Kwamukele Ukuthi Kulezinto Ongazaziyo

1. UJehova wasidala njani futhi kungani wasidala njalo?

UJEHOVA wasidala ngendlela emangalisayo. Phela siyenelisa ukucabanga, ukufunda izinto ezintsha sizizwisise besesisebenzisa lokho esiyabe sikufundile. Yindaba uJehova wasidala ngalindlela? Ngenxa yokuthi ‘ufuna sithole ulwazi olumayelana laye’ njalo sizenzele izinqumo esikwaziyo ukuthi zizasinceda.—Zaga. 2:​1-5; Rom. 12:1.

2. (a) Kuyini okumele sikukhumbule? (UJobe 37:​23, 24) (Khangela lomfanekiso.) (b) Kusinceda ngani ukuba ngabantu abathobekileyo?

² Lanxa uJehova wasidala sisenelisa ukufunda izinto ezintsha, kunengi kakhulu esingakwaziyo. (Bala uJobe 37:​23, 24.) Kulemibuzo eminengi uJehova ayibuza uJobe eyamenza wazibonela ukuthi kulutshwane kakhulu ayekwazi. Khonokho kwamnceda ukuthi athobeke futhi alungisise indlela acabanga ngayo. (Jobe. 42:​3-6) Lathi kumele sithobeke sikhumbule ukuthi ayisikho konke esikwaziyo lokuthi kuzahlala kulezinto esingazaziyo. Nxa singabantu abathobekileyo sizakhumbula ukuthi khonokho uJehova asitshele khona kwenele futhi kuzasinceda sikhethe kuhle.—Zaga. 2:6.

3. Sizaxoxa ngani esihlokweni lesi?

³ Esihlokweni lesi sizaphendula imibuzo elandelayo: (1) Yiziphi izinto esingazaziyo? (2) Yibuphi ubunzima obungaba khona ngokungazazi lezozinto? (3) Kusinceda ngani ukungazi ezinye izinto? Izimpendulo zemibuzo le zizasinceda ukuthi simthembe ngenhliziyo yonke uJehova ‘lowo okwazi konke.’ UJehova uhlala esitshela khona kanye okumele sibekwazi.—Jobe. 37:16.

ASIKWAZI UKUTHI UKUPHELA KUZAFIKA NINI

4. Kuyini esingakwaziyo? (UMathewu 24:36)

⁴ Bala uMathewu 24:36. Asikwazi ukuthi ukuphela komhlaba lo omubi kuzafika nini. Ngitsho langesikhathi uJesu esasemhlabeni, wayengalazi ‘lelolanga lalelohora.’a UJesu wacacisela abaphostoli bakhe ukuthi uJehova wenza izinto “ngokuthanda kwakhe”. (Imiseb. 1:​6, 7) UJehova uselibekile ilanga lesikhathi azatshabalalisa ngaso umhlaba lo omdala kodwa thina asikwazi ukuthi kuzabe kumhlaka bani.

5. Ukungazi ukuthi usuku lukaJehova luzafika nini kungabangela buphi ubunzima?

⁵ Amazwi akhulunywa nguJesu atshengisa ukuthi asisoze sikwazi ukuthi kumele silinde okwesikhathi esinganani, umhlaba kaSathane ungakatshabalaliswa. Ukungalwazi lolosuku kungasidanisa kuze kusiqede amandla okuqhubeka sibekezela, ikakhulu nxa sesileminyaka eminengi silindele usuku lukaJehova. Kungaba nzima lokuthi siqhubeke siqinisela nxa izihlobo kumbe abangane besihleka ngokuthi silindele ilanga esingalaziyo. (2 Phet. 3:​3, 4) Aluba uJehova ubesitshelile ukuthi usuku lwakhe luzafika mhlaka bani, bekuzaba lula ukuthi sibekezele futhi siqhubeke siqinisela nxa abanye abantu besihleka.

6. Kusinceda ngani ukungabi kwazi ukuthi usuku lukaJehova luzafika nini?

⁶ Kusinceda ngani ukungabi kwazi ukuthi usuku lukaJehova luzafika nini? Kusinika ithuba lokutshengisa ukuthi siyamthanda uBaba wethu lokuthi siyamthemba. Inhloso yethu ngeyokukhonza uJehova kuze kube nini lanini, hatshi ukumkhonza okwesikhatshana. Asifuni kukhathazeka kakhulu ngokuthi “usuku lukaJehova” luzafika nini kodwa sifuna ukucabanga ngokuthi kuzakwenzakalani ngemva kwalolosuku. Khonokho kuzasinceda ukuthi sisondele kakhulu kuJehova futhi sizimisele ukwenza izinto ezimthokozisayo.—2 Phet. 3:​11, 12.

7. Kuyini esikwaziyo?

⁷ Thina okumele sizikhathaze ngakho yilokho esikwaziyo. Siyakwazi ukuthi insuku zokucina zaqalisa ngo-1914. Zinengi iziphrofetho eziseBhayibhilini ezisinika ubufakazi balokho. Lokhu kutshengisa ukuthi “usuku olukhulu lukaJehova seluseduze.” (Zef. 1:14) Okunye esikwaziyo yikuthi uJehova ufuna sitshumayele ‘izindaba ezinhle zoMbuso’ emhlabeni wonke. (Mat. 24:14) Izindaba ezinhle zoMbuso zitshunyayelwa emazweni angu-240 ngezindimi ezedlula 1 000. Sikhuthele emsebenzini wokutshumayela lanxa singasilazi ‘ilanga loba ihora.’

ASIKWAZI UKUTHI UJEHOVA UZASINCEDISA NJANI

8. Kutshiwoni nxa kukhulunywa ‘ngemisebenzi kaNkulunkulu weqiniso?’ (UmTshumayeli 11:5)

⁸ Asisoze siyazi yonke ‘imisebenzi kaNkulunkulu weqiniso.’ (Bala umTshumayeli 11:5.) Lapha kukhulunywa ngaloba yini uJehova angabangela ukuthi yenzakale kumbe angayivumela ukuthi yenzakale ukuze agcwalise inhloso yakhe loba intando yakhe. Angeke sibekwazi ukuthi kungani uJehova evumele ulutho oluthile ukuthi lwenzakale kumbe sibeyazi yona kanye indlela azayisebenzisa ukuze asincedise. (Hubo. 37:5) IBhayibhili lifanisa ukungazi yonke imsebenzi kaNkulunkulu weqiniso lendlela esingeke sizwisise ngayo indlela umntwana akhula ngayo esiswini sikanina. Indlela le ilokhe ibaphica abezesayensi lalamuhla.

9. Kuyini esingacina sikucabanga nxa singakwazi ukuthi uJehova uzasincedisa njani?

⁹ Ukungazi ukuthi uJehova uzasincedisa njani kungenza sithandabuze kumbe sithikaze ukwenza ezinye izinqumo. Singesaba ukudela ezinye izinto ukuze singezelele inkonzo yethu kumbe sesabe lokuthuthela endaweni elabamemezeli abalutshwana. Nxa kuyikuthi kulomsebenzi wenkonzo esifisa ukuwenza kodwa singawuphiwa singazitshela ukuthi lokho esikwenzayo kakumthokozisi uJehova. Kumbe nxa kuyikuthi sikhuthele ekutshumayeleni kodwa kungela loyedwa esifunda laye iBhayibhili singacina sibona angani uJehova kathokozi ngathi.

10. Kusinceda ngani ukungazi ukuthi uJehova uzasincedisa njani?

¹⁰ Ukungazi ukuthi uJehova uzasincedisa njani kuyasinceda ukuthi sithobeke. Kumele sihlale sikhumbula ukuthi imicabango lezindlela zikaJehova ziphakeme kulezethu. (Isaya. 55:​8, 9) Kuphinda kusincede ukuthi simthembe ngenhliziyo yonke uJehova. Nxa singaphumelela ekutshumayeleni kumbe kweminye imsebenzi yenkonzo kumele sihlale sikhumbula ukuthi nguJehova okumele adunyiswe. (Hubo. 127:1; 1 Khor. 3:7) Lanxa ezinye izinto zingeke zihambe ngendlela esifisa ngayo kumbe esiyikhangeleleyo, akumelanga sikhohlwe ukuthi uJehova uyakwazi konke okwenzakalayo. (Isaya. 26:12) Kumele senze lokho esikwenelisayo besesitshiyela okunye kuJehova. Lanxa uJehova engeke asincedise ngendlela eyisimangaliso, asikuthandabuzi ngitsho lakancane ukuthi uzahlala esikhokhela.—Imiseb. 16:​6-10.

11. Kuyini okunye esikwaziyo?

¹¹ Okunye esikwaziyo ngoNkulunkulu wethu uJehova yikuthi uyasithanda, wahlulela kuhle njalo uhlakaniphile. Siyakwazi ukuthi uyakuqakathekisa konke esimenzela khona lesikwenzela abafowethu labodadewethu. Siyakwazi lokuthi uzahlala ebabusisa bonke abamkhonza bethembekile.—Heb. 11:6.

IKUSASA ALAZIWA

12. Kuyini esingelaqiniso lakho? (UJakhobe 4:​13, 14)

¹² Bala uJakhobe 4:​13, 14. Iqiniso esingeke silibalekele yikuthi asikwazi ukuthi elakusasa lisiphatheleni. Phela emhlabeni lo obuswa nguSathane singafikelwa ‘yisikhathi lezehlakalo ezisijuma silibele.’ (Umtshu. 9:11) Angeke sibeleqiniso lokuthi sizaphumelela ukwenza esikuhlelileyo kumbe ukuthi sizakuqeda esiyabe sikuqalisile.

13. Kuyini okungasidanisa?

¹³ Ukungazi ukuthi elakusasa lizabe linjani kungasithwalisa nzima kusenze sikhathazeke besesidana. Impilo yethu ingaphonguvuka itshintshile kumbe sehlelwe ngobunye ubunzima esiyabe singabukhangelelanga. Kanti njalo, nxa kulento esikhangelele ukuthi yenzakale kodwa ingenzakali singaphela amandla.—Zaga. 13:12.

14. Kuyini okuzasenza sithokoze? (Khangela lemifanekiso.)

¹⁴ Ukuqinisela nxa sisebunzimeni kutshengisa ukuthi siyamthanda uJehova. Esikufunda eBhayibhilini kutshengisa ukuthi uJehova kasoze asivikele kubo bonke ubunzima esizahlangana labo lokuthi kahlelanga ukuthi impilo yomuntu ngamunye izahamba njani. UJehova uyakwazi ukuthi siyenelisa ukuthokoza lanxa singakwazi ukuthi impilo yethu izabe injani kwelakusasa. Okusenza sithokoze empilweni yikuvuma ukukhokhelwa nguJehova lokumlalela kukho konke. (Jer. 10:23) Nxa singavumela uJehova ukuthi asincedise ekwenzeni izinqumo kuyabe kungani sithi: “Nxa kuyikuthanda kukaJehova sizaphila senze lokhu loba lokhuya.”—Jak. 4:15.

15. Kuyini esikwaziyo ngekusasa?

¹⁵ Lanxa singakwazi ukuthi usuku ngalunye luzabe lusiphatheleni, esikwaziyo yikuthi uJehova uthembisa ukusinika ukuphila okungapheliyo, kungelani lokuthi kusezulwini kumbe lapha emhlabeni. Siyakwazi ukuthi uNkulunkulu wethu ngeke aqambe amanga futhi akula ngitsho lento eyodwa engamvimba ukuthi agcwalise lokho akuthembisileyo. (Tit. 1:2) NguJehova kuphela ongabika lokho ‘okuzakwenzakala ekucineni’ futhi ‘amemezele izinto ezingakenzakali.’ (Isaya. 46:10) Sikwazi mhlophe ukuthi akulalutho olungenza ukuthi uJehova angasithandi. (Rom. 8:​35-39) Uzasinika ukuhlakanipha, asiduduze njalo asinike lamandla okuthi senelise ukubekezelela loba yibuphi ubunzima obungasehlela. Asikuthandabuzi lakancane ukuthi uJehova uzahlala esincedisa futhi esibusisa.—Jer. 17:​7, 8.

NGEKE UYIZWISISE INDLELA UJEHOVA AKWAZI NGAYO

16. Kuyini uJehova akwaziyo ngawe futhi lokho kwenza uzizwe njani? (IHubo 139:​1-6)

¹⁶ Bala iHubo 139:​1-6. UMdali wethu uyakwazi ukuthi wasidala njani, ukuthi sicabangani lokuthi sizizwa njani ngezinto ezitshiyeneyo. UNkulunkulu wethu uzahlala esithanda. Uyakwazi konke esikukhulumayo lezinto ezijulileyo ezisenhliziyweni zethu. Uyakubona konke esikwenzayo lokuthi kungani sikwenza. INkosi uDavida yathi uJehova uhlala ezimisele ukusincedisa futhi ulamandla okwenza njalo. Ukwazi ukuthi uSomandla, uMdali wezinto zonke, ulendaba lathi kusitshiya sitshe amathe! Lathi sizizwa ngendlela uDavida ayezizwa ngayo aze athi: “Indlela ongazi ngayo ijulile, angenelisi ukuyizwisisa.”—Hubo. 139:​6, amabala angaphansi.

17. Kuyini okungenza kube nzima ukuthi sikholwe ukuthi uJehova uyasazi?

¹⁷ Abanye abantu kubathwalisa nzima ukuzwisisa ukuthi uJehova nguBaba obathandayo. Lokhu kungabangelwa yizinto ezitshiyeneyo ezinjengokuthi bakhuliswa njani, amasiko abo kumbe izinto ababezikholwa bengakafundi ngoNkulunkulu. Abanye bazitshela ukuthi uJehova kabathandi ngenxa yamaphutha abawenza kudala. UDavida laye wake wacabanga njalo. (Hubo. 38:​18, 21) Omunye umuntu uyabe ezama ukutshintsha indlela aphila ngayo ukuze athokozise uNkulunkulu kodwa uyabe ezibuza ukuthi, ‘Nxa kuyikuthi uNkulunkulu uyangizwisisa sibili, kungani efuna ngitshintshe indlela engiphila ngayo?’

18. Ukukholwa ukuthi uJehova usazi ngcono kuzasinceda njani? (Khangela lomfanekiso.)

¹⁸ Kumele siqiniseke ukuthi uJehova usazi ngcono ukwedlula indlela esizazi ngayo. Kunengi akubonayo kithi thina esingeke sikubone. UJehova uyasithanda, uyakwazi esiyikho ngaphakathi futhi uyabona ukuthi siyafisa ukuhlala simthokozisa lanxa ngezinye izikhathi sisenza amaphutha. (Rom. 7:15) Nxa singakhumbula ukuthi uJehova uhlala ebona okuhle kithi, sizazimisela ukumkhonza sithembekile njalo sithokoza.

19. Kuyini esikwaziyo ngoJehova?

¹⁹ Siyakwazi futhi asikuthandabuzi ukuthi uJehova uNkulunkulu wethu uluthando. (1 Joh. 4:8) Imithetho asinika yona lakho konke asitshela khona kuhlala kusinceda. Siyakwazi ukuthi uJehova ufuna siphile kuze kube phakade. Yikho wathumela indodana yakhe uJesu ukuthi izosihlawulela ukuze sithethelelwe izono zethu. (Rom. 7:​24, 25) Okunye esikwaziyo yikuthi “uNkulunkulu mkhulu kulezinhliziyo zethu njalo wazi izinto zonke.” (1 Joh. 3:​19, 20) UJehova wazi konke ngathi futhi uyasithemba ukuthi sizahlala sisenza intando yakhe.

20. Kuyini okuzasinceda ukuthi singakhathazeki kakhulu?

²⁰ UJehova kasifihlelanga loba yini okumele siyazi. Yikho akumelanga sitshone sizikhathaza ngalokho esingakwaziyo kodwa kumele sicabangisise ngalokho okuqakathekileyo. Nxa singenza njalo siyabe sitshengisa ukuthi sithembele kuJehova uNkulunkulu “okwazi konke.” (Jobe. 36:4) Ukufunda akupheli. Lanxa kulezinye izinto esingazizwisisiyo khathesi, uJehova uzaqhubeka esifundisa izinto ezintsha emhlabeni omutsha.—Umtshu. 3:11.