Sekimej techtlajtlaniaj
¿Tlen okinekiaya kijtos akin okijkuilo Proverbios 30:18, 19 ijkuak okijto sapanoua okitlajtlachialtiaya “se tlakatl nemi iuan se ichpochtli?
Miakej personas uan akinmej kuali kixmatij Biblia motlajtlaniaj tlen kijtosneki tlen okijto akin okijkuilo Proverbios. Itech iTlajtol toTajtsin Dios. Biblia del Nuevo Mundo kijtoua: “Onka eyi tlamantli tlen sapanoua nechtlajtlachialtia uan naui tlamantli tlen amo nikajsikamati: Ijkuak águila patlani iluikak, ijkuak kouatl motilana ipan se tepejxitl, ijkuak barco yaui ijtik atl uan ijkuak se tlakatl nemi iuan se ichpochtli” (Prov. 30:18, 19).
Achto otikajsikamatiayaj ijkuak “se tlakatl nemi iuan se ichpochtli” okijtosnekiaya kichiuaj tlen amo kuali. ¿Tleka ijkon otikneltokayaj? Porque textos tlen achto ijkuilitokej kijtojtokej akinmej kichiuaj tlen amo kuali uan amo keman kikauaj (Prov. 30:15, 16). Versículo 20 kijtoua se “siuatl tlen auilnemi” kijtoua amo kichiua tlen amo kuali. Ikinon otikijtouayaj okijtosnekiaya ijkuak oksekimej kichiuaj tlen amo kuali uan amikaj kita. Yetoskia ken kichiuaj ken águila tlen uejkapan patlani. Kichiuaj ken se kouatl tlen motilana ipan se tepejxitl, kichiuaj ken se barco ijkuak yaui ijtik atl uan ken se tlakatl tlen ichtaka itlaj kichiua uan amikaj kita. Ikinon ijkuak kijtoua “se tlakatl nemi iuan se ichpochtli” otikneltokayaj okijtosnekiaya se tlakatl okikajkayauaya se ichpochtli para iuan mamoteka maski ye amo okimatiaya ijkon okinekiaya kichiuas non tlakatl.
Pero onka seki tlamantli tlen kiteititia nin texto kijtoua itlaj tlen kuali. Akin okijkuilo san okijto seki tlamantli tlen okitlajtlachialtiaya.
Tlen yiuejkika okijkuilojkej ika hebreo kipaleuia Proverbios 30:18 uan kijtouaj tlen ompa ijkuilitok kijtosneki itlaj kuali. Se diccionario tlen kiyekijtoua tlen ijkuilitok itech Biblia, kijtoua “sapanoua nechtlajtlachialtia” kajki ika hebreo uan kijtosneki itlaj tlen amo ueli tikajsikamatij. Ijkon kijtoua Theological Lexicon of the Old Testament tlen okijkuilojkej Ernst Jenni uan Claus Westermann.
Se tlakatl tlen itoka Crawford Howell Toy tlen tlamachtia ompa Estados Unidos itech se universidad tlen itoka Harvard, okijto nin texto amo kijtoua itlaj tlen amo kuali. Noijki okijto akin okijkuilo non texto san okijtojtoka sapanoua okitlajtlachialtiaya non tlamantli.
Ikinon axkan tikneltokaj tlen kijtoua Proverbios 30:18, 19 san kijtoua seki tlamantli tlen tetlajtlachialti uan amo ueli tikajsikamatij. Tejuan noijki techtlajtlachialtia ken patlanij águilas, ken motilanaj kouamej ipan tepejxio maski amo kinpiaj inmikxiuan, ken ueli yauij barcos ijtik atl maski uejueyij uan etikej uan techtlajtlachialtia ijkuak se telpochtli uan se ichpochtli peua motlasojtlaj uan pakij.