UJobe
1 Kwakulendoda okwakuthiwa nguJobe*+ eyayihlala elizweni lase-Uzi. Indoda le yayiqotho njalo ihlala isenza okulungileyo,+ imesaba uNkulunkulu futhi ixwaya okubi.+ 2 Yayilamadodana ayisikhombisa lamadodakazi amathathu. 3 Yayilezimvu ezingu-7 000, lamakamela angu-3 000, lenkomo ezingu-1 000,* labobabhemi* abangu-500 njalo yayilezisebenzi ezinengi kakhulu. Indoda le yayingumhlonitshwa futhi yayinothe ukwedlula bonke abantu beMpumalanga.
4 Wonke amadodana kaJobe ayesiba lamadili ezindlini zawo, lowo lalowo ngelanga alikhethileyo. Ayenxusa odadewabo abathathu babuye bazokudla njalo banathe labo. 5 Ngemva kwamadili lawo, uJobe wayewabiza ukuze awahlambulule. Wayevuka ekuseni kakhulu enzele ngamunye wawo umhlatshelo wokutshiswa+ esithi: “Mhlawumbe amadodana ami enze isono athethisa uNkulunkulu ezinhliziyweni zawo.” Lokhu yikho okwakusenziwa nguJobe zikhathi zonke.+
6 Lafika ilanga lokuthi amadodana kaNkulunkulu weqiniso*+ ame phambi kukaJehova,+ uSathane+ laye wangena wama lawo.+
7 UJehova wasesithi kuSathane: “Uvela ngaphi?” USathane waphendula uJehova wathi: “Bengizibhodela nje emhlabeni ngihambahamba kuwo.”+ 8 UJehova wasesithi kuSathane: “Uke wayibona yini inceku* yami uJobe? Kakho onjengaye emhlabeni. Ungumuntu oqotho ohlala esenza okulungileyo,+ omesabayo uNkulunkulu futhi oxwaya okubi.” 9 USathane waphendula uJehova wathi: “Aluba uJobe katholi lutho ubezamesaba yini uNkulunkulu?+ 10 Kawumbiyelanga yini+ yena lendlu yakhe lakho konke alakho? Uwubusisile umsebenzi wezandla zakhe,+ lezifuyo zakhe zigcwele ilizwe lonke. 11 Kodwa ake welule isandla sakho utshabalalise konke alakho, uzabona uzakuthethisa ekukhangele.” 12 UJehova wasesithi kuSathane: “Konke alakho kusesandleni sakho kodwa yena ungamthinti!” USathane wasesuka phambi kukaJehova.*+
13 Kwathi ngelinye ilanga amadodana lamadodakazi kaJobe esidla njalo enatha iwayini endlini yendodana yakhe elizibulo,+ 14 kwafika isisebenzi sikaJobe sathi kuye: “Inkomo bezilima, labobabhemi besidla eduze khonapho, 15 kwasekutheleka amaSabhini ahlasela izisebenzi zakho azibulala ngenkemba athatha zonke inkomo labobabhemi. Yimi ngedwa engiphunyukileyo ukuze ngizokubikela.”
16 Isisebenzi leso sathi sisakhuluma kwafika esinye sathi: “Kwehle umlilo kaNkulunkulu* uvela ezulwini waqothula izimvu lezisebenzi zakho! Yimi ngedwa engisilileyo ukuze ngizokubikela.”
17 Sithe sisakhuluma kwafika esinye sathi: “Kufike amaqembu amathathu amaKhaledi+ athumba amakamela abulala lezisebenzi zakho ngenkemba. Yimi ngedwa engiphunyukileyo ukuze ngizokubikela.”
18 Kwathi isisebenzi leso sisakhuluma kwafika esinye futhi, sathi: “Amadodana lamadodakazi akho abesidla njalo enatha iwayini endlini yendodana yakho elizibulo, 19 kwathi vungu isivunguzane sivela enkangala satshaya amakhona womane endlu, yadilikela phezu kwabantwabakho bafa. Yimi ngedwa engisilileyo ukuze ngizokubikela.”
20 UJobe wathi ekuzwa lokhu wasukuma wadabula isembatho sakhe, waphuca ikhanda wasezilahla phansi 21 wathi:
“Ngaphuma nginqunu esiswini sikamama,
Ngizabuyela nginjalo.+
UJehova uphile,+ uJehova usethethe.
Ibizo likaJehova kaliqhubeke lidunyiswa.”
22 Kukho konke lokhu uJobe konanga futhi kazange asole uNkulunkulu athi wenze okubi.