Ungenzani Ukuze Ukholise Ukutshumayela?

1. Kuyini okwenza kube nzima kwabanye ukuthi benze umsebenzi wokutshumayela? (Khangela lomfanekiso.)

OKWENZA sitshumayele yikuthi siyamthanda uBaba wethu osezulwini lokuthi sifuna ukuncedisa abantu ukuthi babe mazi. Abamemezeli abanengi bayakukholisa ukutshumayela kodwa abanye abakukholisi kangako. Kungani? Abanye balenhloni futhi babona angani abenelisi ukufundisa. Abanye kubathwalisa nzima ukuhamba beqoqoda ezindlini zabantu. Abanye besaba ukuthi bazahlangana labantu abangafuni ukutshunyayezwa besebebaphatha kubi. Kanti njalo abanye besaba ukuthi bazacaphula abantu. Lanxa bemthanda kakhulu uJehova, abafowethu labodadewethu laba kubathwalisa nzima ukukhuluma izindaba ezinhle labantu abangabaziyo. Kodwa bayakwazi ukuthi umsebenzi lo uqakatheke kakhulu, yikho behlala bewenza. Kufanele ukuthi uJehova uyathokoza kakhulu ngalokho abakwenzayo.

2. Kungani kungamelanga uphele amandla nxa ungakukholisi ukutshumayela?

² Kwezinye izikhathi ukuthola kunzima yini ukutshumayela? Nxa kunjalo ungapheli amandla. Nxa ungazithembi, ubona angathi ngeke wenelise ukutshumayela kuhle, lokho kungabe kusitsho ukuthi uthobekile lokuthi awufuni kuzidonsela amehlo abantu. Kutshengisa lokuthi awukuthandi ukuphikisana labantu. Phela akulamuntu ofuna ukuphathwa kubi ikakhulu nxa esenzela abanye okuhle. UYihlo osezulwini uyabazi bonke ubunzima ohlangana labo njalo uyafuna ukukuncedisa. (Isaya. 41:13) Esihlokweni lesi sizaxoxa ngezinto ezinhlanu ezizakunceda ukuthi ulwisane lobunzima lobu njalo ukukholise ukutshumayela.

VUMA UKUQINISWA LILIZWI LIKANKULUNKULU

3. Kuyini okwanceda umphrofethi uJeremiya ukuthi aqhubeke etshumayela?

³ Kusukela kudala zinengi izinceku zikaNkulunkulu ezaqiniswa ngamazwi akhe ukuthi zenze imisebenzi enzima ezaziyiphiwe. Ngokwesibonelo umphrofethi uJeremiya wayesesaba kakhulu ngesikhathi uJehova emthuma ukuthi ayetshumayela. Wathi: “Angenelisi ukukhuluma ngoba ngisesengumfana nje.” (Jer. 1:6) Kuyini okwamnceda ukuthi acine eselesibindi? Waqiniswa ngamazwi kaNkulunkulu. UJeremiya wathi ekhuluma ngeLizwi likaNkulunkulu wathi: “Laba njengomlilo ovuthayo, kwaba angathi kulomlilo ovalelwe emathanjeni ami. Ngasengidiniwe ngokulivalela ngaphakathi.” (Jer. 20:​8, 9) Lanxa abantu ababetshunyayezwa nguJeremiya babengafuni ukulalela, amazwi okwakumele abatshele wona amnika amandla okuthi aqhubeke etshumayela.

4. Ukubala iLizwi likaNkulunkulu lokucabangisisa ngalo kuzasinceda njani? (UKholose 1:​9, 10)

⁴ Amazwi kaNkulunkulu abhalwe eBhayibhilini ayawaqinisa amaKhristu lamuhla. Ngesikhathi umphostoli uPhawuli ebhalela ibandla laseKholose incwadi, wabatshela ukuthi ukuqhubeka befunda babe lolwazi oluqondileyo kwakuzabanceda ukuthi ‘baziphathe ngendlela efaneleyo phambi kukaJehova’ njalo baqhubeke ‘bethela izithelo kuyo yonke imisebenzi emihle.’ (Bala uKholose 1:​9, 10.) Imisebenzi emihle okukhulunywa ngayo igoqela lokutshumayela izindaba ezinhle. Yikho nxa singabala iBhayibhili sicabangisise ngesikubalayo, ukholo lwethu luzaqina njalo sizakuqakathekisa kakhulu ukutshela abanye izindaba ezinhle ezimayelana loMbuso.

5. Kuyini okumele sikwenze ukuze sithole imicijo eminengi nxa sitaditsha iBhayibhili?

⁵ Nxa sifuna ukuthola okunengi eLizwini likaNkulunkulu kumele sizinike isikhathi sokucabangisisa, singabali sigijima. Nxa ungahlangana levesi okukhanya kunzima ukuyizwisisa ungayidluli masinyane. Sebenzisa iBhuku Lokuchwayisisa LaboFakazi bakaJehova kumbe i-Watch Tower Publications Index ukuze ubone ukuthi ivesi leyo ichasiswa njani. Ukutaditsha ungajahanga kuzakunceda ungathandabuzi ukuthi iLizwi likaNkulunkulu liliqiniso. (1 Thes. 5:21) Nxa ukukholwa lokho okubala eBhayibhilini uzakukholisa ukuxoxela abanye ngalokho osukufundile.

LUNGISELELA KUHLE UNGAKAYI EKUTSHUMAYELENI

6. Kungani kumele silungiselele kuhle singakayi ekutshumayeleni?

⁶ Nxa ungalungiselela kuhle ungakayi ekutshumayeleni awusoze ukhathazeke kakhulu nxa usukhuluma labantu. UJesu wancedisa abafundi bakhe ukuthi balungiselele engakabathumi ukuthi baye ekutshumayeleni. (Luk. 10:​1-11) Abafundi bakusebenzisa lokho uJesu ayebafundisa khona, yikho bawenza kuhle umsebenzi wabo futhi lokhu kwenza bathokoza.—Luk. 10:17.

7. Singakulungiselela njani ukutshumayela? (Khangela lomfanekiso.)

⁷ Singakulungiselela njani ukutshumayela? Kumele sicabange ngokuthi sifuna ukuxoxa ngani labantu, besesibona ukuthi singakubeka njani ngendlela ecacileyo. Okunye okungasinceda yikucabanga ngezinto ezitshiyeneyo abantu abangazikhuluma nxa sisekutshumayeleni besesilungiselela ukuthi thina singabaphendula njani. Nxa sitshumayeza abantu kumele sizame ukukhululeka, sibobotheke njalo sibe lomusa.

8. AmaKhristu afanana njani lembiza zebumba umphostoli uPhawuli akhuluma ngazo?

⁸ Umphostoli uPhawuli wawucacisa kuhle umsebenzi wokutshumayela lapho esithi: “Silegugu leli embizeni zebumba.” (2 Khor. 4:7) Yiliphi igugu lelo? Ngumsebenzi wokutshumayela ngoMbuso ozenza abantu basindiswe. (2 Khor. 4:1) Imbiza zebumba zona ziyini? Zimela izinceku zikaNkulunkulu ezitshela abanye izindaba ezinhle. Ngesikhathi sikaPhawuli abantu ababethengisa babesebenzisa imbiza zebumba nxa bethwala izinto eziqakathekileyo njengokudla lewayini kanye lemali. Lathi uJehova usinike umsebenzi oqakathekileyo wokutshumayela izindaba ezinhle. Singaba lawo amandla okuqhubeka sitshela abanye izindaba ezinhle ngenxa yokuthi uJehova uyasincedisa.

THANDAZA UKUZE UBE LESIBINDI

9. Kuyini okungasinceda ukuthi singabesabi abantu? (Khangela lomfanekiso.)

⁹ Kwezinye izikhathi singesaba ukuthi abantu bazasiphikisa kumbe ukuthi abasoze basilalele. Kuyini okungasinceda ukuthi singesabi? Cabanga ngokuthi abaphostoli benzani ngesikhathi betshelwa ukuthi bangatshumayeli. Abazange besabe kodwa bathandaza kuJehova becela ukuthi abancedise ukuze ‘baqhubeke bekhuluma iLizwi [lakhe] ngesibindi esikhulu.’ UJehova wahle wawuphendula umthandazo wabo. (Imiseb. 4:​18, 29, 31) Nxa lathi siyake sesabe abantu, kumele sikhuleke kuJehova sicele ukuthi asincedise. Cela uJehova akuncedise ukuthi ubathande kakhulu abantu ukuze ungesabi ukubatshela izindaba ezinhle.

10. UJehova usincedisa njani ukuthi sifakaze ngaye? (U-Isaya 43:​10-12)

¹⁰ UJehova usikhethile ukuthi sibe ngoFakazi bakhe njalo uthembisa ukuthi uzasincedisa ukuthi sibe lesibindi. (Bala u-Isaya 43:​10-12.) Nanzi ezinye indlela ezine asincedisa ngazo: Okokuqala, nxa sitshumayela izindaba ezinhle uJesu uyabe elathi. (Mat. 28:​18-20) Okwesibili, uJehova usincedisa esebenzisa ingilosi zakhe. (Isam. 14:6) Okwesithathu, usipha umoya wakhe ongcwele osincedisa ukuthi sikhumbule izinto esizifundayo. (Joh. 14:​25, 26) Okwesine, usinika abafowethu labodadewethu esitshumayela labo. Silakho konke esikudingayo ukuze sibe lesibindi ngoba uJehova uyasincedisa futhi labafowethu labodadewethu abalothando bayasisekela.

VUMELANA LEZIMO FUTHI UNGALAHLI ITHEMBA

11. Kuyini ongakwenza ukuze uthole abantu abanengi ekutshumayeleni? (Khangela lomfanekiso.)

¹¹ Kuyakudanisa yini ukuthola abantu bengekho nxa usekutshumayeleni? Nxa kunjalo, zibuze imibuzo le, ‘Bangabe bengaphi abantu ngalesisikhathi?’ (Imiseb. 16:13) ‘Bangabe besemsebenzini yini kumbe beye ezitolo?’ Ungazama yini ukutshumayela emgwaqweni lapho ongathola khona abantu abanengi? Umfowethu okuthiwa nguJoshua uyakwenza lokho, uthi, “Ngithola amathuba amanengi okutshumayela ezitolo lakwezinye indawo lapho okulabantu abanengi khona.” Yena lomkakhe uBridget bajayele ukuthola abantu abanengi bekhona ezindlini zabo nxa bangabavakatshela ntambama kumbe ngeSonto emini.—Efe. 5:​15, 16.

12. Nika isibonelo esitshengisa okungasinceda sibekwazi ukuthi abantu bakholwani lokuthi kuyini okubahluphayo.

¹² Nxa umuntu omtshumayezayo ekhanya angathi kafuni ukulalela, zama ukudinga ukuthi kuyini akukholwayo kumbe okumkhathazayo. Nxa uJoshua loBridget betshumayeza abantu, bajayele ukuqala ngokubuza umbuzo otholakala emaphetshaneni ethu. Ngokwesibonelo nxa besebenzisa iphetshana elithi Uyini Umbono Wakho NgeBhayibhili? bajayele ukuthi, “Abanye abantu bathi iBhayibhili libhuku elivela kuNkulunkulu kodwa abanye abakukholwa lokho. Wena uthini?” Lokhu kujayele ukubanceda ukuthi baqalise ingxoxo.

13. Kungani sisithi siyabe siphumelele enkonzweni lanxa abantu bengasilaleli? (IZaga 27:11)

¹³ Ukuphumelela kwethu enkonzweni akuyi ngokuthi abantu bayasilalela yini kumbe abasilaleli. Kungani sisitsho njalo? Ngenxa yokuthi nxa sitshumayelile siyabe senze lokho uJehova loJesu abafuna sikwenze. (Imiseb. 10:42) Lanxa singaswela umuntu wokuxoxa laye kumbe siphikiswe, singathokoza ngoba siyabe sijabulise uBaba wethu osezulwini.—Bala iZaga 27:11.

14. Kungani kumele sithokoze nxa omunye ummemezeli angathola umuntu ofuna ukufunda iBhayibhili?

¹⁴ Nxa omunye ummemezeli angathola umuntu ofuna ukufunda iBhayibhili, kumele sithokoze laye. Eyinye iNqabayokulinda yafanisa umsebenzi esiwenzayo lokudinga umntwana olahlekileyo. Abantu abanengi bangaphuma ijumo besiyamdinga. Nxa engatholakala ayisikho ukuthi lowomuntu omtholileyo nguye yedwa othokozayo kodwa abantu bonke bayathokoza. Ngendlela efananayo sonke ebandleni sisebenza ndawonye emsebenzini wokudinga abafundi. Kuyabe kumele sisebenze sonke ukuze siqede insimu. Kanti njalo sonke siyathokoza nxa umuntu ofunda iBhayibhili angaqalisa ukuza emihlanganweni yethu.

CABANGA NGENDLELA OMTHANDA NGAYO UJEHOVA KANYE LABOMAKHELWANE BAKHO

15. Amazwi akuMathewu 22:​37-39 angasinceda njani ukuthi sikhuthalele ukutshumayela? (Khangela lomfanekiso )

¹⁵ Okunye okungasinceda ukuthi sikhuthale emsebenzini wokutshumayela yikucabanga ngendlela esimthanda ngayo uJehova kanye labomakhelwane bethu. (Bala uMathewu 22:​37-39.) Akucabange ukuthi uJehova uthokoza njani nxa esibona sisenza umsebenzi wokutshumayela lokuthi abantu bathokoza njani nxa beqalisa ukufunda iBhayibhili. Cabanga langokuthi nxa abantu bangasilalela besebekhetha ukukhonza uJehova bazasindiswa—Joh. 6:40; 1 Thim. 4:16.

16. Kuyini esingakwenza ukuze sikholise ukutshumayela lanxa singenelisi ukuphuma endlini? Nika izibonelo.

¹⁶ Awenelisi yini ukuphuma endlini ngenxa yezizatho ezithile? Nxa kunjalo cabanga ngongakwenza ukuze utshengise ukuthi uyamthanda uJehova kanye labomakhelwane bakho. Ngesikhathi somkhuhlane weCOVID-19 uSamuel loDania babengenelisi ukuphuma endlini yabo. Ngesikhathi leso esasinzima babehlala betshumayela besebenzisa ifoni, bebhala izincwadi njalo babeqhuba lezifundo zeBhayibhili besebenzisa ezempucuko. USamuel wayetshumayeza abantu ayehlangana labo eklinika lapho ayeselatshwa khona i-cancer. Uthi: “Nxa sisebunzimeni singakhathazeka kakhulu sizizwe sidiniwe futhi kube nzima ukuthi siqhubeke siqinisela. Kodwa nxa siqhubeka sitshumayela sizathokoza.” UDania laye wawa futhi waqeda inyanga ezintathu egula esehluleka lokuvuka. Ngemva kwalokho wasebenzisa i-wheelchair okwenyanga eziyisithupha. Uthi: “Ngangizama ukwenza konke engangingakwenza kusiya ngezimo zami. Ngangitshumayeza unesi owayengincedisa njalo ngangitshumayeza lalabo ababesiphathela izinto endlini. Kanti njalo ngangixoxa ngefoni lomunye owesifazana owayesebenzela ikhampani ethengisa izinto ezisetshenziswa ekwelapheni.” Lanxa uSamuel loDania babengasenelisi ukwenza okunengi enkonzweni njengakuqala, benza konke ababesenelisa ukukwenza futhi lokho kwabathokozisa.

17. Kuyini okumele ukwenze ukuze amacebo esiwafunde esihlokweni lesi akuncede?

¹⁷ Yenza konke okusemandleni akho ukuthi usebenzise wonke amacebo esiwafunde esihlokweni lesi. Icebo ngalinye lifanana lezinto ezisetshenziswayo nxa upheka ukudla. Nxa ungahlanganisa zonke izinto ezifunekayo, ukudla kwakho kuyaphuma kumnandi. Ngakho nxa singasebenzisa wonke amacebo esiwafundileyo sizenelisa ukunqoba loba yini engasibuyisela emuva besesikukholisa ukutshumayela.