Ulowesifazana Emthonjeni

UJESU uyaphumula emthonjeni, eSamariya. Abafundi bakhe bayethenga ukudla edolobheni. Umfazi okhuluma loJesu uzokukha amanzi. UJesu uthi kuye: ‘Ngicela amanzi.’

Lokhu kuyammangalisa kakhulu umfazi lo. Uyakwazi yini ukuthi kungani? Kungenxa yokuthi uJesu ungumJuda, yena ungumSamariya. AmaJuda amanengi kawawathandi amaSamariya njalo kawawakhulumisi! Kodwa uJesu uthanda abantu bonke. UJesu uthi kuye: ‘Aluba ubumazi okucela amanzi, ubuzamcela abesekunika amanzi anika ukuphila.’

Umfazi lo uphendula esithi: ‘Mnumzana, umthombo uyatshona njalo awulakho okokukhisa amanzi. Ungawathatha ngaphi lawomanzi anika ukuphila?’

UJesu uyamchasisela esithi: ‘Nxa unganatha amanzi omthombo lo uzawoma futhi. Kodwa amanzi engizakunika wona angenza umuntu aphile kuze kube nininini.’

Umfazi lo uthi: ‘Mnumzana, ngipha lawomanzi! Khona ngingasoze ngiphinde ngiwome, ngingabi ngilokhu ngisiza lapha ngizokukha amanzi.’

Umfazi lo ucabanga ukuthi uJesu ukhuluma ngamanzi eqiniso. Kodwa uJesu ukhuluma ngeqiniso elimayelana loNkulunkulu lombuso wakhe. Iqiniso leli linjengamanzi anika ukuphila. Lingenza umuntu athole ukuphila okungapheliyo.

UJesu utshela umfazi lo esithi: ‘Hamba uyebiza indoda yakho ubuye layo lapha.’

Umfazi lo uphendula esithi: ‘Kangilandoda.’

UJesu uthi: ‘Uqinisile. Kodwa usube lamadoda amahlanu njalo indoda ohlala layo khathesi kayisiyakho.’

Umfazi lo uyamangala ngoba konke lokhu kuliqiniso. UJesu wazazi njani izinto lezi? Wazazi ngoba yena ungoThenjisiweyo owathunywa nguNkulunkulu, ngakho uNkulunkulu nguye omtshela konke lokhu. Abalandeli bakaJesu bayaphenduka besebemangala ukufica uJesu ekhuluma lomfazi ongumSamariya.

Lokhu kusifundisani? Kusifundisa ukuthi uJesu ulomusa ebantwini bemihlobo yonke. Lathi kumele senze njalo. Akumelanga sicabange ukuthi abantu beminye imihlobo bangabantu ababi. UJesu ufuna abantu bonke balazi iqiniso elenza bathole ukuphila okungapheliyo. Lathi kumele sincedise abantu ukuthi balazi iqiniso.