IBhayibhili
IBhayibhili libunjwa ngamabhuku angu-66 angcwele. Kwathatha iminyaka engaba ngu-1 600 ukuthi libhalwe. IBhayibhili limumethe umlayezo ovela kuNkulunkulu yikho libizwa ngokuthi ‘lilizwi likaNkulunkulu.’—1 KwabaseThesalonika 2:13.
Okusesihlokweni lesi
Okumayelana leBhayibhili
Ngubani owabhala iBhayibhili? UNkulunkulu nguye uMlobi weBhayibhili kodwa wasebenzisa amadoda angaba ngu-40 ukuthi alibhale. Amanye akhona nguMosi, iNkosi uDavida, uMathewu, uMakho, uLukha loJohane.a UNkulunkulu wayebatshela ukuthi babhaleni abalobi laba.—2 KuThimothi 3:16.
Ngokwesibonelo, usomabhizimusi angacela umabhalani ukuthi abhale incwadi, aze amtshele lokuthi abhaleni. Incwadi leyo ngekasomabhizimusi ngoba okumunyethwe kuyo kuvela kuye. Kuyafanana lokwenziwa nguNkulunkulu, lanxa wasebenzisa abantu ukuthi babhale iBhayibhili yena nguye uMlobi walo.
Litshoni ibala elithi “iBhayibhili”? Ibala elithi “iBhayibhili” livela kwelesiGrikhi elithi biblia, elitsho “amabhuku amancane.” Ngokuhamba kwesikhathi ibala elithi biblia laselisetshenziswa kutshiwo wonke amabhuku amancane abumba iBhayibhili.
IBhayibhili labhalwa nini? IBhayibhili laqalisa ukubhalwa ngo-1513 B.C.E. laqedwa ngabo 98 C.E. sekudlule iminyaka engaba ngu-1 600.
Isesekhona yini imibhalo yakuqala yeBhayibhili? Hatshi, ayisatholakali khathesi. Lokhu kungenxa yokuthi iBhayibhili lalibhalelwa ezintweni ezingahlali isikhathi eside ezinjengesikhumba lasemaphepheni enziwe ngolunye uhlobo lomhlanga okuthiwa yi-papyrus. Kodwa okweminyaka eminengi eyalandelayo omabhalani abazingcitshi babeyikopa ngonanzelelo imibhalo yeBhayibhili ukuze ingatshabalali.
Kuyini iThestamenti Elidala leThestamenti Elitsha? IThestamenti Elidala yingxenye yeBhayibhili eyabhalwa ngesiHebheru ephinda ibizwe langokuthi yiMibhalo yesiHebheru.b IThestamenti Elitsha lona yingxenye yeBhayibhili eyabhalwa ngesiGrikhi eyaziwa langokuthi yiMibhalo yamaKhristu yesiGrikhi. Ingxenye lezi nxa sezihlanganisiwe zibumba iMibhalo Engcwele.c
Kuyini okutholakala eBhayibhilini? Amabhuku eBhayibhili amumethe imbali, imithetho, iziphrofetho, inkondlo, izaga, izingoma kanye lezincwadi.—Khangela isihlokwana esithi “Amabhuku aseBhayibhilini.”
IBhayibhili limumetheni?
IBhayibhili liqala ngokusitshela ngamafitshane ukuthi uNkulunkulu uSomandla wadala amazulu lomhlaba. Liphinda lisitshele ibizo likaNkulunkulu elithi Jehova lokuthi uyafisa ukuthi abantu babe ngabangane bakhe.—IHubo 83:18.
IBhayibhili liphinda lisitshele ukuthi ibizo likaNkulunkulu belilokhu lingcoliswa lokuthi uzakwenzani ukuze alingcwelise.
Lisitshela lokuthi uNkulunkulu uhloseni ngabantu langomhlaba. Liphinda litshengise lokuthi esikhathini esizayo uzaqeda konke okwenza abantu bahlupheke.
IBhayibhili liyasinika lamacebo asincedayo empilweni. Amanye akhona yilawa alandelayo:
Ukuhlalisana kuhle labanye. “Konke elifuna abantu bakwenze kini, lani kumele likwenze kubo.”—UMathewu 7:12.
Okutshiwo yivesi le: Kumele siphathe abanye ngendlela esingafuna ukuphathwa ngayo.
Ukulwisana lokukhathazeka. “Lingaqali ukukhathazeka ngosuku olulandelayo ngoba usuku olulandelayo luzakuba lezalo izinkathazo.”—UMathewu 6:34.
Okutshiwo yivesi le: Kumele sikhangele inhlupho zalelolanga kulokuthi sizihluphe kakhulu ngalokho okungenzakala esikhathini esizayo.
Ukuba lemuli ethokozayo. “Kumele ngamunye wenu athande inkosikazi yakhe ngendlela azithanda ngayo, lenkosikazi kumele imhloniphe kakhulu umkayo.”—Kwabase-Efesu 5:33.
Okutshiwo yivesi le: Okungenza abatshadileyo bathokoze yikuthandana lokuhloniphana.
IBhayibhili selatshintsha yini?
Hatshi. Izikhwicamfundo ezihlola iBhayibhili ziqathanise imibhalo yeBhayibhili yakudala lamaBhayibhili akhona khathesi zathola ukuthi umlayezo weBhayibhili awutshintshanga. UNkulunkulu nguye obelilondoloza iLizwi lakhe ukuze lingatshintshwa. Lokhu yikho vele okumele sikukhangelele ngoba ufuna abantu babale njalo bazwisise umlayezo oseBhayibhilini.d—U-Isaya 40:8.
Yindaba kulamaBhayibhili amanengi ahunyutshwe ngendlela ezitshiyeneyo?
Abantu abanengi lamuhla abazizwisisi indimi okwabhalwa ngazo iBhayibhili kudala. Kodwa iBhayibhili ‘lilezindaba ezinhle’ okumele zifike ‘kuzo zonke izizwe, lezizwana lezindimi.’ (ISambulo 14:6) Lokhu sekusitsho ukuthi abantu kumele bathole amaBhayibhili ahunyutshwe ngezindimi abazizwisisayo ukuze benelise ukuzwisisa lokho abakubala eLizwini likaNkulunkulu.
Kulendlela ezintathu zokuhumutsha iBhayibhili:
Ukuhumutsha ibala ngebala nxa kuvuma.
Ukuhumutsha umqondo oyiwo omunyethwe ngamabala asetshenziswa ezindimini okwabhalwa ngazo iBhayibhili.
Ukuhumutsha ngendlela umhumutshi azwisisa ngayo yena esebenzisa amabala azakwenza obalayo akholise nje kuphela. Kodwa ukuhumutsha ngendlela le kungabangela ukuthi acine esefaka imibono yakhe kumbe atshiye okunye okwakutshiwo emibhalweni yokuqala.
IBhayibhili elihunyutshwe kuhle ngelisebenzisa amabala lemitsho eveza lokho okutshiwo emibhalweni yokuqala futhi libe leqiniso lokuthi alitshiyi amavesi engazwisiseki loba engacacanga.e
Amazwi aseBhayibhilini ayevela kubani?
Amazwi aseBhayibhilini avela kuNkulunkulu ngoba nguye uMlobi walo. Ekuqaliseni wakhetha isizwe sako-Israyeli ukuthi kube yiso ‘asinika amazwi akhe angcwele’ atholakala eMibhalweni yesiHebheru.—KwabaseRoma 3:2.
Akhona yini amabhuku angazange afakwe eBhayibhilini?
Hatshi. IBhayibhili liphelele, akulamabhuku angazange afakwe. Abanye bathi kulamabhuku avunjululwayo okumele ukuthi ngabe aseBhayibhilini.f Kodwa iqiniso yikuthi iBhayibhili liphelele linjalo futhi okukulo kuqondile. (2 KuThimothi 1:13) Wonke amabhuku aseBhayibhilini aphefumulelwe nguNkulunkulu futhi ayavumelana. Kodwa amabhuku la avunjululwayo wona awaphefumulelwanga yikho akumelanga abeseBhayibhilini.g
Ungawathola njani amavesi eBhayibhilini?
Amabizo amabhuku aseBhayibhilini
a Ukuze ubone wonke amabizo amabhuku aseBhayibhilini lokuthi abhalwa ngubani njalo nini khangela isihloko “Uluhlu Lwamabhuku AseBhayibhilini.”
b Ezinye ingxenye zeBhayibhili zabhalwa ngesi-Aramu futhi ulimi lolu luhambelana lesiHebheru.
c Abantu abanengi bakhetha ukubiza izingxenye lezi ngokuthi “iMibhalo yesiHebheru” lokuthi “iMibhalo yamaKhristu yesiGrikhi.” Bathi abafuni kukhanye angani “iThestamenti Elidala” alisasebenzi, sekusebenza “iThestamenti Elitsha.”
d Bala isihloko esithi “IBhayibhili Lantshintshwa Yini?”
e Abantu abanengi bayakukholisa ukubala i-Nguqulo Yomhlaba Omutsha YeMibhalo Engcwele ngoba ihunyutshwe ngendlela eqondileyo futhi kulula ukuyibala. Bala isihloko esithi “I-New World Translation Iqondile Yini?”
f Amabhuku lawo abizwa kuthiwa yi-Apocrypha. I-Encyclopædia Britannica iveza ukuthi ibala leli litsho imibhalo engazange ifakwe eBhayibhilini.
g Ukuze uthole okunengi bala isihloko esithi “AmaVangeli E-Apocrypha—Ingabe Anamaqiniso Afihliwe NgoJesu?”