Abezesayensi Basondeza Isikhathi Sokutshabalala Komhlaba—IBhayibhili Lithini Ngakho?

Mhlaka 24 January 2023 abezesayensi batshovele phambili uphondo lwewatshi etshengisa ukuthi umhlaba uzatshabalala nini. Iwatshi le bayibiza ngokuthi yi-Doomsday Clock.a Isikhathi asebesifakile sitshengisa ukuthi sekuseduze ukuthi u-12 webusuku atshaye futhi bathi lokhu kutshengisa ukuthi sokusele isikhathi esincane kakhulu ukuthi umhlaba lo uphele.

• “I-‘Doomsday Clock’ itshengisa ukuthi ingozi enkulu ezakwehlela abantu izakwenzakala nini. NgoLwesibili abezesayensi basitshovele phambili isikhathi sewatshi le okokuthi sekuseduze kakhulu ukuthi u-12 webusuku atshaye. Bathi lokhu kubangelwe yimpi ye-Ukraine, ukuphambaniseka komkhathi kanye lokusongelana kwamazwe ngamabhomba e-nuclear.”—Umbiko okhitshwe yi-AFP International Text Wire.

• ‘NgoLwesibili abezesayensi bakhiphe umbiko otshengisa ukuthi sekusele imizuzwana engu-90 ukuthi u-12 webusuku atshaye. Lokhu kutsho ukuthi sekuseduze kakhulu ukuthi abantu lomhlaba kutshabalale.’—Umbiko okhitshwe yi-ABC News.

• “Kuleqembu labezesayensi eselikhiphe isixwayiso sokuthi sekuseduze kakhulu ukuthi izinto esezisenziwa ngabantu khathesi zibatshabalalise.”—Umbiko okhitshwe yi-The Guardian.

Kambe ukuthi sekuseduze yini ukuthi umhlaba labantu kutshabalale? Kumele sihlalele evalweni yini? IBhayibhili lithini ngakho?

Esikutshelwa liBhayibhili mayelana lekusasa

IBhayibhili lithi “umhlaba umi kuze kube nini lanini” futhi kulabantu ‘abazahlala kuwo kuze kube nini lanini.’ (UmTshumayeli 1:4; IHubo 37:29) Yikho abantu abasoze bawutshabalalise umhlaba kumbe bawenze ungasahlaleki.

Lanxa kunjalo iBhayibhili liyakhuluma ngokuphela komhlaba. Ngokwesibonelo lithi “umhlaba uyadlula.”—1 UJohane 2:17.

• Ukuze uzwisise ukuthi iBhayibhili liyabe lisitshoni nxa likhuluma ngokuphela komhlaba, bala isihloko esithi “IBhayibhili Lithini Ngokubhujiswa Komhlaba?”

• Ukuze uzwisise ukuthi iBhayibhili lithini ngalokho okuzakwenzakala esikhathini esizayo lokuthi kuzakwenzakala nini, bala isihloko esithi “Uzobhubha Nini Umhlaba?”

Okungakunceda ukuthi ungahlaleli evalweni

IBhayibhili lingasinceda ukuthi sihlaliseke lanxa kulenhlupho esizithwalise nzima khathesi. Lingasinceda njani?

• IBhayibhili lisinika amacebo asincedayo empilweni. (2 KuThimothi 3:16, 17) Ngokwesibonelo ukuze ubone ukuthi iBhayibhili lingakunceda njani ukuthi uhlaliseke lanxa uphakathi kwenhlupho, bala isihloko esithi “Ongakwenza Ukuze Ungakhathazeki Kakhulu.”

• IBhayibhili lisinceda lokuthi sibe lethemba elihle kakhulu ngekusasa. (KwabaseRoma 15:4) Liyasitshela ngalokho okwenzakalayo khathesi langalokho okuzakwenzakala ngesikhathi esizayo futhi lokho kuyasinceda ukuthi sihlaliseke lanxa kusenzakala izinto ezethusayo emhlabeni.

Nxa ufuna ukwazi okunengi, hlela ukufunda iBhayibhili usebenzisa ikhosi yokufunda ekuwebhusayithi yethu.