Okunganceda Abesifazana Abahlukuluzwayo
“ EMHLABENI wonke, amamiliyoni abesifazana lamantombazana ake ahlukuluzwa. Ungomunye wabo yini? Isihloko lesi sizakunceda ubone ukuthi uNkulunkulu ufuna ukuthi abesifazana bavikelwe lokuthi uzakwenzani ngokuphathwa kwabo kubi.”
Amazwi la atholakala esihlokweni esiku-jw.org esithi “Ukuvikelwa Kwabesifazana—IBhayibhili Lithini Ngakho?” Ekucineni kwesihloko leso kulamabala athi “dawuniloda isihloko lesi.” Nxa ungasidawuniloda ungenelisa ukusiphrinta wenze iphetshana ongalisebenzisa ekutshumayeleni. Omunye udadewethu okuthiwa nguStacy ohlala e-United States uthi: “Saphrinta amaphetshana sasesihamba lawo lapho okugcinwa khona abesifazana abatshiye imizi yabo ngenxa yokuhlukuluzwa.”
Omunye owesifazana osebenza lapho wacela ukuthi simnike amanye amaphetshana ukuze awanike abanye abahlala lapho. Odadewethu laba batshiya amaphetshana angu-40 lamakhadi e-jw.org angu-30. Ngelinye ilanga sebebuyele endaweni leyo umphathi wendawo wabacela ukuthi batshengise abesifazana abahlala lapho ukuthi bafunda njani labantu iBhayibhili.
UStacy labanye odadewethu ababili baphinda baya kwenye indawo ehlala abesifazana. Babatshiyela amaphetshana amahlanu kodwa abesifazana laba babacela ukuthi babuye lamanye futhi. Omunye owesifazana osebenza lapho wathi: “Sicela lisitshiyele sibili amaphepha lawa ngoba azanceda abantu abanengi.” Bathi sebebuyele futhi abanye abesifazana bathi bafuna ukufunda iBhayibhili, ababili babo baze bathi bafuna ukungena imihlangano yebandla ngempelaviki leyo.
UStacy uthi: “Yasimangalisa kakhulu indlela abantu abasithanda ngayo isihloko lesi. Nxa sesiphrintiwe saba liphetshana kubalula ukuthi usinike abesifazana abahlukuluzwayo ukuze baduduzwe. Asithandabuzi ukuthi uJehova uzaqhubeka esibusisa njengoba siqhubeka sitshumayeza abesifazana laba abathwele nzima.”