INEMILIS
Otikajsikej “perla non patio”
WINSTON uan Pamela Payne akin noijki kitokayotiaj Pam. Yejuan tlapaleuiaj Betel tlen kajki Australasia. Achto okixnamikej ouijkayotl pero ok yolpakij. Omonekiaya momatiskej kanin okintitlankej maski satepan oixpoliuik inkone. Pero maski okixnamikej ouijkayotl, yejuan kitlasojtlaj Jehová uan tokniuan. Noijki yolpakij tetlapouiaj. Axkan techiluiskej tlen okinpanok.
Winston, techtlapoui ken opejki tikixmati toTajtsin Dios.
Onimoskalti ompa Queensland, Australia. Nokalchanejkauan amo okipiayaj se religión. Otichantiayaj kanin okinmiskaltiayaj yolkamej, ik non, amikaj onikixmatiaya. Ijkuak onikpiaya doce xiuitl, oniknekiaya nikixmatis toTajtsin Dios. Oniktlatlaujti ma nechpaleui uan ijkon nikixmatiskia. Satepan oksekan onichantito uan opejki nitekipanoa ompa Adelaida (Australia Meridional). Ijkuak onikpiaya 21 xiuitl, onikixmatki Pamela ijkuak oninemito Sydney. Ye onechtlapoui itech se grupo tlen okiski Gran Bretaña uan yejuan okineltokayaj okatkaj israelitas. Ninmej kijtoaj pouij itech majtlaktli ikalchanejkauan Israel tlen opouiayaj itech tekiuajkayotl tlen okatka ik norte. Kijtoaj okinkixtijkej itech siglo chikueyi achto itech xiuitl se. Ijkuak onimokopki Adelaida, oniktlapoui se akin iuan onitekipanoaya tlen onechilui Pamela. Ye okimachtiayaj iTlaixpantijkauan Jehová. Ijkuak iuan onimotlapouijtoka, onikitak toTajtsin Dios onechnankilijtoka tlen oniktlajtlanili ijkuak onikatka nitsikitsin. Onimomachtijtoka itech akin otechchijchi uan itech iTekiuajkayo. ¡Onikajsik “perla non patio”! (Mat. 13:45, 46).
Pamela, tikmatij te noijki opejki tiktemoa “perla non patio”. ¿Ken otikajsik?
Nokalchanejkauan okipiayaj se religión uan ochantiayaj Coffs Harbour (Nueva Gales del Sur). Notatajuan uan nokojkoluan okineltokayaj tlen tlamachtiaj akinmej pouij itech se grupo tlen okiski Gran Bretaña uan okineltokayaj okatkaj israelitas. Ne uan ome nokniuan uan noprimos, otechmachtiayaj toTajtsin Dios kinpatioita ixuiuan británicos. Pero amo okachi onimouikaya iuan toTajtsin Dios. Ijkuak onikpiaya 14 xiuitl, onia onitlatemoto itech miakej teopanmej. Noijki onitlatemoto itech teopan tlen motokayotiaj Anglinas, kanin monechikoaj bautistas uan noijki kanin monechikoaj adventistas del séptimo día. Pero amo onechpaleuijkej ma nikixmati toTajtsin Dios.
Satepan nokalchanejkauan ochantitoj Sydney uan ompa onikixmatki Winston ijkuak ompa onemito. Ijkon ken yokijto, ijkuak otinemitoj otimotlapouijkej itech religión uan opejki momachtia Biblia iuan iTlaixpantijkauan Jehová. Ijkuak opejki nechtlajkuililia noijki onechijkuililiaya textos. Ijkuak yikin onechtlajkuilili amo onechpakti uan onikualanki. Satepan onikajsikamatki non tlen melauak tlamachtia Biblia.
1962 onichantito ompa Adelaida para nikitaskia Winston. Ye okinmilui sekimej tokniuan ma nechkalotikan. Onechkaloti Thomas uan Janice Sloman. Yejuan okatkaj misioneros Papúa Nueva Guinea. Kuali onechselijkej. Ijkuakon, onikpiaya 18 xiuitl uan yejuan onechpaleuijkej ma nikixmati Jehová uan okiteititijkej onechtlasojtlayaj. Opejki nimomachtia Biblia uan san niman onikneltokak melauak tlen kijtoa Biblia. Satepan, ne uan Winston otimonamiktijkej uan opejki tiktekichiuiliaj Jehová. Opejki tiktemoaj “perla non patio” maski otikixnamikiayaj ouijkayotl.
Winston, techtlapoui ken opejki tiktekichiuilia Jehová.
A. Itech mapa mota kanin otitlapaleuijkej itech circuito.
B. Sellos tlen okitlaliliayaj cartas. Achto Kiribati uan Tuvalu omotokayotiayaj islas Gilbert uan Ellice.
C. Kuajkualtsin isla carolina tlen kajki Funafuti nin poui itech altepetl Tuvalu. Miak uelta ompa otitetlajpalotoj ijkuak ayamo okatkaj misioneros.
Ijkuak otimonamiktijkej, okachi opejki tiktekichiuiliaj Jehová (1 Cor. 16:9). Opejki techpaleuia tokni Jack Porter. Ye okatka tlayekanki itech circuito uan noijki okintlajpaloaya tokniuan tlen inmiuan otimonechikoayaj. Axkan tejuan uan tokni Jack Porter titlapaleuiaj Betel tlen kajki Australasia. Ijkuakon Jack Porter uan isiua tlen itoka Roslyn otechpaleuijkej ma timochiuakan precursores uan otiuejkajkej makuili xiuitl. Ne onikpiaya 29 xiuitl ijkuak otechiluijkej ma titlapaleuikan itech circuito ompa islas del Pacífico sur uan ijkuakon tokniuan tlen katej Betel tlen kajki Fiyi okitayaj tekitl tlen ompa okichiuayaj. Otikintlajpalotoj tokniuan tlen katej islas de Kiribati, Nauru, Niue, Samoa, Samoa Norteamericana, Tokelau, Tonga, Tuvalu uan Vanuatu.
Sekimej tlen ochantiayaj itech islas amo kuali otechitayaj tiiTlaixpantijkauan Jehová, ik non, omonekiaya timomaluiskej (Mat. 10:16). Itech tlanechikolmej amo miakej omonechikoayaj tokniuan uan noijki amo okipiayaj kanin techkalotiskej. Ik non, otikinmiluiayaj tlen ik ompa ochantiayaj kox uelis techkalotiskiaj. Yejuan nochipa otechkalotiayaj.
Winston tikmatij te mitspaktia titlajtolkopas. ¿Ken opejki tikchiua?
Ijkuak okinmachtijkej tlayekankej ompa Samoa.
Tokniuan tlen ochantiayaj Tonga san okinpiayaj seki amatsitsintin uan amatlajkuilolmej ika tlajtoli tonga. Otitlamachtiayaj ika amochtli La verdad que lleva a vida eterna ika inglés. Pero ijkuak otikselitoj se metstli tlamachtil tlen kiseliaj akinmej tlayekanaj itech tlanechikol, eyi tlayekankej tlen okimatiayaj inglés okitlajtolkopkej ika tonga non amochtli. Nosiua okijkuilo uan satepan otikintitlanilijkej tokniuan tlen tekipanoaj Betel ompa Estados Unidos ma kinchijchiuakan amochmej. Nin tekitl ouejka ome metstli. Nin amochtli otlapaleui ma tikinmachtikan akinmej tlajtoaj tonga maski amo okachi kuali otiktlajtolkopkej. Nosiua uan ne amo otitlajtolkopayaj. Pero non otechpaleui ma techpakti titlajtolkopaskej.
Pamela, ¿itech islas kuali onanchantiayaj ijkon ken Australia?
Kanin otimokalotiayaj ijkuak otitlapaleuiayaj itech circuito.
Amo. Itech islas sapanoa moyotla, tlatotonia, tlasiaua, onka miakej kimichimej, onka kokolistli uan ualeua amo otikpiayaj tlen tikkuaskej. Pero otichantiayaj itech kali tlen ochijchitoka ika sakatl uan amo okipiaya tepamitl. Ompa otimotlaliayaj uan otikitayaj ueyi atl. Yoak otikitayaj ken otlauiaya metstli uan otikinmitayaj soyamej uan noijki metstli okitlauiliaya ueyi atl. Non otechpaleuiaya ma timokuayejyekokan uan ma timotlatlaujtikan. Ijkon amo otimoyolkokoayaj.
Noijki otechpaktiaya tlen kichiuaj konemej. Otechuetskitiayaj uan otikintlajtlachialtiayaj ijkuak otechitayaj tejuan tiixchipajkej. Se tonal, ijkuak otiajkej itech isla Niue, se chokotsin opejki kikitskia ima Winston uan okilui: “Nechpaktia moijuio”. Non chokotsin amo keman okitaya ikaj sapanoa tsojmio uan amo okimatiaya ken kijtos.
Otechyolkokoaya ijkuak otikinmitayaj akinmej ompa chantij amitlaj kipiaj. Itech non isla tlakualtsin pero amo okatkaj akinmej tlapajtiaj uan amo okachi okatka atl chipauak. Pero tokniuan amitlaj okintekipachoaya. Oyolpakiayaj porque okatkaj iuan inkalchanejkauan uan okipiayaj kanin kiueyichiuaskej Jehová. Non otechpaleui ma tiktekichiuilikan Jehová uan amo ma tiktemokan miak tlamantli.
Pamela, tikmatij omonekiaya tiatlakuiti uan otitlakaualchiuaya. ¿Ken otikchiuaya?
Pamela otlapaki ijkuak otikintlajpalotoj tokniuan ompa Tonga.
Niktlasojkamatilia notajtsin porque onechmachti miak tlamantli tlen onechpaleui. Onechmachti ma nitlatlati uan ompa ma nitlakualchiua. Ijkuak otikintlajpalotoj tokniuan ompa Kiribati, otechkalotijkej itech se kaltsintli tlen ikuapak otsaktoka ika sakatl, tepamitl otsaktoka ika akatl uan ipan tlali okitlalilijkej xali uan okipiaya corales tlen yotlajtlapankej. Onitlachkuak uan ompa onitlatlatiaya ika ieuayo cocos uan ompa onitlakualchiuaya. Ijkuak oniatlakuito, onikinmajsitoj miakej siuamej okikixtiayaj atl. Okikixtiayaj atl ika se mekatl tlen okilpiliayaj se kuauitl tlen okipiaya kanaj ome metros ken yetoskia kinkitskiskiaj michimej. Pero nin kuauitl okipiaya se lata. Ijkuak se siuatl okikixtiaya atl, okikajkauaya non lata uan totoka okoliniaya ima uan san niman okikixtiaya atl. Ne onikitaya amo oui. Pero ijkuak onikkajka non lata, san omotlauitek uan amitlaj atl omonechiko. Siuamej tlen ompa okatkaj opejki nechuetskiliaj. Pero se onechilui kox oniknekiaya ma nechmachti. Nochtin otechpaleuiayaj tlen ompa ochantiayaj uan okipiayaj kuali inyelis.
Tikmatij onamechpakti nantetlapouiskej itech islas. Techtlapouikan tlen okachi onamechpakti.
Winston: Oui otimomatkej itech nonmej islas. Nikilnamiki ijkuak tokniuan otechiluiayaj kox otiknekiayaj inmiuan titlakuaskej, otechmakayaj nochi tlakuali tlen okipiayaj. Ijkuak yikin otiajsitoj, otiktlamiayaj nochi tlakuali uan amo otikmatiayaj kox omonekiaya tikinkauiliskej. Pero ijkuak otikitakej amo omonekiaya ijkon tikchiuaskej, ayakmo keman ijkon otikchijkej. Maski amo kuali tlen otikchijkej, tokniuan nochipa otechajsikamatiayaj. Okinpaktiaya techitaskej ijkuak otiayaj tikintlajpalotiuij. Tokniuan tlen ompa ochantiayaj san tejuan otechixmatiayaj.
Ijkuak Winston otetlapouito uan oksekimej tokniuan ompa isla Niue.
Sapanoa omoyolchikauayaj tokniuan ijkuak otikintlajpaloayaj. Tlen ompa ochantiayaj okijtoayaj tokniuan okitlalijkej inreligión. Ik non, omotlajtlachialtiayaj ijkuak okimatkej tejuan tikinpiaj tokniuan itech nochi tlaltikpak.
Pamela: Nikilnamiki se tlamantli tlen onechpanok Kiribati. Ompa amo miakej tokniuan omonechikoayaj. San okatka se tlayekanki itoka Itinikai Matera. Ye omochijchikauaya kitas tlen otechpoloaya. Se tonal, oejkok kiualika se chikiuitl uan ompa okiualikaya se teksistli noso totoltetl. Onechilui: “Nin onamechualikili”. Ijkuakon sapanoa otechpaktiaya tikkuaskej teksistli noso totoltetl. Melauak otechyolini tlen okichi tokni.
Pamela, tikmatij oixpoliuik mokone. ¿Tlen omitsyolchika amo ximoyolkokojto?
Itech 1973 ijkuak otikatkaj Pacífico sur, onikmatki nikpiaskia nokone. Ik non, otimokopkej Australia. Pero opanok naui metstli noijtik oixpoliuik. Winston sapanoa omoyolkoko porque noijki okatka ikone. Yolik onimoyolchika pero ok onimoyolkokoaya. Pero okiski revista Akin Tetlapouijtok 15 de abril 2009 itech sección: “Sekimej techtlajtlaniaj”. “Si una criatura muere en el vientre materno, ¿volverá a la vida en la resurrección?”. Sapanoa onechpaleui porque tlamachtil kijtoa Jehová kimati tlen kichiuas porque ye yolmelauak. Ye kitlajtlamis tlen amo kuali uan yokitlali iKone para “kipojpolos nochi tlan kichiwa n diablo” (1 Juan 3:8). Noijki otechpaleui ma tikpatioitakan “perla non patio” tlen tikpiaj tiiTlaixpantijkauan Jehová. Amo kuali timomachiliskiaj tla amo titlaneltokaskiaj itech Jehová.
Ijkuak oixpoliuik tokone oksepa opejki tiktekichiuiliaj Jehová. Seki metstli otitlapaleuijkej Betel tlen kajki ompa Australia uan satepan oksepa otechtitlankej ma titlapaleuitij itech circuito. Kanaj naui xiuitl otitlapaleuiayaj ompa Nueva Gales del Sur uan Sydney. Itech 1981 otechiluijkej ma titlapaleuitij Betel tlen kajki Australia uan axkan ok ompa tikatej.
Winston, ¿mitspaleuia nochi tlen omitspanok para xipoui itech comité tlen kiyekana Betel tlen kajki Australasia?
Sapanoa nechpaleuia. Achto, tokniuan tlen tekipanoaj Betel okitayaj tekitl tlen omochiuaya Samoa uan Samoa Norteamericana. Satepan Betel tlen okatka Nueva Zelanda okisetilijkej uan tlen kajki Australia. Axkan Betel tlen kajki Australasia kita tekitl tlen mochiua Australia, las islas Cook, Niue, Nueva Zelanda, Samoa, Samoa Norteamericana, Timor Oriental, Tokelau uan Tonga. Yotikintlajpalotoj ninmej altepemej porque tokniuan tlen katej Betel techiluiaj ma tikintlajpalotij.
Winston uan Pamela katej ompa Betel tlen kajki Australasia
Nikneki namechiluis amo san akinmej yikipiaj miak xiuitl kinekij kixmatiskej toTajtsin Dios. Telpokamej uan ichpokamej noijki kinekij kajsiskej “perla non patio” maski inkalchanejkauan amo kinekij kimatiskej tlen tlamachtia Biblia (2 Rey. 5:2, 3; 2 Crón. 34:1-3). Jehová kineki ma momakixtikan telpokamej uan ichpokamej uan noijki akinmej yikipiaj miak xiuitl.
Yopanok kanaj cincuenta xiuitl ijkuak ne uan nosiua opejki tiknekij tikixmatiskej toTajtsin Dios. Amo otikmatiayaj tlen tikchiuaskiaj. Melauak iTekiuajkayo toTajtsin Dios se “perla non patio”. Tiknekij nochipa tikpatioitaskej.