Eyesibili EyamaKhosi
16 Ngomnyaka wesi-17 wokubusa kukaPhekha indodana kaRemaliya, u-Ahazi+ indodana kaJothamu inkosi yakoJuda waba yinkosi. 2 U-Ahazi wayeleminyaka engu-20 ngesikhathi esiba yinkosi futhi wabusa eJerusalema okweminyaka engu-16. Kazange enze okulungileyo phambi kukaJehova uNkulunkulu wakhe, kenzanga njengoDavida ukhokho wakhe.+ 3 Walandela okwakusenziwa ngamakhosi ako-Israyeli+ waze watshisa indodana yakhe emlilweni,+ elandela izenzo ezenyanyekayo ezazisenziwa yizizwe+ uJehova azixotsha phambi kwabako-Israyeli. 4 Waqhubeka enikela futhi etshisa imihlatshelo ezindaweni eziphakemeyo*+ lasemaqaqeni langaphansi kwazo zonke izihlahla eziyizithingithingi.+
5 Ngalesosikhathi kwafika uRezini inkosi yeSiriya kanye loPhekha inkosi yako-Israyeli owayeyindodana kaRemaliya, bezokulwa lo-Ahazi. Bavimbezela iJerusalema+ kodwa behluleka ukuyithumba. 6 Yikho lapho uRezini inkosi yeSiriya abuyisela khona idolobho le-Elathi+ kwabako-Edomi, wasexotsha abantu bakoJuda e-Elathi. Abako-Edomi bayithatha i-Elathi futhi balokhu behlala khona kuze kube lamuhla. 7 U-Ahazi wathuma izithunywa kuThigilathi-phileseri+ inkosi ye-Asiriya esithi: “Ngiyinceku yakho futhi ngiyindodana yakho. Buya uzongilamulela enkosini yeSiriya lasenkosini yako-Israyeli ngoba bayangihlasela.” 8 U-Ahazi wathatha isiliva legolide elalisendlini kaJehova laseziphaleni zenotho yendlu yenkosi* wakuthumela enkosini ye-Asiriya.+ 9 Inkosi ye-Asiriya yasamukela isicelo sakhe, yasuka yayahlasela iDamaseko yayithumba. Yathatha abantu beDamaseko yabasa eKhiri+ njalo yabulala uRezini.+
10 Ngemva kwalokho iNkosi u-Ahazi yasuka yaya eDamaseko isiyabona uThigilathi-phileseri inkosi ye-Asiriya. INkosi u-Ahazi yathi ibona i-alithare elaliseDamaseko, yathumezela umphristi u-Urija umdwebo we-alithare lelo owawutshengisa iplani yalo lendlela elalakhiwe ngayo.+ 11 Umphristi u-Urija+ wakha i-alithare+ elinjengalo elandela konke ayekuthunyelwe yiNkosi u-Ahazi eyayiseDamaseko. Umphristi u-Urija waqeda ukwakha i-alithare lelo iNkosi u-Ahazi ingakaphenduki ivela eDamaseko. 12 Inkosi yathi ibona i-alithare lelo ivela eDamaseko, yaya kulo yenza iminikelo.+ 13 Yaqhubeka isenza iminikelo yokutshiswa e-alithareni lelo njalo itshisa leminikelo yamabele. Yathulula leminikelo yokunathwayo futhi yafafaza phezu kwalo igazi lemihlatshelo yobudlelwano. 14 Ngemva kwalokho yasusa i-alithare elenziwe ngekhopha+ elaliphambi kukaJehova endaweni yalo phambi kwendlu. I-alithare leli laliphakathi laphakathi kwe-alithare lakhe lendlu kaJehova, kodwa yena walisusa wayalifaka enyakatho kwe-alithare lakhe. 15 INkosi u-Ahazi yatshela umphristi u-Urija+ yathi: “Umnikelo wokutshiswa owenziwa ekuseni sekumele uwenzele e-alithareni elikhulu+ futhi wenzele kulo lomnikelo wamabele wantambama,+ lomnikelo wokutshiswa wenkosi, lomnikelo wayo wamabele kanye layo yonke nje iminikelo yokutshiswa, leminikelo yamabele, leminikelo yokunathwayo yabantu bonke. Kumele ufafaze kulo igazi lonke leminikelo yokutshiswa lelemihlatshelo yonke nje. I-alithare lekhopha ngizabona ukuthi ngizakwenzani ngalo.” 16 Ngakho umphristi u-Urija wenza konke ayekutshelwe yiNkosi u-Ahazi.+
17 Phezu kwalokho iNkosi u-Ahazi yaquma amazenge ayesemaceleni ezinqola+ ezazisethempelini, yakhipha lezinditshi ezaziphezu kwezinqola lezi.+ Yethula letanka enkulu eyayihlezi phezu kwenkunzi zekhopha+ yayifaka phansi endaweni egandelwe ngamatshe.+ 18 Yadiliza indawo efulelweyo eyayisetshenziswa ngeSabatha eyayakhiwe ethempelini, yakhipha lomnyango inkosi eyayingena ngawo nxa isiya endlini kaJehova. Yenza lokhu ngoba yayisesaba inkosi ye-Asiriya.
19 Yonke imbali ka-Ahazi lalokho akwenzayo kubhaliwe ebhukwini lembali yamakhosi akoJuda.+ 20 U-Ahazi wafa wangcwatshwa emangcwabeni abokhokho bakhe edolobheni likaDavida, indodana yakhe uHezekhiya*+ yasisiba yinkosi esikhundleni sakhe.