Kungani Kumele Uzinikele KuNkulunkulu Futhi Ubhabhathizwe?

Nxa umuntu ezinikela kuJehova uyabe ekhuleka kuye emthembisa ukuthi uzakhonza yena yedwa lokuthi uzaqakathekisa ukwenza intando yakhe. (IHubo 40:8) Umuntu osezinikele kuJehova uyabe esekulungele ukubhabhathizwa. Lesi yisinqumo esiqakatheke kakhulu. Kodwa kuyini okungenza uthathe inyathelo elikhulu kangaka?

1. Kuyini okwenza umuntu azinikele kuJehova?

Ukuthanda uJehova yikho okwenza sizinikele kuye. (1 UJohane 4:10, 19) IBhayibhili lithi: “Kumele uthande uJehova uNkulunkulu wakho ngenhliziyo yakho yonke, langomphefumulo wonke, langengqondo yonke, langamandla akho wonke.” (UMakho 12:30) Sitshengisa ukuthi siyamthanda uNkulunkulu ngalokho esikwenzayo langalokho esikukhulumayo. Njengoba nje uthando lufuqa ijaha lentombi ukuthi batshade, ukuthanda uJehova lakho kwenza sizinikele kuye njalo sibhabhathizwe.

2. Ukubhabhathizwa kuzakwenza uJehova akubusise

Nxa ungabhabhathizwa uzabe usulilunga lemuli kaJehova ethokozayo. Uzaphinda ube ngumngane kaJehova oseduze kakhulu njalo uzabona lendlela ezitshiyeneyo akuthanda ngazo. (Bala uMalaki 3:16-18.) Kanti njalo uzabe usulilunga lenhlanganiso esemhlabeni wonke elabafowethu labodadewethu abathanda uJehova futhi abakuthandayo. (Bala uMakho 10:29, 30.) Kodwa kulezinto okumele uzenze ungakabhabhathizwa. Kumele ufunde ngoJehova, umthande njalo ube lokholo eNdodaneni yakhe. Ungenza njalo usungazinikela kuJehova ubusubhabhathizwa. Nxa ungakwenza konke lokhu uzabe usulethuba lokuphila kuze kube nini lanini. ILizwi likaNkulunkulu lithi: ‘Ukubhabhathizwa kuyasisindisa.’—1 UPhetro 3:21.

GEBHA UJULE

3. Kumele sikhethe ukuthi sizakhonza bani

Amanye ama-Israyeli endulo ayecabanga ukuthi angakwenza kokubili, ukukhonza uJehova lokukhonza unkulunkulu wamanga okwakuthiwa nguBhali. Kodwa uJehova wathuma umphrofethi wakhe u-Elija ukuthi ayebatshela ukuthi ababekwenza kwakungaqondanga. Bala u-1 AmaKhosi 18:21 beselixoxa ngombuzo lo:

• Kuyini okwakumele ama-Israyeli akwenze?

Lathi njengama-Israyeli kumele sikhethe ukuthi sizakhonza bani. Bala uLukha 16:13 beselixoxa ngemibuzo le:

• Kungani kungaqondanga ukuthi sikhonze uJehova ngapha sikhonza olunye ulutho kumbe omunye umuntu?

• Sitshengisa njani ukuthi sikhetha ukukhonza uJehova kuphela?

4. Cabangisisa ngendlela uJehova akuthanda ngayo

Zinengi izipho ezinhle uJehova asinike zona. Singenzani ukuze sitshengise ukuthi siyambonga? Bukelani IVIDIYO.

IVIDIYO: Ukupha UJehova Izipho (3:04)

UJehova utshengise njani ukuthi uyakuthanda? Bala iHubo 104:14, 15 lo-1 Johane 4:9, 10 beselixoxa ngemibuzo elandelayo:

• Phakathi kwazo zonke izipho oziphiwe nguJehova, yiziphi ozithanda kakhulu?

• Izipho lezo zenza uzwe njani ngoJehova?

Nxa omunye umuntu angasipha isipho sijayele ukumbonga. Bala uDutheronomi 16:17 beselixoxa ngombuzo lo:

• Ufuna ukumenzelani uJehova nxa ucabanga ngakho konke akwenzele khona?

5. Nxa ungazinikela kuJehova uzathola izibusiso ezinengi

IVIDIYO: Ngangiliqakathekisa Kakhulu Ibhora (5:45)

• Kuyini okwenza umfowethu lo watshiya ukudlala ibhora lanxa wayelithanda?

• Wakhetha ukuzinikela kuJehova hatshi ekudlaleni ibhora. Ucabanga ukuthi wakhetha kuhle yini? Kungani usitsho njalo?

Engakabi ngumKhristu, umphostoli uPhawuli wayefundele umsebenzi owamenza waba ngumuntu odumileyo. Wayefundiswe umthetho wamaJuda ngumbalisi owayedumile ngalesosikhathi. Kodwa wakutshiya konke lokhu ngesikhathi esiba ngumKhristu. Wazisola yini uPhawuli? Bala uFiliphi 3:8 beselixoxa ngemibuzo le:

• Kungani uPhawuli wathi lokho ayekwenza engakabi ngumKhristu ‘kwakuyinqumbi yezibi’?

• Kwamnceda ngani ukutshiya ayekwenza?

• Ubona angani kumele ukhethe kuphi phakathi kokukhonza uJehova lokuqakathekisa lokho okufunayo?

ISIFINQO

Ukuthanda uJehova kuzakwenza uzinikele kuye futhi ubhabhathizwe.

Ufundeni?

• Kungani kumele sithande uJehova ngenhliziyo yonke njalo sikhonze yena yedwa?

• Ukubhabhathizwa kuzakwenza uthole ziphi izibusiso?

• Wena uyafuna yini ukuzinikela kuJehova?

THOLA OKUNENGI

Bukela ividiyo le ukuze ubone ukuthi kuyini okwenza omunye umhlabeleli lomunye umdlali we-rugby bazinikela kuJehova.

Imibuzo Ebuzwa Ngabasakhulayo-Ngizakwenzani Ngempilo Yami?-Okwenzakala Besakhula (6:54)

Bala isihloko lesi ubone ezinye izinto ezingakwenza ufune ukuzinikela kuJehova.

“Kungani Kumele Uzinikele KuJehova?” (INqabayokulinda, January 15, 2010)

Bukela ividiyo yengoma le ukuze ubone intokozo abantu abazinikela kuJehova abalayo.

Ngiz’nikela Kuwe (4:30)

Bala isihloko esithi “Ngangihlala Ngizibuza Ukuthi Siphilelani” ukuze ubone ukuthi kuyini okwafuqa owesifazana othile ukuthi atshintshe ayekuqakathekisa.

“IBhayibhili Liyamntshintsha Umuntu” (INqabayokulinda, November 1, 2012)