SINGENZANI NXA IZINTO ZIKHWELA?

Ungalahli Ithemba

Izinto ziyakhwela elizweni ohlala kulo ngapha uhola imali encane yini? Ukhathazekile yini ngokuthi uzayithatha ngaphi imali yokuziphilisa kanye leyokondla imuli yakho? Nxa kunjalo, ungabona angathi kumnyama phambili. Kodwa kuqakathekile ukuthi ungalahli ithemba lanxa izinto zinzima.

KUQAKATHEKE NGANI UKUTHI SINGALAHLI ITHEMBA?

Abantu abalethemba bahlala bekhangelele ukuthi izinto zizakuba ngcono. Ukuba lethemba kuphinda kubancede ukuthi bangahlaleli izandla kodwa benze konke okusemandleni abo lanxa izinto zinzima. Ngokwesibonelo, abachwayisisayo bathi abantu abalethemba . . .

ababeki izikhali phansi nxa izinto sezinzima
bayavumelana lezimo
benza izinqumo ezinhle ezingasoze zibathele emanyaleni njalo abakhetha ukukwenza kuyabanceda lokuthi babe lempilakahle

ONGAKWENZA

Okokuqala, hlola ukuthi iBhayibhili lingakunceda njani. IBhayibhili lilamacebo amanengi angakunceda nxa izinto zilokhu zikhwela. Amacebo la angakunceda ukuthi ungakhathazeki kakhulu lokuthi ukwazi ukuthi wenzeni khathesi langesikhathi esizayo nxa izinto zilokhu zisiba nzima.

“Ingqondo izakugcina, ukuqedisisa kukulondoloze.”—IZaga 2:11, TBS.

Okwesibili, hlola lokho okutshiwo liBhayibhili mayelana lekusasa. Nxa ungabona ukuthi amacebo esiwathola eBhayibhilini ayanceda, uzafuna ukufunda okunengi mayelana lokuthi impilo izabe injani ngesikhathi esizayo. Ngokwesibonelo, uzafunda ukuthi uNkulunkulu ufuna ukukunika “ithemba kanye lekusasa elihle.” (UJeremiya 29:11) IBhayibhili liphinda likhulume ngoMbuso kaNkulunkulu azawusebenzisa ukuthi agcwalise lokho asithembise khona.

UYINI UMBUSO KANKULUNKULU FUTHI UZAKWENZANI?

UMbuso kaNkulunkulu nguhulumende ozabusa umhlaba wonke. (UDanyeli 2:44; UMathewu 6:10) Uzabusa usezulwini njalo uzasusa ukuhlupheka lobuyanga, ubusuletha ukuthula. Akulamuntu ozaswela loba yini njengoba imibhalo elandelayo isitsho.

“Uzathokoza njalo uphumelele.”—IHubo 128:2.

Abazabuswa nguMbuso kaNkulunkulu “abasoze basebenzele ize.”—U-Isaya 65:23.

“Kuzakuba lenala yokudla emhlabeni.”—IHubo 72:16.

Abantu abanengi bayazikholwa izithembiso lezi ngoba bayakwazi ukuthi uNkulunkulu ‘ngeke aqambe amanga.’ (KuThithusi 1:2) Kungaba kuhle ukuthi ulibale iBhayibhili. Ithemba ozasala ulalo nxa ungalibala lizakunceda ukuthi uqinisele ngezikhathi ezinzima lokuthi ungathandabuzi ukuthi uzakuba lekusasa elihle.