UJehoshafathi Uthembela kuJehova

UYAKWAZI yini ukuthi amadoda la angobani njalo lokuthi enzani? Bayakulwa njalo amadoda aphambili ayahlabela. Kodwa ungabuza uthi: ‘Kungani abahlabeleli bengela zinkemba lemikhonto?’ Ake sibone ukuthi kungani.

UJehoshafathi uyinkosi yombuso wezizwana ezimbili zako-Israyeli. Uphila ngesikhathi seNkosi u-Ahabi loJezebeli abombuso wezizwana ezilitshumi ezisenyakatho. Kodwa uJehoshafathi uyinkosi elungileyo njalo uyise u-Asa laye wayeyinkosi elungileyo. Yikho-ke, okweminyaka eminengi, abantu bombuso wezizwana ezimbili eziseningizimu bajabulela impilo enhle.

Kodwa kulento eyenzakalayo enza abantu besabe. Izithunywa ziletha umbiko kuJehoshafathi othi: ‘Kulebutho elikhulu elizolihlasela elivela eMowabi, e-Amoni lentabeni iSeyiri.’ Ama-Israyeli amanengi ayabuthana eJerusalema ukuze adinge uncedo kuJehova. Aya ethempelini, uJehoshafathi abesekhuleka: ‘O Jehova Nkulunkulu wethu, kasikwazi ukuthi senzeni. Kasilamandla okulwa lebutho elingaka. Sidinga uncedo lwakho.’

UJehova uyalalela, abesetshela enye yezinceku zakhe ukuthi itshele abantu ukuthi: ‘Ukulwa kakusikho okwenu kodwa ngokukaNkulunkulu. Aliyikulwa impi le. Lime libukele libone indlela uJehova azalikhulula ngayo.’

Yikho-ke, ngelanga elilandelayo ekuseni, uJehoshafathi uthi ebantwini: ‘Thembelani kuJehova!’ Sekunjalo, ufaka abahlabeleli phambi kwamasotsha akhe, abahlabeleli bahamba behlabela izindumiso kuJehova. Uyakwazi yini ukuthi kwenzakalani sebesondela duze lempi? UJehova wenza ukuthi amasotsha esitha alwe wodwa. Ama-Israyeli afica amasotsha wonke esitha asefile!

UJehoshafathi wayehlakaniphile ngokuthembela kuJehova. Lathi siyabe sihlakaniphile nxa singathembela kuye.