Kambe Ukuthi Kuzaba Leyinye Impi Yomhlaba Wonke?—IBhayibhili Lithini Ngakho?

Abantu abanengi bacabanga ukuthi okweminyaka engu-30 edlulileyo bekulokhu kusiba lokuthula lokuzwanana phakathi kwamazwe atshiyeneyo. Kodwa izinto ezisanda kwenzakala ziveza ukuthi akulakuthula ngitsho njengoba imibiko elandelayo itshengisa:

• “Abantu bakhathazekile ngokuthi impi eseGaza ingacina iphambanisa lamanye amazwe njengoba i-Israel isiqalise ukulwa leHezbollah emngceleni weLebanon.”—Reuters, January 6, 2024.

• “Amaqembu angaphansi kwe-Iran alokhu ehlasela indawo ezitshiyeneyo njalo i-Iran isiqalisile futhi ukwenza izikhali ze-nuclear. Kanti njalo i-Iran isincediswa yiRussia leChina. Konke lokhu kubangele ukuthi amazwe asentshonalanga ahlalele evalweni.”—The New York Times, January 7, 2024.

• “Ukuhlasela kweRussia kulokhu kubangela umonakalo omkhulu e-Ukraine.”—UN News, January 11, 2024.

• “Indlela ilizwe leChina elilokhu liqina ngayo kwezomnotho futhi lisiba lezikhali zempi ezilamandla, lokungazwanani kwalo le-America kanye lokuthi iTaiwan ayifuni kuthwaliswa nzima ngamanye amazwe sekungabangela ukuthi kucine kube lempi.”—The Japan Times, January 9, 2024.

IBhayibhili lithini ngokungazwanani kwamazwe atshiyeneyo esikubona kusenzakala lamuhla? Kambe ukuthi lokhu kungacina kubangele eyinye futhi impi yomhlaba?

IBhayibhili lalivele likhulumile ngalokho okwenzakala khathesi

IBhayibhili liyatsho ukuthi kuzakuba lezimpi emhlabeni kodwa alitsho ukuthi yiwaphi amazwe azabe elwisana. Izimpi lezo ‘zisusa ukuthula emhlabeni.’—ISambulo 6:4.

Ibhuku likaDanyeli lakhuluma ngokuthi ‘ngesikhathi sokucina’ imibuso elamandla emhlabeni wonke ‘yayizafuqana’ kumbe ilwisane ukuze kukhanye ukuthi yiwuphi olamandla. Ukulwisana lokhu kubangele ukuthi imibuso le isebenzise imali enengi ilungisa izikhali zempi ezilamandla.—UDanyeli 11:40, 42, 43.

Impi ezaqeda zonke izimpi

IBhayibhili likwenza kucace ukuthi izinto zizakuba nzima kakhulu emhlabeni kuze kube yilapho uNkulunkulu elungisa izinto. UJesu wathi “kuzakuba lokuhlupheka okukhulu okungakaze kube khona kusukela ekuqaleni komhlaba.” (UMathewu 24:21) ‘Ukuhlupheka okukhulu’ kuzakwenza ukuthi kube lempi ye-Amagedoni ebizwa ngokuthi ‘yimpi yosuku olukhulu lukaNkulunkulu uSomandla.’—ISambulo 16:14, 16.

Impi ye-Amagedoni izakhulula abantu. Empini le uNkulunkulu uzatshabalalisa yonke imibuso yabantu okuyiyo ebangela zonke izimpi eseziqede abantu lamuhla. Ukuze ubone ukuthi impi ye-Amagedoni izakwenza njani ukuthi kube lokuthula okungapheliyo, bala izihloko ezilandelayo:

• “Kuyini I-Amagedoni?”

• “Siyilindele Ngabomvu I-Amagedoni!”