¿TLEN TIKCHIUASKEJ IJKUAK TLAPATIOUA?

Matipakikan san ika tlen tikpiaj

Kuali katej akinmej pakij ika tlen kipiaj. Noijki kimatij tlen kichiuaskej ijkuak mopatla innemilis.

¿TLEKA MIAK IPATI?

Se tepajti tlen itoka Jessica Koehler okijto kuali katej akinmej pakij san ika tlen kipiaj uan amo tlaixnekij. Yejuan pakij uan amo okachi motekipachouaj. Sekimej pakij maski amo kipiaj miak tlamantli uan okachi kipatioitaj yetoskej inuan infamilia uan inyolikniuan porque amo kintekipachoua kipiaskej miak tomin.

“Matipakikan tla tikpiaj tlen tikkuaskej uan tlen tikmokentiskej” (1 Timoteo 6:8).

¿TLEN UELIS TIKCHIUASKEJ?

Amo matiknekikan tikpiaskej tlen oksekimej kipiaj. Tla amo tikpiaj miak tlamantli uan tikitaj amo tikpiaj tlen oksekimej kipiaj, timoyolkokoskej uan titlaixnekiskej. Amo techpaleuis tla ijkon tikchiuaskej. Akinmej kipiaj miak tlamantli xamo kiteuikiliaj miak tomin. Se siuatl itoka Nicole uan chanti Senegal okijto: “Amo moneki nikpias miak tlamantli para nipakis. Ne nipaki san ika tlen nikpia maski nikita oksekimej kipiaj miak tlamantli”.

Matikchiuakan nin tlamantli: Amo matikitakan itech redes sociales tlen oksekimej kitlaliaj kanin kiteititiaj kipiaj miak tlamantli uan kinmiluiaj oksekimej noijki ijkon makichiuakan.

“Porque maski nankipiaskej miak tlamantli amo namechpaleuis xiyoltokan” (Lucas 12:15).

Matimotlasojkamatikan. Miakej pakij san ika tlen kipiaj uan amo mokuayejyekouaj moneki kipiaskej okseki tlamantli noso kinnamiki makipiakan. Se tlakatl itoka Roberton tlen chanti Haití okijto: “Nimokuayejyekoua tlen kichiuaj oksekimej para nechpaleuiskej ne uan nofamilia. Satepan nikintlasojkamatilia tlen kichiuaj para techpaleuiskej. Nokone tlen kipia chikueyi xiuitl nikmachtia makintlasojkamatili oksekimej ijkuak kipaleuiaj”.

Matikchiuakan nin tlamantli: Mojmostla matikijkuilokan tlen tiknekij tiktlasojkamatiskej. Uelis timotlasojkamatiskej porque kuali tikatej, kuali timouikaj iuan tofamilia, tikinpiaj toyolikniuan noso ijkuak tikitaj kualtsin mota tonaltsin ijkuak motlatia.

“Akin yolkuali kipia se ueyi iluitl” (Proverbios 15:15).

Ualeua tikitaj oui tipakiskej tla amo tikpiaj miak tlamantli pero tipakiskej tla tikilnamiktokej amo moneki tikpiaskej okseki tlamantli. Tomin amo techpaleuis matipakikan.