IMIBUZO EBUZWA NGABASAKHULAYO
Ngingenzani Ukuze Ngekele Ukuphila Impilo Embaxambili?
Ngezinye izikhathi izinceku zikaNkulunkulu ziyake zizibuze ukuthi kuyanceda yini ukuphila zilandela izimiso eziseBhayibhilini. (IHubo 73:2, 3) Zingaqalisa ukwenza izinto eziphikisana lemithetho kaJehova njalo zizame lokufihlela abanye lokho eziyabe sezikwenza.
Isihloko lesi sibhalelwe ukunceda labo asebeqalisile ukwenza izinto ezimbi kodwa abafisa ukutshintsha batshiyane lazo.
Okusesihlokweni lesi
Kutshoni ukuphila impilo embaxambili?
Ukuphila impilo embaxambili kutsho ukwenza izinto okwaziyo ukuthi zimbi nxa ulabantu abenza lezozinto kodwa nxa usulalabo okhonza labo ubususenza izinto eziqondileyo ezithokozisa uJehova. Kuba sengathi uphila impilo ezimbili njalo uyabe uzifihla lokho oyikho khona sibisibili.
“Nxa uphila impilo embaxambili uyabe uzifihla lokho oyikho khona empilweni zakho zombili futhi akulamuntu oyabe ekwazi ukuthi ungumuntu onjani sibili. Uyabe uqila abantu nxa uphila impilo enjalo.”—U-Erin.
Ubukwazi yini? Ukuphila impilo embaxambili kugoqela lokwenza ngudlu izinto okwaziyo ukuthi uJehova kazemukeli.
“Ngaqalisa ukubukela iphonografi ngileminyaka engu-14. Ngangisithi nxa ngiphakathi kwabantu ngenze sengathi ngiyayenyanya kodwa enhliziyweni ngikwazi ukuthi ngiyayibukela.”—UNolan.
IBhayibhili lithi: “Kakho ongasebenzela amakhosi amabili ngoba uzazonda enye athande enye kumbe uzanamathela kwenye adelele enye.”—UMathewu 6:24.
Nxa ngiphila impilo embaxambili kutsho ukuthi ngingumuntu omubi yini?
Hatshi. Kuliqiniso ukuthi abanye abantu sebakhetha ukungalandeli izimiso zikaNkulunkulu empilweni yabo. Kodwa yikho yini lawe okukhethayo? Engxenye kulesinye isizatho esikwenza uphile impilo embaxambili. Mhlawumbe:
Wesaba ukwenza izinto ezitshiyene lalokho okwenziwa ngontanga yakho.
Ubona angani kulezinto ezinengi okholisa ukuzenza lalabo ofunda labo ukwedlula lezo ongazenza lalabo abasebandleni lenu.
Ukuthola kunzima ukulalela imithetho kaNkulunkulu.
“Ngibona angani abasakhulayo abanengi abaphila impilo embaxambili bayakukholisa ukuba labantu abangakholwayo ngenxa yokuthi bayabe befuna ukuthandwa ngabantu bonke.”—UDavid.
Izinto lezi eziqanjwe phezulu azenzi ukuphila impilo embaxambili kube yinto enhle. Lanxa kunjalo, ziyatshengisa ukuthi labantu abalungileyo basengozini yokucina bephila impilo embaxambili. Nxa lokho kungenzeka kuwe, kumele wenzeni?
Ngingenzani ukuze ngekele ukuphila impilo embaxambili?
1. Cabanga ngendlela ophila ngayo khathesi. Zibuze: ‘Kambe yiyo sibili impilo engifuna ukuyiphila? Nxa ngingaqhubeka ngiphila ngendlela le kuzaphetha ngani?’
IBhayibhili lithi: ‘Umuntu ohlakaniphileyo uyayibona ingozi, kodwa ongelalwazi uqhubeka eqonda kuyo abesethwala nzima.’—IZaga 27:12.
2. Cela uncedo. Xoxa labazali bakho kumbe ukhulume lomunye omuntu oyihloniphayo imithetho kaJehova. Kuzabathokozisa ukuthi ucele uncedo kibo kanti njalo bazazigqaja ngawe nxa bengabona ukuthi uyakwazi okulungileyo lokuthi uyafuna ukukwenza.
Nxa ubusuqalisile ukuphila impilo embaxambili, dinga uncedo.
“Ukuxoxa labanye ngamaphutha ami kwakunzima kakhulu kodwa ngathi sengikwenzile, ngazizwa sengikhululekile.”—UNolan.
IBhayibhili lithi: “Ofihla iziphambeko zakhe kasoze aphumelele, kodwa ozivumayo azitshiye uzatshengiswa isihawu.”—IZaga 28:13.
3. Yamukele impumela yezenzo zakho. Khumbula ukuthi ukufihlela abazali bakho kumbe abafowenu labodadewenu okuthile kungenza bangakuthembi. Yikho abazali bakho kumbe abadala bangakwalisa ukwenza eminye imisebenzi okwesikhathi esithile. Kwamukele lokho njalo uzimisele ukuhlala ‘uthembekile kukho konke.’—KumaHebheru 13:18.
IBhayibhili lithi: “Lalela nxa uselulekwa njalo uvume ukulaywa, ukuze uhlakaniphe kusasa.”—IZaga 19:20.
4. Ungathandabuzi ukuthi uNkulunkulu uyakuthanda. UJehova uyakubona konke esikwenzayo ngoba uyasithanda. Yikho uyabona nxa uphila impilo embaxambili njalo lokho kuyamdanisa. Lanxa kunjalo, uzimisele ukukuncedisa ukuthi ulungisise impilo yakho ‘ngoba yena ulendaba lawe’.—1 UPhetro 5:7.
IBhayibhili lithi: “Amehlo kaJehova ayakuhlolisisa konke okwenzakala emhlabeni, ukuze atshengise amandla akhe ngokunceda labo abazinikele kuye ngenhliziyo yonke.”—2 ImiLando 16:9.