Imibuzo Ebuzwa Ngabafundi
UJehova uzafaka wuphi “umcabango” kubohulumende?
ISambulo 17:16, 17 sithi: “Impondo ezilitshumi ozibonileyo kanye lesilo zizasizonda isifebe zisithathele konke esilakho futhi zisinqunule. Zizakudla inyama yaso zisitshise ngomlilo size siphele du. Ngoba uNkulunkulu ukufake ezinhliziyweni zazo ukuthi zenze umcabango wakhe. Zizawenza sibili umcabango munye ezilawo ngokunika isilo umbuso wazo.” Amavesi lawa akhuluma ngokuzakwenzakala nxa sekuqalisa ukuhlupheka okukhulu. Besikholwa ukuthi uJehova uzakwenza ukuthi amakhosi omhlaba ‘abelomcabango’ munye wokutshabalalisa inkolo yamanga.
Kodwa lokho ebesikukholwa sokumele kutshintshe ngoba khathesi sesizwisisa ukuthi “umcabango” uJehova azawufaka kubohulumende ngowokuthi ‘banike isilo umbuso wabo.’ Asiyihlolisiseni kabanzi indaba le ukuze siyizwisise ngcono.
Ngobani okukhulunywa ngabo emavesini lawa? Kukhulunywa ‘ngesifebe’ esibizwa langokuthi ‘yiBhabhiloni Enkulu’ futhi simela zonke izinkolo zamanga ezisemhlabeni. Kuphinda kukhulunywe ‘langesilo esibomvu gebhu’ futhi kudala sasimela inhlanganiso yomanyano eyabunjwa ngo-1919 okwakuthiwa yi-League of Nations kodwa kusukela ngo-1945 ibisibizwa ngokuthi yi-United Nations. (Sam. 17:3-5) “Impondo ezilitshumi” zona zimela bonke ohulumende abasekela inhlanganiso ye-United Nations.
Kulabuphi ubudlelwano phakathi kwesifebe lesilo esibomvu gebhu? Isifebe lesi sesileminyaka leminyaka sihlezi phezu kwesilo okutsho ukuthi sisekela ababusi bomhlaba siphinde sibenzise intando yaso.
Kuzakwenzakalani esifebeni lesi? Isilo esibomvu kanye lempondo ezilitshumi “zizasizonda isifebe” okokuthi zizasithathela konke esilakho futhi zikuveze egcekeni konke okubi esikwenzayo. Ngemva kwalokho bazasitshabalalisa njengoba nje uJehova etshilo. (Isam. 17:1; 18:8) Lokho kuzakuba yikuphela kwenkolo yamanga. Kodwa lokhu kungakenzakali uJehova uzakwenza ukuthi izizwe zenze into engakaze yenzakale selokhu kwadabuka umhlaba.
Izizwe zizakwenzani? UJehova uzakwenza ukuthi ohulumende babe lomcabango munye wokunika isilo amandla kanye lelungelo lokubusa. (Isam. 17:13) Kambe ukuthi ohulumende bazaphonguvuka becabange ukuthi banike i-United Nations amandla okubusa? Hatshi! Phela isiphrofetho sitshengisa ukuthi uJehova nguye ozakufaka ezinhliziyweni zabo ukuthi bakwenze lokhu. (Zaga. 21:1; khangela lo-Isaya 44:28.) Manje bazakwenza njani lokhu? Kambe ukuthi yinto abazayenza kancane kancane? Ngitsho lakancane! Kufanele ukuthi kuzakwenzakala ngokuphazima kwelihlo. I-United Nations izathi isiphiwe amandla ibisitshabalalisa zonke inkolo zamanga.
Hlala ulindile. Akumelanga sikhangelele ukuthi kuzakuba lemibiko etshengisa ukuthi ohulumende balokhe beyisekela kancane kancane i-United Nations. Kodwa nanku esingakulindela: UJehova uzakwenza ukuthi ohulumende banike i-United Nations amandla okubusa futhi lokhu uzakwenza ngokuphazima kwelihlo. Ungavele ubone lokho kusenzakala kumele uhle ubekwazi ukuthi ukuhlupheka okukhulu sekuzaqalisa. Okwakhathesi “asihlaleni siphapheme njalo sizisebenzise kuhle ingqondo zethu” ngoba kukhulu okuzayo!—1 Thes. 5:6