ISambulo 21:4—“Uzakwesula Zonke Izinyembezi”

“Uzakwesula zonke izinyembezi emehlweni abo. Ukufa akusoze kuphinde kubekhona, loba ukulila loba ukukhala loba ubuhlungu ngeke kusabakhona. Izinto ebezisenzakala sezidlulile.”—ISambulo 21:4, INguqulo Yomhlaba Omutsha.

“Azesule izinyembezi zonke emehlweni abo; ukufa kakusayikuba khona, lokulila lokukhala lobuhlungu ngoba izinto zakuqala sezidlulile.”—ISambulo 21:4, The Holy Bible in Ndebele.

Okutshiwo nguSambulo 21:4

UNkulunkulu uthembisa ukuqeda bonke ubuhlungu lokuhlupheka kanye lalokho okubangela inhlupho lezi.

“Uzakwesula zonke izinyembezi emehlweni abo.” Amazwi la asikhumbuza isithembiso sikaJehovaa esabhalwa ngu-Isaya esithi ’uzakwesula izinyembezi ebusweni babantu bonke.’ (U-Isaya 25:8; ISambulo 7:17) Aveza lokuthi uNkulunkulu ulendaba labantu abakhala ezimathonsi ngenxa yokufelwa kumbe okunye nje okubahluphayo.

“Ukufa akusoze kuphinde kubekhona.” Amazwi la akwenza kucace ukuthi ukufa kuzaphela du! UNkulunkulu uthembisa ukuqeda ukufa kanye lokuhlupheka okubangelwa yikho. Kanti njalo abafileyo bazavuswa baphile. (1 KwabaseKhorinte 15:21, 22) Yikho ukufa “kuzatshabalaliswa.”—1 KwabaseKhorinte 15:26.

“Ukulila loba ukukhala loba ubuhlungu ngeke kusabakhona.” Isithembiso lesi kasitsho ukuthi abantu bayabe bengasabuzwa ubuhlungu. Kodwa sitsho ukuthi bonke ubuhlungu obubangelwa yisonob buyabe bungasekho.—KwabaseRoma 8:21, 22.

“Izinto ebezisenzakala sezidlulile.” Amazwi la okuphetha akufinqa kuhle konke okuzakwenzakala. Elinye ibhuku elichasisa iBhayibhili lithi: “Impilo abantu abayiphila khathesi bethwele amagabha avuzayo ngenxa yokufa, ukulila, ukukhala lobuhlungu iyabe isitshintshile, sokulempilo entsha.” Ngalesosikhathi abantu bazakholisa ukuphila kuze kube nini lanini, konke uNkulunkulu ayekuhlosile ekuqaliseni kuyabe sokugcwalisekile.—UGenesisi 1:27, 28.

Amanye amavesi asinceda sizwisise iSambulo 21:4

Ekuqaliseni kwesahluko 21, umphostoli uJohane uchasisa lokho akubonayo embonweni. Uthi: “Ngasengibona izulu elitsha lomhlaba omutsha.” (ISambulo 21:1) Amazwi la atshengisa indlela izinto ezizatshintsha ngayo njengoba kutshiwo lakwamanye amavesi aseBhayibhilini. (U-Isaya 65:17; 66:22; U-2 Phetro 3:13) “Izulu elitsha” litsho uhulumende kaNkulunkulu osezulwini ozabusa esikhundleni sabohulumende babantu abakhona khathesi. “Umhlaba omutsha” wona utsho umphakathi wabantu abalungileyo abazabuswa nguhulumende kaNkulunkulu khonapha emhlabeni.—U-Isaya 65:21-23.

Kuyini okuveza ukuthi amazwi akuSambulo akhuluma ngempilo yalapha emhlabeni? Okokuqala, isithembiso sikaNkulunkulu sethulwa ngamazwi athi: “Itende likaNkulunkulu lisebantwini.” (ISambulo 21:3) Yikho isithembiso lesi asitshelwa izingilosi ezisezulwini kodwa abantu abasemhlabeni. Okwesibili, amazwi la akhuluma ngomhlaba ‘ongasoze uphinde ube lokufa.’ (ISambulo 21:4) Ukufa akukaze kubekhona ezulwini kodwa bekulokhu kulapha emhlabeni. (KwabaseRoma 5:14) Yikho kulengqondo ukuphetha ngokuthi ivesi le ichasisa lokho okuzakwenzakala lapha emhlabeni.

Bukela ividiyo le emfitshane ukuze ubone okumunyethwe libhuku leSambulo.