SINGENZANI NXA IZINTO ZIKHWELA?

Sebenzisa Kuhle Imali

Sonke sithwala nzima nxa izinto zilokhu zikhwela. Kodwa lokhu akutsho ukuthi sekumele sithwale imikhono ekhanda. Kukhona esingakwenza.

KUQAKATHEKE NGANI UKUTHI UYISEBENZISE KUHLE IMALI?

Nxa ungehluleka ukuyisebenzisa kuhle imali yakho, ungacina ungasaboni lokuthi iya ngaphi. Khonokho kungenza ukuthi ukhathazeke kakhulu. Kodwa lanxa ulemali encane, kukhona ongakwenza ukuze uyisebenzise kuhle.

ONGAKWENZA

Thenga izinto ezihambelana lesikhwama sakho. Ungenza njalo uzenelisa ukuyisebenzisa kuhle imali yakho futhi awusoze wethuke nxa kungavuka ulutho obungalulindelanga ngoba uzabe ulayo imali.

Okungakunceda ukuthi uthenge izinto ezihambelana lesikhwama sakho yikwenza ibhajethi, okutsho ukuhlela ukuthi uzayisebenzisa njani imali oyitholayo. Nxa usukwenzile lokho, hlolisisa ukuthi yiziphi izinto eziqakathekileyo empilweni ongabe uzifuna. Thenga lokho okubhalileyo kuphela njalo nxa imali oyiholayo ingatshintsha, utshintshe lebhajethi yakho. Nxa litshadile kungaba kuhle ukuthi lokhu likwenze lindawonye.

Zama lokhu: Kungaba ngcono ukuthi usebenzise imali olayo nxa uthenga izinto kulokuthi ukwelede. Abanye sebebone ukuthi lokhu kuyabanceda ukuthi bayisebenzise kuhle imali yabo futhi bangabi lezikwelede. Okunye okuzakunceda ukuthi ungakhathazeki kakhulu yikuhlala ukwazi ukuthi ulemali enganani.

Kungaba nzima sibili ukuphila ngalokho olakho. Kodwa nxa ungahlela ukuthi uzayisebenzisa njani imali yakho ungancedakala kakhulu. Kanti njalo kuzakunceda ukuthi ungahlali ukhathazeke ngemali.

‘Bala izindleko.’—ULukha 14:28.

Ongakwenza ukuze ungaphelelwa ngumsebenzi: Nanzi ezinye izinto ezingakunceda ukuthi ungacini usuphelelwe ngumsebenzi: Bamba isikhathi njalo uwuthande umsebenzi wakho. Ungameleli ukutshelwa yonke into kodwa sebenza nzima. Hlonipha futhi ulandele imithetho yalapho osebenza khona. Zama ukuhlala udinga indlela ezingcono zokuwenza kuhle umsebenzi wakho.

Ungadlalisi imali. Zibuze, ‘Ngilomkhuba wokuthenga izinto ezingaqakathekanga kangako yini kumbe ukuthenga izinto ezingacina zingiphambanisa?’ Ngokwesibonelo abantu abanengi badlalisa imali abayabe beyisebenzele nzima ngokuthenga izidakamizwa, ukubheja, lokubhema, kumbe ukudakwa. Konke lokhu kungenza ukuthi umuntu aphelelwe ngumsebenzi kumbe acine esegula.

‘Uyathokoza umuntu othola ukuhlakanipha. Ukukuthola kungcono kulokuthola isiliva.’—IZaga 3:13, 14.

Hlala ulemali oyibeke eceleni. Nxa kuvuma woba leyinye imali oyibeke eceleni ukuze uthole okokusebenzisa nxa kungavuka ulutho oyabe ungalucabangeli. Imali le ingakunceda ukuthi ungakhathazeki kakhulu nxa kuyikuthi omunye emulini usebanjwe umkhuhlane kumbe nxa ungaphelelwa ngumsebenzi loba kuvuke okunye nje ongakulindelanga.

‘Sonke sifikelwa yisikhathi lezehlakalo ezisijuma silibele.’—UmTshumayeli 9:11.

Okungakunceda Ukuthi Uyigcine Kuhle Imali

Ziphekele ukudla kwakho.

Ukujayela ukuthenga ukudla okuphekiweyo loba okunathwayo kumbe ukudlela emakhefa kungakuqedela imali. Lanxa ukuziphekela kungathatha isikhathi, kungakunceda ukuthi uyigcine kuhle imali yakho. Kanti njalo nxa ungaziphekela kulula ukuthi udle ukudla okwakha umzimba.

Qala ucabange ungakathengi.

Ungakayithenga bhala phansi izinto ofuna ukuzithenga futhi ungathengi lokho oyabe ungakubhalanga.
Nxa usiyathenga okuthile ubusukuthola kutshiphile ungahle uthenge kube kunengi nxa imali yakho ivuma. Kodwa nxa uthenga izinto eziphangisa ukonakala kuyabe kumele ube leqiniso lokuthi ulendlela yokuzilondoloza ukuze zingaboli masinya besezidlaliseka.
Zama ukudinga izinto ezitshiphileyo ikakhulu nxa kuyikuthi zilohlonzi.
Nxa ungaya esitolo, zama ukuthi ungathengi izinto oyabe ungahlelanga ukuzithenga futhi nanzelela lendlela osebenzisa ngayo imali. Kanti njalo ungagijimeli ukuthenga otshayisane lakho. Qala ubhode ezitolo ezitshiyeneyo udinga okutshiphileyo.
Dinga izitolo ezithengisa izinto ezikuseli kumbe ezehlise intengo zazo. Ungakathengi, qala udinge ukuthi ofuna ukukuthenga kuyimalini kwezinye indawo. Nxa ofuna ukukuthenga kuzasebenzisa amagetsi, dingisisa ukuthi kuzasebenzisa amagetsi anganani kumbe ukuthi kuzadinga malini ukuthi ukugcine kusebenza kuhle.

Qala ucabange ungakathengi into entsha.

Amankampani ayenza amafoni lezinye izinto ayabe elokhu ekhipha izinto ezintsha ukuze athole imali enengi. Yikho ungakathengi qala uzibuze imibuzo le: ‘Ukuthenga into entsha kuzanginceda ngani? Ngiyayidinga yini vele khathesi? Lanxa kumele ngiyithenge, kumele ngithenge esanda kukhitshwa yini?’

Gcina kuhle izinto zakho futhi uzilungisise zingafa.

Zigcine kuhle izinto zakho ukuze zihlale isikhathi eside. Nxa zingafa zilungisise nxa kuyikuthi lokho akusoze kuthathe imali enengi. Okunye ongakwenza yikuthenga izinto ezike zasetshenziswa.

Lima.

Nxa ulendawo ungazama ukuthi uzilimele ezinye izinto. Lokhu kuzakunceda ukuthi wonge imali obuzayisebenzisa ukuzithenga. Ungenelisa lokulima izinto ongazithengisa kumbe uzinike abanye.

“Amacebo abakhutheleyo azabenza baphumelele sibili.”—IZaga 21:5.

“Siyakhangela ukuthi izinto esijayele ukuzithenga ziyimalini njalo siba leqiniso lokuthi asisebenzisi imali enengi nxa sithenga ngesikweledi.”—UMiles ohlala e-England.

“Mina lemuli yami siyabhala phansi izinto eziqakathekileyo esifuna ukuzithenga singakayi ezitolo.”—UJeremy ohlala e-U.S.A.

“Sihlala sikhangela ukuthi imali esilayo iyenela yini ukuthenga izinto esiyabe sizibhajethile njalo kulemali esihlala siyibeke eceleni ukuze siyisebenzise nxa kungavuka into esingayilindelanga.”—UYael ohlala e-Israel.

“Safundisa abantwabethu ukuthi nxa ulutho lungafa kungcono ukuthi lulungiswe kulokuthi kuhle kuthengwe olutsha kungelani lokuthi yimota kumbe ezinye nje izinto esizisebenzisa endlini. Mina lomkami siyazama ukuthi singathengi izinto ezintsha eziyabe zisanda kuphuma.”—UJeffrey ohlala e-U.S.A.

“Ngiyazilimela imibhida futhi ngifuya lenkukhu. Lokhu kuyanginceda ukuthi ngingasebenzisi imali ngithenga izinto lezi. Kanti njalo eminye imibhida ngiyenelisa lokuyinika abanye.”—UHono ohlala eMyanmar.