiuiliskej, techpaleuia matikixtopeuakan tlen amo kuali. Ikinon amo keman tikijtoskej techpaktia ikaj tlen yomonamikti. Porque ijkuak otimotemakakej ixpan Jehová otikiluijkej amo keman ijkon tikchiuaskej. Amo timoyolkokoskej tla amo timokuayejyekouaj tlen amo kuali. Ijkon amo tikchiuaskej ken akinmej kichiuaj tlen amo kuali (Prov. 4:​14, 15). Tlen okichi Jesús uelis techpaleuis porque ye nochipa okiyolpakti iTajtsin. Tejuan noijki tiknekij nochipa tikyolpaktiskej toTajtsin Dios uan san niman tikixtopeuaskej tlen amo kipaktia (Mat. 4:10; Juan 8:29). Ijkuak itlaj tikixnamikij uan itlaj techyoltilana, techpaleuia matikteititikan tiknekij tikchiuaskej ijkon ken Jesús okichi. Pero tikilnamiktokej Jehová techpaleuis. w24.03 9, 10 párrs. 8-10