UJohane 14:27—“Ukuthula Ngikutshiya Kini”

“Ngilitshiyela ukuthula, ngilinika ukuthula kwami. Angiliniki ukuthula ngendlela umhlaba onika ngayo ukuthula. Inhliziyo zenu kazingakhathazeki futhi kazingapheli amandla ngokwesaba.”—UJohane 14:27, INguqulo Yomhlaba Omutsha.

“Ukuthula ngikutshiya kini, ukuthula kwami ngilinika khona. Kakunjengokunika komhlaba ukulinika kwami. Inhliziyo zenu kazingakhathazeki, zingesabi.”—UJohane 14:27, The Holy Bible in Ndebele.

Okutshiwo nguJohane 14:27

UJesu wakhuluma amazwi la ukuze aqinisekise abaphostoli bakhe ukuthi kwakungamelanga bakhathazeke kakhulu nxa besebunzimeni. UNkulunkulu wayezabancedisa ukuthi babe lokuthula futhi bahlaliseke njengoba nje wayencede loJesu.

Yikuthula okunjani uJesu akutshiyela abafundi bakhe? Wabanika ukuthula kwakhe okutsho ukuthula okwakumncedile laye ngesikhathi sobunzima. Kodwa ukuthula lokho kwakungatsho ukuthi abasoze bahlangane lenhlupho kumbe bahlukuluzwe. (UJohane 15:20; 16:33) Lanxa uJesu waphathwa ngesihluku waze wacina ebulawa, wayehlalisekile engqondweni lasenhliziyweni. (ULukha 23:27, 28, 32-34; 1 UPhetro 2:23) Okwamenza waba lokuthula yikwazi ukuthi uYise uJehova wayemthanda futhi ethokoza ngaye.a—UMathewu 3:16, 17.

UJesu wanika abaphostoli bakhe ukuthula ngokubatshela ukuthi yena loYise babebathanda kakhulu futhi bethokoza ngabo. (UJohane 14:23; 15:9, 10; KwabaseRoma 5:1) Ukuba lokholo kuJesu iNdodana kaNkulunkulu kwabanceda ukuthi babe lokuthula, bahlaliseke njalo bangakhathazeki kakhulu. (UJohane 14:1) Lanxa uJesu wayengasoze aqhubeke elabo, wabathembisa ukuthi umoya ongcwele kaNkulunkulu wawuzabanceda ukuthi bahlaliseke njalo babe lokuthula. (UJohane 14:25-27) Abalandeli bakaJesu babezakwenelisa ukubekezelela inhlupho ngoba bekwazi ukuthi uJehova uyathokoza ngabo lokuthi uzabancedisa.—KumaHebheru 13:6.

Ngesikhathi uJesu esemhlabeni, abantu babejayele ukufiselana ukuthula nxa bebingelelana. (UMathewu 10:12, 13) Kodwa uJesu kaphelelanga ekufiseleni abafundi bakhe ukuthula, wabanika khona. Okuhle ngokuthula uJesu akunika abafundi bakhe yikuthi kutshiyene lokuthula komhlaba.b Ukuthula komhlaba kungalethwa yikuba labangane, inotho, udumo kumbe izikhundla. Kodwa ukuthula kukaJesu akuyi ngokuthi izimo zomuntu zinjani. Khona yikuthula kwangaphakathi okwenza umuntu ahlaliseke futhi akupheli.

Amanye amavesi asinceda sizwisise uJohane 14:27

UJesu watshela abaphostoli bakhe amazwi la ngobusuku ezavuka ebulawa. Ngalobobusuku wabatshela ukuthi sekuseduze ukuthi asuke kubo. (UJohane 13:33, 36) Abaphostoli badana besizwa lokho. (UJohane 16:6) Yikho uJesu wakhuluma amazwi akuvesi 27 ukuze abancede ukuthi bahlaliseke lanxa wayesesuka kubo.

Amazwi akhulunywa nguJesu ayasiqinisa lathi lamuhla. (2 KwabaseThesalonika 3:16) Nxa sisiba ngabalandeli bakaJesu, siyazibonela ukuthi yena loYise bayasithanda lokuthi bayathokoza ngathi. (KwabaseKholose 3:15; 1 UJohane 4:16) Ukwazi lokho kuyasinceda ukuthi singakhathazeki kakhulu ngoba uJehova ulathi.—IHubo 118:6; KwabaseFiliphi 4:6, 7; 2 UPhetro 1:2.

Bukela ividiyo le emfitshane ukuze ubone okumunyethwe libhuku likaJohane.