U-Isaya 26:3—“Uyamnika Ukuthula Okupheleleyo Lowo Olengqondo Ebambelele Kuwe”

“Labo abathembela kuwe ngokupheleleyo uzabagcina, uzabanika ukuthula okungapheliyo, ngenxa yokuthi bayakuthemba.”—U-Isaya 26:3, INguqulo Yomhlaba Omutsha.

“Uyamnika ukuthula okupheleleyo lowo olengqondo ebambelele kuwe, ngoba ethemba kuwe.”—U-Isaya 26:3, The Holy Bible in Ndebele.

Okutshiwo ngu-Isaya 26:3

Ngamazwi la aduduzayo, umphrofethi u-Isaya uveza ukuthi uNkulunkulu uyabavikela abantu abamthemba ngokupheleleyo. Lokhu ukwenza ngokubanceda ukuthi bahlaliseke futhi babe lokuthula.

“Labo abathembela kuwe ngokupheleleyo uzabagcina.” Amazwi la achasisa labo abazimiseleyo ukuhlala bemthemba ngazo zonke izikhathi uJehovaa uNkulunkulu. Labo abamthembayo uNkulunkulu bayananzelela ukuthi akulalutho abangalwenza bengancediswa nguye. Ngokwesibonelo kabathembi okwabo ukuhlakanipha nxa besenza izinqumo kodwa bayavuma ukuqondiswa nguNkulunkulu kukho konke abakwenzayo. (IZaga 3:5, 6) Bayabala iLizwi likaNkulunkulu iBhayibhili befuna ukubona ukuthi yena uthini ngendaba ethile besebecabangisisa ngalokho abakubalayo. (IHubo 1:2; 119:15) Nxa behlangana lobunzima, bayathandaza kuJehova bemcela ukuthi abancedise. (IHubo 37:5; 55:22) Nxa besenza lokhu bayabe betshengisa ukuthi bayamthemba futhi yena uyabapha ukuthula.

“Uzabanika ukuthula okungapheliyo.” NgesiHebheru, ibala elithi “ukuthula” libhalwe kabili ukuze kugcizelelwe okutshiwoyo. Yikho ukuze kugcizelelwe ngendlela efananayo kusetshenziswa amazwi athi “ukuthula okungapheliyo,” “ukuthula okupheleleyo” kumbe “ukuthula okugcweleyo.” Ngamanye amazwi, labo abamthemba ngokupheleleyo uJehova baba lokuthula njalo bahlaliseke kungelani lokuthi kuyini okwenzakalayo. (IHubo 112:7; 119:165) Okwenza umuntu abe lokuthula lokhu yikuthi uyabe engumngane kaJehova futhi esenza izinto ezimthokozisayo.—IZaga 3:32; U-Isaya 48:18.

“Ukuthula okungapheliyo” okukhulunywa ngakho lapha akutsho ukuthi uNkulunkulu uyasusa zonke inhlupho zalabo abamkhonzayo. (1 USamuyeli 1:6, 7; UJobe 6:1, 2; IHubo 31:9) Kodwa akwenzayo yikubancedisa balwisane lenhlupho zabo. (U-Isaya 41:10, 13) Uyayiphendula imithandazo yabo abaphe ukuhlakanipha lamandla futhi abaduduze. (IHubo 94:19; IZaga 2:6; U-Isaya 40:29) Lokhu kwenza bahlaliseke lanxa bephakathi kobunzima obukhulu.—KwabaseFiliphi 4:6, 7.

Amanye amavesi asinceda sizwisise u-Isaya 26:3

Umphrofethi u-Isaya waphila ngeminyaka yabo-800 B.C.E. Ngaleyominyaka amaJuda amanengi ayengathembekanga kuJehova uNkulunkulu. Lokhu kwabangela ukuthi uJehova acine evumela isigodlo sawo esibizwa ngokuthi yiJerusalema sitshabalaliswe ngomnyaka ka-607 B.C.E.

Lanxa kunjalo, kusasele iminyaka edlula 100 ukuthi idolobho leli libhujiswe u-Isaya wabhala ingoma eyisiphrofetho edumisa uJehova etholakala ku-Isaya 26. (U-Isaya 26:1-6) Ingoma le yayikhuluma ngesikhathi esizayo lapho idolobho leJerusalema elalizavuselelwa khona.

IJerusalema yavuselelwa ngemva komnyaka ka-537 B.C.E. Ngalesosikhathi amaJuda ayesehlalisekile yikho ayengathi: “Siledolobho eliqinileyo.” (U-Isaya 26:1) Kodwa imiduli yedolobho leli ayisiyo eyayilenza liqine. Okwakulenza liqine njalo livikeleke yikubusiswa nguJehova lokuvikelwa nguye.—U-Isaya 26:2.

Kunjalo lalamuhla. Labo abamthemba ngokupheleleyo uJehova bavikelekile ngoba “uliDwala” labo kumbe indawo yabo yokucatsha evikelekileyo.—U-Isaya 26:4.

Bukela ividiyo le emfitshane ukuze ubone okumunyethwe libhuku lika-Isaya.