Ngingenzani Nxa Abazali Bami Bengalisa Ukusebenzisa I-Social Media?

Engxenye bonke abangane bakho bayayisebenzisa i-social media njalo bahlala bekhuluma ngayo. Mhlawumbe bayake bakuhleke ngenxa yokuthi wena awuyisebenzisi. Kuyini okumele ukwazi ngendaba le? Ungakhetha njani endabeni le?

Okumele ukwazi

Ayisuwe wedwa. Abazali abanengi ababavumeli abantwababo ukuthi basebenzise i-social media. Lokhu kungabe kusenziwa yikuthi bayakwazi ukuthi ukuyisebenzisa:

• kungabangela ukuhlulukelwa kanye leminye imikhuhlane yengqondo.

• kungenza umuntu acine esebukela iphonografi, athumelane labanye imifanekiso kumbe imilayezo yemacansini loba athwaliswe nzima ngabanye ayabe exoxa labo (i-cyberbullying).

• kungabangela lokungazwanani labanye abantu.

Abasakhulayo abanengi sebekhetha ukungasebenzisi i-social media. Sebezibonele ukuthi bekubalimaza ukusebenzisa i-social media. Ake sixoxe ngabanye babo:

• UPriscilla wananzelela ukuthi wayeseqeda isikhathi esinengi eku-social media okokuthi wayengaselasikhathi sokwenza izinto eziqakathekileyo.

• UJeremy yena wacina engasayisebenzisi i-social media ngoba wananzelela ukuthi kwakuphonguthutsha lezinye izinto ezingaqondanga.

• UBethany wananzelela ukuthi i-social media yayimenza acine eseqeda isikhathi esinengi elokhe elandelela okwenziwa ngabanye.

“Mina ngakhetha ukudilitha i-application ye-social media engangiyisebenzisa. Angiyikhanuki ngitsho ngoba sengilesikhathi esinengi sokwenza izinto eziqakathekileyo.”—USierra.

“Ngasengiphilela i-social media futhi okunye okwakungikhathaza yikuzibuza ukuthi abantu bathini ngezinto engangizifaka lapho. Kwakungalula ukuthi ngidilithe i-application engangiyisebenzisa kodwa ngazizwa sengikhululekile sengiyidilithile.”—UKate.

Ongakwenza

Lalela okutshelwa ngabazali bakho. Zimisele ukulalela lokho abazali bakho abathi ukwenze ngoba ukwenze njalo kuzatshengisa ukuthi uyabahlonipha.

IBhayibhili lithi: “Isithutha sikhipha lonke ulaka lwaso, kodwa ohlakaniphileyo uyazikhuza, abambe ulaka lwakhe.”—IZaga 29:11.

Abanye bangakucebisa ukuthi usebenzise i-social media abazali bakho bengakwazi. Kodwa lelo kuyabe kuliphutha elikhulu ngoba nxa ungabaqila uzahlala usesaba ukuthi bazakubamba njalo uzahlala udliwa yisazela. Kanti njalo nxa abazali bakho bangabakwazi ukuthi ubaqilile bangakujezisa futhi kungabanzima ukuthi baphinde bakuthembe.

IBhayibhili lithi: “Sifisa ukuthembeka kukho konke.”—KumaHebheru 13:18.

Khetha ozakwenza. Ungalingisela abasakhulayo esixoxe ngabo ngokucabanga ngezizatho ezingakwenza ufise ukwekela ukusebenzisa i-social media. Nxa ungananzelela ukuthi ukuyisebenzisa akukuncedi kangako, zama ukwekela. Zikhethele ukwenza njalo kulokuthi umelele ukutshelwa ngabazali bakho. Nxa ungazikhethela ukungasebenzisi i-social media awusoze uyangeke nxa abangane bakho bekubuza njalo kuzabanzima ukuthi bakuhleke.

Okuqakathekileyo: Bambisana labazali bakho njalo udinge ukuthi kungaphi lapho elivumelana khona endabeni ye-social media. Lokho kuzakunceda ukuthi wenze isinqumo esizabathokozisa ngokuke ume ukuyisebenzisa. Mhlawumbe ungenelisa ukuyisebenzisa esikhathini esizayo.