¿Ken uelis tikixmatiskej toTajtsin Dios?

Uelis tikixmatiskej Jehová tla tiktlajtoltiaj Biblia. Yiuejkika, toTajtsin Dios okinpejpenki sekimej tlakamej pampa ma kijkuilokan ikuayejyekoluan toTajtsin Dios. Non tlajkuilolmej moixmatij ken Biblia. Axan uelis tikixmatiskej toTajtsin Dios tla tiktlajtoltiaj Biblia. Nin kipia itlajtoluan Jehová, ik non, noijki moixmati ken iTlajtol toTajtsin Dios. Uelis tikneltokaskej tlen kijtoa Biblia pampa Jehová amo keman tekajkayaua. “Porque tikmatij nik in Dios mach tekajkayaj.” (Hebreos 6:18.) Ik non, iTlajtol toTajtsin Dios kijtoa tlen melauak (Juan 17:17).

Biblia se ueyi tetliokolil tlen otikselijkej itech toTajtsin Dios. Nin ken se amatlajkuilol tlen kintlajkuililia ikoneuan se teta tlen tetlasojtla. Techiluia ke toTajtsin Dios okijto kikuepas kualtsin Tlaltikpak kanin tinemiskej, kijtosneki, se xochitlal. Techiluia tlen okichi toTajtsin Dios yiuejkika, tlen axkan kichijtok uan tlen kichiuas satepan pampa ikoneuan yolmelajkej. Noijki techpaleuia ma moyektlali tlen techtlajyouiltia uan ma tikpiakan pakilistli (2 Timoteo 3:16, 17).

Itlaixpantijkauan Jehová yejuan iyolikniuan toTajtsin Dios; mitspaleuiskej xikajsikamati tlen tlamachtia Biblia. San moneki tikinmiluis tikneki timomachtis Biblia. Amo mitstlajtlaniliskej tomin tla mitsmachtiaj (Mateo 10:8). Noijki, uelis timonechikos iuan akinmej kichiuaj ken Cristo, kanin kiueyichiuaj toTajtsin Dios itech kalmej kanin monechikoaj iTlaixpantijkauan Jehová. Tla timonechikoa, moskaltis totoka motlamatilis itech toTajtsin Dios.

Uelis tikixmatiskej toTajtsin Dios tla timokuayejyekoaj itech tlen yokichijchi. Biblia kijtoa: “Dios [...] okichij in iluikak [uan] tlaltikpak” (Hechos 14:15). Ijkuak Jehová okichijchi “iluikak”, noijki okichijchi Tonaltsin. Ijkuakon, ¿tlen techititia nin itech toTajtsin Dios? Techititia Jehová san ye kipia miak chikaualistli. San ye ueli okichijchi itlaj tlen okachi ueyi ken Tonaltsin. Noijki techititia Jehová san ye ixtlamatki, pampa moneki ixtlamatilistli pampa mochijchiuas Tonaltsin, tlen techtotonia uan techtlauilia, uan amo keman seui.

Tlen Jehová okichijchi techititia ke techtlasojtla. Ximokuayejyeko itech miak tlatlamantli tlakilotl tlen onka itech Tlaltikpak. Jehová uelis techmakaskia san sekimej, noso nion se tlakilotl. Maski ijkon, ye otechmakak miakej tlakilolmej tlen tlatlamantli chijchijtok, sekimej uejueyi, sekimej tsitsikimej, oksekimej chichiltikej, sekimej xoxoktikej, uan tlatlamantli uelik. Nin techititia ke Jehová techtlasojtla, uan noijki techmaka tlen techpoloa uan san ye yolkuali (Salmo 104:24).