Okwenzakala Ezimpilweni Zabanye
◼ E-Australia: Indoda efundileyo okuthiwa nguJohn, yayihamba esontweni isesencane kodwa ngokuhamba kwesikhathi yaba ngumuntu “ongakholwa kuNkulunkulu.” Iphayona lamtshiyela ibhukwana elithi Was Life Created? kwathi ngesikhathi esilandelayo lamtshiyela ibhukwana elithi Origin of Life. Iphayona leli laqhubeka lizama ukuthi indoda le ikholwe kuNkulunkulu ngokuyiphathela amamagazini ayesanda kuphuma ayelezihloko ezikhuluma ngendalo kumbe iziphrofetho zeBhayibhili. Lapho iphayona leli selibona ukuthi uJohn wayesengamukela okunye, lamnika ibhuku elithi The Bible—God’s Word or Man’s? Ngemva kokulibala, uJohn waqalisa ukuzichaza “njengomuntu ongasaphikisi kangako ukuthi uNkulunkulu ukhona.” Iphayona lelo laselitshengisa uJohn ibhuku elithi Okufundiswa liBhayibhili, kundima 8 esekhasini 20 kanye lezindima 13-16 ezisekhasini 23-24. Imibhalo efakiweyo yamthinta kakhulu uJohn waze wathi, “Mhlawumbe kumele ngike ngilifunde futhi iBhayibhili.”
◼ EMexico: Enye indoda yatshela ummemezeli othile ukuthi yayingakholwa ukuthi iBhayibhili laphefumulelwa nguNkulunkulu. Ummemezeli lo wacela ukutshengisa indoda le ubufakazi bokuthi iBhayibhili laphefumulelwa. Ngemva kwezingxoxo ezithile, indoda le yaqalisa ukuthintwa yilokho eyayikufunda eBhayibhilini. Yathintwa kakhulu yilokho eyayikufunda mayelana lezimiso zikaNkulunkulu. Yatshela lowommemezeli ukuthi: “Ekuqaliseni lapho sifunda iBhayibhili ndawonye, kwakukhanya angani yiseluleko esifanana lesamabhuku wonke futhi kasizange singithinte. Kodwa khathesi nxa sibala iBhayibhili inhliziyo yami iba buhlungu, ikakhulu nxa ngibala ngeseluleko salo esimayelana lokuziphatha.”
◼ E-United States: Ngesikhathi besenza inkonzo yokutshumayela obala okuqakathekileyo okwenziwa emadolobheni aphithizelayo, ummemezeli othile lomkakhe bahlangana lowesifazana othile owayevela eTaiwan. Owesifazana lo wayekholwa kuNkulunkulu kodwa wayebona angani iBhayibhili lalingelabantu abamhlophe. Weza lapho okwakuletafula yamabhuku ngenxa yokuthi wayebona angani ukuphila kwakhe akulanjongo lanxa nje wayehlezi kuhle. Wayefisa ukuthi iBhayibhili limsize athole injongo ekuphileni. Ummemezeli lowo lomkakhe baqalisa ukufunda laye besebenzisa ibhuku elithi Okufundiswa liBhayibhili, kanye lebhuku elithi Lasting Peace and Happiness—How to Find Them. Kulokuthi bafunde isahluko 2 sebhuku lelo, baxoxa ngengxenye esebhukwaneni ethi: “A Guidebook for the Blessing of All Mankind.” Ngemva kokuxoxa ngezindima eziyisithupha zokuqala kuleyo ngxenye, owesifazana lo wamangaliswa yikubona ukuthi iBhayibhili kalifanani lamabhuku abhalwe zinkolo. Ngemva kokuxoxa ngeziphrofetho esezigcwalisekile, wathi: “Akula elinye ibhuku engilaziyo elileqiniso njengeBhayibhili!”
◼ EJapan: Lanxa umninimuzi watshela ummemezeli othile ukuthi kakholwa kuNkulunkulu, ummemezeli lo waqhubeka emvakatshela okwesikhatshana, exoxa laye ngezihloko eziku-Awake! ezithi “Was It Designed?” Ngokuhamba kwesikhathi, indoda le yantshintsha umbono wayo futhi yaqalisa ukuvuma ukuthi kungaba loMdali. Khathesi isikholwa ukuthi uNkulunkulu ukhona, futhi ummemezeli usefunda layo ibhukwana elithi Izindaba Ezinhle Ezivela kuNkulunkulu!
◼ ECanada: Omunye udade wanika owesifazana othile amamagazini ayesanda kuphuma. Owesifazana lo wayesuka endlini yakhe esiya emoteni yakhe. Lapho udade owayemnikile ephindela mbayimbayi, owesifazana lo wamtshela ukuthi kafuni ukufunda iBhayibhili lokuthi kakholwa kuNkulunkulu. Udade lo kazange adele kodwa wamphathela ibhukwana elithi A Satisfying Life—How to Attain It. Lapho udade ethola owesifazana lo ekhona endlini, wamtshela ukuthi lanxa wayesazi ukuthi kakholwa kuNkulunkulu, ubecabanga ngaye ngenxa yokuthi wayesazi ukuthi wondla yedwa abantwana. Wavula ibhukwana lelo kukhasi 4 indima 6, ekhuluma ngalapho esingathola khona iseluleko esincedayo. Ngemva kwalokho, wakhuthaza owesifazana lo ukuthi abale amacebo asesifundweni 2, aphathelane lendlela yokukhulisa abantwana. Owesifazana lo wakujabulela ukuthatha lelobhukwana.