Uthando Lwakho Kaluqhubeke Lukhula

1. Kuyini owakufundayo ngesikhathi uqalisa ukufunda iBhayibhili?

USAKHUMBULA yini ngesikhathi uqalisa ukufunda iBhayibhili? Ungabe wamangala usizwa ukuthi uNkulunkulu ulebizo. Engxenye kwathi hu usibakwazi ukuthi uNkulunkulu kahlukuluzi abantu esihogweni. Kanti njalo kumele ukuthi wathokoza kakhulu usizwa ukuthi izihlobo labangane bakho asebakutshiyayo bazavuswa, uphinde uphile labo emhlabeni olipharadayisi.

2. Kuyini okunye owakwenzayo usufunde iqiniso eliseBhayibhilini? (U-Efesu 5:1, 2)

² Kumele ukuthi wamthanda kakhulu uJehova ngesikhathi ufunda okunengi ngaye eLizwini lakhe. Indlela owawumthanda ngayo yiyo eyenza wazimisela ukusebenzisa lokho owawukufundile. Kanti njalo izimiso zeBhayibhili zakunceda ukuthi wenze izinqumo ezinhle. Watshintsha indlela owawubona ngayo izinto lendlela owawuziphatha ngayo ngoba wawufuna ukuthokozisa uNkulunkulu. Wawusulingisela uYihlo osezulwini njengomntwana olingisela umzali wakhe olothando.—Bala u-Efesu 5:1, 2.

3. Yiphi imibuzo esingazibuza yona?

³ Singazibuza imibuzo le: ‘Sengimthanda kakhulu yini uJehova khathesi nxa ngiqathanisa lendlela engangimthanda ngayo ngiqalisa ukuba ngumKhristu? Kusukela ngibhabhathizwa, indlela engicabanga ngayo lengenza ngayo isihambelana lekaJehova yini, ikakhulu endabeni yokuthanda abafowethu labodadewethu?’ Nxa kuyikuthi “uthando owawulalo kuqala” selupholile ungapheli amandla. Lokho kwake kwenzakala lakumaKhristu akuqala. Kodwa uJesu kazange awalahlele iganga njalo lathi kasoze asikhalale. (Isam. 2:4, 7) Uyakwazi ukuthi singaluvuselela uthando esasilalo ngesikhathi siqalisa ukufunda iqiniso.

4. Sizaxoxa ngani esihlokweni lesi?

⁴ Esihlokweni lesi sizaxoxa ngokuthi singenzani ukuze siqhubeke simthanda kakhulu uJehova futhi sithanda labanye. Sizaphinda sixoxe ngezibusiso esizitholayo lezitholwa ngabanye nxa singavumela ukuthi uthando lwethu lukhule.

QHUBEKA UMTHANDA UJEHOVA

5-6. (a) Yibuphi ubunzima umphostoli uPhawuli ahlangana labo enkonzweni yakhe? (b) Kuyini okwamnceda ukuthi aqhubeke esebenzela uJehova?

⁵ Umphostoli uPhawuli wayekukholisa ukukhonza uJehova kodwa izinto zazingatsheleli sonke isikhathi. Wayejayele ukuhamba imango emide njalo ngezikhathi lezo kwakungalula ukuhamba imango emide. Kwezinye izikhathi ekuhambeni kwakhe wayesiba ‘sezingozini emifuleni, lasezingozini zokuhlaselwa yizigebenga.’ Lezitha zakhe zazike zimtshaye. (2 Khor. 11:23-27) Kanti njalo kwezinye izikhathi abazalwane babetshengisa ukuthi kabalandaba lemizamo yonke ayeyenza ukuze abancedise.—2 Khor. 10:10; Flp. 4:15.

⁶ Kuyini okwanceda uPhawuli ukuthi aqhubeke emsebenzela uJehova? UPhawuli wafunda okunengi ngoJehova eMibhalweni lakulokho okwenzakala kuye. Lokhu kwamenza waqiniseka ukuthi uJehova uNkulunkulu wayemthanda kakhulu. (Rom. 8:38, 39; Efe. 2:4, 5) Laye wamthanda kakhulu uJehova. UPhawuli watshengisa ukuthi uyamthanda uJehova ‘ngokusiza abangcwele langokuqhubeka ebasiza.’—Heb. 6:10.

7. Kuyini okungasinceda ukuthi simthande kakhulu uJehova?

⁷ Okungasinceda ukuthi simthande kakhulu uNkulunkulu yikulitaditsha okuzwayo iLizwi lakhe. Nxa ubala iBhayibhili zama ukudingisisa ukuthi okubalayo kukufundisani ngoJehova. Zibuze: ‘Indaba le itshengisa njani ukuthi uJehova uyangithanda? Ingincedisa njani ukuthi lami ngimthande uJehova?’

8. Ukuthandaza kungasinceda njani ukuthi simthande kakhulu uNkulunkulu?

⁸ Okunye okungasinceda ukuthi simthande kakhulu uJehova yikuhlala sithandaza kuye simtshela konke okusezinhliziyweni zethu. (Hubo. 25:4, 5) Nxa singenza njalo, uJehova uzayiphendula imithandazo yethu. (1 Joh. 3:21, 22) Omunye udadewethu ohlala e-Asia okuthiwa nguKhanhb uthi: “Kuqala uJehova ngangimthanda ngenxa yalokho engasengikufundile ngaye. Kodwa okwenza ngamthanda kakhulu yikubona indlela ayephendula ngayo imithandazo yami. Lokho kwangenza ngafuna ukwenza izinto ezimthokozisayo.”

QHUBEKA UBATHANDA KAKHULU ABANYE

9. UThimothi watshengisa njani ukuthi uthando lwakhe lwaluqhubeka lukhula?

⁹ Kwathi sekulesikhathi uPhawuli ebe ngumKhristu, wahlangana lelinye ijaha elalisenza kuhle okwakuthiwa nguThimothi. UThimothi wayemthanda uJehova futhi ebathanda abantu. UPhawuli watshela abaseFiliphi wathi: “Kangilaye omunye onjengaye [uThimothi] ozakuba lendaba lani ngenhliziyo yonke.” (Flp. 2:20) Evesini le uPhawuli kazange athi uThimothi wayeyingcitshi yokuhlela izinto kumbe eyokwenza izinkulumo. Kodwa kuyacaca ukuthi ayekuthande kakhulu ngoThimothi yikuthi wayebathanda abafowabo labodadewabo. Akuthandabuzwa ukuthi amabandla ayevakatshelwa nguThimothi ayekulindela ngabomvu ukufika kwakhe.—1 Khor. 4:17.

10. U-Anna lomkakhe batshengisa njani ukuthi bayabathanda abafowabo labodadewabo?

¹⁰ Lathi kumele sidinge indlela esingancedisa ngazo abafowethu labodadewethu. (Heb. 13:16) Ake sixoxe ngokwenziwa ngu-Anna esikhulume ngaye esihlokweni esidlulileyo. Kwathi sekube lesiphepho esikhulu yena lomkakhe bahamba bayabona eyinye imuli engoFakazi. Bafica uphahla lwendlu yemuli le luwele njalo lokhu kwakutshiye zonke izigqoko zabo zingcolile. U-Anna uthi: “Sathatha izigqoko zabo sayaziwatsha, sazi-ayina, sazigoqa sasesiziphendukisa. Thina sasibona angani esikwenzileyo yinto encane kodwa kwenza ukuthi sibe ngamathe lolimi lemuli le njalo silokhu singabangane lalamuhla.” Indlela u-Anna lomkakhe ababethanda ngayo abafowabo labodadewabo yenza ukuthi babancedise.—1 Joh. 3:17, 18.

11. (a) Kubaphatha njani abanye nxa sitshengisa ukuthi siyabathanda? (b) IZaga 19:17 zithi uJehova wenzani nxa esibona sitshengisa ukuthi siyabathanda abanye?

¹¹ Nxa sisiba lomusa lothando kwabanye, izikhathi ezinengi bayananzelela ukuthi senza okusemandleni ethu ukuthi silingisele uJehova futhi sicabange ngendlela acabanga ngayo. Kanti njalo bayawuqakathekisa kakhulu umusa esibenzela wona lanxa thina siyabe singakwazi. UKhanh esike sakhuluma ngaye ubakhumbula kuhle labo abamncedisayo. Uthi: “Ngiyababonga kakhulu bonke odadewethu ababehamba lami ekutshumayeleni. Babebuya bezongithatha endlini yami, benginxusa ukuthi siyekudla sonke baphinde bangitshiye endlini nxa sesitshayisile. Khathesi senginanzelela sibili ukuthi babezinikela ukuthi bangincedise njalo babekwenza lokhu ngoba bengithanda.” Kuliqiniso ukuthi ayisibo bonke abazasibonga ngezinto ezinhle esibenzela zona. UKhanh wakhuluma ngalabo abamncedisayo wathi: “Ngiyafisa ukuthi bonke abantu ababa lomusa kimi lami ngibenzele njalo kodwa angikwazi ukuthi abanye babo bahlala ngaphi khathesi. Lanxa kunjalo uJehova yena uyakwazi yikho ngithandazela ukuthi abatshengise umusa.” UKhanh uqinisile sibili. UJehova uyakunanzelela konke okuhle esikwenzela abanye lanxa kungakhanya angathi kuncane futhi ukubona kungumnikelo oqakathekileyo lanjengesikwelede okuyabe sekumele asibhadale.—Bala iZaga 19:17.

12. Abazalwane bangatshengisa njani ukuthi bayabathanda abasebandleni labo? (Khangela lemifanekiso.)

¹² Nxa ungumzalwane ungatshengisa njani ukuthi uyabathanda abanye lokuthi uyafuna sibili ukubancedisa? Omunye umzalwane osakhulayo okuthiwa nguJordan wabuza umdala webandla ukuthi kuyini okunye ayengakwenza ukuze abe luncedo kakhulu ebandleni. Umdala lo wamncoma ngentuthuko ayesevele eseyenzile wasemtshela lokunye ayengakwenza. Ngokwesibonelo, wakhuthaza uJordan ukuthi afike masinyane eWolu yoMbuso futhi abingelele abanye. Wamkhuthaza lokuthi aphendule emihlanganweni yebandla futhi ahlale etshumayela leqembu lokutshumayela akulo kanye lokuthi adinge ezinye izindlela zokuncedisa abanye. UJordan wafunda izinto ezintsha ngesikhathi ekwenza lokhu futhi wabathanda kakhulu abafowabo labodadewabo. Wafunda ukuthi umzalwane kaqalisi ukunceda abanye ngesikhathi esiba yinceku ekhonzayo kodwa uyaqhubeka ebancedisa.—1 Thim. 3:8-10, 13.

13. Ukuba lothando kwamnceda njani umfowethu okuthiwa nguChristian ukuthi aphinde abe ngumdala?

¹³ Wake waba yinceku ekhonzayo kumbe umdala yini? UJehova uyawukhumbula umsebenzi owamenzela wona njalo uyakwazi lokuthi wawuwenza ngoba umthanda. (1 Khor. 15:58) Uyakubona lokuthi khathesi ulokhu ulothando. Umzalwane okuthiwa nguChristian wadana kakhulu ngesikhathi ekhitshwa ukuba ngumdala. Kodwa wathi: “Lanxa ngangingasenguye mdala ngabona kungcono ukuthi ngiqhubeke ngisenza okusemandleni ami ngikhonza uJehova ngoba ngimthanda.” Ngokuhamba kwesikhathi waphinda wabekwa ukuthi abe ngumdala. UChristian uthi: “Kwakungesabisa ukuthi ngiphinde ngibe ngumdala. Kodwa ngacina ngibona ukuthi nxa uJehova engivumela ukuthi ngiphinde ngibe ngumdala ngenxa yesihawu sakhe, ngizakuba nguye ngenxa yokuthi ngiyamthanda langenxa yokuthi ngiyabathanda abafowethu labodadewethu.”

14. Ufundani kulokho okwakhulunywa ngu-Elena?

¹⁴ Izinceku zikaJehova zitshengisa ngezenzo ukuthi ziyabathanda omakhelwane. (Mat. 22:37-39) Ngokwesibonelo, omunye udadewethu okuthiwa ngu-Elena ohlala eGeorgia uthi: “Ekuqaliseni ngangitshumayela ngenxa yokuthanda uJehova kuphela. Kodwa njengoba ngangiqhubeka ngimthanda kakhulu uBaba wami osezulwini, ngabathanda kakhulu labantu. Ngangizama ukucabanga ngenhlupho ababengabe belazo lokuthi yikuphi engingakhuluma ngakho okungathinta inhliziyo zabo. Ukuqhubeka ngicabanga ngabo kwenza ukuthi ngifune kakhulu ukubancedisa.”—Rom. 10:13-15.

IZIBUSISO ESIZITHOLAYO NXA SINGATSHENGISA UKUTHI SIYABATHANDA ABANYE

15-16. Okusemfanekisweni kutshengisa ukuthi yiziphi izibusiso esizitholayo nxa sitshengisa ukuthi siyabathanda abanye?

¹⁵ Nxa sitshengisa ukuthi siyabathanda abafowethu labodadewethu, ayisibo bodwa abancedakalayo. Ngesikhathi somkhuhlane weCOVID-19 omunye umfowethu okuthiwa nguPaolo lomkakhe bafundisa odadewethu abanengi asebekhulile indlela yokutshumayeza abantu besebenzisa amafoni, ama-tablet loba ama-computer. Omunye udade owaqalisa engenelisi ukusebenzisa ezempucuko wacina eseyingcitshi njalo wanxusa izihlobo zakhe eSikhumbuzweni. Izihlobo zakhe ezingu-60 zangena iSikhumbuzo zisebenzisa ezempucuko! Okwenziwa nguPaolo lomkakhe kwanceda udade lo kanye lezihlobo zakhe. Ngemva kwesikhathi udade lo wabhalela uPaolo incwadi wathi: “Ngiyabonga ngokusifundisa thina asebekhulile. Angisoze ngiyikhohlwe indlela uJehova atshengise ngayo ukuthi ulendaba lathi kanye lomsebenzi onzima eliwenzileyo lisifundisa.”

¹⁶ Lokho okwenzakalayo kwafundisa uPaolo isifundo esiqakathekileyo. Wafunda ukuthi ukuba lothando kuqakatheke kakhulu ukwedlula ulwazi loba iziphiwo umuntu angabe elazo. Uthi: “Ngake ngaba ngumbonisi wesiqinti. Khathesi ngiyananzelela ukuthi abafowethu labodadewethu bangabe sebazikhohlwa izinkulumo zami kodwa lokhu besayikhumbula indlela engangibancedisa ngayo.”

17. Sincedakala njani nxa singatshengisa ukuthi siyabathanda abanye?

¹⁷ Nxa sitshengisa abanye ukuthi siyabathanda lathi siyancedakala ngezindlela ezinengi esiyabe singazikhangelelanga. Okwenzakala kuJonathan ohlala eNew Zealand kwenza sibone ukuthi lokho kuliqiniso. Ngelinye ilanga kungoMgqibelo emini, wabona omunye umzalwane oliphayona etshumayela emgwaqweni ilanga litshisa. UJonathan wakhetha ukutshumayela lephayona lelo iMigqibelo yonke emini. Ngalesosikhathi wayengaboni ukuthi umusa lo awenzayo wawuzamnceda njani. Uthi: “Ngesikhathi leso ngangingakuthandi ukutshumayela. Kodwa ukuzwa indlela umzalwane lo oliphayona ayefundisa ngayo, lokubona indlela inkonzo yakhe eyayiphumelela ngayo kwangenza ngaqalisa ukukuthanda ukutshumayela. Waba ngumngane wami omkhulu futhi wanginceda ukuthi ngibe lokholo oluqinileyo, ngiyikholise inkonzo yami lokuthi ngisondele kuJehova.”

18. UJehova ufuna senzeni?

¹⁸ UJehova ufuna ukuthi uthando lwethu luqhubeke lukhula. Ufuna simthande kakhulu futhi sibathande kakhulu labanye. Njengoba sifundile, okuzasinceda ukuthi siqhubeke simthanda kakhulu uJehova yikubala iLizwi lakhe langokucabangisisa ngalo langokuthandaza kuye zikhathi zonke. Singatshengisa ukuthi siyabathanda kakhulu abafowethu labodadewethu ngokudinga izindlela esingabancedisa ngazo. Nxa uthando lwethu luqhubeka lukhula, sizasondela kakhulu kuJehova lakubafowethu labodadewethu njalo ubungane lobo buzahlala kuze kube nini lanini!