Inhlanganiso Emanyeneyo

OKWEMINYAKA engaba ngu-1 500, abako-Israyeli babeyisizwe esibizwa ngebizo likaJehova uNkulunkulu. Kodwa ngokuya kwesikhathi uJehova ‘wanaka abezizweni ukuze athathe abantu bebizo lakhe phakathi kwabo.’ (ImiSeb. 15:14) Labobantu babezakuba ngofakazi bakhe abamanyeneyo njalo benze izinto ngendlela efananayo kungelani lokuthi bahlala ngaphi. UJesu watshiyela abalandeli bakhe umsebenzi wokutshumayela oyiwo owenza kuqoqwe abantu ababizwa ngebizo likaNkulunkulu. Wathi: “Ngakho-ke hambani liyekwenza abantu bezizwe zonke babe ngabafundi, libabhabhathize ebizweni likaBaba leleNdodana lelomoya ongcwele, libafundise ukulandela izinto zonke engililaye zona.”—Mat. 28:19, 20.

² Ukuzinikela owakwenzayo kanye lokubhabhathizwa kwakho kwenza waba ngumlandeli kaJesu Khristu. Usulilunga lenhlanganiso elamaKhristu amanyeneyo futhi angabandlululi abanye ngokuthi bangumhlobo bani, bavela kuliphi ilizwe lokuthi balemali yini loba hatshi. (Hubo. 133:1) Lokhu kukwenze wakhululeka ukuba sebandleni lobuKhristu lanxa kulabantu bemihlobo etshiyeneyo, abavela emazweni atshiyeneyo futhi abakhuliswe ngendlela ezitshiyeneyo. Khathesi usuphakathi kwabantu abakuthandayo futhi uthando olunjalo ngeke uluthole kwenye indawo.—Mak. 10:29, 30; Kol. 3:14; 1 Phet. 1:22.

UKUTSHINTSHA INDLELA ESICABANGA NGAYO

³ Nxa ulohlupho lokubandlulula abanye ngokuthi bangumhlobo bani, bavela kuliphi ilizwe, lokuthi bayini emphakathini loba esinye nje isizatho, cabanga ngesibonelo samaKhristu okuqala ayengamaJuda. AmaKhristu la kwakumele atshintshe indlela ayephatha ngayo abantu bezinye izizwe. Ngokwesibonelo uJehova watshengisa uPhetro umbono owamnceda ukuthi atshintshe indlela ayebona ngayo abantu bezizweni engakamthumi endlini kaKhoneliya owayengumkhokheli wamasotsha eRoma.—ImiSeb, isahl. 10.

⁴ Embonweni lo, uPhetro watshelwa ukuthi ahlabe njalo adle inyamazana ezazingcolile kumaJuda. Ngemva kokwala, kwezwakala ilizwi livela ezulwini lisithi: “Yekela ukubiza izinto uNkulunkulu asezihlambululile ngokuthi zingcolile.” (ImiSeb. 10:15) Umbono lo wamnceda ukuthi atshintshe indlela ayecabanga ngayo lokuthi avume ukuyabona uKhoneliya owayengowezizweni. Esevumile ukwenza ayekuthunywe nguJehova, uPhetro watshela abantu ababelapho wathi: “Likwazi mhlophe ukuthi akukho emthethweni ukuthi umJuda adlelane lomuntu womunye umhlobo lokuthi aye kuye. Kodwa uNkulunkulu usengitshengisile ukuthi akumelanga ngibize loba ngubani ngokuthi ungcolile kumbe ngokuthi kahlambulukanga. Yikho ngingazange ngithikaze ngitshelwa ukuthi ngize lapha.” (ImiSeb. 10:28, 29) Ngemva kwalokho uPhetro wabona ubufakazi obabutshengisa ukuthi uJehova wayemamukele sibili uKhoneliya lemuli yakhe.

⁵ Esinye isibonelo ngesikaSawuli waseThasu owayengumFarisi ofundileyo. Laye kwakumele atshintshe indlela ayebona ngayo abantu ayebakhangelela phansi, aqalise ukuzihlanganisa labo. Kwadingeka lokuthi azithobe amukele iziqondiso ezivela kubo. (ImiSeb. 4:13; Gal. 1:13-20; Flp. 3:4-11) USegiwu Phawuli, uDiyonisiyu, uDamari, u-Onesimu, uFilimoni labanye kwakumele labo batshintshe indlela ababecabanga ngayo ngesikhathi besamukela izindaba ezinhle futhi besiba ngabalandeli bakaJesu Khristu.—ImiSeb. 13:6-12; 17:22, 33, 34; Filim. 8-20.

UKULONDOLOZA UKUMANYANA KWETHU

⁶ Akuthandabuzwa ukuthi uthando owalubona ebandleni lwakwenza wasondela kakhulu kuJehova lasenhlanganisweni yakhe. Wananzelela ukuthi lolothando yilo kanye uJesu Khristu athi abalandeli bakhe bazabonakala ngalo lapho esithi: “Ngilinika umlayo omutsha wokuthi lithandane. Thandanani ngendlela lami engilithande ngayo. Nxa lithandana, abantu bonke bazakwazi ukuthi lingabafundi bami.” (Joh. 13:34, 35) Kanti njalo ukubona ukuthi uthando lolu alupheleli ebandleni okulo kodwa lukhona lakubafowethu labodadewethu emhlabeni wonke, kwakwenza wamthanda kakhulu uJehova lenhlanganiso yakhe. Okubonayo kugcwalisa isiphrofetho esiseBhayibhilini esimayelana lokuqoqwa kwabantu kulezinsuku zokucina ukuze bakhonze uJehova ngokuthula langokumanyana.—Mik. 4:1-5.

⁷ Ngenxa yokubandlululana okukhona namuhla, ubona angani kungenzakala yini ukuthi abantu abaphuma “kuzo zonke izizwe, lezizwana, labantu kanye lezindimi” bamanyane? (Isam. 7:9) Ngokwesibonelo, cabanga ngomehluko okhona phakathi kwabantu abathanda ezempucuko labaphila ngesidala. Cabanga langokuxabana okukhona phakathi kwabantu bamasonto atshiyeneyo lanxa bengumhlobo ofananayo. Kanti njalo ezombusazwe lezomnotho lazo zibangela ukuthi abantu behlukane. Yikho kuyazicacela ukuthi ukuhlanganiswa kwabantu abaphuma kuzo zonke izizwe, izindimi lemihlobo ukuze bakhonze bemanyene, belokuthula njalo belothando kuyisimangaliso esingenziwa nguNkulunkulu kuphela.—Zek. 4:6.

⁸ Ukumanyana okunjalo kukhona sibili enhlanganisweni kaNkulunkulu, njalo ngesikhathi uzinikela futhi ubhabhathizwa ukuze ube nguFakazi kaJehova waba lilunga lenhlanganiso le. Ngakho usulomlandu wokulondoloza ukumanyana kwethu. Lokhu ungakwenza ngokulandela amazwi akhulunywa nguPhawuli kuGalathiya 6:10 athi: “Nxa nje siseselethuba, kasenzeni okuhle kubo bonke, kodwa ikakhulu kulabo abangabemuli yethu yabakholwayo.” Esinye iseluleko ngesithi: “Lingenzi lutho ngokubangisana kumbe ngokuziphakamisa, kodwa ngokuthobeka bonani abanye bengcono kulani, lingaqakathekisi lokho okufunwa yini kuphela kodwa liqakathekise lalokho okufunwa ngabanye.” (Flp. 2:3, 4) Nxa singazifundisa ukubona abafowethu labodadewethu ngendlela uJehova ababona ngayo, hatshi lokho abayikho ngaphandle, sizahlala simanyene njalo sizakholisa ukuba seduze labo.—Efe. 4:23, 24.

UKUBA LENDABA LABANYE

⁹ Umphostoli uPhawuli wasebenzisa umzekeliso otshengisa ukuthi ibandla lobuKhristu akumelanga lehlukane lokuthi bonke abakulo kufanele bathandane. (1 Khor. 12:14-26) Lanxa singabe sihlala khatshana labanye abafowethu labodadewethu, akutsho ukuthi asenelisi ukutshengisa ukuthi silendaba labo. Nxa abafowethu kwezinye indawo behlukuluzwa, lathi siyabuzwa ubuhlungu. Nxa kulabaswelayo kumbe abehlelwe ngumonakalo obangelwe yimvelo loba abahlaselwe yizimpi, sisukumela phezulu ukuze sibancedise njalo sibakhuthaze.—2 Khor. 1:8-11.

¹⁰ Kuqakathekile ukuthi sithandazele abafowethu labodadewethu nsuku zonke. Abanye babo balwisana lezilingo, abanye baphakathi kwenhlupho ezitshiyeneyo, abanye njalo bayaphikiswa ezimulini zabo kumbe lapho abasebenza khona. (Mat. 10:35, 36; 1 Thes. 2:14) Lokhu kuyasikhathaza lathi ngoba siyabathanda abafowethu labodadewethu. (1 Phet. 5:9) Abanye okumele sibathandazele ngabafowethu abasebenza nzima ukuze bakhokhele emabandleni lasemsebenzini wokutshumayela. Abanye njalo ngabakhangela umsebenzi owenziwa enhlanganisweni. Singenza njalo, kuzakhanya ukuthi siyabathanda kakhulu lokuthi silendaba labo lanxa kwezinye izikhathi singenelisi ukubancedisa ngezinye indlela.—Efe. 1:16; 1 Thes. 1:2, 3; 5:25.

¹¹ Abantu bakaJehova kumele bahlale bekulungele ukuncedana ngoba insuku lezi esiphila kuzo zigcwele inhlupho. Ngokwesibonelo, kufanele sizimisele ukuncedisa ngezindlela ezitshiyeneyo nxa kungaba lomonakalo obangelwe yikuzamazama komhlaba kumbe izikhukhula. AmaKhristu aphila ngesikhathi sabaphostoli asitshiyela isibonelo esihle endabeni le. Elandela lokho okwakhulunywa nguJesu, amaKhristu ase-Antiyokhi ancedisa abazalwane baseJudiya ngalokho ababekudinga. (ImiSeb. 11:27-30; 20:35) Ngokuya kwesikhathi, umphostoli uPhawuli wakhuthaza abaseKhorinte ukuthi bazimisele ukubambisana lenhlelo ezazikhona zokuncedisa labo ababeswela. (2 Khor. 9:1-15) Lalamuhla, nxa abafowethu labodadewethu besehlelwa yizimo ezinzima, sonke sisukumela phezulu ukuze sibancedise.

UKWENZA INTANDO KAJEHOVA

¹² Inhlanganiso le elabantu abamanyeneyo ihlelelwe ukwenza intando kaJehova. Okwakhathesi uJehova ufuna ukuthi izindaba ezinhle zoMbuso zitshunyayelwe emhlabeni wonke ukuze kube lobufakazi ezizweni zonke. (Mat. 24:14) UJehova ukhangelele ukuthi siziphathe ngendlela evumelana lezimiso zakhe njengoba sisenza umsebenzi lo asiphathise wona. (1 Phet. 1:14-16) Ukhangelele lokuthi sizehlise futhi sisebenze nzima ukuze siqhubeke sitshumayela izindaba ezinhle. (Efe. 5:21) Lesi yisikhathi sokutshengisa ukuthi siqakathekisa uMbuso kaNkulunkulu ukwedlula loba yini. (Mat. 6:33) Singenza njalo, sizakholisa ukuncedisana labanye emsebenzini wokutshumayela izindaba ezinhle njalo sizathola izibusiso ezizahlala kuze kube nini lanini.

¹³ Thina sitshiyene sibili labantu bomhlaba lo ngoba sihlanzekile ekukhonzeni njalo sikukhuthalele ukwenza intando kaNkulunkulu. (Tit. 2:14) Indlela esikhonza ngayo uJehova yiyo eyenza sitshiyane labanye abantu. Ngokwesibonelo, siyabambisana labafowethu labodadewethu emhlabeni wonke, sithanda iqiniso eliseBhayibhilini futhi esikufundisayo yikho kanye esikwenzayo. UJehova wayevele ekhulumile esebenzisa uZefaniya ukuthi kuzakwenzakala lokhu. Wathi: “Ngizahlambulula izindebe zezizwe, ukuze zonke zikhuleke ebizweni likaJehova zimkhonze zimanyene.”—Zef. 3:9.

¹⁴ UJehova waphinda waphefumulela uZefaniya ukuthi aphrofethe ngokumanyana okwakuzakuba senhlanganisweni, wathi: “Abako-Israyeli abaseleyo kabayikwenza okubi; kabayikuqamba amanga, loba kube lenkohliso emilonyeni yabo. Bazakudla balale phansi, kakho ozabenza besabe.” (Zef. 3:13) Ukuzwisisa iqiniso eliseLizwini likaJehova lokutshintsha indlela esicabanga ngayo lesiphila ngayo ukuze ihambelane lezimiso zakhe yikho okusenza senelise ukuhlala simanyene. Kuyabamangalisa sibili abantu abanengi ukubona konke okuhle okwenzakala enhlanganisweni. Kusegcekeni ukuthi sitshiyene labantu bomhlaba lo ngoba singabantu bakaNkulunkulu abaqhubeka bemdumisa emhlabeni wonke.—Mik. 2:12.