Ukunceda Labo Abangakalungeli Ukufunda Ibhuku Elithi Okufundiswa liBhayibhili
1. Ibhuku elithi Okufundiswa liBhayibhili lizakhanga wonke umuntu yini? Chasisa.
1 Umuntu kumele afunde lokho okufundiswa liBhayibhili ukuze abe yisikhonzi sikaNkulunkulu. Kodwa abanye kabasiwo maKhristu futhi iBhayibhili kabaliboni njengeLizwi likaNkulunkulu. Abanye vele kabakholwa kuNkulunkulu futhi kabalihloniphi iBhayibhili. Yiwaphi amabhuku angcono kakhulu ekuncedeni labo ekuqaliseni abangafuni ukufunda ibhuku elithi Okufundiswa liBhayibhili? Amacebo alandelayo asekelwe kulokho okuye kwatshiwo ngabamemezeli abavela emazweni angu-20.
2. Kumele senzeni nxa umuntu engasitshela ukuthi kakholwa kuNkulunkulu futhi kungani kumele senze njalo?
2 Abantu Abangakholwa kuNkulunkulu: Nxa umuntu engathi kakholwa kuNkulunkulu, kuyanceda kakhulu ukuthi umbuze ukuthi kungani esitsho njalo. Kungenxa yokuthi ukholwa ukuthi izinto zazivelela yini? Ubuzenzisi obusemasontweni kumbe ububi obusemhlabeni yikho okumenze wangabe esakholwa kuNkulunkulu yini? Uvela elizweni elingafuni muntu okholwa kuNkulunkulu yini? Mhlawumbe kaphiki ukuthi uNkulunkulu ukhona, kodwa kakaze abone isizathu sokukholwa kuye. Abamemezeli abanengi sebenanzelele ukuthi ukubuza ukuthi, “Wawuvele uzizwa ngaleyo ndlela yini?” kwenza ukuthi umuntu achasise. Lalela futhi umekele achasise aze aqede. Ukuzwisisa lokho okwenza lowomuntu angakholwa kuNkulunkulu kuzasinceda ukuthi sikwazi indlela esingamphendula ngayo kanye lebhuku esingamnika lona.—Zaga. 18:13.
3. Singatshengisa njani ukuthi siyamhlonipha umuntu kanye lalokho akukholwayo?
3 Nxa uphendula, nanzelela ukuthi ungenzi lowomuntu abone angani uzama ukulwisana lombono wakhe. Icebo leli elilandelayo lavela kubamemezeli base-United States: “Kuqakatheke kakhulu ukuhlonipha inkululeko umuntu munye ngamunye alayo ekukhetheni lokho afuna ukukukholwa. Kulokuzama ukunqoba impikiswano, kungcono kakhulu ukubuza imibuzo enza abantu bacabange futhi bafinyelele bona bodwa esiphethweni esithile.” Omunye umbonisi ohambelayo wandise ukuthi ngemva kokuzwa umninimuzi eveza umbono wakhe, aqalise ngokubuza ukuthi: “Wake wacabanga yini ngokuthi lokhu kungenzakala?”
4. Singabanceda njani abantu abangamaBhuda?
4 Abantu abanengi abangamaBhuda kabamazi uNkulunkulu. Abanye abamemezeli eBritain bandise ukuthi nxa betshumayeza abantu abanjalo basebenzise ibhukwana elithi Lasting Peace and Happiness—How to Find Them. Ngemva kokukhuluma ngesingeniso, baxoxa ngesihloko esithi “Is There Really a Most High Creator?” kanye lesithi “A Guidebook for the Blessing of All Mankind.” Ngemva kwalokho bangenelisa ukwethula ibhuku elithi Okufundiswa liBhayibhili besebesithi kumninimuzi, “Lanxa ungakholwa kuNkulunkulu, ukufunda iBhayibhili kuyanceda ngenxa yokuthi kuleziqondiso ezinengi ezinceda kakhulu.” Iphayona elihlala e-United States elitshumayela ensimini yesiTshayina lathi: “Abantu abanengi ensimini yethu bayakuthanda ukubala. Ngakho singabatshiyela ibhuku, bandise ukulibala baliqede singakaphindeli. Kodwa bangabe bengakuzwisisi ukuthi siyini isifundo seBhayibhili. Ngakho ngithanda ukubatshiyela ibhukwana elithi Izindaba Ezinhle ngelanga lakuqala nje ngibabonile ngenxa yokuthi libhalwe ngendlela enza ukuthi kube lengxoxo.” Umbonisi wesiqinti okhonza esiqintini solimi lwesiTshayina e-United States uveza ukuthi singamtshengisa umninimuzi ibhuku elithi Okufundiswa liBhayibhili ngelanga lakuqala nje. Kodwa kungcono ukuqalisa ngesahluko 2 sebhuku leli, esikhuluma ngeBhayibhili, kulokuqalisa ngesahluko 1, esikhuluma ngoNkulunkulu.
5 Kungani ukubekezela kuqakathekile?
5 Kuqakathekile ukubekezela ngenxa yokuthi kuthatha isikhathi ukuthi umuntu abe lokholo kuNkulunkulu. Kungenzakala ukuthi angavumi ukuthi kuloMdali ngesikhathi siqala ukufunda laye. Kodwa ngokuhamba kwesikhathi angavuma ukuthi uMdali angabe ekhona, kumbe athi uyazwisisa ukuthi kungani kuthiwa ukhona.
6. Kuyini okungenza abanye abantu bangalithandi iBhayibhili?
6 Labo Abangelandaba leBhayibhili kumbe Abangalithembiyo: Kodwa izikhathi ezinengi, umuntu ovumayo ukuthi uNkulunkulu ukhona angabe engelandaba lokufundiswa liBhayibhili ngenxa yokuthi kakholwa ukuthi liLizwi likaNkulunkulu. Mhlawumbe uhlala elizweni elingela maKhristu futhi ubona iBhayibhili njengebhuku lamasonto azithi angawesiKhristu. Mhlawumbe angabe ehlala elizweni elizithi ngelesiKhristu kodwa elithanda izinto zomhlaba. Lokhu kungamenza abone angathi iBhayibhili kalingeke limncede. Singabanceda njani abantu abanjalo ukuthi balithande iBhayibhili futhi bacine sebevuma ukufunda ibhuku elithi Okufundiswa liBhayibhili?
7. Kuyini okwandise ukuba yindlela enhle yokwenza ukuthi umuntu afune ukufunda iBhayibhili?
7 Iwofisi yegatsha yaseGreece yabhala yathi: “Indlela engcono kakhulu yokunceda abantu abangelandaba leBhayibhili yikubavulela nje iBhayibhili ubatshengise elikumumetheyo. Abamemezeli abanengi sebenanzelele ukuthi umlayezo weBhayibhili ulamandla ekuntshintsheni inhliziyo yomuntu ukwedlula noma kuyini bona ngokwabo abangakutsho. (Heb. 4:12) Ukubona ibizo likaNkulunkulu eBhayibhilini kuncede abantu abanengi ukuthi babelesifiso sokubala iBhayibhili.” Iwofisi yegatsha yase-India yabhala yathi: “Iqiniso eliphathelane lempilo kanye lokufa liyawakhanga kakhulu amaHindu amanengi, futhi lesithembiso sikaNkulunkulu esomhlaba ongelabandlululo laso siyabakhanga.” Ukukhuluma ngezinhlupho ezisemphakathini kwandise ukupha abamemezeli ithuba lokutshengisa abantu lokho iBhayibhili elithi kuzakwenziwa nguMbuso kaNkulunkulu ukuze ulungise izinhlupho ezikhona.
8. Kuyini esingakutsho kulabo abangalithandiyo iBhayibhili ngenxa yamaSonto azithi ngawesiKhristu?
8 Nxa umuntu engalithandi iBhayibhili ngenxa yalokho okufundiswa ngamasonto azithi ngawesiKhristu, mtshele ukuthi amasonto lawo akhulume amanga ngeBhayibhili kanye lezimfundiso zalo. Iwofisi yegatsha ese-India yabhala yathi: “Kwezinye izikhathi kuyadingakala ukuthi sincede abantu bakwazi ukuthi amasonto kayisiwo banikazi beBhayibhili.” Igatsha leli lithi izikhathi ezinengi amaHindu akhangwa yingxenye yesine yebhukwana elithi What Is the Purpose of Life? How Can You Find It?, echasisa ngokuthi amasonto azame njani ukuphambanisa kanye lokutshabalalisa iLizwi likaNkulunkulu. Elinye iphayona elihlala eBrazil litshela abantu ukuthi: “Kungani ungafundi okunengi ngokuseBhayibhilini? Abantu abanengi bafunda iBhayibhili befuna ukubona lokho okufundiswa yilo lanxa bengelankolo abayingenayo. Ungafunda okunengi kakhulu okungakumangalisa.”
9. Kungani kungamelanga silahle ithemba nxa umuntu engafuni ukufunda lokho okufundiswa liBhayibhili?
9 UJehova ukhangela inhliziyo yomuntu munye ngamunye. (1 Sam. 16:7; Zaga. 21:2) Labo abalesimo esihle senhliziyo ubasondeza ekukhonzeni kweqiniso. (Joh. 6:44) Abanengi abasondezwa nguNkulunkulu kuye babengakaze bafundiswe ngaye, loba kabazange babe lesikhathi esinengi sokufunda iBhayibhili. Inkonzo yethu ibanika ithuba ‘lokusindiswa njalo balazi iqiniso.’ (1 Tim. 2:4) Ngakho ekuqaliseni, nxa abanye bengelandaba lalokho okufundiswa liBhayibhili, ungalahli ithemba! Sebenzisa loba yiliphi ibhuku elikhona olimini lwakho ukuze ubenze bafune ukufunda iBhayibhili. Ngokuhamba kwesikhathi, ungenelisa ukuqalisa ukuxoxa ngebhuku esilisebenzisa ekuxoxeni labantu iBhayibhili, elithi IBhayibhili Lifundisani Sibili?
[Ibhokisi elisekhasini 4]
Nxa umninimuzi engathi kakholwa kuNkulunkulu, zama lokhu okulandelayo:
• Ukuze uthole ukuthi kungani, buza ukuthi, “Wawuvele uzizwa ngaleyo ndlela yini?”
• Nxa engumBhuda, sebenzisa ibhukwana elithi Lasting Peace and Happiness—How to Find Them, amakhasi 9-12.
• Nxa ekholwa ekuthini izinto zazenzakalela, amabhuku alandelayo angaba luncedo:
Izihloko ze-Awake! ezihlala ziphuma ezithi, “Was It Designed?”
Ividiyo ethi The Wonders of Creation Reveal God’s Glory
Ibhukwana elithi A Satisfying Life—How to Attain It, kungxenye 4; elithi Was Life Created?; kanye lelithi The Origin of Life—Five Questions Worth Asking
• Nxa engasakholwa kuNkulunkulu ngenxa yobubi kanye lokuhlupheka okusemhlabeni, amabhuku alandelayo anganceda:
Ibhuku elithi Is There a Creator Who Cares About You?, kusahluko 10
Ibhukwana elithi Does God Really Care About Us?, kungxenye 6, kanye lelithi What Is the Purpose of Life?, kungxenye 6
• Ntshintshela ebhukwini elithi Okufundiswa liBhayibhili masinyane nje nxa umninimuzi esekholwa ukuthi uNkulunkulu angabe ekhona. Kungaba kuhle ukuqalisa ngesahluko 2 kumbe esinye isahluko esimfaneleyo.
[Ibhokisi elisekhasini 5]
Zama okulandelayo nxa umninimuzi engakholwa eBhayibhilini:
• Xoxa ngezahluko 17 lo 18 zebhuku elithi Life—How Did It Get Here? By Evolution or by Creation?
• Nxa uxoxa lamaHindu, sebenzisa ibhukwana elithi Why Should We Worship God in Love and Truth?
• Nxa uxoxa lamaJuda, sebenzisa ibhukwana elithi Will There Ever Be a World Without War?, amakhasi 3-11.
• Xoxa ngoncedo lokusebenzisa izimiso zeBhayibhili. Amabhuku ongawasebenzisa ekutshengiseni umuntu ukuqakatheka kweBhayibhili yila alandelayo:
Izihloko ze-Awake! ezihlala ziphuma ezithi “Help for the Family”
Ividiyo ethi The Bible—Its Power in Your Life
Amabhukwana athi Good News From God!, izifundo 9 lo 11; elithi A Book for All People, amakhasi 22-26; kanye lelithi A Satisfying Life—How to Attain It, kungxenye 2
Nxa uxoxa lamaBhuda, sebenzisa ibhukwana elithi The Pathway to Peace and Happiness, amakhasi 3-7.
Nxa uxoxa lamaMozilemu, sebenzisa ibhukwana elithi Real Faith—Your Key to a Happy Life, kungxenye 3.
Nxa utshumayela endaweni lapho iBhayibhili elibandlululwa khona, kungaba ngcono ukuthi ungatsho ukuthi uwathethe ngaphi lawomazwi alokuhlakanipha oyabe ubatshela wona kuze kube yilapho usuphindele kanengi.
• Chasisa indlela iziphrofetho zeBhayibhili ezigcwaliseke ngayo. Amabhuku ongawasebenzisa yila alandelayo:
Ividiyo ethi The Bible—Accurate History, Reliable Prophecy
Ibhukwana elithi A Book for All People, amakhasi 27-29
• Ntshintshela ebhukwini elithi Okufundiswa liBhayibhili masinyane nje nxa umuntu angabuza ukuthi iBhayibhili lifundisani ngezihloko ezitshiyeneyo.
[Umfanekiso osekhasini 6]
Nxa umninimuzi engathi: “Kangikholwa kuNkulunkulu,” ungathi:
• “Ngingakutshengisa yini ngamafitshane ukuthi kuyini okwangenza ngakholwa ukuthi kuloMdali?” Ngemva kwalokho ungaxoxa ngemicijo esebhukwini elithi Reasoning, emakhasini 84-86, kumbe uhlele ukuphathela lowomuntu ibhuku owakholisa ukulibala.
• “Kodwa ngabe kuloNkulunkulu, ubungafuna abe njani?” Abaninimuzi abanengi baphendula ngokuthi bangasondela kuNkulunkulu olothando, owahlulela ngokulunga, olomusa, futhi ongakhethiyo. Vula iBhayibhili umtshengise ukuthi uNkulunkulu ulazo izimpawu zobuntu ezinjalo. (Ungasebenzisa lesahluko 1 sebhuku elithi Okufundiswa liBhayibhili, uqalise ngendima 6.)
Nxa umninimuzi engathi: “Kangilikholwa iBhayibhili,” ungathi:
• “Banengi abalombono onjalo. Abanye bacabanga ukuthi iBhayibhili kalikhulumi ngesayensi, kumbe ukuthi izimiso zalo kazisebenzi. Kodwa ngicela ungitshele, sewake walibala yini iBhayibhili? [Melela impendulo. Ngemva kwalokho, mtshengise isingeniso sebhukwana elithi A Book for All People, esisekhasini 3, ubusumnika lona.] Abantu abanengi kabasalithembi iBhayibhili ngenxa yokuthi inkolo ikhuluma amanga ngezimfundiso zalo. Ngesikhathi esilandelayo, ngingathanda ukuxoxa lawe ngesibonelo esisekhasini 4 lo 5.”
• “Abantu abanengi balombono onjengowakho. Ngicela ukukutshengisa okuthile okuseBhayibhilini okungithokozisayo? [Bala umbhalo kaJobe 26:7; lo-Isaya 40:22, otshengisa ukuthi iBhayibhili likhuluma iqiniso ngesayensi.] IBhayibhili liphinde libe lamazwi ahlakaniphileyo anceda izimuli. Ngingathanda ukukutshengisa isibonelo salokho ngesikhathi esizayo.”
• “Ngiyabonga ngokungitshela lokho. Nxa uNkulunkulu engabhalela abantu ibhuku, ubona angani liyabe limumetheni?” Ngemva kwalokho ubusumtshengisa lowomuntu okuthile okuseBhayibhilini okuvumelana lempendulo yakhe.