ITekiuajkayo toTajtsin Dios: se tekiuajkayotl tlen amo kichiuas tlen amo kuali

Tekiuajkej noijki ken oksekimej tlaltikpaktlakamej uan tlaltikpaktlakamej kichiua tlen amo kuali, ik non, tekiuajkej tlachtekij, ¿amo melauak? Ik non, pampa se tekiuajkayotl amo kichiuas tlen amo kuali moneki oksekan kisas. Biblia tlajtoa itech nin tekiuajkayotl. Jesús okinmilui imachtijkauan ma kitlajtlanikan ijkuak motlatlaujtiskiaj itech toTajtsin Dios. Nin iTekiuajkayo toTajtsin Dios (Mateo 6:9, 10).

ITekiuajkayo toTajtsin Dios melauak onka uan kajki iluikak uan ayakmo miak poliui uan kinpatlas tekiuajkej (Salmo 2:8, 9; Apocalipsis 16:14; 19:19-21). Uan nin Tekiuajkayotl kachiuas tlen amo kuali. Axkan tikitaskej tleka tekiuajkej amo ueli kachiuaj uan ken tikmatij iTekiuajkayo toTajtsin Dios melauak kichiuas.

1. CHIKAUALISTLI

OUIJKAYOTL: Tekiuajkej ueli katej pampa kitekitiltiaj tomin tlen ika tlatlaxtlauaj tlaltikpaktlakamej. Sapanoa miak tomin kitekitiltiaj, ik non, kichtekij uan oksekimej ichtaka kintlaxtlauiaj tekiuajkej pampa amo okachi ma tlatlaxtlauakan. Uan tekiuajkej okachi kipatiotiaj miak tlamantli pampa oksepa ma mokuepa tomin. Uan san ijkon kichijtokej uan tlaltikpaktlakamej akinmej amo tlachtekij, tlajyouiaj.

TLEN TLAYEKTLALIS: Itech toTajtsin Dios uits nin Tekiuajkayotl (Apocalipsis 11:15).a Nin Tekiuajkayotl amo kintlajtlanilis tlaltikpaktlakamej ma tlatlaxtlauakan pampa uelis yetos. Kinmaluis akinmej kinnauatis, kinmakas tlen kinpoloa, pampa kipia chikaualistli (Isaías 40:26; Salmo 145:16).

2. AKIN KIYEKANAS

OUIJKAYOTL: Pampa uelis pojpoliuis tlen amo kuali Susan Rose-Ackerman kijtoa: “Se peuas ik tlakpak uan se tlamis tlalchi”. Ijkuak se tekiua kinmixkomaka akinmej kinyekanaj polícias uan aduanas, uan amo itlaj kinmiluiaj oksekimej tekiuajkej tlen kichiuaj tlen amo kuali, oksekimej tlaltikpaktlakamej ayakmo intech tlaneltokaj. Maski se tlakatl sapanoa yolkuali uelis kichiuas tlen amo kuali, pampa Biblia kijtoa: “Tinochteh titlajtlakolejkeh” (Romanos 3:9).

TLEN TLAYEKTLALIS: ITekiuajkayo toTajtsin Dios amo yetos ken tekiuajkej tlanauatiaj, amo keman kichiuas tlen amo kuali. Ijkuak Jesús okiyejyekojkej ijkon yokiteititi. Ijkuak Satanás okilui Jesús kimakaskiaj “nochteh n tlalmeh kan tlanawatiah” tla motlankuaketsaskia uan kiueyichiuaskia, pero Jesús san niman okixtope (Mateo 4:8-10; Juan 14:30). Ye yolmelauak pampa ijkuak okitlajyouiltijtokaj amo okiseli droga, maski uelis kipaleuiskia uan nin uelis kitlapololtiskia (Mateo 27:34). Jesús yokiteititi ye uelis kiyekanas nin Tekiuajkayotl, uan axkan yikajki iluikak (Filipenses 2:8-11).

3. SAN KUALI YETOS

OUIJKAYOTL: Itech miakej altepemej amo uejkika kinpatlaj tekiuajkej uan ijkon ayakmo katej tekiuajkej tlen kichiuaj tlen amo kuali, pero non amo melauak. Ijkuak kinpejpenaj tekiuajkej nochtin kichiuaj tlen amo kuali, uan noijki itech amo uejueyij altepemej ijkon kichiuaj. Se neskayotl, akinmej kipiaj tomin kinpaleuiaj akinmej kinekij yetoskej tekiuajkej.

Se juez tlen itoka John Paul Stevens akin tekiti itech Tribunal Supremo de Estados Unidos, okijkuilo ijkon ken kichiuaj san teijtlakoa pampa “miakej ayakmo kineltokaj se kuali tekiuajkayotl, noijki miakej ayakmo intech tlaneltokaj”. Ik non, miakej tlaltikpaktlakamej kineltokaj itech política mochiua miak tlamantli tlen amo kuali.

TLEN TLAYEKTLALIS: Ken iTekiuajkayo toTajtsin Dios amo keman kipatlaskej, ayakmo itlaj kichiuaskej pampa ma kinpejpenakan ken tekiuajkej uan noijki ayakmo kichiuaskej tlen amo kuali (Daniel 7:13, 14). Noijki ueyi Tekiua amo kipejpenaj tlaltikpaktlakamej, nin kitlalia toTajtsin Dios uan amo keman kipatlaskej. Nin kichiua kuali ma yeto uan noijki ma kinpaleui akinmej kinnauatia.

4. TLANAUATILMEJ

OUIJKAYOTL: Sekimej uelis kijtoskej pampa ayakmo ma kichiuakan tlen amo kuali moneki okseki tlanauatilmej. Pero akinmej ixtlamatkej kijtoaj ijkuak okachi kintlaliaj tlanauatilmej okachi uelis amo kintlakamatiskej. Uan noijki oui pampa amo kichiuaskej tlen amo kuali, uan amo okachi tlapaleuiaj intlanauatiluan.

TLEN TLAYEKTLALIS: Itlanauatiluan toTajtsin Dios amo ken intlanauatiluan tlaltikpaktlakamej. Se neskayotl, iTekiuajkayo toTajtsin Dios amo techmaka miakej tlanauatilmej kanin kijtoa tlen uelis tikchiuaskej uan tlen amo, Jesús san okijto se tlanauatil tlen kijtoa: “Xikchiwakah iwan oksikimeh ijkó kemi nomejwah nonkinekih makichiwakah nomowah” (Mateo 7:12). Pero noijki onka seki tlanauatilmej tlen amo san kijtoaj tlen kichiuaj tlaltikpaktlakamej, noijki tlen mokuayejyekoaj. Jesús otlanauati: “Xiktlasojtla mokni kemi te timotlasojtla” (Mateo 22:39). Ken toTajtsin Dios kimati tlen tikpiaj itech toyolo, ye uelis kitas kox tikintlakamatij itlanauatiluan (1 Samuel 16:7).

5. TLEN KICHIUAJ

OUIJKAYOTL: Kichiuaj tlen amo kuali pampa tlaixnekij uan tsotsokamej, ninmej tlamantli kichiuaj tekiuajkej uan tlaltikpaktlakamej. Itech kali tlen otikijtojkej ouetski, satepan okimatkej ijkon opanok pampa akinmej okichijchijkej nin kali okinmakakej tomin tekiuajkej pampa amo ma kitekitiltikan tlen okachi kuali.

Ik non, pampa amo ma kichiuakan tlen amo kuali kinekij kinmachtiskej tlaltikpaktlakamej pampa amo ma tlaixnekikan nion ma yetokan tsotsokamej. Pero amo kichiuaj pampa axkan tekiuajkej amo uelij nion kimatij ken uelis kinmachtiskej.

TLEN TLAYEKTLALIS: ITekiuajkayo toTajtsin Dios kema uelis kiyektlalis nochi pampa kinmachtia tlen moneki ma kichiuakan tlaltikpaktlakamej.b Ijkuak kinmachtiaj mochijchikauaj pampa ayakmo ijkon ma mokuayejyekokan (Efesios 4:23). Uan tlen axkan mokuayejyekoaj kinpaleuia pampa amo ma tlaixnekikan nion ma yetokan tsotsokamej, uan ma yolpakikan ika tlen kipiaj uan ma kinpaleuikan oksekimej (Filipenses 2:4; 1 Timoteo 6:6).

6. TLALTIKPAKTLAKAMEJ

OUIJKAYOTL: Maski miakej kuali katej uan kuali momachtiaj miakej kipejpenaj kichiuaskej tlen amo kuali. Miakej kijtoaj, ik non, tlaltikpaktlakamej ok kichiuaj tlen amo kuali. San uelis amo okachi ma teijtlako amo kuali tlen kichiuaj tlaltikpaktlakamej.

TLEN TLAYEKTLALIS: Itech Naciones Unidas tlaltikpaktlakamej akinmej mochijchikauaj pampa ayakmo ma kichiuakan tlen amo kuali, kijtoaj pampa ayakmo ma mochiua tlen amo kuali, tekiuajkej moneki kinpaleuiskej pampa amo ma tlakajkayauakan, ma yetokan yolmelajkej uan ma kichiuakan tlen moneki. Maski sapanoa kuali tlen kinekij, iTekiuajkayo toTajtsin Dios okachi kuali, pampa amo san kinpaleuia ijkon ma kichiuakan, kinchiualtia. Biblia kijtoa amo kiseliskej tlateochiualismej akinmej tlakajkayauaj uan tsotsokamej (1 Corintios 6:9-11; Apocalipsis 21:8).

Ijkon ken itech achto siglo, axkan tinochtin uelis tikintlakamatiskej tlanauatilmej tlen techmaka iTekiuajkayo toTajtsin Dios. Se neskayotl, ijkuak se tlakatl tlen omotokayotiaya Simón okinekiaya kintlaxtlauis iTlatitlaniluan Jesús pampa ma kipaleuikan, yejuan okiluijkej: “Ximolnamiki, iwa xiktlatlaujti Dios mamitstlapojpolwi”. Simón okimatki amo kuali okatka tlen okinekiaya uan okinmilui ma kipaleuikan pampa uelis ayakmo ijkon kichiuaskia (Hechos 8:18-24).

¿TLEN UELIS TIKCHIUASKEJ PAMPA MA TECHNAUATI ITEKIUAJKAYO TOTAJTSIN DIOS?

Maski san kanin otineski, tejuatsin uelis mitsnauatis iTekiuajkayo toTajtsin Dios (Hechos 10:34, 35). Tlamachtilistli tlen kitemaka nin Tekiuajkayotl uelis mitspaleuis. ITlaixpantijkauan Jehová ika miak yolpakilistli kinekij mitspaleuiskej pampa uelis tikmatis ken titlamachtiaj ika Biblia. Tla tiueli maski san seki minutos uelis tikmatis miak itech iTekiuajkayo toTajtsin Dios. Noijki tikmatis tlen kichiuas toTajtsin Dios pampa ayakmo ma yeto tlen amo kuali (Lucas 4:43). Ximotlapoui iuan iTlaixpantijkauan Jehová noso xikalaki Internet itech www.jw.org/ncx.