Tlamachtilmej para Toteki akinmej tikchiuaj ken Cristo
3-9 DE JULIO
KEN TECHPALEUIA BIBLIA | ESDRAS 4-6
“Xiktekauilikan matekipanokan”
¿Tikitaj tlen okitak Zacarías?
13 Maski judíos amo okinkauiliayaj ma kichijchiuakan teokali, akinmej okinyekanaya, ueyi teopixki Jesúa (Josué) uan tekiua Zorobabel opejki kichijchiuaj (Esd. 5:1, 2). Xamo sekimej judíos okineltokayaj amo kuali tlen okichiuayaj porque akinmej okinkokoliayaj amo kinkauiliskiaj. Josué uan Zorobabel okiyekanayaj tekitl, ik non, omonekiaya kimatiskej Jehová kinpaleuiskia uan ye kema okinpaleui. Ma tikitakan ken okichi.
w86-S 1/2 pág. 29, recuadro párrs. 2, 3
Jehová tlachixtok inpan tlayekankej
Ijkuak israelitas okiskej Babilonia kanaj 16 xiuitl amitlaj okichijkej. Profetas Ageo uan Zacarías okinyolchikajkej israelitas uan opejkej kiyektlaliaj templo. Amo uejkika otekipanojkej uan tekiuajkej ayakmo okinkauilijkej matekipanokan. Okintlajtlanijkej akin okinmijkuilili amatl para makichiuakan kali (Esd. 5:1-3).
Yejuan okinekiayaj san niman makinnankilikan. Tla tlayekankej momojtiskiaj, ayakmo uelis kichiuaskiaj templo. Tla tlayekankej san kualaniskiaj, ayakmo kinkauiliskiaj makichiuakan templo. Xamo tekiua Zorobabel uan teopixki Josué okinyekankej tlayekankej uan yejuan okijkuilojkej tlen omonekiaya kijtoskej. Okinmilnamiktijkej tekiuajkej yiuejkika Ciro okinkauili makichiuakan templo. Tekiuajkej okimatiayaj persas amo kipatlaskiaj tlanauatil tlen yokatka, ikinon okinkauilijkej makichiuakan tlen okichijtokaj. Ijkon okichijkej templo hasta ijkuak tekiua Darío otlanauati uelis kichiuaskiaj tlen okichijtokaj (Esd. 5:11-17; 6:6-12).
¿Tikitaj tlen okitak Zacarías?
7 Satepan itlaj opanok uan non okinpaleui judíos. Itech 520 ijkuak ayamo oajsiaya xiuitl 1, ompa Persia otlanauatiaya Darío l. Ijkuak otlanauatijtoka ome xiuitl, okitak okatka se tlanauatil tlen okijtouaya judíos amo ma kichijchiuakan teokali pero ye okinkauili ma kitlamikan (Esd. 6:1-3). Tlen okinmiluijkej okichi ma yolpakikan. Satepan tekiua okinnauati oksekimej altepemej amo ma kintsakuilikan, noijki okinmilui ma kinmakakan tomin uan tlen kinekiskiaj para kichijchiuaskiaj teokali (Esd. 6:7-12). Ijkon judíos okitlamijkej teokali itech kanaj naui xiuitl, itech 5 15 ijkuak ayamo oajsiaya xiuitl 1 (Esd. 6:15).
¿Tikitaj tlen okitak Zacarías?
16 Jehová techyekana ika “tlakeuali yolmelajki uan ixtlamatki” (Mat. 24:45, TNM). Ualeua technauatia seki tlamantli tlen amo tikajsikamatij, ken ijkuak tlaxixini noso timokuayejyekouaj sapanoua techmaluia ijkuak onka se ueyi kokolistli. Ik non, ¿tlen moneki tikchiuaskej tla timokuayejyekouaj tlen technauatia amo techpaleuis? Xamo techpaleuis tla tikilnamikij ken okinpaleui judíos ijkuak okintlakamatkej tlen okinmiluijkej Josué uan Zorobabel. Noijki techpaleuis tlen yiuejkika okinpanok sekimej itekipanojkauan Jehová. Ye okinmilui tlen omonekiaya kichiuaskiaj, xamo yejuan omokuayejyekouayaj amo kinpaleuiskia pero satepan kema okinpaleui (Juec. 7:7; 8:10).
Matiktemokan ken techpaleuia Biblia
w93-S 15/6 pág. 32 párrs. 3-5
¿Uelis tikneltokaskej tlen kijtoua Biblia?
Tomin okichijchijkej ompa Tarso, se altepetl ik sureste kanin axkan kajki Turquía. Okichijkej kanaj itech siglo IV achto itech xiuitl 1 ijkuak otlanauatiaya tekiua persa Mazaeus. Itech tomin okijtouaya tekiua otlanauatiaya ik oeste kanin kajki aueyatl Éufrates. ¿Tleka sapanoua ipati tlen okijkuilojkej?
Porque non noijki kijtoua Biblia. Itech Esdras 5:6–6:13 kijtoua tekiua Darío okititlanili se carta tekiua Tatenai. Non carta okijtouaya kichijchiuaskiaj templo ompa Jerusalén. Esdras kuali okinchiuaya copias kanin okatkaj itlanauatiluan toTajtsin Dios ikinon tikmatij nochi tlen okijkuilo melauak opanok. Ijkuak tiktlajtoltis Esdras 5:6 uan 6:13 uelis tikitas tekiua Tatenai otlanauatijtoka ik oeste kanin kajki aueyatl Éufrates.
Esdras otlajkuilo kanaj itech xiuitl 460 achto itech xiuitl 1. Non kijtosneki otlajkuilo kanaj 100 xiuitl achto ijkuak ayamo okichijchiuayaj non tomin. Xamo miakej kijtoskej amo ipati kitokayotiskej se tekiua tlen youejka otlanauati. Pero akinmej okijkuilojkej Biblia okitlalijkej nochi tlen melauak maski seki tlamantli amo miak ipati. Non techpaleuia okachi matikneltokakan nochi tlen yejuan okijkuilojkej.
10-16 DE JULIO
KEN TECHPALEUIA BIBLIA | ESDRAS 7, 8
“Tlen okichi Esdras okiueyichi Jehová”
w00-S 1/10 pág. 14 párr. 8
Matiyolpakikan ijkuak timomachtiaj
8 Tejuan tikpatioitaj iTlajtol toTajtsin Dios ika nochi toyolo. Moneki tiyolpakiskej ijkuak timokuayejyekouaj tlen otiktlajtoltijkej. Matimomachtikan tlen okachi oui. Non kijtosneki kuali timokuayejyekoskej uan timotlatlaujtiskej. Matimoyektlalikan ijkuak tiktlajtoltiskej Biblia uan ijkuak timomachtiskej. Matikchiuakan ijkon ken okichi Esdras. Biblia kijtoua: “Esdras okiyektlali iyolo para kitaskia itlanauatil Jehová uan kitlakamatiskia uan kinmachtiskia israelitas tlanauatilmej uan tlaixkomakalistli” (Esd. 7:10). Matikchiuakan eyi tlamantli tlen okichi Esdras. Ye omomachtiaya, okichiuaya tlen omomachtiaya uan okinmachtiaya oksekimej.
si-S pág. 75 párr. 5
Amochtli 13: 1 Crónicas
5 San ye Esdras kuali okimatiaya kijkuilos tlen melauak opanok. “Esdras okiyektlali iyolo para kitaskia itlanauatil Jehová uan kitlakamatiskia uan kinmachtiskia israelitas tlanauatilmej uan tlaixkomakalistli” (Esd. 7:10). Jehová okipaleui ika iespíritu santo. Tekiua tlen okatka Persia okitak Esdras okatka ixtlamatki porque toTajtsin Dios okipaleuiaya. Ikinon okinauati makichiua seki tekitl ompa Judá (Esd. 7:12-26). Noijki okijkuilo tlen opanok porque Jehová okipaleui ika iespíritu santo uan noijki tekiua.
it-1-S pág. 1186 párr. 4
Akin yolyamanki
Techyekana ken moneki. Tla tiyolyamankej ixpan toTajtsin Dios, ye techyekanas uan techpaleuis. Esdras okipiaya miak tekitl porque okinyekanki kanaj 1,500 tlakamej ijkuak oyajkej Jerusalén. Pero ompa amo opouiayaj teopixkej, netineos, siuamej nion konemej. Noijki okiuikayaj miak oro uan plata para kiyektlaliskiaj templo tlen okatka Jerusalén. Omonekiaya ikaj kinmaluijtiaskia pero Esdras amo okilui tekiua tlen otlanauatiaya Persia makintitlanili sekimej soldados. Porque ijkon kiteititiskia okineltokaya uelis kipaleuiskiaj tlakamej pero ye yokijtojka: “ToTajtsin Dios sapanoua kinpaleuia nochtin akinmej kitemouaj”. Ikinon okinmilui israelitas amo matlakuakan uan ijkon kiteititiskiaj okitlakaitayaj Jehová. Okiluijkej toTajtsin Dios makinpaleui. Ye okinkak uan okinpaleui para amitlaj makinpano ijkuak oyajkej Jerusalén (Esd. 8:1-14, 21-32). Noijki toTajtsin Dios okipaleui Daniel ijkuak okatka Babilonia. Okititlanili se ángel porque okitlakaitaya. Noijki porque okilui makiyekana uan makipaleui mayeto ixtlamatki (Dan. 10:12).
Matiktemokan ken techpaleuia Biblia
w06-S 15/1 pág. 19 párr. 10
Tlen okachi ipati omotlajtolti itech amochtli Esdras
7:28–8:20. ¿Tleka miakej judíos amo okinekej yaskej iuan Esdras ompa Jerusalén? Amo miakej ochantiayaj Jerusalén maski yokipiaya kanaj 60 xiuitl sekimej judíos ompa oyajkej. Tla ompa mokopaskiaj, amo kipiaskiaj miak tlamantli uan tlajyouiskiaj. Porque miakej judíos yokipiayaj miak tomin uan Jerusalén amo okatka miak tlamantli. Noijki okitayaj oui mokopaskiaj Jerusalén. Akinmej omokopkej okineltokayaj Jehová kinpaleuiskia. Noijki okinekiayaj kiueyichiuaskej uan okatkaj yolchikauakej. Esdras omoyolchika porque Jehová okipaleui. Esdras okinyolchika 1,500 familias tlen okatkaj kanaj 6,000 personas. Yejuan omoyektlalijkej uan oyajkej Jerusalén. Satepan Esdras okse tlamantli okichi uan okipaleuijkej 38 levitas uan 220 netineos.
17-23 DE JULIO
KEN TECHPALEUIA BIBLIA | ESDRAS 9, 10
“Titlajyouiskej tla amo titetlakamatij”
w06-S 15/1 pág. 20 párr. 1
Tlen okachi ipati omotlajtolti itech amochtli Esdras
9:1, 2 ¿Tlajyouiskiaj tla monamiktiskiaj inuan akinmej ompa ochantiayaj? Israelitas omonekiaya kuali kiueyichiuaskej Jehová hasta ijkuak ualaskia Mesías. Ayakmo kuali kiueyichiuaskiaj Jehová tla monamiktiskiaj inuan akinmej amo okitekichiuiliayaj Jehová. Akinmej omonamiktijkej inuan akinmej okinueyichiuayaj okseki dioses satepan nochtin kinmijtlakoskiaj. Xamo ayakmo kiueyichiuaskiaj san toTajtsin Dios uan amikaj kichiaskia Mesías. Ikinon Esdras omotekipacho ijkuak okitak tlen okichijtokaj.
w09-S 1/10 pág. 10 párr. 6
¿Tlen kineki Jehová matikchiuakan?
Sapanoua techpaleuia tiktlakamatiskej toTajtsin Dios. Ijkon okijto Moisés itech versículo 13: “Xikintlakamati itlanauatiluan Jehová [...] para kuali tiyetos”. Kuali tiyetoskej tla tikchiuaskej tlen techiluia maski san tlen techtlajtlanilis. Matikilnamiktokan toTajtsin Dios “Ye n tlasojtlálistli” (1 Juan 4:8). Itlanauatiluan toTajtsin Dios techpaleuiaj axkan uan noijki techpaleuiskej satepan (Is. 48:17). Ijkon amo titlajyouiskej uan satepan techteochiuas ijkuak ualtlanauatis iTekiuajkayo.
Matiktemokan ken techpaleuia Biblia
w06-S 15/1 pág. 20 párr. 2
Tlen okachi ipati omotlajtolti itech amochtli Esdras
10:3, 44 ¿Tleka okinmiluijkej mayakan siuamej uan inkoneuan? Siuamej oksepa ualaskiaj tla mokauaskiaj inkoneuan. Noijki kuali tikmatij siuamej moneki kinmaluiskej inkoneuan ijkuak ok konemej.
24-30 DE JULIO
KEN TECHPALEUIA BIBLIA | NEHEMÍAS 1, 2
“San niman oniktlatlaujti toTajtsin Dios tlen kajki iluikak”
w08-S 15/2 pág. 3 párr. 5
Nochipa matikilnamiktokan Jehová
5 Ualeua amo tiuejkauaskej timotlatlaujtiskej. Se tlakatl tlen omotokayotiaya Nehemías okitekiliaya vino tekiua Artajerjes tlen okatka Persia. Se tonal tekiua okinekiaya kimatis tleka Nehemías omoyolkokouaya ikinon okitlajtlani: “¿Tlen tikneki tikchiuas?”. Nehemías ‘san niman okitlatlaujti toTajtsin Dios tlen kajki iluikak’. Ye san ichtaka omotlatlaujti uan amo ouejka pero Jehová okinankili. Tekiua okipaleui Nehemías makiyektlaliti tepamitl tlen okipiaya Jerusalén (xiktlajtolti Nehemías 2:1-8). Jehová technankilia maski san ichtaka timotlatlaujtiskej uan amo tiuejkauaskej.
be-S pág. 178 párr. 1
Ximokuayejyeko tlen tikijtos
Xamo ikaj mitsiluis xikyekilui tlen tikneltoka pero non tonal amo otimomachti tlen ye kineki kimatis. ¿Tlen mitspaleuis kuali xiknankili? Xikchiua ijkon ken Nehemías okichi. Ye achto ichtaka omotlatlaujti uan satepan okinankili tekiua Artajerjes (Neh. 2:4). Satepan ximokuayejyeko seki tlamantli tlen uelis tikijtos. Achto xikpejpena se noso ome tlamantli tlen tikyekiluis. Non tlamantli uelis tiktemos itech amochtli Razonamiento a partir de las Escrituras. Satepan xikinpejpena tlen textos tikiluis. Noijki ximokuayejyeko ken uelis kuali tiktlapouis uan ijkon mitsyekkakis. Ijkuakon xikilui tlen tikneltoka.
Matiktemokan ken techpaleuia Biblia
w86-S 15/2 pág. 25
Kiueyichiuaj Jehová ijkon ken moneki
Amo. Nehemías tlajka uan youak omotlatlaujtiaya porque Jerusalén amo okiyektlaliayaj (1:4, 6). Nehemías omotlatlaujti ijkon ken yokichijtoka ijkuak omotlapoui iuan tekiua Artajerjes para kiyektlalis tepamitl tlen okipiaya Jerusalén. Jehová okinankili uan okikauilijkej makiyektlaliti tepamitl.
¿Tlen techmachtia?: Nehemías nochipa okiluiaya Jehová makiyekana. Tejuan noijki nochipa matimotlatlaujtikan ijkuak itlaj tikchiuaskej uan matikkauilikan Jehová matechyekana (Rom. 12:12).
31 DE JULIO-6 DE AGOSTO
KEN TECHPALEUIA BIBLIA | NEHEMÍAS 3, 4
“¿Tikita amo ipati titlapaleuis?”
w06-S 1/2 pág. 9 párr. 9
Tlen okachi ipati omotlajtolti itech amochtli Nehemías
3:5, 27. Amo matikchiuakan ijkon ken sekimej teqoítas tlen omoueyinekiayaj. Yejuan amo okipatioitayaj tekitl tlen omochiuaya para kiueyichiuaskej Jehová. Matikchiuakan ijkon ken teqoítas tlen amo omoueyinekiayaj. Yejuan ika nochi inyolo otlapaleuijkej.
Jehová techpaleuia ma tiktekichiuilikan
11 Opanok miak siglos uan Jehová okinpaleui ichpokauan Salum uan oksekimej ma kiyektlalikan tepamitl tlen okiyaualoaya Jerusalén (Neh. 2:20; 3:12). Salum okatka tekiua pero ichpokauan sapanoa otlapaleuijkej maski okatka oui tekitl (Neh. 4:15-18). Amo ken akinmej okatkaj tecoítas. Porque yejuan amo otlapaleuitoj (Neh. 3:5). Xamo sapanoa oyolpakej ijkuak okitakej ipan cincuenta y dos tonalmej okichijkej non tekitl (Neh. 6:15). Axkan miakej tokniuan siuamej yolpakij ijkuak kinchijchiuaj kalmej kanin timonechikoaj noso ijkuak kinyektlaliaj. Sapanoa tlapaleuiaj porque kimatij kichiuaskej miak tlamantli uan yolpakij kichiuaskej non tekitl.
w04-S 1/8 pág. 18 párr. 16
Matikchiuakan ijkon ken Cristo
16 Tinochtin moneki tikchiuaskej ijkon ken Cristo maski yitikpiaj miak xiuitl noso tiichpochmej noso titelpochmej. Kanin timonechikouaj onka miak tekitl tlen uelis tikchiuaskej. Amo matimoyolkokokan tla techiluiaj matikchiuakan itlaj tlen amo miak ipati (1 Sam. 25:41; 2 Rey. 3:11). Tetajmej, ¿nankinyolchikauaj namokoneuan mayolpakikan ijkuak kinmiluiaj itlaj makichiuakan kanin timonechikouaj noso kanin mochiuaj uejueyij nechikolmej? ¿Kitaj namokoneuan nankichiuaj maski san tlen tekitl namechiluiskej xikchiuakan? Se tokni tlen tlapaleuia kanin kajki sede mundial kilnamiki tlen okichiuayaj itatajuan. Ye okijto: “Onikitak yejuan okipatioitayaj tlachipauaskej kanin otimonechikouayaj uan kanin mochiuaj uejueyij nechikolmej. Nochipa okinmiluiayaj tokniuan okinekiayaj tlapaleuiskej kanin omonechikouayaj noso kichiuaskiaj okseki tlamantli. Tlen yejuan okichijkej onechpaleui manikchiua san tlen tekitl ompa Betel”.
Matiktemokan ken techpaleuia Biblia
w06-S 1/2 pág. 9 párr. 1
Tlen okachi ipati omotlajtolti itech amochtli Nehemías
4:17, 18 ¿Ken uelis se tlakatl tekipanoskia san ika se ima? Amo oui okitayaj akinmej okimamayaj tlen ika otekipanouayaj. Ijkuak okimoajkolmamaltiayaj tlen ika otekipanouayaj, uelis kikitskijtiaskiaj san ika se inma uan ika okse inma okikitskijtiayaj intepos. Oksekimej tlen okiyektlaliayaj tepamitl okinnejnekiayaj nochi ome inmauan. Yejuan otlajkoilpitokaj uan ompa okiuikayaj inmiespada ijkuak otekipanouayaj. Ijkon uelis mopaleuiskiaj tla ikaj kintlajyouiltiskia.
7-13 DE AGOSTO
KEN TECHPALEUIA BIBLIA | NEHEMÍAS 5-7
“Nehemías otlapaleui uan amo san okinekiaya makipaleuikan”
w02-S 1/11 pág. 27 párr. 3
Achto otlapaleuiayaj okiueyichiuayaj Jehová uan axkan noijki
Nehemías amo san okijtouaya ken tekipanoskiaj oksekimej. Ye noijki okitemakak tlen okipiaya para kiueyichiuas Jehová. Okitemakak tomin uan ijkon okinpaleui israelitas tlen okatkaj ken tlakeualmej. Noijki okitetlanetiaya tomin maski amitlaj okitlaniliaya ijkuak okikopiliayaj tomin. Amo okinmilui makitlaxtlauikan porque okatka tekiua. Ye okintlamakaya 150 tlakamej uan oksekimej tlen oualayaj okseki altepemej. Mojmostla okimiktiaya se toro, chikuase ichkamej tojtomauakej uan totomej. Noijki ipan majtlaktli tonal okoniayaj tlatlamantli vino uan okitemakaya miak. Pero Nehemías nochi ye okikouaya (Neh. 5:8, 10, 14-18).
“Amo xikkaua ma uetsikan momauan”
16 Jehová okipaleui Nehemías uan judíos, ik non, omoyolchikajkej uan okichijkej tekitl tlen omonekiaya. San itech 5 2 tonalmej okichijchijkej tepamitl tlen okiyaualoaya Jerusalén (Nehemías 2:18, 6:15, 16). Pero Nehemías amo san otlachixtoka ijkuak oksekimej otekipanojtokaj. Ye noijki otlapaleui ma kichijchiuakan tepamitl (Nehemías 5:16). Axkan miakej tlayekankej kichiuaj ken Nehemías ijkuak tlapaleuiaj ma mochijchiuakan kalmej kanin timonechikoaj, ijkuak kinchipauaj noso kinyektlaliaj. Uan ken kintlasojtlaj inmikniuan, kinyolchikauaj akinmej kipiaj ouijkayotl ijkuak kintlajpalotiuij noso ijkuak inmiuan tetlapouiaj (xiktlajtolti Isaías 35:3, 4).
w00-S 1/2 pág. 32
¿Ken techilnamikis Jehová?
Biblia kiteititia toTajtsin Dios techilnamiki uan itlaj kichiua para techpaleuis. Matikitakan tlen okichi ijkuak yokipiaya 150 tonal otlaatenki. Biblia kijtoua: “Pero toTajtsin Dios amo okilka Noé […] okichi maejeka ipan tlaltikpak uan atl opejki temoua” (Gén. 8:1). Opanok miak xiuitl filisteos okichijkej ayakmo matlachia Sansón uan okijilpijkej. Ye omotlatlaujti: “ToTajtsin Dios amo okilka Noé [uan] okichi maejeka ipan tlaltikpak uan atl opejki temoua”. Jehová okilnamik uan okimakak chikaualistli makintlanili akinmej okikokoliayaj (Juec. 16:28-30). Jehová okiteochi Nehemías porque omochijchika makiueyichiuakan san Jehová ompa Jerusalén.
Matiktemokan ken techpaleuia Biblia
w07-S 1/7 pág. 30 párr. 15
“Ika tlan kuali xiktlanili tlan amokuali”
15 Saiktlami okiluijkej se israelita tlen itoka Semaya makikajkayaua Nehemías uan ijkon amo makitlakamati itlanauatil toTajtsin Dios. Non tlakatl okilui: “Matiktlalikan se tonal para timotaskej itech templo ikalijtik akin melauak toTajtsin Dios. Satepan timokaltsakuaskej porque mitsmiktikiuij, youak mitsmiktikiuij”. Okilui Nehemías mamotlatiti itech templo uan ijkon amo kimiktiskiaj. Nehemías amo okatka teopixki ikinon yetoskia tlajtlakoli tla ompa motlatiskia. ¿Ompa motlatiskia para amo makimiktikan uan ijkon amo kitlakamatiskia iTlanauatil toTajtsin Dios? Amo. Nehemías okinankili: “¿Uelis se tlakatl ijkon ken ne kalakis templo uan ok yoltos? ¡Amo nikalakis!”. ¿Tleka amo okikajkayajkej Nehemías? Ye okimatiaya maski Semaya okatka judío amo okititlanki toTajtsin Dios. Okimatiaya se profeta tlen amo tlakajkayaua amo kiluiskia amo makitlakamati iTlanauatil Jehová. Ijkon Nehemías oksepa amo okinkauili makikajkayauakan akinmej okikokoliayaj. Satepan okijto: “Opanok 52 tonal uan 25 de elul okitlamijkej tepamitl” (Neh. 6:10-15; Núm. 1:51; 18:7).
14-20 DE AGOSTO
KEN TECHPALEUIA BIBLIA | NEHEMÍAS 8, 9
“Timoyolchikauaj ijkuak tiktekichiuiliaj Jehová uan tiyolpakij”
w13-S 15/10 pág. 21 párr. 2
Kuali omoyektlalijkej para motlatlaujtiskej
2 Se metstli achto judíos otlanki okiyektlalijkej tepamitl tlen okipiaya Jerusalén (Neh. 6:15). Non tekitl okitlamijkej ipan 52 tonal uan satepan okinekiayaj okachi kiueyichiuaskej Jehová. Ijkuak opejki metstli tisri oyajkej okikakitoj Esdras uan oksekimej levitas ijkuak okitlajtoltiayaj uan okiyekijtouayaj iTlanauatil toTajtsin Dios (xikita achto dibujo). Oyayaj nochtin familias uan okinuikayaj inkoneuan tlen yokajsikamatiayaj tlen omoijtouaya. Nochtin omoketokaj uan kuali okikakiayaj tlen omoijtouaya desde kualkan hasta tlajkotonal. Kuali tlen okichiuayaj. Axkan timonechikouaj itech kalmej kuajkualtsitsintin. Pero ijkuak timonechikouaj ualeua timokuayejyekouaj okseki tlamantli tlen amitlaj ipati. ¿Ijkon techpanoua? Matikitakan tlen okichijkej israelitas. Tlen ompa okinmachtiayaj okikauayaj maajsi itech inyolo uan amo san okikakiayaj. Ikinon opejki chokaj porque okitakej amo okitlakamatiayaj iTlanauatil Jehová (Neh. 8:1-9).
w07-S 15/7 pág. 22 párrs. 9, 10
Espíritu santo techpaleuia matiktekichiuilikan toTajtsin Dios
9 Kuali timomachiliaj ijkuak tipakij porque toTajtsin Dios ye “yolpaki” (1 Tim. 1:11, TNM; Sal. 104:31). Jesús paki kitekichiuilia iTajtsin (Sal. 40:8; Heb. 10:7-9). Tejuan tipakij porque ‘ipakilis Jehová techyolchikaua’ (Neh. 8:10).
10 Jehová kichiua matiyolpakikan ikinon tipakij ijkuak tiktekichiuiliaj maski titlajyouiaj, timoyolkokouaj noso techtlajyouiltiaj. ¡Sapanoua tiyolpakij porque ‘tikajsij ixtlamatilis toTajtsin Dios’! (Prov. 2:1-5). Tejuan tipakij kuali timouikaj iuan toTajtsin Dios porque tikixmatij iTlajtol, titlaneltokaj uan tikmatij omotemakak topatka iKone (1 Juan 2:1, 2). Noijki tipakij porque tipouij itech ialtepe Jehová uan tikinpiaj miakej tokniuan itech nochi tlaltikpak (Sof. 3:9; Ageo 2:7). Tiyolpakij ijkuak titetlapouiaj uan tikinmiluiaj oksekimej tlen kichiuas iTekiuajkayo toTajtsin Dios (Mat. 6:9, 10; 24:14, TNM). Tipakij porque tikmatij satepan nochipa tiyoltoskej (Juan 17:3). Sapanoua tiyolpakij porque tikmatij Jehová ijkon kichiuas (Deut. 16:15).
Matiktemokan ken techpaleuia Biblia
it-1-S pág. 171 párr. 2
Arameo
Opanok seki xiuitl ijkuak judíos okiskej Babilonia, teopixki Esdras okintlajtoltili Tlanauatil akinmej ompa omonechikojkej. Miakej levitas okinyekiluijkej akinmej ompa okatkaj. Ijkon ken kijtoua Nehemías 8:8: “Yejuan chikauak okitlajtoltijtokaj amochtli itech iTlanauatil akin melauak toTajtsin Dios, kuali okiyekijtouayaj uan okijtouayaj tlen kijtosneki; non okinpaleui makajsikamatikan tlen okitlajtoltiayaj”. Xamo tlen okitlajtoltijkej okitlajtolkoptiajkej ika arameo porque israelitas omomachtijkej arameo ijkuak okatkaj Babilonia. Xamo noijki okiyekijtojkej tlen kijtosneki tlen okitlajtoltijkej. Ijkon israelitas okachi okajsikamatkej tlen kijtosneki tlen okinmiluijtokaj.
21-27 DE AGOSTO
KEN TECHPALEUIA BIBLIA | NEHEMÍAS 10, 11
“Okikajkej seki tlamantli porque okitlakamatkej Jehová”
w98-S 15/10 pág. 22 párr. 13
Kuali tlen okichijkej ompa Jerusalén
13 Nehemías okijto itlaj kichiuaskia. Tlen kichiuaskia okijkuilojkej uan okitlalilijkej sello. Tlen okichi tlapaleuiskia ijkuak iluichiuaskiaj porque otlanki okiyektlalijkej tepamitl. Noijki omonekiaya kichiuas okseki tlamantli. Jerusalén okiyaualouaya ueyi tepamitl uan okinpiaya 12 puertas pero amo miakej ompa ochantiayaj. “Altepetl okatka sapanoua ueyi pero amo miakej ompa ochantiayaj” maski sekimej israelitas ompa yochantiayaj (Neh. 7:4). Ikinon “oksekimej omotlatlankej para kitaskiaj akinmej yaskiaj Jerusalén. Ijkon tla okatkaj majtlaktli familias san se familia yaskia Jerusalén, nin altepetl okatka chipauak”. Yejuan okijtojkej kichiuaskiaj tlen okinmiluijkej uan “akinmej opouiayaj itech non altepetl okinmiluijkej akinmej okinekej yaskej Jerusalén makinteochiua toTajtsin Dios” (Neh. 11:1, 2). Tlen okichijkej kinpaleuia tokniuan porque yauij tlapaleuitiuij kanin okachi moneki.
w86-S 15/2 pág. 26
Okiueyichijkej Jehová ijkon ken omonekiaya
Xamo okinpolouaya tomin ijkuak yejuan ochantitoj Jerusalén porque okikajtejkej nochi tlen okipiayaj. Noijki uelis itlaj kinpanoskia akinmej ochantiayaj Jerusalén. Pero oksekimej israelitas okinyolchikajkej akinmej ompa yaskiaj uan okitlatlaujtijkej Jehová makinteochiua.
Jehová kinteochiua akinmej itech tlaneltokaj
15 Ijkuak otimotemakakej iixpan Jehová, otiktemakakej totlajtol. Otikiluijkej nochipa tikchiuaskej itlanekilis, maski san tlen panos. Uan kuali otikmatiayaj ijkuak ijkon tikchiuaskiaj, tikpoloskiaj miak tlamantli. Axkan, motas tla melauak tiknekij tiktekichiuiliskej Jehová, ijkuak techtlajtlaniliskej ma tikchiuakan itlaj tlen amo okachi techpaktis. Tikteititiskej chikauak totlaneltokilis tla tiktekichiuiliaj toTajtsin Dios maski ualeua oui yetos. Okachi miak ipati tlateochiualismej tlen techmaka Jehová uan amo nochi tlen tikpoloskej pampa tiktekichiuiliaj (Malaquías 3:10). Axkan oksepa ma timotlapouikan itech Jefté, ¿tlen okipanok iichpoch?
Matiktemokan ken techpaleuia Biblia
w06-S 1/2 pág. 11 párr. 1
Tlen okachi ipati omotlajtolti itech amochtli Nehemías
10:34 ¿Tleka okinnauatijkej sekimej israelitas makiuikakan kouitl? Tlanauatil tlen okijkuilo Moisés amo okijtouaya omonekiaya kitemakaskej kouitl. Ijkon okinnauatijkej porque omonekiaya kouitl. Omonekiaya miak kouitl uan ijkon uelis kitlatiskiaj tlen okitemakayaj ipan altar. Ijkon okichijkej porque amo okatkaj miakej netineos. Yejuan okatkaj tlakeualmej tlen otlapaleuiayaj itech templo. Ikinon okitakej akinmej kitemakaskiaj kouitl.
28 DE AGOSTO-3 DE SEPTIEMBRE
KEN TECHPALEUIA BIBLIA | NEHEMÍAS 12, 13
“Matikteititikan timouikaj iuan Jehová ijkuak tikintemouaj toyolikniuan”
it-1-S pág. 117 párr. 8
Ammonitas
Ijkuak Tobías okikixtijkej itech templo, okitlajtoltijkej itlanauatil toTajtsin Dios uan okichijkej ijkon ken kijtoua Deuteronomio 23:3-6. Ompa kijtoua ammonitas uan moabitas amo keman uelis kalakiskiaj itech ialtepe Jehová (Neh. 13:1-3). Nin tlanauatil okijkuilojkej mil xiuitl achto ijkuak ammonitas uan moabitas amo okinpaleuijkej israelitas ijkuak yonajsiayaj itech tlali tlen toTajtsin Dios okinmilui kinmakaskia. Nin kijtosneki yejuan amo uelis pouiskiaj itech altepetl Israel nion uelis kichiuaskiaj nochi tlen israelitas okichiuayaj. Pero non amo kijtosneki amo uelis mouikaskiaj inuan ammonitas uan moabitas noso amo ompa chantiskiaj. Noijki amo kijtosneki amo kinteochiuaskia Jehová ijkon ken israelitas. Ijkon ken omoijto Zéleq okinyekanaya isoldados David. Noijki Rut okiteochijkej maski okatka moabita (Rut 1:4, 16-18).
w13-S 15/8 pág. 4 párrs. 5, 6
Namejuan onamechchipajkej
5 (Xiktlajtolti Nehemías 13:4-9). Oui tiktlakamatiskej Jehová porque miakej kichiuaj tlen amo kuali. Matikitakan tlen okinpanok Eliasib uan Tobías. Eliasib okatka teopixki uan Tobías okatka ammonita uan xamo okinpaleuiaya tekiuajkej persas ompa Judea. Tobías uan akinmej okipaleuiayaj amo okinekiayaj Nehemías makiyektlali tepamitl tlen okipiaya Jerusalén (Neh. 2:10). Noijki ammonitas amo okinkauiliayaj makalakikan templo (Deut. 23:3). Ikinon ¿tleka teopixki okixelili se cuarto Tobías?
6 Tobías kuali omouikaya iuan Eliasib. Tobías uan itelpoch tlen omotokayotiaya Jehohanán omonamiktijkej inuan siuamej judías. Miakej judíos kuali okinmitayaj (Neh. 6:17-19). Noijki ixui Eliasib omonamikti iuan ichpoch Sanbalat. Sanbalat okatka tekiua ompa Samaria uan kuali omouikaya iuan Tobías porque omopaleuiayaj (Neh. 13:28). Nochi nin tlamantli kiteititia tleka teopixki Eliasib okichi tlen okilui Tobías maski ye amo okitekichiuiliaya toTajtsin Dios. Pero Nehemías okiteititi okitlakamatki Jehová ijkuak otlanauati makikixtikan itech templo nochi tlen okipiaya Tobías.
w96-S 15/3 pág. 16 párr. 6
Matiktlakamatikan Jehová
6 Tla tiktlakamatij Jehová, amo timouikaskej inuan akinmej kikokoliaj. Ikinon discípulo Santiago okijkuilo: “Mekatánajteh! ¿Amo nonkimatih, ijkuak okachi nonkitlasojtlah tlan onka itech nin tlaltíkpaktli nonmokopah nontetlawelitakeh inawak Dios? Nochi akin kimoknitia tlan amokuali onka itech nin tlaltíkpaktli, iselti mokopa ikokolikni n Dios” (Sant. 4:4). Tejuan noijki tiknekij tiktlakamatiskej toTajtsin Dios ijkon ken David ijkuak okijto: “Oh Jehová, ¿amo nikinkokolia akinmej mitskokoliaj uan nechkualaniaj akinmej mitsixnamikij? Ne sapanoua nikinkokolia. Axkan nikinmita ken nechixnamikij” (Sal. 139:21, 22). Amo tiknekij timouikaskej inuan akinmej kixnamikij toTajtsin Dios uan kichiuaj tlen amo kuali. Tla tejuan tiktlakamatij toTajtsin Dios, techpaleuis amo matimouikakan inuan akinmej kikokoliaj Jehová nion tikitaskej tlen amo kuali panoua itech televisión.
Matiktemokan ken techpaleuia Biblia
it-2-S pág. 444 párr. 2
Tlatsotsonali
Okatka miak ipati ijkuak otlakuikayaj itech templo. Ijkon kiteititiaj miakej textos kanin kijtouaj akinmej otlakuikayaj uan yejuan amo okinnauatiayaj makichiuakan okseki tekitl. Ijkon uelis majxiliskiaj tlakuikaskej (1 Crón. 9:33). Akinmej otlakuikayaj san sekan okatkaj ijkon ken levitas pero yejuan opouiayaj itech okse grupo ijkuak okiskej Babilonia (Esd. 2:40, 41). Tekiua tlen okatka Persia uan omotokayotiaya Artajerjes Longimano okinpaleui uan okijto amo matlatlaxtlauakan ijkon ken oksekimej grupos (Esd. 7:24). Satepan tekiua okintlali seki tlanauatilmej tlen kinpaleuiskia akinmej otlakuikayaj. Ninmej tlanauatilmej kijtouaj okintlali Artajerjes pero xamo Esdras ijkon okichi porque ye noijki otlanauatiaya (Neh. 11:23; Esd. 7:18-26). Nin tlamantli techpaleuia matikajsikamatikan maski akinmej otlakuikayaj okatkaj levitas, Biblia techiluia yejuan okatkaj se grupo tlen okinpatioitayaj (Neh. 7:1; 13:10).