Tlamachtilmej para Toteki akinmej tikchiuaj ken Cristo
© 2022 Watch Tower Bible and Tract Society of Pennsylvania
6-12 DE MARZO
KEN TECHPALEUIA BIBLIA | 1 CRÓNICAS 23-26
“Levitas kuali otlapaleuiayaj itech teokali”
it-2-S pág. 214 párr. 1
Levitas
Ijkuak otlanauatiaya David, levitas kuali otlapaleuiayaj porque ye okinmilui makitakan tekitl, matlayekanakan, matlaixkomakakan, makinmaluikan puertas, makimaluikan tomin uan oksekimej okinmilui makinpaleuikan teopixkej itech teokali. Yejuan otlapaleuiayaj kanin otlakualchiuayaj, okinpaleuiayaj teopixkej ijkuak okitlamaniliayaj Jehová, ijkuak okinmiktiayaj yolkamej, ijkuak omonekiaya itlaj kichipauaskej, otlatamachiuayaj uan okichiuayaj okseki tlamantli. Okatkaj 24 grupos levitas tlen otlakuikayaj, noijki okatkaj 24 grupos teopixkej tlen omopatlatiayaj ijkuak otlapaleuiayaj. Yejuan okitayaj tlen tekitl kichiuaskiaj. Levitas tlen okinmaluiayaj puertas noijki okitaya akinmej ompa tlamaluiskiaj (1 Crón. 23: 25, 26; 2 Crón. 35:3-5, 10).
it-2-S pág. 893 párr. 1
Teopixki
Itech teokali teopixkej kuali oxexelitokaj uan okatkaj akinmej okinyekanayaj. Ualeua okitayaj tlen tekitl kichiuaskiaj. Okatkaj 24 grupos teopixkej uan sejse grupo otlapaleuiayaj se semana, ikinon otlapaleuiayaj ome uelta sejse xiuitl. Xamo nochtin teopixkej otlapaleuiayaj ijkuak oiluichiuayaj, porque non tonal okintemakaya miakej yolkamej. Ijkon opanok ijkuak okiyankuilijkej teokali (1 Crón. 24:1-18, 31; 2 Crón. 5:11; noijki xikita 2 Crón. 29:31-35; 30:23-25; 35:10-19). Se teopixki uelis tlapaleuiskia okseki tonal tla amo kintsakuiliskia oksekimej teopixkej tlen otlapaleuiayaj nonmej tonalmej. Ijkuak okatka Jesús, otlapaleuiayaj miakej teopixkej porque ijkon okijtouayaj incostumbres akinmej otlamachtiayaj. Ikinon omonekiaya kixejxeloskej tekitl sejse semana para familias tlen opouiayaj itech se grupo. Ijkon akinmej opouiayaj itech se familia uelis tlapaleuiskiaj se noso ome tonal.
it-2-S pág. 443 párr. 1
Tlatsotsonali
Ijkuak David otlayektlalijtoka para kichiuaskiaj iteokal Jehová, okinxelo 4,000 levitas tlen otlatsotsonayaj (1 Crón. 23:4, 5). Ompa opouiayaj 288 tlakamej tlen kuali okimatiayaj tlatsotsonaskej (1 Crón. 25: 7). Akinmej otlatsotsonayaj okinyekanayaj Asaf, Hermán uan Jedutún (xamo noijki omotokayotiaya Etán). Nonmej eyi tlakamej sapanoua okimatiayaj tlatsotsonaskej. Yejuan opouiayaj itech sejse ikone Leví tlen omotokayotiayaj Guersom, Qohat uan Merarí, nonmej eyi familias tlen opouiayaj itech Leví, omonekiaya tlatsotsonaskej itech iteokal Jehová (1 Crón. 6:16, 31-33, 39-44; 25:1-6). Nonmej eyi tlakamej okinpiayaj 24 inkoneuan uan opouiayaj inmiuan 288 tlakamej tlen okimatiayaj tlatsotsonaskej. Yejuan okichiuayaj suertes para kipejpenaskiaj akin kinyekanaskia sejse grupo tlen okipiayaj 11 tlakamej tlen otlatsotsonayaj. Okinpejpenayaj inkoneuan uan oksekimej levitas. Ikinon 288 ([1 + 11] × 24 = 288) levitas tlen kuali okimatiayaj tlatsotsonaskej okinxexelojkej ijkon ken teopixkej, okatkaj 24 grupos. Tla 3,712 tlakamej tlen omomachtijtokaj tlatsotsonaskej noijki oxexelitokaj itech 24 grupos xamo opouiayaj 155, noijki uelis tikajsikamatiskej sejse tlakatl omonekiaya kimachtis 13 levitas (1 Crón. 25:1-31). Teopixkej tlen okipitsayaj trompeta amo okinpouayaj inmiuan levitas (2 Crón. 5:12; noijki xikita Núm. 10:8).
it-2-S pág. 684 párr. 1
Akinmej okinmaluiayaj puertas
Itech teokali. Ijkuak tekiua David yimikiskia, kuali okinxexelo levitas uan akinmej otlapaleuiayaj itech teokali. Itech saiktlami grupo opouiayaj 4,000 tlakamej tlen okinmaluiayaj puertas. Chikome tonal omonekiayaj tekipanoskej kanin sejse grupo otlamaluiayaj. Omonekiaya nochipa kuali kimaluiskiaj ikal Jehová (1 Crón. 9:23-27; 23:1-6). Noijki omonekiaya kiseliskej tlen sekimej okiuikayaj itech teokali (2 Rey. 12:9; 22:4). Satepan teopixki Jehoiadá okintlali sekimej tlakamej makinmaluikan puertas itech teokali ijkuak okipejpenki Jehoás matlanauati porque Atalía okatka tekiua maski amo okinamikiaya (2 Rey. 11:4-8). Ijkuak tekiua Josías otlanauatijtoka okinpojpolo nochtin teotsitsintin uan okipaleuijkej akinmej okinmaluiayaj puertas, okikixtijkej itech teokali nochi tlen ika okiueyichiuaya Baal uan okitlatijkej (2 Rey. 23:4).
Matiktemokan ken techpaleuia Biblia
Tiyolpakij tikueyichiuaj Jehová ken ye kineki
10 Tikueyichiuaj Jehová ijkuak titlakuikaj iuan tokniuan (Sal. 28:7). Israelitas okipatioitayaj kitlakuikiliskej Jehová ijkuak okiueyichiuayaj. David okintlali ma tlakuikakan 288 levitas ompa teokali (1 Crón. 25:1, 6-8). Axkan uelis tikteititiskej tiktlasojtlaj Jehová ijkuak tiktlakuikiliaj ika nochi toyolo maski tikitaj oui titlakuikaskej. Ximokuayejyeko, ijkuak itlaj tikijtouaj ualeua timotlapololtiaj pero non amo kichiua ayakmo ma titlanankilikan ijkuak timonechikouaj uan ijkuak titetlapouiaj (Sant. 3:2). Maski timotlapololtiaj moneki nochipa tiktlakuikiliskej Jehová.
13-19 DE MARZO
KEN TECHPALEUIA BIBLIA | 1 CRÓNICAS 27-29
“Se tlakatl okiyektlapoui ikone tlen okitlasojtlaya”
w05-S 15/2 pág. 19 párr. 9
Matikteititikan melauak tikchiua ken Cristo
9 Matikitakan tlen melauak tlamachtia Biblia. Tiitekipanojkauan Jehová uelis ayakmo titlaneltokaskej tla amo timomachtiaj iTlajtol (Filipenses 1:9, 10). Maski yitikpiaj miak xiuitl noso amo, tinochtin moneki tikneltokaskej melauak tlen tlamachtia Biblia. Pablo okinmijkuilili tokniuan: “Kuali xikkakikah tlan nomechmatiltiah iwa xikmokawikah tlan kuali” (1 Tesalonicenses 5:21). Telpokamej uan ichpokamej tlen intatajuan iTlaixpantijkauan Jehová moneki inselti mouikaskej iuan Jehová. David okilui itelpoch Salomón: “Xikixmati iDios motajtsin uan xiktekichiuili ika nochi moyolo” (1 Crónicas 28:9). Salomón amo san omonekiaya kitas ken itajtsin otlaneltokaya, ye omonekiaya mochijchikauas kixmatis Jehová para ijkon kineltokilis. Ikinon okilui toTajtsin Dios: “Techpaleui maniyeto niixtlamatki uan techmachti para manikyekana nin altepetl” (2 Crónicas 1:10).
w12-S 15/4 pág. 16 párr. 13
Nochipa matiktekichiuilikan Jehová ika nochi toyolo
13 Amo san moneki timonechikoskej uan titetlapouiskej para tiktekichiuiliskej Jehová ika nochi toyolo, noijki moneki tikchiuaskej okseki tlamantli (2 Crón. 25:1, 2, 27). Tla se tokni ok kiyoltilana tlen yiuejkika okichiuaya, xamo Jehová ayakmo kiselis (Luc. 17:32). Tla ikaj kineki kalakis itech iTekiuajkayo toTajtsin Dios moneki kitlakamatis nin tlanauatil: “Xiktlawelitakah nochi tlan amokuali, iwa xikchiwakah tlan kuali” (Luc. 9:62; Rom. 12:9). Ikinon tinochtin moneki timomaluiskej para amitlaj tlen kiyekantok Satanás maski mota uelis techpaleuis noso techyoltilana makichiua ayakmo matiktekichiuilikan Jehová ika nochi toyolo (2 Cor. 11:14; xiktlajtolti Filipenses 3:13, 14).
“Ximoyolchikaua [...] uan xikchiua tlen moneki”
20 Ueyi tekiua David okilui ikone kipaleuiskia Jehová hasta ijkuak tlamiskia kichijchiuaskia teokali (1 Crón. 28:20). Salomón uelis omokuayejyeko itech non tlamantli, ik non, maski ok okatka telpochtli uan amo okimatiaya tlen kichiuas, okichijchi teokali. Okatka yolchikauak uan okichi tlen omonekiaya, Jehová okipaleui uan otlanki okichijchi teokali itech chikome xiuitl uan tlajko.
21 Ijkon ken Jehová okipaleui Salomón, tejuan noijki uelis techpaleuis ma tiyetokan tiyolchikauakej uan ma tikinpaleuikan tokalchanejkauan uan noijki ma titlapaleuikan itech tlanechikol (Is. 41:10, 13). Tla tiyolchikauakej uan tiktekichiuiliaj Jehová, ye techteochiuas axkan uan satepan. Ik non, ma tikchiuakan tlen okijto David: “Ximoyolchikaua [...] uan xikchiua tlen moneki”.
Matiktemokan ken techpaleuia Biblia
¿Tlen moneki tikchiuaskej para ok timouikaskej iuan se toyolikni?
David okinpixki miakej iyolikniuan ijkuak otlajyouijtoka. Se iyolikni omotokayotiaya Husai uan Biblia kijtoua ye omouikaya iuan David (2 Sam. 16:16; 1 Crón. 27:33). Husai xamo okipaleuiaya tekiua uan ualeua ichtaka okichiuaya seki tekitl tlen okinauatiaya tekiua.
Miakej israelitas okipaleuijkej Absalón ijkuak ye omochi tekiua ipatka David maski amo okinamikiaya. David otlajyoui porque ikone okixnamik uan noijki okixnamikej sekimej iyolikniuan. Pero Husai amo keman okika David uan okitemoto ijkuak ye ocholo. Noijki okipaleui David oksepa mamochiua tekiua maski uelis kimiktiskiaj. Ye okipaleui porque okatka iyolikni uan amo san porque okatka tekiua (2 Sam. 15:13-17, 32-37; 16:15-17:16).
20-26 DE MARZO
KEN TECHPALEUIA BIBLIA | 2 CRÓNICAS 1-4
“Amo kuali tlen okipejpenki tekiua Salomón”
it-1-S pág. 782 párr. 8
Soldados
Ijkuak Salomón otlanauatiaya, omopatlak ken okinyekanayaj soldados ompa Israel. Ijkuak ye otlanauatiaya nochtin omoyolseuijtokaj, maski ijkon okimiaktili icarros uan caballos tlen okinualikiliayaj desde Egipto (xikita CARRO). Para kipiaskia soldados kanin ochantiaya okinchijchijkej miakej kalmej kanin otlanauatiaya Salomón. (1 Rey. 4:26; 9:19; 10:26, 29; 2 Crón. 1:14-17). Pero Jehová amo okiteochi tlen okichi Salomón, ikinon ijkuak oixpoliuik itekiuajkayo omoxejxelo uan ayakmo miakej soldados omokajkej. Satepan Isaías okijkuilo: “¡Amo kuali kinpanos akinmej yauij Egipto para mopaleuiskej uan akinmej kineltokaj caballos tlen yauij guerra, yejuan kineltokaj uelis kinpaleuiskej carros porque sapanoua miakej uan caballos porque chikauakej, pero amo kineltokaj Santo tlen kajki Israel uan amo kitemouaj Jehová!” (Is. 31:1).
it-1-S pág. 435 párrs. 2, 3
Carro
Ijkuak otlanauatiaya Salomón altepetl Israel amo okinpiaya sapanoua miakej carros. ToTajtsin Dios okilui amo omonekiaya kinpias miakej carros uan caballos porque amo kipaleuiskia. ToTajtsin Dios okinauati Salomón amo makipia miakej carros tlen okintekitiltiaya caballos (Deut. 17:16). Samuel okinmilui israelitas tlajyouiskiaj porque okinekiayaj se tekiua makinauati. Ye okijto: “Kinuikas namokoneuan para kintlalis itech carros” (1 Sam. 8: 11). Ijkuak Absalón uan Adonías okinekiayaj tlanauatiskej ipatka David, otlanauatijkej makinchijchiuilikan se carro uan cincuenta tlakamej inmixpan mamotlalokan (2 Sam. 15:1; 1 Rey. 1:5). Ijkuak David okitlanili akin otlanauatiaya altepetl Zobá okimokauili cien caballos (2 Sam. 8:3, 4; 10:18).
Ijkuak Salomón otlanauatiaya okimiaktili soldados uan noijki oajsikej 1,400 carros (1 Rey. 10:26, 29; 2 Crón. 1:14, 17). Altepetl Jerusalén uan okseki altepetsitsintin okinpiayaj carros uan ompa okimaluiayaj nochi tlamantli tlen ika moteuiskia (1 Rey. 9:19, 22; 2 Crón. 8:6, 9; 9:25).
Matiktemokan ken techpaleuia Biblia
w05-S 1/12 pág. 19 párr. 6
Tlen okachi ipati omotlajtolti itech Segundo de Crónicas
1:11, 12. Tlen Salomón okitlajtlanili Jehová okiteititi ye okinekiaya ika nochi iyolo yetos ixtlamatki uan kimatis miak tlamantli. Noijki tlen tejuan tiktlajtlaniliaj Jehová kiteititia tlen tikpiaj itech toyolo, ikinon moneki tikitaskej tlen tiktlajtlaniliaj ijkuak timotlatlaujtia.
27 DE MARZO-2 DE ABRIL
KEN TECHPALEUIA BIBLIA | 2 CRÓNICAS 5-7
“Noyolo nochipa ompa yetos”
w02-S 15/11 pág. 5 párr. 1
Nochipa matimonechikokan iuan tokniuan
Ijkuak David otlanauatiaya ompa Jerusalén, okijto okinekiaya kichiuas se kali kanin nochipa kiueyichiuaskiaj Jehová. Pero David oyaya guerras ikinon toTajtsin Dios okijto ye amo kichijchiuiliskia ikal. Jehová okipejpenki se ikone David tlen omotokayotiaya Salomón para makichijchiua non kali (1 Crónicas 22:6-10). Chikome xiuitl uan tlajto ouejkajkej okichijchijkej teokali uan Salomón okiyankuili itech xiuitl 1026 achto itech xiuitl se. Jehová okipakti non teokali uan okijto: “Yonikueyichi nin kali tlen otikchijchi uan otiktlali notoka uan nochipa ijkon kipias, uan noixtololouan uan noyolo nochipa ompa yetoskej” (1 Reyes 9:3). Tla israelitas nochipa kichiuaskiaj tlen kuali, Jehová nochipa kiseliskia non kali. Pero tla kichiuaskiaj tlen amo kuali, Jehová ayakmo kimaluiskia non kali uan kixixiniskiaj (1 Reyes 9:4-9; 2 Crónicas 7:16, 19, 20).
it-2-S pág. 1098 párr. 3
Teokali
Tlen yiuejkika opanok. Teokali okatka hasta itech 607 achto itech xiuitl se, porque non xiuitl okipojpolo tekiua Nabucodonosor (2 Rey. 25:9; 2 Crón. 36:19; Jer. 52:13). ToTajtsin Dios okitekauili okseki altepemej makitlajyouiltikan Judá uan Jerusalén. Ikinon ualeua okiuikayaj nochi tlen okatka itech teokali porque yejuan okinueyichiuaya teotsitsintin, ualeua teokali amikaj okimaluiaya. Sisaq tlen otlanauatiaya ompa Egipto okichtek tlen okatka teokali itech 9 93 achto itech xiuitl se. Ijkuak otlanauatijtoka Rehoboam, ikone Salomón, yikin okipiaya 33 xiuitl okiyankuilijka teokali (1 Rey. 14:25, 26; 2 Crón. 12:9). Tekiua Asá otlanauati itech xiuitl 977-937 achto itech xiuitl se, ye okitlakaitaya ikal Jehová pero okinekiaya kimaluis Jerusalén ikinon okikajkaya tekiua Ben-hadad I tlen otlanauatiaya Siria ijkuak okimakak oro uan plata tlen okatka itech teokali. Para ayakmo mamouika iuan Baasá tlen otlanauatiaya Israel (1 Rey. 15:18, 19; 2 Crón. 15:17, 18; 16:2, 39).
Matiktemokan ken techpaleuia Biblia
w10-S 1/12 pág. 11 párr. 7
Jehová kuali techixmati
Tlen okijto Salomón sapanoua techyolchikaua. Xamo amikaj uelis kajsikamatis tlen techpanotok (Proverbios 14:10). Pero Jehová sapanoua techtlasojtla uan kimati ijkuak timoyolkokouaj. Ikinon matikiluikan nochi tlen techtekipachoua. Kuali tikmatij ye techpaleuis matitlaxikokan porque Biblia kijtoua: “Nochi tlan nomechtekipachoah, xiktlalikah imak Dios, porke Ye [nomechmaluia]” (1 Ped. 5:7).
10-16 DE ABRIL
KEN TECHPALEUIA BIBLIA | 2 CRÓNICAS 8, 9
“Se tekiua okipatioitak ixtlamatilistli”
w99-S 1/11 pág. 20 párr. 4
Ijkuak tiktemakaj tlen tikpiaj
Ijkuak siuatl tlen otlanauatiaya Seba okitato Salomón omonekiaya majxilis porque uejka yaskia uan omonekiaya mochijchikauas para ompa ajsiti. Xamo altepetl Seba okatka ik kanin axkan kajki altepetl República del Yemen. Ikinon non siuatl oyajki kanaj mil seiscientos kilómetros hasta Jerusalén. Jesús okijto: “Reina de Sabá non walewatok ik tlatsintla”. ¿Tleka ijkon okichi? Biblia kijtoua: “Wejka owalewak, okikakiko n Salomón non satlawel ixtlamati” (Luc. 11:31).
w99-S 1/7 pág. 30 párrs. 4, 5
Sapanoua okinpaleui ijkuak omotakej
Siuatl tlen otlanauatiaya Seba oajsito ijkuak Jerusalén “sapanoua miakej iuan oyayaj ijkuak oajsito Jerusalén, camellos okiuikayaj aceite balsámico, sapanoua miak oro uan temej kualtsitsintin” (1 Rey. 10:2a). Ixtlamatkej kijtoua oyajkej sapanoua miakej porque tekiua okiuikaya sapanoua miak tomin.
Non siuatl okimatki Salomón okatka tekiua porque okiluiaya Jehová okipaleuiaya, ikinon ye amo san okitato para iuan motlapouiskia itech tomin. Okachi kuali okinekiaya kikakis Salomón porque okatka sapanoua ixtlamatki uan xamo okinekiaya kimatis akin toTajtsin Dios. Non siuatl xamo opouiaya itech ifamilia Sem noso Cam, akinmej okiueyichiuayaj Jehová.
w99-S 1/7 pág. 30 párr. 7
Sapanoua okinpaleui ijkuak omotakej
Siuatl tlen otlanauatiaya ompa Seba sapanoua omotlajtlachialti ijkuak okitak Salomón okatka ixtlamatki uan okipiaya sapanoua miak tlamantli (1 Reyes 10:4, 5). Sekimej ixtlamatkej kajsikamatij siuatl sapanoua omotlajtlachialti uan okse ixtlamatki kijtoua ouetski. Amo tikyekmatij, pero tlen ye okikak uan okitak sapanoua okitlajtlachialti. Okijto mayolpakikan akinmej okikakiayaj Salomón porque otlapouaya ika ixtlamatilistli uan okiueyichi Jehová porque okipejpenki matlanauati. Ik non, okimakak miak tlamantli tlen sapanoua patio, oro tlen okimakak, axkan ipati kanaj $824,460,000 (40,000,000 dólares [E.U.A]). Salomón okimakak siuatl miak tlamantli, nochi tlen okitlajtlanki (1 Reyes 10:6-13).
it-2-S pág. 913 párr. 4
Salomón
Ijkuak tekiua tlen okatka Seba okitak ken okatka teokali, ikal Salomón, ken otlakualchiuayaj, ken otekipanouaya itlakeualuan uan ken okitlamaniliaya toTajtsin Dios sapanoua omotlajtlachialti. Ye okitak Salomón okatka ixtlamatki uan nochi tlen okiluijkej melauak okatka. Ikinon okijto akinmej okitekichiuiliayaj Salomón oyolpakiayaj. Non siuatl okiueyichi Jehová porque ye okinmititi okintlasojtlaya israelitas, ijkuak okitlali Salomón ken tekiua uan ye kuali okipejpenki tlen kichiuaskia uan okichi tlen kuali (1 Rey. 10:4-9; 2 Crón. 9:3-8).
Matiktemokan ken techpaleuia Biblia
it-2-S pág. 1162
Trono
Itech Biblia tiktlajtoltiaj ken okatka itrono Salomón ijkuak ye otlanauatiaya Israel (1 Rey. 10:18-20; 2 Crón. 9:17-19). Xamo trono okatka ik portico itech se kali tlen okatka Jerusalén itech tepetl Moria (1 Rey. 7:7). Non ueyi trono ochijchitoka ika marfil uan ixko okipiaya oro tlen okichipajkej. Xamo okichijchijkej ika marfil ijkon ken okichijchijkej teokali tlen ochijchitoka ika kuauitl, oro uan ika marfil. Ikinon trono omotaya ochijchitoka ika marfil uan ika oro. Biblia kijtoua inajnakastlan trono okatkaj leones (2 Crón. 9:17-19). Sekimej okitekitiltiayaj leones para kiteititiskej okinnamikiayaj tlanauatiskej (Gén. 49:9, 10; Apoc. 5:5). Xamo doce leones opouiaya itech 1 2 tribus tlen okatka Israel uan xamo ijkon yejuan okiteititiaya okintlakaitiaya uan okinpaleuiaya, noijki kanin okintlaliayaj ikxiuan ochijchitokaj ika oro. Tlen okajsikej ixtlamatkej sapanoua tetlajtlachialti porque amo onka se trono tlen chijchitok ika marfil, oro uan kipiaj leones. Ikinon akin okijkuilo amochtli Crónicas okijto nion se tekiua okipixki ijkon itrono (2 Crón. 9:19).
17-23 DE ABRIL
KEN TECHPALEUIA BIBLIA | 2 CRÓNICAS 10-12
“Xikinkaki akinmej ixtlamatkej”
Xamo kiseliskia toTajtsin Dios
Xamo Rehoboam amo okimatiaya tlen kichiuas. Tla kichiuaskia tlen okinekiayaj israelitas, ye uan ikalchanejkauan ayakmo kipiaskia seki tlamantli. ¿Tlen okichi? Achto okintlajtlani tlayekankej tlen okipaleuiayaj Salomón. Satepan okintlajtlani telpokamej uan okiluijkej ma kintlajyouilti okachi israelitas uan ijkon okichi. Okinmilui: “Ne okachi namechtlajyouiltis ijkon ken yonikijto. Notajtsin onamechtlajyouiltiaya ika mekatl pero ne namechtlajyouiltis ika mekatl tlen yakauijuitso” (2 Crón. 10:6-14).
w01-S 1/9 págs. 28, 29
Kuali matikpejpenakan tlen tikchiuaskej
Kanin timonechikouaj katej tokniuan tlen kuali mouikaj iuan Jehová, uelis inmiuan timotlapouiskej ijkuak itlaj tiknekij tikpejpenaskej (Efesios 4:11, 12). Pero amo moneki nochtin tikintlajtlaniskej san para matechiluikan tlen tejuan tiknekij tikkakiskej uan tikchiuaskej tlen techiluiaj. Matikilnamikikan tlen okipanok Rehoboam uan tlen techmachtia. Ijkuak omonekiaya kipejpenas tlen kichiuas, tlayekankej tlen okipaleuiayaj itajtsin okiluijkej tlen omonekiaya kipejpenas pero amo okinkak. Ye okintlajtlani telpochmej tlen inmiuan omoskalti tlen kichiuaskia uan okichi tlen okiluijkej, ikinon amo kuali okipejpenki tlen kichiuas uan ijkon ayakmo otlanauati itech miakej altepemej (1 Reyes 12:1-17).
Ijkuak tikinmiluiskej oksekimej matechpaleuikan, moneki tikinmiluiskej akinmej kuali mouikaj iuan Jehová, akinmej kuali momachtiaj Biblia uan akinmej kitlakaitaj itlanauatiluan (Proverbios 1:5; 11:14; 13:20). Kuali matimokuayejyekokan tlen techmachtiaj principios bíblicos uan tlen otimomachtijkej. ITlajtol Jehová uelis techpaleuis kuali matikpejpenakan tlen tikchiuaskej (Filipenses 4:6, 7).
it-2-S pág. 805
Rehoboam
Rehoboam omoueyinekiaya uan okintlajyouiltiaya oksekimej ikinon okikajkej miakej tlen opouiaya itech altepetl. San ifamilias Judá uan Benjamín ok okipaleuiaya ifamilia David, noijki okipaleuiayaj nochtin teopixkej uan levitas uan sekimej tlen okikajkej majtlaktli familias (1 Rey. 12:16, 17; 2 Crón. 10:16, 17; 11:13, 14, 16).
Matiktemokan ken techpaleuia Biblia
it-1-S págs. 657, 658
Amo kuali ejekamej tlen omotayaj ken tentsomej
Tlen okijto Josué okiteititi sekimej israelitas okiueyichijkej teotsitsintin ijkuak okatkaj ompa Egipto (Jos. 24:14). Ezequiel okijto israelitas miak xiuitl satepan ok okinueyichijkej teotsitsintin (Ezeq. 23:8, 21). Ikinon sekimej ixtlamatkej kijtoua tlanauatil tlen okijtouaya israelitas amo omonekiaya kintlamaniliskej amo kuali ejekamej tlen omotayaj ken tentsomej (Lev. 17:1-7) uan ijkuak Jeroboán okintlalili teopixkej kanin kinueyichiuaskia teotsitsintin tlen omotaya ken tentsomej uan becerros (2 Crón. 11:15) kiteititia israelitas okinueyichiuayaj tentsomej ijkon ken ompa Egipto, okachi ijkon okichiuayaj Bajo Egipto. Heródoto (II, 46) okijto tlen okichiuaya ompa Egipto okichi griegos makiueyichiuakan Pan uan sátiros teotsitsintin tlen okinueyichiuaya kuajyo, satepan okijtojkej nonmej teotsitsintin okipiaya ikuakojuan, ikuitlapil uan ikxiuan ken se tentso. Ikinon axkan miakej kineltokaj Satanás kipia ikuakojuan, ikuitlapil uan ikxiuan ken se tentso porque non otlamachti iglesia del Medievo.
Pero Biblia amo tlamachtia kox amo kuali ejekamej omotaya ken tentsomej. Maski sekimej kineltokaj melauak okinueyichiuaya tentsomej noso teotsitsintin tlen ijkon omotaya, Biblia amo ijkon tlamachtia. Xamo san ijkon omokuayejyekouayaj akinmej okinueyichiuaya teotsitsintin noso xamo sekimej ijkon okinmiluiaya teotsitsintin tlen ika otlaueyichiuayaj. Ijkon panoua ika tlajtoli “teotsin” tlen yiuejkika okijtosnekiaya “kuitlatl” pero non amo kijtosneki nonmej teotsitsintin ochijchitoka ika kuitlatl (Lev. 26:30; Deut. 29:17).
24-30 DE ABRIL
KEN TECHPALEUIA BIBLIA | 2 CRÓNICAS 13-16
“Nochipa xikilui Jehová mamitspaleui”
¿Telpokamej ken uelis nantlapaleuiskej itech tlanechikol?
12 Ijkuak Asá okatka telpochtli okatka yolyamanki uan yolchikauak. Itajtsin omotokayotiaya Abías, ijkuak oixpoliuik Asá omochi tekiua, okinpojpolo teotsitsintin itech nochi ialtepe. Noijki okinmilui akinmej ochantiayaj Judá ma mouikakan iuan Jehová uan ma kintlakamatikan itlanauatiluan (2 Crón. 14:1-7). Ijkuak Zérah tlen ochantiaya Etiopía okinuikak 1,000,000 (se millón) soldados ompa Judá, Asá okilui Jehová ma kipaleui, ye okilui: “Oh Jehová te amo mitstekipachoua kox miakej noso amo akinmej tikinpaleuia noso kox kipiaj chikaualistli. Techpaleui oh Jehová toTajtsin Dios, porque melauak motech titlaneltokaj”. Tlen okijto Asá okiteititi okineltokaya Jehová kipaleuiskia ye uan ialtepe. Uan ijkon opanok “Jehová okintlanili etíopes” (2 Crón. 14:8-12).
¿Telpokamej ken uelis nantlapaleuiskej itech tlanechikol?
13 Temomojti ijkuak se millón soldados oajsitoj ialtepe Asá pero ye okineltokak Jehová kipaleuiskia, ik non, otlatlankej. Satepan tekiua Baasá tlen otlanauatiaya ompa Israel okinekiaya kinteuis. Maski amo okatka oui inmiuan moteuiskiaj Asá amo okilui Jehová ma kipaleui, okilui tekiua tlen otlanauatiaya Siria ma kipaleui. Amo kuali tlen okichi Asá, ik non, Jehová okitekitilti Hananí para ma kilui: “Ken otimopaleui itech ueyi tekiua tlen kajki Siria uan amo itech Jehová moTajtsin Dios, isoldados ueyi tekiua itech Siria momak ocholojkej”. Desde ijkuakon nochipa inmiuan omoteuijtokaj (2 Crón. 16:7, 9; 1 Rey. 15:32). ¿Tlen techmachtia tlen amo kuali okichi Asá?
¿Telpokamej ken uelis nantlapaleuiskej itech tlanechikol?
14 ¿Tlen mitsmachtia tlen okipanok tekiua Asá? Moneki tiyetos tiyolyamanki uan moneki titlaneltokas itech Jehová. Ijkuak otimoapolakti otikteititi otikpiaya chikauak motlaneltokilis uan otikneltokaya Jehová mitspaleuiskia. Jehová oyolpakik uan omitskauili xipoui iuan ifamilia. ¡Non se ueyi tetliokolil! Pero ok moneki ijkon tikchijtos. Xamo amo tikitas oui ijkon tikchiuas ijkuak itlaj miak ipati moneki tikpejpenas pero noijki ijkon moneki tikchiuas ijkuak tikpejpenas okseki tlamantli tlen ika timoyolpaktis, kanin titekipanos noso tlen tikneki tikchiuas satepan. Amo ximokuayejyeko te tikmati tlen tikpejpenas porque tiixtlamatki, xikintemo principios bíblicos tlen uelis mitspaleuiskej uan xikchiua (Prov. 3:5, 6). Tikyolpaktis Jehová tla ijkon tikchiuas uan mitstlakaitaskej tokniuan (xiktlajtolti 1 Timoteo 4:12).
Matiktemokan ken techpaleuia Biblia
Ma tiktekichiuilikan Jehová ika nochi toyolo
7 ¿Ken tikmatij kox tiktekichiuilijtokej Jehová ika nochi toyolo? Ma timotlajtlanikan: “¿Niktlakamati Jehová maski oui? ¿Nitlapaleuia ma yeto chipauak tlanechikol?”. Ma timokuayejyekokan itech Asá, omonekiaya yetos yolchikauak para kixnamikis isitsin. Ualeua moneki tiyetoskej tiyolchikauakej ken Asá. Se neskayotl, ¿tlen tikchiuaskej tla se tokalchanejka noso se toyolikni tlajtlakolchiua uan kikixtiaj itech tlanechikol porque amo moyolkuepa? ¿Ok iuan timouikaskej? ¿Tlen techiluis toyolo ma tikchiuakan?