SINGENZANI NXA IZINTO ZIKHWELA?
Woba Ngumuntu Ophanayo
Nxa izinto zilokhu zikhwela, ungabona angani akulalutho ongalupha abanye kumbe ubone angani ngeke ubancede ngalutho. Kodwa ungenelisa ukuba ngumuntu ophanayo lanxa izinto zinzima. Phela ukupha kungakunceda lawe.
KUQAKATHEKE NGANI UKUBA NGUMUNTU OPHANAYO?
Nxa umuntu ephana ngitsho langezinto ezincane, uyathokoza futhi azizwe eqakathekile. Abanye odokotela bathi ukupha kuyanceda ukuthi umuntu angahlali egulagula, angabi lohlupho lokukhathazeka, angabanjwa yimkhuhlane enjengabo-BP, lokuthi angabi lezinye izinhlungu emzimbeni. Ukupha kuyasinceda lokuthi silale kuhle.
Nxa singaba ngabantu abaphanayo, kungabe kuyikuncedisa abanye ngemali kumbe ezinye izinto, asisoze sibe lenhloni nxa lathi sekumele sincediswe. UHoward ohlala e-England uthi: “Mina lomkami siyadinga indlela zokupha abanye izinto ezitshiyeneyo kanye lokubancedisa. Lokhu kwenza ukuthi singabi lenhloni nxa lathi sekumele sincediswe.” Abantu abapha ngenhliziyo yonke kabakhangeleli ukuthi labo baphiwe okuthile. Okuhle ngokuphana yikuthi kuyabenza bathole abangane beqiniso abayabe bezimisele ukubancedisa ngezikhathi ezinzima.
ONGAKWENZA
Nika abanye lokho olakho. Lanxa ulokulutshwana kukhona ongakunika abanye. Mhlawumbe lokhu kungatsho ukuthi ubaphekele ukudla okungamangalisiyo. UDuncan lemuli yakhe abahlala e-Uganda ngabantu abaswelayo kodwa bayaphana. UDuncan uthi: “Maviki wonke ngeSonto siyanxusa abantu ukuthi bazokudla emzini wethu. Siyakukholisa kakhulu ukukwejisa labanye lanxa siyabe singaphekanga ukudla okumangalisayo.”
Kuhle sibili ukupha abanye, kodwa ungakhohlwa ukuthi akumelanga ube ngumuntu ophanayo imuli yakho ize isale isiswela ezinye izinto.—UJobe 17:5.
Zama lokhu: Nxusa abanye ukuthi bazokudla lani kodwa ungazikhami. Lokhu kungatsho ukubabizela okunathwayo nje. Nxa ulezinto ongasazisebenzisiyo kungaba kuhle ukuthi uziphe abangane kumbe omakhelwane abangabe bezidinga.
Tshengisa ukuthi uyaphana langezinye indlela ezitshiyeneyo. Ayisikho ukuthi kumele ube lemali ukuze ube ngumuntu ophanayo. Ngokwesibonelo, ungasebenzisa isikhathi sakho uncedisa abanye ngezinye indlela. Lokhu kuzatshengisa ukuthi ulendaba labo. Okunye ongakwenza yikubatshela amazwi akhuthazayo! Yikho tshela abanye ukuthi uyabathanda lokuthi uyabaqakathekisa.
Zama lokhu: Dinga umuntu ongamncedisa ukwenza imisebenzi yangekhaya kumbe ongamlungisela okuthile okungabe kufile emzini wakhe, loba ongahamba uyemthengela ezinye izinto angabe ezifuna. Bhalela umngane wakho ikhadi kumbe umthumele imeseji lanxa kuyinto encane enjengokumtshela ukuthi uyamkhumbula nje.
Nxa singadinga indlela ezitshiyeneyo zokuba ngabaphanayo, sizathokoza kakhulu.