INDABA YOKUPHILA | ILANDISWA NGU-IBOLYA BARTHA

Umkami Wacina Ekholwa “Kungelalizwi Elikhulunyiweyo”

Kunengi engakuthandayo okwangenza ngasondela kuJehova. Kwangithinta kakhulu ukubona oFakazi bakhe abalothando futhi ngangiyithanda indlela ababefundisa ngayo iqiniso eliseBhayibhilini. Ngathokoza kakhulu ngifunda ukuthi uNkulunkulu ulendaba labantu lokuthi usigcinele ikusasa elihle. Kodwa uhlupho olwalukhona yikuthi umkami wayengakuthandi engangikufunda futhi lokhu kwenza ngathwala nzima.

U-Ibolya lo-István mhla betshada. — Ngelanga lomtshado wethu

Ngazalelwa eRomania ngo-1952. Lanxa umama wayenguFakazi owayebhabhathiziwe, wayengakhonzi kuhle, yikho ngangingahambi emihlanganweni yebandla. Kanti njalo umbuso weRomania wawungavumeli ukuthi oFakazi batshumayele lokuthi baphrinte amabhuku abo. Angizange ngike ngibe mazi uJehova kumbe iBhayibhili ngaze ngafika iminyaka engu-36. Kodwa ngo-1988 ngihlala lomkami u-István edolobheni leSatu-Mare kwenzakala into eyatshintsha impilo yami.

Ukuhamba Emhlanganweni WaboFakazi

Ngelinye ilanga umama wabuya wazongibona wathi kimi: “Ngifuna ukuyavakatshela umama omdala wakho. Asambe sonke phela! Sizathi sesiphenduka sizikwejisele nje.” Ngavuma ngoba kwakungelalutho engilwenzayo.

Sathi sifika komama omdala sathola imihlangano yaboFakazi bakaJehova isenzelwa endlini yakhe. Engakuzwa mhlalokho kwangithinta kakhulu. Kwakulabantu abangaba ngu-9 njalo umama wayesephinde wavuselela ukukhonza kwakhe, esenguFakazi otshisekayo.

Umhlangano lo wathi uphela, owayeqhuba wangilanda wafika wathi kimi: “Ibizo lami nguJános, nginanzelele ukuthi ubuthiye indlebe sibili ulalele. Ukuthandile yini okuzwe namuhla?” Ngamtshela ngathi bengiqala ukufika emhlanganweni lo lokuthi ngiyafuna ukuphinda ngiphenduke. Yena wathi kimi: “Uyafuna yini ukufunda iBhayibhili?” Ngahle ngavumela phezulu. Ngakubona ukuthi uJehova nguye owayengidonsele ebantwini laba.

Ngelanga elilandelayo uJános wabuya lo-Ida futhi kusukela lapho nguye owayesefunda lami iBhayibhili. Kodwa ngangisesaba ukuthi umkami u-István wayezathini nxa wayengezwa ukuthi oFakazi bakaJehova sebefunda lami iBhayibhili. Ngazama kanengi ukukhuluma laye kodwa kwakungathi ngitshaya idwala ngempama. Ngangikwazi ukuthi wayengakuthandi engangikwenza.

Lanxa kunjalo, ngaqhubeka ngifunda iBhayibhili ngabhabhathizwa ngo-August ngo-1989. Ngemva kwenyanga ezine, umbuso weRomania wawa njalo lomkhokheli wakhona wabulawa.

Umkami Ungithwalisa Amagabha Avuzayo

Umbuso weRomania wathi usuwile, oFakazi bakaJehova basebezikhonzela bekhululekile. Basebevunyelwa ukwenza imihlangano yabo lokutshumayela. Kodwa kimi kwakunganjalo. Umkami u-István wangithwalisa nzima kakhulu wathi kimi, “Mina angilandaba ukuthi ukholwani kodwa ungahamba uyetshumayela endlini ngendlu sizaxabana.”

Angizange ngiyekele ukutshumayela kodwa ngasengikwenza ngicatshile. (ImiSebenzi 4:20) Ngelinye ilanga abangane baka-István bangibona ngitshumayela endlini ngendlu bamtshela. Ngathi ngifika endlini wangitshingela wathi: “Uyangiyangisa futhi uyangisa imuli yami.” Wafaka ingqamu entanyeni yami wasesithi uzangibulala nxa ngingaqhubeka ngitshumayela.

Ngazama ukukhuluma laye u-István ngaphinda ngamqinisekisa lokuthi ngiyamthanda kakhulu. Amazwi ami enza ukuthi abe ngathi uyaphola kancane. Kodwa ngathi ngisala ukuya emtshadweni wesinye isihlobo ngoba ngikwazi ukuthi babezakwenza izinto ezingahambelani lalokho engasengikufundile eBhayibhilini, wazonda wadla amalahle. Lokhu kwenza ukuthi angitshele amazwi ahlabayo.

U-István wangiphatha kabuhlungu okweminyaka engu-13. Kwezinye izikhathi wayengethusela engitshela ukuthi ufuna ukungidivosa. Wayeke akhiye lomnyango ayale ukuthi ngingene futhi kwezinye izikhathi wayesithi ngipakitshe ezami ngingene indlela.

Manje kuyini okwanginceda ukuthi ngiqinisele ebunzimeni lobu? Ngathandaza kuJehova ngimcela ukuthi angincede ngihlaliseke njalo ngangikubona ukuthi uyangincedisa sibili. (IHubo 55:22) Ibandla lalo lalingisekela kakhulu. Abadala labanye odadewethu babengikhuthaza ukuthi ngingakhalali ukukhonza uJehova. Bangikhumbuza ukuthi iBhayibhili lithi amanye amadoda acina esekholwa “kungelalizwi elikhulunyiweyo” ngenxa yokuthi amakhosikazi awo ayabe eqotho kuJehova futhi eqhubeka esenza okuhle. (1 UPhetro 3:1) Ngokuhamba kwesikhathi umkami laye wacina etshintsha.

Izinto Ziyatshintsha

Ngo-2001 u-István watshaywa yi-stroke wasala engasenelisi ukuhamba. Walaliswa esibhedlela okwenyanga eyodwa njalo okwamaviki amanengana alandelayo wayelokhu eselatshwa. Ngalesosikhathi ngangingamtshiyi, ngangimfunza, ngixoxa laye futhi ngisiba leqiniso lokuthi kasweli lutho.

Abafowethu labodadewethu ebandleni labo babebuya bezombona u-István. Abanengi babesincedisa ngemisebenzi yendlini futhi abadala babehlala besiduduza futhi besincedisa. U-István wazibonela ngawakhe ukuthi abazalwane balothando lokuthi balendaba laye.

Lokhu kwamthinta kakhulu u-István wazisola ngendlela ayengiphatha ngayo njalo wananzelela lokuthi akula loyedwa umngane wakhe owabuya wazombona. Yikho wathi esephumile esibhedlela wathi, “Sengifuna ukufunda iBhayibhili ngibe nguFakazi kaJehova.” Ngathi ngimuzwa esitsho njalo ngathaba, zehla zodwa.

U-István wabhabhathizwa ngoMay ngo-2005. Njengoba wayengenelisi ukuhamba yedwa, abazalwane bamfuqa nge-wheelchair bamfikisa eduze lalapho okwakubhabhathizelwa khona. Bamngenisa emanzini kuhle kuhle basebembhabhathiza. Esebhabhathiziwe wayekutshisekela ukutshumayela. Ngikhumbula izikhathi lapho esasitshumayela khona sonke. Kwakumnandi sibili. Ngangingakukholwa ukuthi indoda le eyayingafuni ukuthi ngitshumayele yiyo sibili eyayisiseceleni kwami ikukholisa ukutshumayela indaba ezinhle!

U-István wayesemthanda kakhulu uJehova. Isikhathi sakhe esinengi wayesisebenzisa ukutaditsha lokubamba amavesi eBhayibhili ngekhanda. Wayekuthanda ukuwaxoxela abafowethu labodadewethu abasebandleni futhi wayebakhuthaza ngawo.

U-Ibolya lo-István ohlezi ku-wheelchair bathatha ifotho labangane babo. — Silabangane bethu emhlanganweni wesabelo

U-István kwakulokhu kumqinela ngoba waphinda watshaywa yi-stroke wacina engasenelisi ukukhuluma futhi engasavuki. Lokhu kwambuyisela emuva yini? Ngitsho! Wayelokhu esenza okusemandleni akhe eqhubeka ebala futhi etaditsha. Nxa abazalwane babemvakatshela wayesesebenzisa omunye umtshina wezempucuko ukuze akhulume labo futhi aqinise ukholo lwabo. Omunye umfowethu wathi, “Ngiyathaba kakhulu nxa ngibona u-István. Nxa sengisuka uyabe engikhuthazile, wangiqinisa.”

Okudanisayo yikuthi umkami u-István watshona ngoDecember ngo-2015. Lokho kwangizwisa ubuhlungu kakhulu. Kodwa okwangenza ngahlaliseka yikuthi u-István wayesebe ngumngane kaJehova engakatshoni. Lokho kungenza ngithokoze kakhulu. Lanxa yena lomama sebatshona, uJehova kabakhohlwanga. Kuzaba mnandi ukubahlangabeza sebevusiwe, sesisiba labo emhlabeni omutsha kaJehova olokulunga.

Angisoze ngilikhohlwe ilanga mina lomama esavakatshela ngalo umama omdala njalo sekwedlule iminyaka eyedlula engu-35 lokhu kwenzakala. Khathesi sengidlulise iminyaka engu-70 njalo ngiliphayona lesikhathi sonke. Angilamazwi okumbonga uJehova ngalokho angenzele khona. (IHubo 116:12) Wangincedisa ukuthi ngiqhubeke ngithembekile futhi ngihlalisekile lanxa umkami wayengithwalise nzima. Ngathwala nzima sibili, kodwa ngafunda ukuthi izinto zingatshintsha. Phela umkami wacina esekholwa kungelalizwi engalikhulumayo lanxa ngangingakukhangelelanga lokho.

U-Ibolya lomunye udadewethu batshumayela ngenqola. U-Ibolya utshumayeza owesifazana esebenzisa ibhukwana elithi “Ungathokoza Kuze Kube Nini Lanini!”