Ukuncedisa Abahlelwe Ngumonakalo Ngo-2022—Abafowethu Batshengisa Ukuthi Bayathandana

IBhayibhili lathi esikhathini sethu kwakuzakuba lezimpi, ukuzamazama komhlaba, imikhuhlane emibi, kanye “lezinto ezesabisayo.” (ULukha 21:10, 11) Isiprofetho lesi siqhubeke sigcwaliseka ngomnyaka wenkonzo ka-2022.a Ngokwesibonelo, impi ye-Ukraine ilokhu iqhubekela phambili njalo itshintshe impilo zamamiliyoni abantu. Emazweni amanengi abantu bebelokhu bethwele nzima ngenxa yomkhuhlane weCOVID-19. Kanti njalo endaweni ezitshiyeneyo kube lezingozi zemvelo. Ngokwesibonelo, kube lokuzamazama komhlaba eHaiti leziphepho ezibangele umonakalo omkhulu eCentral America, lasePhilippines kanye laseningizimu ye-Africa. OFakazi bakaJehova babancedise njani labo abehlelwe zingozi lezi?

Ngomnyaka wenkonzo ka-2022 inhlanganiso yethu incedise abafowethu labodadewethu abehlelwe zingozi zemvelo ezingaba ngu-200! Kusetshenziswe imali engaba ngamadola angu-12 miliyoni ukuze kuncediswe abafowethu labodadewethu.b Ake sibone ukuthi iminikelo isetshenziswe njani ukuze kuncediswe abafowethu labodadewethu eHaiti laseningizimu ye-Africa.

Ukuzamazama Komhlaba EHaiti

Mhlaka 14 August 2021 kwaba lokuzamazama komhlaba okulamandla eningizimu yeHaiti. Kuyadanisa ukuthi kwafa umfowethu oyedwa labodadewethu ababili. Labo abasilayo lokhe bekhathazekile futhi besizwa ubuhlungu ngokulahlekelwa yizinto ababelazo. Umfowethu okuthiwa nguStephane uthi: “Edolobheni engihlala kulo kwafa abantu abanengi okokuthi iviki ngayinye kwakusiba lemingcwabo eminengi okwenyanga ezidlula ezimbili.” Umfowethu okuthiwa ngu-Eliezer uthi: “Abafowethu labodadewethu abanengi basala bengelandawo zokuhlala, izigqoko, izicathulo lezinye izinto abazidingayo. Okwenyanga ezinengi ezalandelayo abantu babephila besesaba ngenxa yokuzamazama komhlaba okuncane okujayele ukuba khona ngemva kokuzamazama komhlaba okukhulu.”

Inhlanganiso yethu yasukumela phezulu yancedisa abafowethu labodadewethu laba. Igatsha leHaiti labanika ukudla okwedlula amakhilogremu angu-53 000 kanye lamatende, lamaseyili, lamamethrasi, lamatshaja e-solar ukuze amafoni abo ahlale elomlilo. Kwaphinda kwakhiwa njalo kwalungiswa lezindlu zabafowethu labodadewethu ezedlula 100. Kwasetshenziswa imali edlula amadola angu-1 miliyoni emsebenzini wokuncedisa abehlelwe yingozi yemvelo.

Abafowethu labodadewethu bayabonga kakhulu ngosizo abalutholileyo. ULorette uthi: “Indlu yethu yadilizwa yikuzamazama komhlaba lokhu futhi salahlekelwa yibhizinesi yethu. Sasala singaselakudla. Kodwa inhlanganiso kaJehova yasincedisa ngokusinika konke esasikudinga.” UMicheline uthi: “Ukuzamazama komhlaba kwadiliza indlu esasihlala kuyo labantwabami ababili. Ngangingasakwazi ukuthi ngenzeni ngaphandle kokuthandaza ngicela uJehova ukuthi asincedise. Lakanye wasiphendula esebenzisa inhlanganiso yakhe. Khathesi sesilendlu enhle kakhulu. Ngizimisele ukwenza konke okusemandleni ami ukuze ngitshengise uJehova ukuthi ngiyambonga kakhulu.”

Iziphathamandla zakubona esasikwenza. Esinye isiphathamandla esikhangela iwolu yomphakathi edolobheni laseL’Asile sathi: “Siyalibonga ngokusukumela kwenu phezulu ukuze lizoncedisa. Siyalibonga kakhulu langokuhlonipha kwenu iziphathamandla. Ngiyathokoza ukubona ukuthi umsebenzi wenu aliwenzeli ukuthola imali kodwa lincedisa abantu ngoba liyabathanda.”

Isiphepho Esikhulu Okuthiwa Ngu-Ana Esahlasela IMalawi LeMozambique

Mhlaka 24 January 2022, isiphepho esikhulu okuthiwa ngu-Ana sahlasela iMozambique sasesiqonda entshonalanga sahlasela leMalawi. Isiphepho lesi sabuya lezulu elikhulu elalilomoya olamandla owawugijima ngesiqubu esedlula amakhilomitha angu-100 ngehola. Sawisa intambo zamagetsi, sadiliza amabholoho njalo sabangela lesikhukhula.

Abafowethu labodadewethu abedlula 30 000 eMalawi laseMozambique bathwala nzima ngenxa yesiphepho lesi. Umfowethu okuthiwa nguCharles owancedisa labo abehlaselwe yisiphepho lesi uthi: “Kwangizwisa ubuhlungu kakhulu ukubona ubunzima abafowethu labodadewethu ababephakathi kwabo lokucabanga ngezinto ezazibalahlekele.” Okwababuhlungu kakhulu yikuthi ukudla okuncane ababelakho kanye lezilimo zabo kwakhukhulwa. Abanengi basala bengasela ndawo zokuhlala. Okunye okudanisayo yikuthi omunye umfowethu wafelwa ngumkakhe lamadodakazi akhe amabili abagalula ngemva kokugenquka kwesikepe esincane ababekuso.

Isiphepho lesi sasisesabisa kakhulu. Ngabo 1 ebusuku eNchalo, eMalawi, imuli kamfowethu uSengeredo yezwa umsindo owethusayo. Imifula emibili yayisigcwale yaze yaphuphuma. Amanzi ayehamba ngesiqubu esikhulu kakhulu agcwala yonke indawo. Umfowethu uSengeredo wabona kungcono ukuthi baphume endlini babalekele endaweni evikelekileyo. Lokhu kwabanceda sibili ngoba isikhukhula lesi sacina sidilize indlu yabo. Ezinye impahla zabo zathathwa ngamanzi ezinye zasala zingasasebenziseki. Imuli le yabona kungcono ukuthi ibalekele eWolu yoMbuso futhi babejayele ukuthatha imizuzu engu-30 ukuthi bayefika khona, kodwa mhlalokho kwabathatha amahola amabili. Bafika bemanzi te, bedinwe befile kodwa bebonga ukuthi bafike bephila.

Abafowethu abasegatsheni leMalawi leleMozambique bahle baqalisa umsebenzi wokuncedisa abafowethu labodadewethu. Batshela ababonisi beziqinti labadala bamabandla ukuthi bahlole okwakudingwa ngabafowethu labodadewethu lokuthi babakhuthaze. Amakhomithi okuncedisa abehlelwe ngumonakalo ahle aqalisa ukuncedisa abafowethu labodadewethu ukuthi bathole ukudla lezinye izinto abazidingayo. Kwasetshenziswa imali edlula amadola angu-33 000 ekuncediseni abafowethu labodadewethu kwazokuthi imali edlula amadola angu-300 000 yasetshenziswa ekwakheni lasekulungiseni izindlu ezazidilizwe yisiphepho.

Amakhomithi la ayisebenzisa kuhle imali futhi lokhu kwanceda kakhulu ngoba izinto zazilokhe zikhwela ukusa kwamalanga. Ngokwesibonelo, ezinyangeni ezingaba yisikhombisa kuqalise umsebenzi wokuncedisa abafowethu labodadewethu, intengo yempuphu yakhwela ngamaphesenti angu-70. Impuphu yiyo esetshenziswa ngabantu abanengi eMalawi. Intengo yamafutha ezimota layo yakhwela. Ukuze kongiwe imali, abafowethu babethenga ukudla okunengi ngasikhathi sinye kanye lezinto zokwakha futhi babekuthenga khona eMalawi. Lokhu kwakusenza ukuthi bephulelwe imali ababeyibhadala njalo bangasebenzisi imali enengi ekuthwaleni izinto lezi.

Umsebenzi lo wathinta inhliziyo zabafowethu labodadewethu. Umfowethu waseMozambique okuthiwa nguFelisberto uthi: “Akulanhlanganiso enjengekaJehova encedisa abantu bayo ngezinto zokwakha, ibathwalele zona, ibanike lezisebenzi zokubancedisa ukwakha, iphinde ibanike lokudla kanye leziqondiso ezinceda abantu bayo. Umsebenzi lo ungenze ngabona ukuthi amazwi kaJesu akuJohane 13:34, 35 aliqiniso sibili ngoba siyathandana.” U-Ester, udade ongumfelokazi oseMalawi olendlu eyadilizwa yisiphepho uthi: “Ngasengiswele lokuthi ngibambe ngaphi ngoba ngangingelamali yokwakha enye indlu. Yikho ngathi ngibona abafowethu bethutsha bezongakhela indlu ngezwa angani sengisePharadayisi.”

Njengoba umhlaba omutsha ulokhu usondela, sikhangelele ukuthi izingozi zemvelo ziqhubeke zisiba zinengi. (UMathewu 24:7, 8) Lanxa kunjalo, asithandabuzi ukuthi abantu bakaJehova bazaqhubeka bethola uncedo abaludingayo ngezikhathi ezinzima. ngenxa yeminikelo yenu. Ezinye indlela elinganikela ngazo ziyachasiswa kuwebhusayithi yethu engxenyeni ethi donate.jw.org. Siyalibonga kakhulu ngokuphana kwenu.