Abafana Ababili Abavuswayo

NXA UMNTWANA engafa, umama wakhe engezwa njani nxa engavuswa? Engathaba kakhulu! Kodwa umuntu ofileyo angavuka aphile yini? Kwake kwenzakala yini?

Khangela indoda le elapha kanye lomama lomfana lo omncane. Indoda le ngumphrofethi u-Elija. Umama lo ngumfelokazi wasedolobheni leZarefathi njalo umfana lo yindodana yakhe. Ngelinye ilanga umfana lo uyagula. Ukugula kwakhe kuyaqhubeka aze afe. U-Elija abesesithi kumama womfana: ‘Nginika indodana yakho.’

U-Elija uthatha umntwana lo ofileyo ahambe laye endlini ephezulu abesemlalisa embhedeni. Abesekhuleka esithi: ‘O Jehova, yenza ukuthi umfana avuke aphile futhi.’ Umfana uqalisa ukuphefumula! Ngalesosikhathi, u-Elija uyamthatha amhambise kunina, abesesithi: ‘Khangela ubone, indodana yakho iyaphila!’ Yikho unina womfana ethabe kangaka.

Omunye umphrofethi kaJehova oqakathekileyo ngu-Elisha. Uncedisa u-Elija. Kodwa ngokuhamba kwesikhathi uJehova usebenzisa lo-Elisha ukwenza izimangaliso. Ngelinye ilanga u-Elisha uya edolobheni laseShunemi lapho okulowesifazana omenzela umusa omkhulu. Ngemva kwesikhathi umama lo uba lomntwana ongumfana.

Ngelinye ilanga ekuseni, umntwana lo esemkhudlwana, uhamba ayencedisa ubaba wakhe emasimini. Umfana uzwakala ekhala esithi: ‘Ikhanda lami libuhlungu!’ Umfana uyafa esehanjiswe endlini. Umama wakhe udanile sibili! Ngokuphangisa, uhamba ayedinga u-Elisha.

U-Elisha ufika angene endlini lapho okulomntwana ofileyo. Uyathandaza kuJehova, alale phezu kwesidumbu somfana. Ngesikhatshana umzimba womfana uqalisa ukukhudumala, njalo uyathimula kasikhombisa. Umama womfana uyathaba lapho engena ethola umntanakhe ephila!

Sekulabantu abanengi abafayo. Lokhu kwenze izihlobo labangane babantu laba badana kakhulu. Asilawo amandla okuvusa abantu abafileyo. Kodwa uJehova ulawo. Ngokuhamba kwesikhathi sizafunda indlela azavusa ngayo izigidi zabantu abafileyo.