Indlela uJesu Afundisa Ngayo

NGELINYE ilanga uJesu utshela enye indoda ukuthi kumele ithande umakhelwana wayo. Indoda le ibuza uJesu isithi: ‘Ngubani umakhelwana wami?’ UJesu uyakwazi ukuthi indoda le icabangani. Indoda le icabanga ukuthi omakhelwana bayo ngabantu bomhlobo wayo kumbe abenkolo yayo kuphela. Ake sibone ukuthi uJesu uyitshelani.

Kwezinye izikhathi uJesu ufundisa ngokulandisa indaba. Yikho akwenzayo khathesi. Ulandisa ngendaba yomJuda lomSamariya. Sesifundile ukuthi amaJuda amanengi kawawathandi amaSamariya. Nansi-ke indaba uJesu ayilandisayo:

Ngelinye ilanga kwakulomJuda owayehamba ngendlela yasentabeni esiya eJerikho. Kodwa amasela ambamba. Amthathela imali yakhe asemtshaya waze waphosa wafa.

Ngemva kwesikhathi, kwathutsha umphristi ongumJuda endleleni leyo. Wayibona indoda le eyayitshayiwe. Ubona angani wenzani? Wazidlulela wahamba eceleni kwendlela. Kwasekudlula omunye umuntu owayethanda kakhulu ezokukhonza. WayengumLevi. Wama yini? Hatshi, laye kamanga ukuze ancede indoda le eyayitshayiwe. Uyambona yini umphristi lomLevi bedlula besehla ngendlela?

Khangela ukuthi ngubani olendoda etshayiweyo. NgumSamariya. Kodwa unceda umJuda. Ufaka umuthi ezilondeni zomJuda lo abesemhambisa endaweni lapho angaphumulela khona ukuze abe ngcono.

Eseqedile indaba yakhe, uJesu ubuza indoda embuze umbuzo: ‘Ngubani phakathi kwalaba abathathu obona angani waba ngumakhelwana wendoda eyayitshayiwe? Ngumphristi, ngumLevi kumbe ngumSamariya yini?’

Indoda iyaphendula: ‘Yindoda engumSamariya. Yaba lomusa endodeni eyayitshayiwe.’

UJesu uthi: ‘Uqinisile. Lawe hamba uyekwenza njalo.’

Uyayithanda yini indlela uJesu afundisa ngayo? Singafunda izinto ezinengi kakhulu eziqakathekileyo nxa singalalela okukhulunywa nguJesu eBhayibhilini.