SINGENZANI NXA IZINTO ZIKHWELA?

Suthiseka Ngalokho Olakho

Abantu abasuthiseka ngalokho abalakho empilweni abazihluphi ngezinto abangenelisi ukuzithola. Lanxa izinto zingatshintsha, bayenelisa ukuphila ngokuncane abayabe belakho.

KUQAKATHEKE NGANI UKUSUTHISEKA NGALOKHO ESILAKHO?

UJessica Koehler isikhwicamfundo esihlola indlela abantu abacabanga ngayo sathi abantu abasuthisekayo izikhathi ezinengi abakhathazeki kakhulu futhi kabahawukeli izinto zabanye. Yikho bethokoza empilweni. Phela abantu abanengi abathokozayo ngabaswelayo. Kanti njalo bayathokoza labo abaqakathekisa izinto ezingeke zithengwe ngemali, njengokuzikholisela lemuli labangane.

“Nxa silokudla lezigqoko sizasuthiseka ngezinto lezo.”—1 KuThimothi 6:8.

ONGAKWENZA

Ungaziqathanisi labanye. Nxa ungaqathanisa impilo yakho leyabanye abakhanya bephila ntofontofo ungacina ungasasuthiseki futhi ususiba lomhawu. Kodwa uyabe ungakwazi lokuthi kwenzakalani ezimpilweni zabantu laba. Abanye bangabe belezinto ezinengi sibili kodwa izikwelede zibathwalise nzima. UNicole ohlala eSenegal uthi: “Ukuba lezinto ezinengi ayisikho okungenza ngithokoze. Abanye balezinto ezinengi kulami, kodwa ngiyathokoza ngoba ngiyasuthiseka ngalokho engilakho.”

Zama lokhu: Ungahlali ukhangela izinto ezifakwa ngabanye kwezokuxhumana ezitshengisa izimali ezinengi abalazo kumbe indlela abanothe ngayo.

“Lanxa umuntu elokunengi, izinto alazo ayisizo ezimnika impilo.”—ULukha 12:15.

Woba ngumuntu obongayo. Izikhathi ezinengi abantu ababongayo bayasuthiseka futhi ababoni angathi kulezinto ezinengi okumele babe lazo. Omunye ubaba okuthiwa nguRoberton ohlala eHaiti wathi: “Ngiyazinika isikhathi sokucabangisisa ngezinto ezinhle esiyabe sizenzelwe ngabanye, besengibabonga ngalokho abakwenzileyo. Lomntanami oleminyaka engu-8 laye sengimfundise ukuthi abonge nxa angaphiwa ulutho.”

Zama lokhu: Bhala phansi konke olakho empilweni yakho, kungaba yimpilakahle, imuli yakho, abangane abaqotho, kumbe ubuhle belanga nxa litshona, ubusubonga uJehova uphinde ubonge labo bonke abakwenzela okuhle.

“Olenhliziyo echelesileyo uhlala esedilini kokuphela.”—IZaga 15:15.

Kwezinye izikhathi kungaba nzima ukuthi sisuthiseke. Kodwa nxa singenza okusemandleni ethu ukuthi sisuthiseke ngalokho esilakho sizathokoza ngoba imali ayisiyo eyenza sithokoze.