ISIHLOKO ESISEKUQALISENI | ISAYENSI ISINGCONO KULEBHAYIBHILI YINI?

Lapho Isayensi Esilela Khona

Kulezinsuku sekutholakala amabhuku amanengi aveza okutshiwo ngabantu abangakukholwayo ukuthi kuloNkulunkulu. Okutshiwo ngamabhuku la kuyindaba esegudwini njalo akhanga abantu abanengi aphinde avuse lempikiswano enkulu. Esinye isikhwicamfundo sesayensi okuthiwa nguDavid Eagleman sabhala sathi: “Nxa abanye bangabala amabhuku la. . . basuka bacabange ukuthi abezesayensi bakwazi konke.” Saqhubeka sathi: “Kodwa abezesayensi abawenza kuhle umsebenzi wabo ngabahlala belungele ukuthapha ulwazi olutsha, njalo kusayensi kuhlala kutholakala izinto ezintsha esiyabe singazicabangeli.”

Isazi sezinkanyezi sisebenzisa ithelesikopu

Kusukela kudala abezesayensi abazingcitshi benelisile ukwenza izinto ezimangalisayo ngesikhathi bedinga izimpendulo zemibuzo eyinsindabaphenduli emayelana lemvelo. Kodwa abanye bake balukhutha ugatsha. Ngokwesibonelo u-Isaac Newton wayeyingcitshi kwezesayensi. Nguye phela owaveza ukuthi amandla adonsela izinto phansi akwenza njani ukuthi amaplanethi, izinkanyezi kanye lemithala kungehlukani. Waphinda wasungula isifundo sezinombolo esanceda ukuthi kwenziwe ikhompiyutha, izinto ezihamba emkhathini, lezinto eziphathelane le-nuclea. Lanxa kunjalo, uNewton wazama ukwenza into engeke yafa yenzakala. Wayefuna ukuntshintsha ezinye izinhlobo zensimbi ukuthi zibe ligolide esebenzisa amasalamusi lolwazi lwezinkanyezi.

Eminyakeni edlula engu-1 500 uNewton engakazalwa, esinye isazi sezinkanyezi esingumGiriki okuthiwa nguPtolemy sachwayisisa umumo wamazulu ngokukhangela ngamehlo nje hatshi ngemitshina. Wayehlola indlela amaplanethi ahamba ngayo ebusuku njalo wayelobuciko bokwenza amamephu. Kodwa wayekholwa ukuthi umhlaba yiwo ophakathi laphakathi kwezinto zonke. Omunye owezesayensi obona ngezinkanyezi lokunye okusemkhathini okuthiwa nguCarl Sagan wabhala ngoPtolemy wathi: “Kwathatha iminyaka engu-1 500 abantu bewukholwa umbono wakhe wokuthi uMhlaba yiwo ophakathi laphakathi kwendawo yonke, okusikhumbuza ukuthi ukukhalipha akutsho ukuthi asingeke siwenze amaphutha amakhulu.”

Abezesayensi abakhona lamuhla labo bayawenza amaphutha. Bazake bakuzwisise yini konke okuphathelane lemvelo? Siyayibona sibili intuthuko yabezesayensi kanye lezinto abazenzileyo ezisincedayo. Kodwa kumele sihlale sikwazi ukuthi kukhona okubehlulayo. Esinye isifundiswa sesayensi okuthiwa nguPaul Davies sathi akungeke kwenzeke ukuthi izinto zonke ezadalwayo zichwayisiswe kutholwe imicijo evumelanayo futhi esuthisa wonke umuntu. Akutshoyo kuveza iqiniso leli esingeke siliphike: Abantu kabangeke benelise ukuzizwisisa ngokupheleleyo zonke izinto ezadalwayo. Yikho-ke nxa kuthiwa abezesayensi bangenelisa ukuchasisa yonke into ekhona, kumele sinanzelele singaphongukholwa.

Kuyacaca ukuthi iBhayibhili lisinceda ngendlela isayensi engeke isincede ngayo

Nxa iBhayibhili likhuluma ngezinto zemvelo ezimangalisayo lithi: “Njalo le yimisebenzi yakhe [uNkulunkulu] engaphandle nje ekucineni; esikuzwayo yilizwana nje lokunyenyeza kwakhe!” (UJobe 26:14) Kulokunengi kakhulu esingakuqedisisiyo lesingeke sikuzwisise. Kuyakhanya-ke ukuthi amazwi abhalwa ngumphostoli uPhawuli eminyakeni engaba ngu-2 000 eyadlulayo alokhu eliqiniso. Wabhala wathi: “Yeka ukuzika kwenotho yenhlakanipho kanye lokwazi kukaNkulunkulu! Yeka ukwahlulela kwakhe okungeke kuhlolwe, kanye lezindlela zakhe ezingeke zilandelwe!”—KwabaseRoma 11:33.

Ukuhlakanipha Esingeke Sikuthole KuSayensi

Abezesayensi basitshela ulwazi oluphathelane lezinto ezidaliweyo, kodwa iBhayibhili lisinika izimiso kanye lokuhlakanipha okungasenza senelise ukuhlalisana kuhle labanye njalo sithole intokozo empilweni. Khangela izibonelo ezilandelayo.

Ubugebengu

Qakathekisa ukuphila

“Ungabulali.”—U-Eksodusi 20:13.

“Lowo ozonda umzalwane wakhe ungumbulali.”—1 Johane 3:15.

Thanda ukuthula njalo ukulondoloze

“Tshiya ububi wenze okulungileyo; funa ukuthula ukunxwanele.”—IHubo 34:14.

““Abalamuli abahlanyela ukuthula bathola isivuno sokulunga.”—UJakhobe 3:18.

Xwaya udlakela

“UJehova uyabahlola abalungileyo, kodwa ababi lalabo abathanda udlakela umphefumulo wakhe uyabazonda.”—IHubo 11:5.

“Ungamhawukeli umuntu othanda ukulwa loba nje ufise lakuphi ukwenza kwakhe, ngokuba uJehova uyamenyanya umuntu oxhwalileyo.”—IZaga 3:31, 32.
Imuli Ethokozayo

Lalela abazali bakho

“Bantwana lalelani abazali benu eNkosini, ngoba lokhu kulungile. ‘Hlonipha uyihlo lonyoko’—okungumlayo wokuqala olesithembiso—‘ukuze kukulungele lokuba ube lempilo ende emhlabeni.’ ”—Kwabase-Efesu 6:1-3.

Bafundise kuhle abantwabakho

“Lingabathukuthelisi abantwana benu, kodwa bondleni ngokufundisa langokulaya kweNkosi.”—Kwabase-Efesu 6:4.

“Lingabathukuthelisi abantwana benu, hlezi badumazeke.”—KwabaseKholose 3:21.

Thanda umkakho futhi umhloniphe

“Omunye lomunye wenu laye kathande umkakhe njengoba ezithanda, lomfazi kumele ahloniphe indoda yakhe.”—Kwabase-Efesu 5:33.
Ukulondoloza imvelo

IBhayibhili lakhuluma ngababengcolisa umhlaba ko-Israyeli wasendulo lathi: “Umhlaba ungcoliswa ngabantu bawo. . . . Abantu bawo kumele bahlupheke ngenxa yokona kwabo.” (U-Isaya 24:5, 6) UNkulunkulu uzabajezisa abantu abonakalisa umhlaba. ‘Uzachitha labo abachitha umhlaba.’ (ISambulo 11:18) Kasoze abayekele.