Indlela Yokutshumayela Sisebenzisa Izinqola Kanye Lamatafula Amabhuku

Ukutshumayela sisebenzisa izinqola kumbe amatafula sokuncede abantu abanengi ukuthi bafunde iqiniso. (Joh. 6:44) Yikho abadala bakhuthazwa ukuthi benze izinhlelo zokuthi ibandla liyetshumayela ngalindlela ezindaweni ezilabantu abanengi. Kakudingeki ukuthi kucelwe imvumo kuziphathimandla ukuze kwenziwe ukutshumayela lokhu ngenxa yokuthi izinqola zingantshintshwa ziyefakwa kweyinye indawo. Ngobani abangasetshenziswa enkonzweni le? Kungasetshenziswa abamemezeli abalokwahlulela okuhle, abagqoka futhi bazilungise ngendlela elesithunzi njalo abenelisa ukuxoxisana labantu. Ngaphansi kulotshwe lokho okumele abamemezeli bakwenze lalokho okungamelanga bakwenze nxa besenkonzweni le.

Okumele Ukwenze:

Kufanele ube lomusa njalo uhlale ukulungele ukusiza abadlulayo. Abanye abamemezeli bayabobotheka nxa bebona abantu njalo bababingelele ngomusa. Nxa umuntu odlulayo engakhangela amabhuku eliwafake enqoleni ungathi, “Woza uzothatha ibhuku nxa likhona olifunayo.”
Mela eduze kwenqola. Abanye abamemezeli bathi nxa bangama eduze kwenqola kuba lempumela emihle. Kodwa kwezinye izindawo abamemezeli bathi ukumela eduze kwenqola kubangela ukuthi abantu badonde ukuzocela amabhuku yikho besima bucwadlana besekusithi kungafika umuntu ofuna ibhuku bayekhuluma laye. Nxa umuntu angasondela eduze kwenqola efuna amabhuku, zama ukuqalisa ingxoxo laye mhlawumbe ngokumbuza ukuthi: “Sowake wazibuza umbuzo lo yini?”
Sebenzisa iBhayibhili zonke izikhathi.
Tshela bonke ngohlelo lokufunda iBhayibhili ikakhulu labo abathatha amabhuku afanana lelithi Okufundiswa liBhayibhili. Cela ukubatshengisa ividiyo ethi Kungani Kumele Ulifunde IBhayibhili?
Nxa kulabantu abalesifiso sokufunda iBhayibhili, cela izinombolo zabo zocingo kumbe ikheli. Nxa umuntu lowo engahlali ensimini yebandla lenu, gcwalisa ifomu elithi Sicela Uyebona (S-43) ubusulinika unobhala webandla lenu.