AmaNani

32 Amadodana kaRubheni+ lamadodana kaGadi+ ayelezifuyo ezinengi kakhulu njalo abona ukuthi indawo yaseJazeri+ leyaseGiliyadi yayiyindawo enhle efanele izifuyo. 2 Ngakho amadodana kaGadi lamadodana kaRubheni alanda uMosi lo-Eliyazari umphristi labakhokheli babantu bako-Israyeli athi kubo: 3 “I-Atharothi, leDibhoni, leJazeri, leNimra, leHeshibhoni,+ le-Eliyale, leSebhami, leNebho+ kanye leBheyoni,+ 4 indawo ezanqotshwa nguJehova phambi kwabantu bako-Israyeli,+ zindawo ezifanele izifuyo njalo izinceku zakho zilezifuyo ezinengi kakhulu.”+ 5 Aqhubeka athi: “Nxa sithole umusa kuwe sicela ukuthi indawo le ibe yilo ilifa lezinceku zakho. Ungasichaphisi umfula uJodani siye phetsheya.”

6 UMosi wasesithi kumadodana kaGadi lamadodana kaRubheni: “Kambe lizasala lizihlalele khonapha abafowenu besiya empini? 7 Kungani kumele lenze abantu bako-Israyeli baphele amandla bacine bedonda ukuchapha baye elizweni uJehova azabanika lona? 8 Lokhu yikho kanye okwenziwa ngoyihlo ngesikhathi ngibathuma siseKhadeshi-bhaneya ukuthi bayehlola ilizwe.+ 9 Bathi sebehambe baze bayafika esigodini se-Eshikholi+ njalo balibona ilizwe, basebesenza abako-Israyeli baphela amandla besaba ukuya elizweni uJehova ayezabanika lona.+ 10 UJehova wathukuthela kakhulu ngalelolanga waze wafunga wathi:+ 11 ‘Wonke amadoda aphume eGibhithe aleminyaka engu-20 kusiya phezulu kawasoze alibone ilizwe+ engafunga ngalo ku-Abrahama lo-Isaka loJakhobe+ ngoba kawazange angilandele ngenhliziyo yonke, 12 ngaphandle kukaKhalebhi+ indodana kaJefune umKhenizi loJoshuwa+ indodana kaNuni ngenxa yokuthi balandele uJehova ngenhliziyo yonke.’+ 13 Ngakho ulaka lukaJehova lwavutha ebantwini bako-Israyeli wasebangela ukuthi bazulazule enkangala okweminyaka engu-40,+ saze saphela sonke isizukulwane leso esasisenza okubi phambi kukaJehova.+ 14 Khathesi lani bantu abalesono selilandela khonokho okwakusenziwa ngoyihlo abaqhubeka besengezelela ulaka lukaJehova ebantwini bako-Israyeli. 15 Nxa lingayekela ukumlandela uzaphinda abatshiye abantu laba enkangala njalo lizakwenza ukuthi bonke abantu laba batshabalale.”

16 Baphinda babuyela kuye ngemva kwesikhathi bathi: “Sivumele sakhele izifuyo zethu izibaya zamatshe lapha njalo sakhele labantwabethu amadolobho. 17 Kodwa sizaqhubeka sikulungele ukuya empini+ njalo sizahamba phambi kwabantu bako-Israyeli size siyebafikisa endaweni yabo. Abantwabethu bona bazasala behlezi khonapha emadolobheni avikelweyo ukuze bavikeleke ebantwini belizwe leli. 18 Asisoze sibuyele emizini yethu wonke umuntu wako-Israyeli aze athole indawo ezakuba lilifa lakhe.+ 19 Phela asisoze sithole ilifa ndawonye labo ngaphetsheya komfula uJodani ngoba elethu ilifa sesilitholile ngapha empumalanga komfula uJodani.”+

20 UMosi wabaphendula wathi: “Nxa lizathwala izikhali phambi kukaJehova lihlomele impi,+ 21 njalo nxa ngamunye wenu ezathwala izikhali achaphe umfula uJodani phambi kukaJehova, ngesikhathi esedudula izitha zakhe phambi kwakhe+ 22 ilizwe lonke lize linqotshwe phambi kukaJehova,+ ngemva kwalokho selingabuyela+ njalo alisoze libe lecala kuJehova lasebantwini bako-Israyeli. Lapho-ke ilizwe leli lizakuba lilifa lenu phambi kukaJehova.+ 23 Kodwa nxa lingasoze likwenze lokhu, lizabe lenze isono kuJehova futhi kumele likwazi ukuthi isono senu sizalilandela. 24 Ngakho lingabakhela abantwabenu amadolobho lakhele lezifuyo zenu izibaya+ kodwa kumele lenze lokho elikuthembisileyo.”

25 Amadodana kaGadi lamadodana kaRubheni asesithi kuMosi: “Izinceku zakho zizakwenza khona kanye inkosi yami ekutshoyo. 26 Sizatshiya abantwabethu lamakhosikazi ethu lemihlambi yethu lazo zonke izifuyo zethu emadolobheni eGiliyadi,+ 27 kodwa izinceku zakho zizachapha ziye phetsheya, wonke nje amadoda ahlomele ukuyakulwa impi phambi kukaJehova,+ njengokutsho kwakho nkosi yami.”

28 Ngakho uMosi wakhipha umlayo mayelana labo wawutshela u-Eliyazari umphristi loJoshuwa indodana kaNuni lalabo ababengabakhokheli bezindlu zaboyise ezizwaneni zako-Israyeli. 29 UMosi wathi kubo: “Nxa amadodana kaGadi lamadodana kaRubheni angachapha lani aye ngaphetsheya komfula uJodani, wonke nje amadoda ahlomele impi phambi kukaJehova njalo nxa ilizwe linganqotshwa phambi kwenu, kuzamele liwanike ilizwe leGiliyadi libe lilifa lawo.+ 30 Kodwa nxa engasoze athwale izikhali achaphe lani, kuzamele ayehlala phakathi kwenu khonale elizweni leKhenani.”

31 Amadodana kaGadi lamadodana kaRubheni aphendula athi: “Izinceku zakho zizakwenza lokho uJehova akukhulumileyo kuzo. 32 Sizathwala izikhali phambi kukaJehova sichaphe siye elizweni leKhenani+ kodwa ilifa lethu esizalithola lizakuba ngapha komfula uJodani.” 33 Ngakho uMosi wanika amadodana kaGadi lamadodana kaRubheni+ lengxenye yesizwana sakoManase+ indodana kaJosefa, umbuso kaSihoni+ inkosi yama-Amori lombuso ka-Ogi+ inkosi yaseBhashani. Wawanika ilizwe lelo lamadolobho ayesezindaweni zakhona kanye lamadolobho endawo eligombolozeleyo.

34 Amadodana kaGadi akha* iDibhoni,+ le-Atharothi,+ le-Aroweri,+ 35 le-Athirothi-shofani, leJazeri,+ leJogibheha,+ 36 leBhethi-nimira+ kanye leBhethi-harani,+ amadolobho avikelwe ngemiduli njalo akhela imihlambi yawo yezimvu izibaya zamatshe. 37 Amadodana kaRubheni akha iHeshibhoni,+ le-Eliyale,+ leKhiriyathayimi,+ 38 leNebho+ kanye leBhali-meyoni,+ [amabizo amadolobho lawo atshintshwa]. Akha leSibhima futhi aqalisa ukunika amadolobho ayewakhe kutsha amabizo amatsha.

39 Amadodana kaMakhiri+ indodana kaManase ahamba ayahlasela iGiliyadi ayithumba njalo adudula ama-Amori ayehlala kuyo. 40 Ngakho uMosi wanika uMakhiri indodana kaManase iGiliyadi futhi wahle wayahlala kuyo.+ 41 UJayiri indodana kaManase wahamba wayahlasela imizi elamatende wayithumba, wayibiza ngokuthi yiHavothi-jayiri.*+ 42 UNobha wahamba wayahlasela iKhenathi wayithumba kanye lamadolobho akhelane layo* njalo wayinika ibizo lakhe wathi yiNobha.