ImiSebenzi Yabaphostoli
5 Enye indoda okwakuthiwa ngu-Ananiya lomkayo uSafira bathengisa indawo yabo, 2 basebevumelana ukuthi bafihle enye imali. U-Ananiya wathatha enye yakhona wafika wayibeka phambi kwabaphostoli.+ 3 Kodwa uPhetro wathi kuye: “Ananiya, kungani uSathane ekunike isibindi sokuqambela umoya ongcwele+ amanga,+ wafihla enye imali othengise ngayo indawo yenu? 4 Kanti ibingasiyakho yini? Angithi uthe usuyithengisile ubukhululekile ukuzenzela okufunayo ngemali yakhona? Kungani ucabange ukwenza into embi kangaka? Awuqambelanga abantu amanga kodwa uqambele uNkulunkulu.” 5 U-Ananiya wathi esizwa amazwi la, wathi di phansi wafa. Bonke abayizwayo indaba le besaba kakhulu. 6 Amajaha ayelapho asukuma amgoqela ngamalembu, asemthwala aphuma laye ayamngcwaba.
7 Ngemva kwamahora angaba mathathu inkosikazi yakhe yafika ingakwazi ukuthi kwenzakaleni. 8 UPhetro wathi kuyo: “Akungitshele, yiyo yonke imali le wena lo-Ananiya elithengise ngayo indawo yenu?” Yona yathi: “Ye yiyo yonke.” 9 UPhetro wasesithi kuyo: “Kungani livumelene ukulinga umoya kaJehova?* Uyazizwa izisinde zalabo abangcwabe umkakho? Bazakuthwala baphume lawe phandle.” 10 USafira wahle wawela phambi kukaPhetro wafa. Amajaha athi engena amthola esefile, asemthwala aphuma laye ayamngcwaba eceleni komkakhe. 11 Ibandla lonke kanye labo bonke abazizwayo izinto lezi besaba kakhulu.
12 Abaphostoli bona baqhubeka besenzela abantu izibonakaliso lezimanga+ njalo bonke babehlangana ndawonye evurandini okwakuthiwa ngelikaSolomoni.+ 13 Lanxa abanye bengazange babe lesibindi sokuzihlanganisa labo, abantu babekhuluma kuhle kakhulu ngabo. 14 Phezu kwalokho ababekholwa eNkosini baqhubeka besengezelelwa, kusiba lamadoda labesifazana abanengi kakhulu.+ 15 Babeze bathathe labagulayo babalethe emigwaqweni emikhulu, besebebalalisa khonapho emibhedeni emincane lasemacansini ukuze nxa uPhetro edlula, isithunzi sakhe sidlule phezu kwabanye babo.+ 16 Kwakulokhu kufika abantu abanengi bevela emadolobheni aseduze leJerusalema, bethwele abagulayo lababehlutshwa ngamadimoni. Kakho loyedwa ongelatshwanga.
17 Kodwa umphristi omkhulu labo bonke ababelaye ababengabeqembu labaSadusi baba lomhawu futhi bazonda, 18 basebebamba* abaphostoli babafaka ejele.+ 19 Kodwa ebusuku ingilosi kaJehova* yavula iminyango yejele+ yabakhiphela phandle, yathi: 20 “Hambani liyekuma ethempelini liqhubeke litshela abantu wonke amazwi amayelana lempilo ezayo.” 21 Sebekuzwile lokhu, bangena ethempelini ekuseni baqalisa ukufundisa.
Umphristi omkhulu lalabo ayelabo bafika babuthanisa iSanihedrini yonke leqembu lonke labadala bako-Israyeli, bathumela ilizwi lokuthi abaphostoli bayethathwa ejele balethwe kubo. 22 Kodwa abalindi bethempeli bathi befika ejele bathola abaphostoli bengekho. Basebephenduka bayabika 23 bathi: “Sithole ejele kuvalwe ngci futhi kukhiyiwe. Abalindi bebemile eminyango kodwa sithe sivula sathola kungelamuntu phakathi.” 24 Umphathi wethempeli kanye lomphristi okhokhelayo bathe bekuzwa lokhu baphithana amakhanda, bazibuza ukuthi kwakuzaphetha ngani. 25 Kwasekufika omunye umuntu wababikela wathi: “Amadoda ebeliwafake ejele asethempelini afundisa abantu.” 26 Umphathi labalindi bakhe basuka bayabathatha kodwa lokhu abakwenzanga ngodlakela ngoba babesesaba ukuthi abantu bazabakhanda ngamatshe.+
27 Babuya labo bafika babamisa phambi kweSanihedrini. Umphristi omkhulu wasebathonisisa 28 wathi: “Siliqonqosele ukuthi lingaqhubeki lifundisa ngebizo leli.+ Kodwa khangelani, seligcwalise iJerusalema ngemfundiso yenu futhi lizimisele ukusibeka icala ngokufa kwendoda le.”+ 29 UPhetro labanye abaphostoli bamphendula bathi: “Kumele silalele uNkulunkulu umbusi kulokuthi silalele abantu.+ 30 UNkulunkulu wabokhokho bethu wamvusa uJesu, lowo elambulala ngokumbethela esigodweni.*+ 31 UNkulunkulu wamphakamisela esandleni sakhe sokudla+ waba nguMmeli Omkhulu+ loMsindisi+ ukuze abako-Israyeli baphenduke futhi bathethelelwe izono.+ 32 Thina singofakazi balezizinto,+ lomoya ongcwele+ uNkulunkulu awuphe labo abavuma ukuthi ungumbusi wabo futhi abamlalelayo lawo uyafakaza.”
33 Bathi bekuzwa lokhu bavuka ngolaka bafuna ukubabulala. 34 Kodwa omunye umFarisi okuthiwa nguGamaliyeli+ wasukuma phakathi kweSanihedrini wathi abaphostoli bakhitshelwe phandle okwesikhatshana. Wayengumfundisi woMthetho owayehlonitshwa ngabantu bonke. 35 Wathi: “Madoda ako-Israyeli, nanzelelani lokho elifuna ukukwenza emadodeni la. 36 Kwake kwaba loThewuda owayezenza umuntu oqakathekileyo. Wayeleqembu lamadoda angaba ngu-400 kodwa wabulawa njalo bonke ababemlandela bachitheka, amacebo abo aphelela emoyeni. 37 Ngemva kwalokho kwaba loJudasi weGalile ngensuku zokubhaliswa kwabantu. Wahuga abantu ukuthi bamlandele kodwa laye watshabalala futhi bonke ababemlandela bachitheka. 38 Yikho mina ngithi lingahluphani lawo amadoda la, wayekeleni ngoba nxa icebo leli kumbe umsebenzi lo ungowabantu awusoze uphumelele. 39 Kodwa nxa ungokaNkulunkulu alisoze lenelise ukuwuchitha.+ Lingazithola selisilwa loNkulunkulu ngokwakhe.”+ 40 Bawalalela amazwi akhe basebebiza abaphostoli bababhaxabula.*+ Ngemva kwalokho babaqonqosela ukuthi bangasakhulumi futhi ngebizo likaJesu, basebebayekela bahamba.
41 Ngakho basuka phambi kwenkundla yeSanihedrini bethokoza+ ngoba uNkulunkulu wayekubone kufanele ukuthi baphathwe kubi ngenxa yebizo lakhe. 42 Baqhubeka befundisa nsuku zonke njalo bememezela izindaba ezinhle ngoKhristu uJesu+ ethempelini lasendlini ngendlu,+ abazange bayekele.