Ukuthuthukisa Indlela Esitshumayela Ngayo—Ukuqalisa Ingxoxo Ukuze Senze Ukutshumayela Okungahlelwanga
Kungani Kuqakathekile? Sandise ukuthi nxa sitshumayela endlini ngendlu singatholi muntu ezindlini ezinengi. Kodwa abantu labo singababona ngesikhathi sekhefu emsebenzini kumbe esikolo, ezimoteni zomphakathi, esibhedlela, kumbe kwezinye izindawo. UJehova ufuna ukuthi abantu bonke bathole ithuba lokuzwa umlayezo woMbuso. (1 Tim. 2:3, 4) Izikhathi ezinengi kumele kube yithi esiqala ingxoxo ukuze senelise ukutshumayela.
Indlela Yokukwenza:
• Hlola isimo. Umuntu lowo ukhanya elomusa futhi efuna ukuxoxa yini? Isimo siyavuma ukuthi lixoxe likhululekile yini? Abanye abamemezeli baqala ngokukhangela umuntu ebusweni besebebobotheka, nxa umuntu lowo angabobotheka bayaqala ukuxoxa laye.
• Yenza umthandazo omfitshane enhliziyweni nxa ungelasibindi sokukhuluma.—Neh. 2:4; ImiSeb. 4:29.
• Mhlawumbe ungaqalisa ngokumbingelela. Ngesikhathi uJesu ekhuluma lowesifazana waseSamariya, kazange aqalise ingxoxo ngokumtshela ngoMbuso. (Joh. 4:7) Kwezinye izikhathi ungaqalisa ingxoxo ngokuthi: “Uyazi abantwabakho bayahlonipha njani.” Ukubuza umbuzo kungenye indlela ongaqalisa ngayo ingxoxo: “Uzibonile yini indaba zayizolo?”
• Nxa seliqalisile ukuxoxa, zama ukuthola ithuba lokumtshela izindaba ezinhle kodwa ungajahi. Yekela ingxoxo iziqhubekele kuhle. Mhlawumbe ungatsho okuthile okungamenza abuze umbuzo kumbe afune ukwazi okunengi. Ngokwesibonelo, nxa ingxoxo yenu iphathelane lezindaba zemuli, ungathi, “Ngithole amacebo athile amahle aphathelane lokukhulisa abantwana.” Nxa lixoxa ngokuthile okusemaphephandabeni, ungathi, “Uyazi emalangeni ngike ngabala izindaba ezinhle ezingafanani lezidanisayo esizizwa mihla yonke.” Ungadani nxa ingxoxo ingaphela ungakamtsheli izindaba ezinhle.
• Thwala amaphetshana loba amanye amabhuku ongawanika umuntu ofuna ukwazi okunengi.
Zama Ukwenza Okulandelayo Kulinyanga:
• Zama ukuthi iviki ngayinye uxoxe lothile ngenjongo yokumtshela izindaba ezinhle.