2 KuThimothi 1:7—“UNkulunkulu Kasinikanga Umoya Wobugwala”

“Phela uNkulunkulu kasiphanga umoya wobugwala kodwa wasipha owamandla lowothando lowokusebenzisa kuhle ingqondo.”—2 KuThimothi 1:7, INguqulo Yomhlaba Omutsha.

“Ngoba uNkulunkulu kasinikanga umoya wobugwala, kodwa wasinika umoya wamandla lowothando lowokuzithinta.”—2 KuThimothi 1:7, The Holy Bible in Ndebele.

Okutshiwo ngu-2 Thimothi 1:7

UNkulunkulu angasincedisa ukuthi sibe lesibindi sokwenza okulungileyo. Kafuni loba ngubani abe ‘ligwala’ ngoba lokho kungenza esabe ukwenza izinto ezimthokozisayo.

Ake sixoxe ngezinto ezintathu eziqanjwe evesini le ezingasinceda ukuthi singesabi kumbe singabi ngamagwala.

‘Amandla.’ AmaKhristu amanengi ayenelisa ukuba lesibindi sokuqhubeka ekhonza uNkulunkulu lanxa ehlaselwa yizitha ezilamandla kumbe ephakathi kobunzima. Awabuyeli emuva aze acine etshiya ukukhonza uNkulunkulu ngenxa yokwesaba. (2 KwabaseKhorinte 11:23-27) Kuyini okuwancedayo? Umphostoli uPhawuli wathi: “Ngilamandla okwenza zonke izinto ngenxa yalowo ongipha amandla.” (KwabaseFiliphi 4:13) UNkulunkulu angapha izinceku zakhe “amandla amakhulu futhi angajayelekanga” angazinceda ukuthi zimelane lobunzima ezingaba phakathi kwabo.—2 KwabaseKhorinte 4:7.

‘Uthando.’ Ukuthanda uNkulunkulu ngenhliziyo yonke yikho okwenza umKhristu abe lesibindi sokwenza okulungileyo. Kanti njalo nxa ebathanda abanye uzaqakathekisa abakufunayo ukwedlula lokho okufunwa nguye lanxa kwezinye izikhathi ukwenza njalo kungafaka impilo yakhe engozini kumbe kwenze ukuthi ahlukuluzwe.—UJohane 13:34; 15:13.

‘Ukusebenzisa kuhle ingqondo.’ Nxa iBhayibhili likhuluma ngomuntu osebenzisa kuhle ingqondo liyabe lisitsho umKhristu owenelisa ukwenza izinqumo esebenzisa okutshiwo liBhayibhili. Umuntu osebenzisa kuhle ingqondo uyenelisa ukuqhubeka ecabanga kuhle kumbe ezwisisa lanxa eyabe esebunzimeni. Nxa ezibuza ukuthi enzeni uyacabanga ngendlela uNkulunkulu abona ngayo izinto ngoba uyabe ekwazi ukuthi ubungane bakhe laye buqakatheke ukwedlula imibono yabantu.

Amanye amavesi asinceda sizwisise u-2 Thimothi 1:7

Incwadi yesibili kaThimothi yabhalwa ngumphostoli uPhawuli eyibhalela umngane wakhe ayesebenza laye uThimothi. Encwadini le uPhawuli wayekhuthaza uThimothi ukuthi aqhubeke esebenza nzima enkonzweni. (2 KuThimothi 1:1, 2) UThimothi engabe wayelijaha elilenhloni futhi lokhu kungenzeka kwakumenza esabe ukwenza eminye imisebenzi ebandleni. (1 KuThimothi 4:12) UPhawuli wamkhumbuza ukuthi wayethole isibusiso senkonzo esiqakathekileyo ebandleni. Wamkhuthaza lokuthi angathikazi ukwenza lokho okumele akwenze ebandleni njengoba wayengumbonisi webandla. Kwakungamelanga athikaze ukutshumayela izindaba ezinhle lokumelana lobunzima obabungamehlela ngenxa yokholo lwakhe.—2 KuThimothi 1:6-8.

Lanxa amazwi la ayebhalelwe uThimothi, aqinisekisa bonke abakhonza uJehova lamuhla ukuthi uyabancedisa ngakho konke abakudingayo ukuze baqhubeke bemkhonza kuhle lanxa bengaba lobunzima.