Eyesibili EkaSamuyeli
23 Nanka amazwi okucina kaDavida:+
“Amazwi kaDavida indodana kaJese,+
Amazwi endoda eyaphakanyiswayo,+
Eyagcotshwa+ nguNkulunkulu kaJakhobe,
Umhlabeleli wezingoma+ zako-Israyeli olephimbo elimnandi.
3 UNkulunkulu ka-Israyeli wakhuluma,
IDwala lika-Israyeli+ lathi kimi:
‘Nxa umuntu obusa abantu elungile,+
Ebusa esesaba uNkulunkulu,+
4 Kuyabe kufanana lokukhanya kwekuseni nxa ilanga liphuma,+
Kungela ngitsho lelilodwa iyezi.
Kuyabe kufanana lokukhanya okuba khona ngemva kokuna kwezulu,
Okwenza utshani bumile emhlabathini.’+
5 Lendlu yami injalo phambi kukaNkulunkulu,
Ngoba wenze lami isivumelwano esihlala kuze kube nini lanini,+
Esihlelwe kuhle futhi esizahlala phakade.
Siyikusindiswa kwami lentokozo yami.
Lokhu yikho okwenza enze indlu yami iphumelele.+
6 Kodwa bonke abantu abangelancedo balahlelwa khatshana+ njengezihlahla zameva,
Ezingeke zibanjwe ngesandla.
7 Nxa umuntu ezibamba,
Kumele athwale insimbi lomkhonto,
Njalo kumele zitshiswe ngomlilo endaweni yazo ziphele.”
8 Nanka amabizo amaqhawe kaDavida alamandla:+ UJoshebi-bhashebhethi umThakhemoni owayengumkhokheli wabathathu.+ Wabulala abantu abangu-800 ngomkhonto ngasikhathi sinye. 9 Wayelandelwa ngu-Eliyazari+ indodana kaDodo,+ indodana ka-Ahohi, owayengomunye wamaqhawe amathathu alamandla ayeseyisa amaFilisti eloDavida. AmaFilisti ayebuye abuthana ezokulwa lama-Israyeli kodwa amadoda ako-Israyeli abaleka. 10 U-Eliyazari yena wajama waqhubeka ewabulala amaFilisti ingalo yakhe yaze yadinwa, isandla sakhe saba buhlungu ngenxa yokubamba inkemba.+ Ngalelolanga uJehova wanqoba.+ Abantu baphenduka sebezothatha impahla yabantu abafileyo.
11 Wayelandelwa nguShama indodana ka-Agi umHarari. AmaFilisti abuthana eLehi lapho okwakulensimu eyayilinywe indumba.* Amabutho ako-Israyeli athi ebalekela amaFilisti, 12 yena wama phakathi kwensimu wayivikela. Waqhubeka ebulala amaFilisti, uJehova wabenza banqoba okumangalisayo.+
13 Abakhokheli abathathu kwabangu-30 baya kuDavida ebhalwini lwase-Adulamu+ ngesikhathi sokuvuna. Ngalesosikhathi amaFilisti ayemise inkamba yawo esigodini seRefayimi.+ 14 UDavida wayesenqabeni+ njalo kwakuleqembu lamabutho amaFilisti eBhethilehema. 15 UDavida wathi: “Aluba nje benginganatha amanzi omgodi osegedini leBhethilehema!” 16 Amaqhawe la amathathu athi esizwa lokhu, angena ngenkani enkambeni yamaFilisti ayakukha amanzi emgodini osegedini leBhethilehema abuya lawo kuDavida. Kodwa uDavida wala ukuwanatha, wawathela phansi phambi kukaJehova,+ 17 wathi: “Awu Jehova, ngeke ngenze into enjalo! Kambe nginganatha igazi+ lamadoda afake impilo zawo engozini?” UDavida wala ukunatha amanzi lawo. Lezi yizo izinto ezenziwa ngamaqhawe akhe amathathu.
18 U-Abhishayi+ umfowabo kaJowabi indodana kaZeruya+ wayengumkhokheli welinye iqembu lamaqhawe amathathu. Wabulala abantu abangu-300 ngomkhonto futhi wayelodumo njengamaqhawe amathathu+ akuqala. 19 Lanxa wayelodumo ukwedlula amaqhawe eqembu lakhe njalo engumkhokheli wawo, kazange alingane lamaqhawe amathathu eqembu lakuqala.
20 UBhenaya+ indodana kaJehoyada wayeyindoda elesibindi* futhi watshengisa ubuqhawe bakhe kanengi eKhabhuzeli.+ Wabulala amadodana amabili ka-Ariyeli wakoMowabi njalo wangena emgodini wamanzi mhla kulongqwaqwane wabulala isilwane.+ 21 Wabulala lendoda engumGibhithe eyayinkulu okwesabekayo. Lanxa umGibhithe lo wayethwele umkhonto, yena wamlanda ethwele induku nje kuphela, wafika wamjwamulela umkhonto wakhe wambulala ngawo. 22 Lezi yizo izinto ezenziwa nguBhenaya indodana kaJehoyada, njalo wayelodumo olunjengolwamaqhawe amathathu eqembu lakuqala. 23 Lanxa wayelodumo ukwedlula abakhokheli abangu-30, kazange alingane lamaqhawe amathathu eqembu lakuqala. Kodwa uDavida wambeka ukuthi abe yinduna yabalindi bakhe.
24 U-Asaheli+ umfowabo kaJowabi wayephakathi kwabakhokheli abangu-30, lo-Elihanani indodana kaDodo weBhethilehema,+ 25 loShama umHarodi, lo-Elikha umHarodi, 26 loHelezi+ umPhalithi, lo-Ira+ indodana ka-Ikheshi weThekhowa, 27 lo-Abhiyezeri+ we-Anathothi,+ loMebhunayi umHusha, 28 loZalimoni um-Ahohi, loMaharayi+ weNethofa, 29 loHelebi indodana kaBhahana weNethofa, lo-Ithayi indodana kaRibhayi weGibheya yakoBhenjamini, 30 loBhenaya+ umPhirathoni, loHidayi owezihotsheni* zeGahashi,+ 31 lo-Abhi-alibhoni um-Aribhathi, lo-Azimavethi weBhahurimi, 32 lo-Eliyaba umShalabhimi, lamadodana kaJasheni, loJonathani, 33 loShama umHarari, lo-Ahiyamu indodana kaSharari umHarari, 34 lo-Elifelethi indodana ka-Ahasibayi, indodana yomMahakhathi, lo-Eliyami indodana ka-Ahithofeli+ waseGilo, 35 loHeziro umKhameli, loPhaharayi wase-Arabi, 36 lo-Igali indodana kaNathani waseZobha, loBhani wakoGadi, 37 loZelekhi um-Amoni, loNaharayi umBheherothi, owayethwala izikhali zikaJowabi indodana kaZeruya, 38 lo-Ira um-Ithiri, loGarebhi um-Ithiri,+ 39 kanye lo-Uriya+ umHithi. Bonke babengu-37.