AmaNani
27 Ngemva kwalokho amadodakazi kaZelofehadi,+ indodana kaHeferi, indodana kaGiliyadi, indodana kaMakhiri, indodana kaManase, owemuli zakoManase indodana kaJosefa asondela kuMosi. Amabizo awo kwakunguMahila, loNowa, loHogila, loMilikha kanye loThiriza. 2 Ama phambi kukaMosi lo-Eliyazari umphristi labakhokheli+ kanye labo bonke abako-Israyeli emnyango wetende lokuhlangana athi: 3 “Ubaba wafela enkangala kodwa wayengekho phakathi kweqembu labasekeli bakaKhora+ elahlangana ukuze limelane loJehova, yena wazifela ngenxa yesono sakhe njalo wayengelabantwana abangabafana. 4 Kungani kumele ibizo likababa linyamalale kwabosendo lwakhe ngenxa yokuthi wayengelamntwana ongumfana? Sicela lisinike ilifa phakathi kwabafowabo bakababa.” 5 Ngakho uMosi wethula udaba lwawo phambi kukaJehova.+
6 UJehova wasesithi kuMosi: 7 “Lokho okutshiwo ngamadodakazi kaZelofehadi kuqondile. Loba sekutheni kumele uwaphe ilifa phakathi kwabafowabo bakayise njalo udlulisele ilifa likayise kuwo.+ 8 Kanti njalo, tshela abako-Israyeli uthi: ‘Nxa umuntu angafa engelamntwana ongumfana, ilifa lakhe kumele liphiwe indodakazi yakhe. 9 Nxa engelayo indodakazi, ilifa lakhe kumele liphiwe abafowabo. 10 Nxa engelabo abafowabo, ilifa lakhe kumele lilinike abafowabo bakayise. 11 Nxa uyise engelabo abafowabo, ilifa lakhe kumele liphiwe isihlobo segazi esiseduze emulini yangakibo njalo sizalithatha libe lilifa laso. Isinqumo lesi sizakuba ngumlayo ozasebenza ebantwini bako-Israyeli njengoba nje uJehova etshilo kuMosi.’”
12 UJehova wasesithi kuMosi: “Qansa intaba le yase-Abharimi+ ubone ilizwe engizalinika abantu bako-Israyeli.+ 13 Nxa usulibonile lawe uzakufa njengomfowenu u-Aroni,+ ungcwatshwe njengabanye abantu bakini,+ 14 ngoba abantu bako-Israyeli bathi bemelana lami enkangala yeZini, langihlamukela layekela ukulandela engangilitshele khona ukuze lingingcwelise phambi kwabo ngesikhathi ngilinika amanzi.+ Lokhu kwenzakala emanzini aseMeribha+ eKhadeshi+ enkangala yeZini.”+
15 UMosi wasesithi kuJehova: 16 “Sengathi uJehova uNkulunkulu onika bonke abantu ukuphila angakhethela abantu bakhe indoda, 17 ezaphuma iphinde ingene phambi kwabo futhi ezabakhokhela nxa bephuma lanxa bengena, ukuze abantu bakaJehova bangabi njengezimvu ezingelamelusi.” 18 Ngakho uJehova wasesithi kuMosi: “Thatha uJoshuwa indodana kaNuni, indoda efaneleyo, ubeke izandla phezu kwakhe.+ 19 Ngemva kwalokho ummise phambi kuka-Eliyazari umphristi laphambi kwabo bonke abantu, umbeke ukuthi abe ngumkhokheli phambi kwabo.+ 20 Kumele umnike amanye amandla olawo*+ ukuze bonke abantu bako-Israyeli bamlalele.+ 21 UJoshuwa uzakuma phambi kuka-Eliyazari umphristi, yena ozambuzela izinqumo zokwahlulela nge-Urimi+ phambi kukaJehova. Ngomlayo wakhe bazaphuma futhi ngomlayo wakhe bazangena, yena labo bonke abako-Israyeli, bonke nje abantu.”
22 Ngakho uMosi wakwenza lokho uJehova ayekutshilo. Wathatha uJoshuwa wammisa phambi kuka-Eliyazari umphristi laphambi kwalo lonke ibandla, 23 wasebeka izandla zakhe phezu kwakhe njalo wambeka ukuthi abe ngumkhokheli,+ njengoba nje uJehova wayetshilo kuye.+